2 Korint 3:1-18
3 Ingkon hupatandahon hami dope dirinami tu hamu? Manang songon na asing, na porlu do surat sian hamu na patuduhon hami parhobas? Manang na porlu do lehononnami surat tu hamu na patuduhon hami parhobas?
2 Hamu do suratnami na tarsurat di bagasan rohanami, naung diboto, jala naung dijaha sude halak.
3 Ai hami do angka parhobas ni Debata jala hamu do surat ni Kristus na husurat hami. Husurathon hami do hamu marhite tondi parbadia ni Debata na mangolu i, ndang marhite tinta. Jala ndang tu batu i husurathon hami, alai tu bagasan roha do.
4 Marhite Kristus, pos do rohanami tu Debata taringot tusi.
5 Ndang hudok hami alani gogonami do umbahen na tama hami mangulahon i. Alai Debata do na mangurupi hami umbahen na tama hami mangulahon i.
6 Ibana do na mambahen hami tama gabe parhobas tu parjanjian na imbaru. Jala parhobas tu tondi parbadia ni Debata do hami, ndang parhobas tu Patik na tarsurat i. Ai parohon hamatean do Patik na tarsurat i, alai parohon hangoluan do tondi parbadia ni Debata.
7 Tu batu lei do disurathon Patik na parohon hamatean i. Nang pe songon i, mardongan hasangapon na balga do Patik i tingki dilehon. Pola ndang tolap halak Israel mangida hasangapon na marsinondang sian bohi ni si Musa. Alai na laho salpu do hasangapon i.
8 Alani i, nda mardongan hasangapon na umbalga do dilehon tondi parbadia i?
9 Molo mardongan hasangapon do Patik na parohon hamatean i, tontu umbalga do hasangapon ni ulaon na mangurupi halak gabe dihalomohon Debata.
10 Ai gabe so adong be hasangapon ni Patik i, molo dipatudos tu hasangapon ni parjanjian na imbaru.
11 Molo mardongan hasangapon do dilehon Patik na laho salpu i, tontu umbalga do hasangapon na dilehon tu parjanjian na imbaru i!
12 Ala songon i do pangkirimonta, gabe barani ma hita mangkatai.*
13 Jala unang ma hita songon si Musa. Ditutupi ibana do bohina dohot abit, asa unang diida halak Israel na tinuju ni Patik na laho salpu i.
14 Ai tartutup do pingkiran ni nasida sian najolo. Sahat tu saonari ditutup abit i dope pingkiran ni nasida. Ujungna, gabe ndang boi diantusi nasida parjanjian na leleng i. Ai holan marhite pangurupion ni Kristus do boi bungka abit i.
15 Sahat tu saonari, ganup dijaha nasida Patik ni si Musa, tongtong do tutup roha ni nasida dibahen abit i.
16 Alai molo dipauba sasahalak rohana jala disomba Jahowa, bungka ma abit i.
17 Ndang boi taida Jahowa jala di surgo* do Ibana. Manang didia adong tondi parbadia ni Jahowa, disi do adong haluaon.
18 Ai sude hita, ndang ditutupi abit i be bohinta. Jala marsinondang do hasangapon ni Jahowa marhite hita. Dipauba do hita suman tu Ibana sian sada hasangapon tu hasangapon na umbalga, songon na dihalomohon ni Jahowa, Debata na so boi taida jala na di surgo i.*
Surat na di toru
^ Ida di Kamus.
^ Ida surat na di toru na di Johannes 4:24.
^ Manang boi do “songon na dihalomohon ni tondi parbadia ni Jahowa”.
