Sanam mɛ win gɔɔ u turuku kua, Yesu nɔɔsia u nɛɛ: “Gusunɔn Bandun labaari gea yeni ya koo nɔɔra handunia kpuro sɔɔ kpa yu ko seeda bwesenu kpuron mi. Sanam mɛ sɔɔra kpeerabu koo tunuma.” (Mateu 24:14) Adama, amɔsunwa waasun sɔmbu baka teni ta koo ka koora? Ya koo koora sà n Yesun yira swĩi sanam mɛ u wãa temɔ.—Luku 8:1.

Sa ra hania ko su ka tɔmbu bera ben beraɔ. Yesu u win bwãabu sɔ̃ɔsi mɛ ba koo ka labaari gea nɔɔsia yɛnu ka yɛnu. (Mateu 10: 11-13; Gɔrobun kookoosu 5:42; 20:20) Wɔ̃ɔ wunɔbu gbiikisu sɔɔ, waasu kowo be, ba ra n ben tem bɔnu mɔ ye ba bu wɛ̃. (Mateu 10:5 6) Nge mɛya maa gisɔ bɛsɛn waasu kobu bu kpunaa swĩi, yigbɛru baatere ta mɔwa mi ta koo waasu ko. Yen bwesera sun somimɔ su ka Yesun sɔmbu te u sun yiire yibia, u nɛɛ: “su win gari tɔmbu waasu kua kpa su seeda di.”—Gɔrobun kookoosu 10:42.

Sa ra kookari ko su ka tɔmbu kasu baama kpuro mi ba wãa. Yesu u maa weenasia sɔ̃ɔsi ka win waasu kobu, ayenu mi tɔmba dabi; ya koo kpĩ ya n sãa nim wɔ̃kun goorɔ ǹ kun mɛ dɔkɔ fataɔ. (Maaku 4:1; Yohanu 4:5-15) Bɛsɛn tii sa ra ka tɔmbu gari ko baama kpuro mi sa ko be wa: swɛɛ bɛkɛn goonɔ, yabunɔ, tɛngɛ saanɔ ǹ kun mɛ ka kãnkarasi. Sa ra maa swaa kasu su ka be ba wãa bɛsɛn yɛnun bɔkuɔ, bɛsɛn sɔm kowo kpaasibu, bɛsɛn keu bii kpaasibu, ǹ kun mɛ bɛsɛn dusibu seeda diya. Kookari yini kpuro yi dera tɔn yakom dabina kpĩa ba “faaban laabari” ye nua tem gira kpuro sɔɔ.—Womu 96:2.

A bwisika goo sɔɔ, wi kaa ka Gusunɔn Bandun labaari gea bɔnu ko kpa u maa ka wa mba labaari ye ya koo wi kua sia? A ku yĩiyɔbun labaari ye nɔ marisi. A ku ma a ka ye kpara!

• “Labaari gea” yerà n weenɛ yu nɔɔra?

• Amɔsunwa Yehofan Seeda Dio ba Yesun yira swĩi waasu kobun swaa sɔɔ?