Songon dia do Penampilan ni Jesus?
Na didok Bibel
Dang adong na mamboto songon dia pastina penampilan ni Jesus, ala dang hea dipaboa taringot i di Bibel. On patuduhon, dang penampilan ni Jesus na uppetting taboto. Alai adong do hatoranganna di Bibel na boi mangurupi hita mamboto songon dia penampilanna.
Rupana: Ala halak Jahudi do omak ni Jesus, mungkin mirip do rupa ni Jesus on songon halak Jahudi na asing. (Heber 7:14) Jadi dang adong pola na istimewa sian penampilan ni Jesus. Uppamana, hea do di sada tikki sip-sip Jesus lao sian Galilea tu Jerusalem jala dang adong na mananda Ibana. (Johannes 7:10, 11) Jala tikki rap Jesus dohot akka siseanna, dang pola beda hian rupana dohot akka siseanna i. Tikki naeng ditakkup pe Jesus, ikkon dibahen si Judas Iskariot do tanda asa boi ditanda nasida na dia Jesus.—Mateus 26:47-49.
Ganjang ni obukna: Dang mungkin ganjang obuk ni Jesus. Alana didok do di Bibel, “Molo ganjang obuk ni sahalak bawa, na parohon lea do i tu dirina.”—1 Korint 11:14.
Janggutna: Adong do janggut ni Jesus, ala diihutton ibana do patik ni halak Jahudi. Alana didok do di patik i, “unang gusting hamu ujung ni janggutmuna”. (3 Musa 19:27; Galatia 4:4) Di sada surirang na dipaboa di Bibel taringot sitaonon na lao masa tu Jesus, dipaboa do disi na adong janggut ni Jesus.—Jesaya 50:6.
Pamatangna: Godang do bukti na patuduhon molo Jesus i gogo. Alana, mardalan pat do ibana sappe markilo-kilo meter tikki marbarita. (Mateus 9:35) Dipaias ibana do muse bagas joro sappe dua hali. Ditunggalikkon ibana ma akka meja ni akka situkkar hepeng. Jala dipalao ibana do akka binatang ni akka partiga-tiga mamakke cambuk. (Lukas 19:45, 46; Johannes 2:14, 15) McClintock and Strong’s Cyclopedia mandok, “Sude akka bukku injil patuduhon molo [Jesus] i halak na gogo jala sehat.”—Volume IV halaman 884.
Ekspresina: Ramah do Jesus jala parholong, jala pasti tarida do i sian bohina tikki makkatai dohot halak. (Mateus 11:28, 29) Godang do halak na ro tu Jesus asa diurupi jala dipamalum sahit ni nasida. (Lukas 5:12, 13; 7:37, 38) Jala akka dakdanak pe, dang mabiar di labbung ni Jesus.—Mateus 19:13-15; Markus 9:35-37.
Hatorangan na sala taringot penampilan ni Jesus
Pandapot na sala: Adong do na mandok molo Jesus i keturunan ni halak Afrika. Alana bukku Pangungkapon mandok, molo obuk ni Jesus i songon wol jala patna “songon tombaga na marhillong di bagasan api”.—Pangungkapon 1:14, 15.
Na sasittongna: Marisi akka gambaran do isi ni bukku Pangungkapon. (Pangungkapon 1:1) Jadi, obuk dohot pat ni Jesus na dipaboa di ayat i, holan lao manggombarhon sifat ni Jesus dukkon dipahehe do, dang na lao paboahon songon dia penampilanna tikki di tano on. Tikki didok di Pangungkapon 1:14 ‘obuk ni Jesus massai bottar songon salju’, dang na paboahon taringot songon dia bentuk ni obuk ni Jesus. Alai, lao paboahon taringot warnana do. Jadi bottar ni obukna i lao manggombarhon taringot bisuk ni Jesus do, dang na lao paboahon sadia godang umurna. (Pangungkapon 3:14) Ayat on dang na mandok na sarupa do obuk ni Jesus songon bonang wol manang songon salju.
Didok do muse di Bibel, pat ni Jesus “songon tombaga na marhillong di bagasan api na marsigorgor”. (Pangungkapon 1:15) Jala bohina “songon mataniari na marsinondang”. (Pangungkapon 1:16) Alai taboto do, dang adong halak na warna ni kulitna dohot patna na songon i. Jadi, holan gambaran do ayat on. On manggombarhon inganan ni Jesus dung hehe ibana. Na lao tinggal ma ibana di inganan “na tiur na so boi jonohan ni manang ise pe”.—1 Timoteus 6:16.
Pandapot na sala: Halak na gale do Jesus i jala dang semangat.
Na sasittongna: Bawa na gogo jala na barani do Jesus. Uppamana, tikki ro akka halak naeng manakkup ibana, barani do Jesus paboahon na ibana na dilului. (Johannes 18:4-8) Asing ni i, tukkang hau do Jesus. Jala najolo, akka alat-alatna dang canggih dope. Jadi boi ma taboto, halak na gogo do Jesus i.—Markus 6:3.
Alai tikki mamboan hau partinaonanna i, boasa ma pola porlu Jesus diurupi mangangkat hau i? Boasa ma Jesus na parjolo mate sian parjahat na di labbungna i? (Lukas 23:26; Johannes 19:31-33) Gale do Jesus sebelum dipamate, alana dang modom ibana saborngin i alani arsakna. (Lukas 22:42-44) Jala saleleng saborngin i, disiksa halak Jahudi do ibana. Dung i di manogotna i, dilissingi tentara ni halak Rom do muse ibana. (Mateus 26:67, 68; Johannes 19:1-3) On ma na mambahen hatop Jesus mate.
Pandapot na sala: Jesus i torus do gale jala mura-mura lungun rohana.
Na sasittongna: Sempurna do Jesus maniru akka sifat ni Bapakna, i ma Jahowa, “Debata na marlas ni roha”. (1 Timoteus 1:11; Johannes 14:9) Asing ni i muse, diajari Jesus do akka halak songon dia carana asa boi marlas ni roha. (Mateus 5:3-9; Lukas 11:28) Sude hatorangan patuduhon, pasti jotjot do tarida sian bohi ni Jesus na marlas ni roha ibana.
Mungkin Lomo do Rohamuna Mamboto
ALUS NI BIBEL
Nandigan do Disurat Kisah Taringot Jesus?
Dung sadia leleng do Jesus mate asa disurat bukku Injil?
AJARAN NI BIBEL NA PENTING
Songon dia do Hita Boi Porsea na Sintong Isi ni Bibel?
Molo sian Debata do bukku on, ikkon asing do Bibel sian bukku na asing.
TARINGOT HAMI
Kunjungi Hamu ma Au
Marsiajar akka topik na sian Bibel manang mamboto taringot Saksi Jahowa.