2 Korint 7:1-16
7 Alani i angka dongan na hinaholongan, ala nunga dilehon janji i tu hita, tapaias ma dirinta sian angka na mambahen ramun pamatang dohot pingkiranta.* Tahabiari ma Debata asa lam badia hita.
2 Jalo hamu ma hami di rohamuna. Ndang hea huulahon hami na sala manang na tu ise pe, ndang hea huliluhon hami manang ise pe, jala ndang hea hubuat hami pangomoan sian manang ise pe.
3 Hudok pe songon i tu hamu, ndang na laho manguhumi hamu ahu. Ai songon naung hea hudok, mansai holong do rohanami tu hamu, jala rade do hami rap dohot hamu manang aha pe na masa.
4 Barani do ahu mangkatai* tu hamu jala las do rohangku mangida hamu. Tarapul jala marlas ni roha do ahu, nang pe godang sitaonon na masa tu hami.
5 Sasintongna dung sahat hami di Makedonia, ndang marhasonangan hami. Ai godang dope sitaonon na masa tu hami, godang do halak na mangalo hami, jala marsak do hami alani na masa di huria.
6 Alai Debata na mangapuli angka na marsak, mangapuli hami marhite haroro ni si Titus.
7 Ndang holan alani haroro ni si Titus umbahen na tarapul hami. Alai dohot do ala naung togu ibana dibahen hamu. Ai dipaboa ibana do tu hami sihol ni rohamuna naeng pajumpang dohot ahu. Jala dipaboa do muse taringot tu arsak ni rohamuna, dohot panarihonmuna di ahu. Alani i, tamba ma las ni rohangku.
8 Nang pe marsak hamu alani surathi, alai ndang manolsoli ahu disi. Ai marsak do hamu huida dibahen surathi, alai holan satongkin do arsakmuna i. Alani i, nang pe mulana manolsoli ahu,
9 saonari las do rohangku, ndang ala na marsak hamu, alai ala na marhamubaon do hamu dibahen arsak ni rohamuna i. Ai hombar do arsak ni rohamuna i tu lomo ni roha ni Debata, alani i ndang adong manang aha pe na mago sian hamu alani hami.
10 Ai sai parohon laba do tu hita arsak ni roha na hombar tu lomo ni roha ni Debata. Arsak ni roha i mambahen sasahalak marhamubaon jala mandapot haluaon. Alai parohon hamatean do arsak ni roha na hombar tu portibi on.
11 Tangkas ma, arsak ni rohamuna i hombar tu lomo ni roha ni Debata. Ai gabe marsitutu do hamu mangulahon na sintong. Dipatudu hamu do na so marsala hamu, sogo do rohamuna tu ulaon na sala, biar mida Debata do hamu, olo do hamu muba, disomba hamu do Debata sian nasa rohamuna, jala marsitutu do hamu padengganhon na sala. Saluhutna i patuduhon nunga diulahon hamu na sintong.*
12 Hubahen pe surat i, ndang tu halak na mangulahon na sala, manang tu halak na marsitaonon alani hasalaanna. Alai husurat do i laho mamboto na marsitutu do hamu manang na ndang manangihon hami di jolo ni Debata.
13 Alani i do hami tarapul.
Asing ni i, tamba do las ni rohanami alani las ni roha ni si Titus. Ai dibahen hamu do ibana marlas ni roha.
14 Ai hea do hupuji hami hamu di jolo ni si Titus, jala ndang maila ahu disi. Ai sintong do sude na hupaboa hami i tu ibana taringot tu hamu jala sintong do sude na hupaboa hami tu hamu.
15 Asing ni i, lam balga do holong ni rohana tu hamu. Ai diingot ibana do songon dia hamu mangoloi, manjalo, jala pasangaphon ibana.
16 Las do rohangku ala boi do pos rohangku tu hamu di saluhutna.*
Surat na di toru
^ Bahasa Junani, pneuma. Ida di Kamus.
^ Ida di Kamus.
^ As. “nunga badia hamu”.
^ Manang boi do “ala boi do ahu sabar di saluhutna alani hamu”.
