Galatia 6:1-18
6 Hamu angka dongan, molo adong donganmuna na mangulahon na sala jala ndang marhamubaon, hamu angka na tinogu-nogu ni tondi parbadia, lambok ma hamu mangurupi ibana asa muba. Alai manat ma hamu, so tung hamu sandiri na tarela-ela mangulahon na sala.
2 Tongtong ma hamu masiurupan tingki masa hasusaan. Ai marhite mangulahon i do hamu mangoloi patik ni Kristus.
3 Molo adong na mandok dirina ringkot, hape ndang songon i, na manggabusi dirina do ibana disi.
4 Alai ganup ma halak mamparrohahon ulaonna be. Asa boi ibana marlas ni roha marhite na niulahonna i, ndang ala paimbar-imbarhon tu ulaon ni halak.
5 Ai ganup do halak martanggung jawab tu na niulahonna be.
6 Naeng ma nian angka halak naung diajar taringot tu hata ni Debata, olo mangalehon angka na denggan tu na mangajari ibana.
7 Unang ma hamu lilu, ndang boi gabusan Debata. Manang aha na disuan sasahalak, i do tapuonna.*
8 Manang ise na manuan hombar tu giot-giot ni dagingna na mardosa, tapuonna do hamatean sian dagingna na mardosa i. Alai manang ise na manuan hombar tu panogu-noguon ni tondi parbadia, tapuonna do hangoluan na saleleng ni lelengna sian i.
9 Unang ma hita marnaloja mangulahon angka na denggan. Ai molo ndang marnaloja hita mangulahon i, tapuonta do i haduan di tingkina.
10 Alani i binsan adong dope tingki, taulahon ma na denggan tu saluhut halak, tarlumobi ma tu dongan sahaporseaon.
11 Ida hamu ma balga ni huruf na husurathon on tu hamu.
12 Angka halak na mamaksa hamu asa disunat, holan naeng pasonangkon roha ni jolma do i. Diulahon pe songon i, asa unang dibahen do na hansit tu nasida alani Kristus.*
13 Haru angka halak na disunat i pe ndang mangulahon Patik i. Dijujui nasida pe hamu disunat, asa boi do nasida marginjang ni roha ala diihuthon hamu nasida.
14 Alai ndang olo ahu marginjang ni roha. Holan Jesus Kristus na mate di hau partinaonan i do huhaginjangkon. Molo di ahu, nunga mate be portibi on marhite ibana. Alai molo di portibi on, nunga mate be ahu marhite ibana.
15 Disunat manang na so disunat, ndang i na rumingkot. Alai molo nunga dipaimbaru Debata sasahalak, i do na rumingkot.
16 Anggiat ma dilehon Debata hadameon dohot asi ni roha tu Israel ni Debata, i ma saluhut halak na mangihuthon aturan on.
17 Mulai saonari, unang ma adong na manusai ahu. Ai nunga adong tanda di dagingku na patuduhon hatoban ni Jesus do ahu.
18 Sai didongani asi ni roha ni Tuan Jesus Kristus na mansai balga ma haburjuon na pinatudumuna. Amen.
