Galatia 3:1-29
-
Mangihuthon Patik imbar sian mangihuthon haporseaon (1-14)
-
Alani haporseaonna do mangolu saleleng ni lelengna halak na sintong i (11)
-
-
Ndang marhite Patik na dijanjihon tu si Abraham (15-18)
-
Kristus do pinompar ni si Abraham (16)
-
-
Haroro dohot tujuan ni Patik (19-25)
-
Gabe angka anak ni Debata alani haporseaon (26-29)
-
Pinompar ni si Abraham do sisean ni Kristus (29)
-
3 Hamu halak Galatia na oto, ise do na mangaliluhon hamu? Hape nunga tangkas diboto hamu taringot tu Jesus Kristus na dipakkuhon tu hau.
2 Holan sada do sisungkunonku tu hamu: Ala mangulahon patik do umbahen na dijalo hamu tondi parbadia, manang ala porsea do hamu tu barita na uli na binegemuna?
3 Boasa gabe maoto hamu? Dung diihuthon hamu panogu-noguon ni tondi parbadia, boasa gabe diihuthon hamu pingkiran ni jolma na mardosa?
4 Tung so adong be labana di hamu na manaon hasusaan i? Pos do rohangku, marlaba do i.
5 Alani aha do umbahen dijalo hamu tondi parbadia dohot huaso laho mambahen tanda halongangan?* Ala diulahon hamu do patik i, manang ala porsea hamu tu barita na uli na binegemuna?
6 Songon si Abraham, “porsea do ibana tu Jahowa jala alani i ma didok do ibana mangulahon na sintong”.
7 Tangkas do diboto hamu, halak na marhaporseaon do angka anak ni si Abraham.
8 Nunga dipaboa Debata di surat na badia i, dohononna do angka halak na sian bangso na asing mangulahon na sintong alani haporseaon ni nasida. Sian mulana nunga dipaboa Debata barita na uli on tu si Abraham na mandok, “Dapotan pasu-pasu ma saluhut bangso marhite ho.”
9 Alani i, dapotan pasu-pasu ma saluhut halak na patuduhon haporseaon songon si Abraham na patuduhon haporseaon.
10 Hona bura* do sude halak na mangasahon patik. Ai tarsurat do, “Hona bura do manang ise na so tongtong mangulahon sude hata na tarsurat di buku Patik on.”
11 Jala tangkas do diboto hamu, ndang adong halak na sintong di jolo ni Debata holan alani mangulahon patik i. Ai “tongtong do mangolu naposongku na mangulahon na sintong ala porsea ibana”.
12 Alai ndang sian haporseaon anggo patik. Ai tarsurat do, “Manang ise na mangulahon patik, mangolu ma ibana ala ni patik i.”
13 Nunga ditobus Kristus hita, nunga dipalua hita sian bura ni Patik. Dilehon Kristus do dirina hona bura manggantihon hita. Ai tarsurat do, “Hona bura ma manang ise na targantung di sada hau.”
14 Asa marhite Kristus Jesus, dapotan pasu-pasu ma angka bangso na asing, i ma pasu-pasu na dijanjihon tu si Abraham. Dung i tajalo ma tondi parbadia na dijanjihon alani haporseaonta.
15 Hamu angka dongan, hupaboa ma tu hamu sada tudosan: Molo nunga hot sada parjanjian, nang pe holan sahalak na mambahen parjanjian, ndang adong na boi manundati manang manambai.
16 Nunga dibahen Debata sada parjanjian tu si Abraham dohot tu pinomparna. Ndang adong didok, “tu angka pinomparmu”, lapatanna ndang tu torop halak. Alai didok do, “tu pinomparmu” lapatanna holan tu sada halak, i ma Kristus.
17 Jala ndang gabe sundat manang disesa janji ni Debata alani Patik na dilehon 430 taon dungkon i.
18 Molo ala mangulahon patik do dilehon pasu-pasu, ndang alani janji ni Debata be dilehon pasu-pasu i. Alai burju do Debata, dilehon Ibana do pasu-pasu i tu si Abraham alani janjina.
19 Antong na laho tu aha do Patik? Na laho papatarhon hasalaan do Patik i, sahat tu na ro pinompar na laho manjalo janji i. Marhite suru-suruan dilehon do patik tu sada halak na gabe parhitean.
20 Somalna, ndang porlu parhitean molo holan sahalak na mambahen parjanjian. Alai holan Debata do na mambahen parjanjian i.
21 Na maralo do Patik tu janji ni Debata? Daong! Molo boi do Patik parohon hangoluan, gabe boi ma ganup halak didok sintong ala mangulahon patik.
22 Alai gabe dipasahat Surat na Badia i do saluhut halak tu bagasan dosa. Alani i, tu angka halak na porsea tu Jesus Kristus do dilehon janji i.
23 Alai andorang so porsea hita tu Kristus,* patik do na manogu-nogu hita jala dipasahat do hita tu dosa sahat tu na dipatudu na laho tahaporseai.
24 Alani i, Patik do na manogu-nogu hita tu Kristus, asa boi hita didok naung mangulahon na sintong marhite haporseaon.
25 Alai dung ro na tahaporseai, ndang porlu be hita ditogu-togu Patik.
26 Anak ni Debata do hamu sude ala porsea tu Kristus Jesus.
27 Ai nunga songon Kristus be hamu ala nunga tardidi di bagasan Kristus.
28 Alani i, ndang marimbar be halak Junani manang halak Jahudi, hatoban manang halak na merdeka, borua manang baoa. Ai nunga marsada be hamu sude di bagasan Kristus Jesus.
29 Alani i, molo sisean ni Kristus do hamu, tutu ma hamu pinompar ni si Abraham na laho manjalo pasu-pasu na dijanjihon i.
Surat na di toru
^ Manang “mukjizat”.
^ Manang “kutukan”.
^ Manang “andorang so adong agama Kristen”.
