Tutu, adong do Debata. Adong do akka buktina di Bibel. Bibel pe mandok, porlu do tapakke ‘nasa pikkiratta’ dohot ‘pangattusiotta’ lao mambuktihon na tutu adong Debata. Unang ma hita asal porsea tu Debata ala songon i na diajarhon agamatta. (Rom 12:1; 1 Johannes 5:​20) Parrohahon ma akka bukti na sian Bibel on:

•   Molo taida alam semesta on dohot nasa na mangolu na adong di bagasanna, boi ma taboto pasti adong do Debata na manoppa i sude. Bibel mandok, “Ganup jabu, adong do na pajongjokkon, alai Debata do na manoppa nasa na adong.” (Heber 3:4) Mura do taattusi na didok ayat on. Jala akka ilmuwan pe setuju do na tutu na didok ayat on. a

•   Nang pe nga dapot ni jolma na porlu di pardagingon, alai dang puas dope roha ni nasida saleleng so diboto aha tujuan ni nasida mangolu. Jala diboto jolma i do “rikkot ni marale-ale tu Debata”. Alani i do umbahen na lomo rohatta naeng mananda Debata jala manomba Ibana. (Mateus 5:3; Pangungkapon 4:​11) On ma bukti na patuduhon tutu do adong Debata. Parholong do Ibana, lomo do rohana asa tatanda jala tasomba Ibana.​—Mateus 4:4.

•   Akka hatorangan na disurat di Bibel taringot na lao masa, terjadi do i sude pas songon na tarsurat i. On patuduhon pasti Debata do na paboahon hatorangan i, dang mungkin jolma.​—2 Petrus 1:​21.

•   Ummaju do parbinotoan akka panurat ni Bibel sian akka halak na mangolu di tikki i. Contohna, najolo godang do halak na porsea tano on dituhuk sada binatang songon gajah, babi, manang lombu. Alai takkas do dipaboa di Bibel, ‘Digattukkon Debata do tano on di na soada.’ (Job 26:7) Jala didok Bibel do muse, “bulat” do bentuk ni tano on. (Jesaya 40:22) Sian dia do diboto akka panurat ni Bibel hatorangan on? Godang do halak na mandok pasti Debata do na paboahon i tu nasida.

•   Godang do sukkun-sukkun ni jolma di portibi on na maol dialusi. Adong do na manukkun: Molo tutu do parholong jala balga huaso ni Debata, boasa ma dipasombu Ibana sitaonon dohot hajahaton di portibi on? Boasa ma diulahon halak na maragama na jahat hape porsea do nasida tu Debata? Ala dang dapot ni nasida alusna, olo do ra gabe dang porsea be nasida tu Debata. Alai boi do Bibel mangalusi sukkun-sukkun i.​—Titus 1:​16.