Gusunɔn wɛrɔ gbiiko sãawa Setam wi ba maa sokumɔ Diabelu. U sãawa hunde goo wi u Yehofa tekuri. Setam u ra Gusunɔ sunkarimɔ ma u ra wahala baka tɔmbu kuamɛ. Setam sãawa tɔn kɔ̃so. U sãawa weesugii ka tɔn gowo.—Yohanu 8:44.

Hunde gaba ka Setam dɔɔ sannu bu Gusunɔ tekuri. Bibeli ya ra n be sokumɔ wɛrɛkunu. Nge Setam, wɛrɛku ni nu sãawa tɔmbun wɛrɔbu. Ba ra kĩa bu tɔmbu kɔ̃sa kua. (Mateu 9:32, 33; 12:22) Yehofa u koo Setam ka win wɛrɛkunu kam koosia sere ka baadommaɔ. Saa fiikowa n be tie bu ka kpĩ bu tɔmbu wahala ko.—Kãsiru 12:12.

À n kĩ a n sãa Gusunɔn bɔrɔ, a ku ko ye Setam u kĩ. Setam ka wɛrɛkunu ba Yehofa tusawa. Ba sãawa Gusunɔn wɛrɔbu, ma ba kĩ bu wunɛn tii ko Gusunɔn wɛrɔ. N weenɛ a gɔsi waran gɔ̃ru a kĩ a dorasia—Setam gia, ǹ kun mɛ Yehofa n gia. À n wãaru te ta ku ra kpe kĩ, a gɔsio a Gusunɔn gɔ̃ru kĩru ko. Setam asiiriba dabinu mɔ ka swɛɛ dabinu u ka tɔmbu torasia. U ra tɔn dabinu nɔni wɔ̃kuamɛwa.—Kãsiru 12:9