Dang hea dipaboa di Bibel taringot Kain Kafan Turin. Molo menurut akka halak, on ma na dipakke lao mambungkus mayat ni Jesus Kristus. Alani i, gabe sada barang na badia do on di akka gareja. Jala saonari, disimpan do i di sada katedral di Turin, Italia.

 Adong do didok di Bibel na tutu Jesus dibungkus mamakke Kain Kafan Turin on? Daong.

 Parrohahon ma tolu alasan on.

1.   Kain kafan on ganjangna 442 sentimeter, lebarna 113 sentimeter. Jala di pinggir ni kain kafan i adong dijahit kain na lebarna ualu sentimeter.

    Na didok Bibel: Dang holan sada kain linen na dipakke lao mambungkus mayat ni Jesus. Adong do piga-piga kain na dipakke. Asing do muse kain na dipakke lao mambungkus ulu ni Jesus. Dung hehe Jesus, ro ma sahalak apostel tu kuburan ni Jesus jala “diida ibana ma peak abit linen disi”. Didok do muse di Bibel, “Abit na mangalilit ulu ni Jesus ndang peak be rap dohot abit na mambungkus daging ni Jesus, alai nunga gulung i jala peak di inganan na asing.”​—Johannes 20:​6, 7.

2.   Di kain kafan i adong do bekas mudar ni Jesus ala dang diparidi mayatna.

    Na didok Bibel: Dung mate Jesus, dikubur akka siseanna do mayatna “mangihuthon hasomalan ni halak Jahudi laho mangkubur sasahalak”. (Johannes 19:39-​42) Tikki i somalna diparidi do mayat, jala dibahen do miak dohot rempah-rempah andorang so dikubur mayat i. (Mateus 26:12; Ulaon ni Apostel 9:​37) Jadi, jolo diparidi akka sisean i do mayat ni Jesus andorang so dibungkus mamakke kain.

3.   Didok di Encyclopædia Britannica, di kain kafan i tarida do bentuk mayat ni baoa na “dipeakkon di satonga ni kain kafan jala satonga nai kain kafan i manutup bohina sahat tu patna”.

    Na didok Bibel: Dihatai akka sisean ni Jesus do taringot hamamate ni Jesus, taringot kuburanna naung kosong, dohot taringot hatorangan ni akka borua na mangida “angka suru-suruan na paboahon naung mulak mangolu ibana”. (Lukas 24:15-​24) Molo tutu do adong kain kafan i di kuburan ni Jesus, tottu dihatai akka sisean do taringot i, dohot rupa ni Jesus na adong di kain i. Alai, dang adong disurat di Bibel taringot i.

 Dang porlu. Nang pe misalna tutu do kain kafan i dipakke lao mambungkus mayat ni Jesus, alai dang na gabe sombaon i. Taida ma prinsip Bibel on.

1.   Dang porlu i. Jesus mandok, “Ndang boi taida Debata jala di surgo do Ibana. Sude na naeng manomba Ibana ingkon mangihuthon panogu-noguon ni tondi parbadia dohot hasintongan.” (Johannes 4:​24) Jadi dang porlu tapakke patung dohot akka benda-benda kuno lao manomba Debata.

2.   Diorai do hita mangulahon i. Di Sampulu Patik, diorai do hita manomba gana-ganaan. (5 Musa 5:​6-​10) Jala didok di Bibel, “Padao hamu ma dirimuna sian gana-ganaan.” (1 Johannes 5:​21) Ra adong do na mandok, kain kafan i dang tarmasuk gana-ganaan. Didok nasida, holan lambang ni agama ni nasida do i. Alai molo disomba do lambang i, gabe sarupa do i tu gana-ganaan. a Alani i, asa las roha ni Debata, unang ma tasomba Ibana mamakke akka barang manang lambang, songon kain kafan on.