Tɔn dabinun bwisikunu sɔɔ, bà n nɛɛ Yehofan Seeda Dio, ba ra n yĩiyɔ sãa kpaaru garun yĩsira. Adama, yen wɔ̃ɔ 2 700 wee, ba raa be ba Gusunɔ geo turo sãamɔ soka win “seeda diobu.” (Esai 43:10-12) Sere ka 1931 ɔ ba ra raa sun sokuwa “Bibelin Keu Kowobu.” Mban sɔ̃na sa yĩsiru sua: “Yehofan Seeda Dio”?

Yĩsi te, ta bɛsɛn Yinni Gusunɔ wunanamɔ. Toren Bibelin yori sɔɔ, Gusunɔn yĩsiru Yehofa ta raa yoruawa nɔn nɔrɔm nɔrɔm dabinu. Wee, Bibelin tusianu dabinu sɔɔ, ba yĩsi te kɔsa ka sokunu nge “Yinni” ǹ kun mɛ “Gusunɔ.” Adama, barum mɛ sɔɔ ba gbia ba Bibeli yorua, Gusunɔ geo turo u Mɔwisi tii sɔ̃ɔsi saa win yĩsiru Yehofan di, ma u nɛɛ: “mɛniwa nɛn yĩsiru sere ka baadommaɔ.” (Yaribu 3:15) Swaa ye sɔɔra, Gusunɔ u ka tii wunana ka gusunɔ weesugii be tɔmba sãamɔ. Ka nuku doo bakaba sa wura su Gusunɔn yĩsi dɛɛra te sɔbe.

Yĩsi te, ta bɛsɛn sɔmburu sɔ̃ɔsimɔ. Yerukobun tɔn dabinu, n torua saa durɔ naanɛgii Abɛlin di, ba Yehofa seeda diiya ben naanɛ dokebun sɔ̃. Wɔ̃ɔ dabi dabinun biru, Nɔwɛ, Aburahamu, Saaraa, Mɔwisi, Dafidi ka tɔn dabinu gabu ba seeda dio dabi ten wuuru naa mwɛ. (Heberu 11:4–12:1) Nge mɛ goo koo kpĩ u taarɛ sarirugii goo seeda diiya siri yerɔ, mɛya sa maa kpeere su ka gem tubusia bɛsɛn Yinni Gusunɔ sɔɔ.

Sa Yesu saarimɔ. Bibeli ya wi soka “seeda dio geo naanɛgii.” (Kãsiru 3:14) Yesun tii u gerua ma u Gusunɔn “yĩsiru giasia,” u maa “gem areru di” Gusunɔ sɔɔ. (Yohanu 17:26; 18:37) Yen sɔ̃na Kirisin bwãa geobun tii, ba maa Yehofan yĩsiru suamɔ ma ba te giasiamɔ. Yera Yehofan Seeda Dio ba maa kookari mɔ̀ bu ko.

• Mban sɔ̃na Bibelin Keu Kowo ba yĩsi te ba mɔ̀ “Yehofan Seeda Dio” sua?

• Saa domman diya Yehofa u seeda diobu mɔ temɔ?

• Warà sãa Yehofan Seeda Dio boko?