Ñ! Bibel i nlôl bés ni “Nyambe nu a nti bôt ba nimis makénd hogbe.” (2 Korintô 7:6) Tolakii Bibel i ta bé kaat i i ntibil bôt ba gwé kon u mahoñol, i bi hôla ngandak bôt i i bé sômbôl nolba. I maéba di nléba i Bibel ma nla hôla yak we.

•  Mambe maéba Bibel i nti?

•  Baa Bibel i mpôdôl ngim bôt i i bé sômbôl wo?

•  Mimbe minlôñ mi Bibel mi nla hôla i mut nu a nsômbôl nolba?

•  Kii u nla boñ ibale liwanda joñ li nkal we le, “me nsômbôl wo”?

•  Lelaa Bibel i nla hôla me ibale me ma noode nolba?

• ● Añle bôt bape i yom u nôgda.

   I yom Bibel i nkal: “Bañga liwanda i ngwés ngéda yosôna, a yé linyañ li li bi gwéé inyu mangéda ma ndutu.”—Bingéngén 17:17.

   Kii hala a nkobla: I ngéda mahoñol mabe ma ntééñga bés, di gwé ngôñ ni mahôla ma bôt bape.

   Ibale u gwé mahoñol mabe ndi u añle bé bôt bape lelaa ma ntééñga we, i mahoñol ma, ma nla kahal yuu we. Ndi ibale u ñañle bôt bape i yom u nôgda, u nôgda le ñem u nhoi we, u mbôdôl tehe mam nya ipe.

   Noode le boñ i jam lini: Len yaga, añle mut i yom u nôgda, a nla ba mut woñ lihaa tole liwanda joñ li u mbôdôl ñem. a U nla ki tila i yom u nôgda.

• ● Yéñ mahôla ma bidokta.

   I yom Bibel i nkal: “I bôt ba yé mbôô ba gwé bé ngôñ ni dokta, ndik bôt ba nkon.”—Matéô 9:12.

   Kii hala a nkobla: Di nlama yéñ mahôla ma bidokta i ngéda di nkon.

   I ngéda mut a gwé ngôñ i nolba, bebek hala a nkobla le a gwé kon u mahoñol tole a nôgda bé le bôt ba ngwés nye. Ibale i nya jam i i mpémél we, u gwé bé le u kon hison inyule u kon u, u yé kiki mana makon mape ni le u nla tiblana.

   Noode le boñ i jam lini: Ibabé i lep ngéda, ke i dokta.

• ● Bigda le Djob a ntôñ we.

   I yom Bibel i nkal: “Bôt ba nuñul diuuna ditan inyu batjañtjañ iba ba ba gwé ndik ndék nseñ, hala bé? Ndi Nyambe a nhôya bé to hiada mu. . . . Ni kon bañ woñi; ni gwé mahee iloo ngandak diuuna.”—Lukas 12:6, 7.

   Kii hala a nkobla: U yé nseñ i mis ma Nyambe.

   U nla nôgda wee u yé wetama, ndi yi le Djob a ntehe ndutu yoñ. A nke ni bisu i tôñ we to ibale u gwé ha bé ngôñ i niñ. Kaat Tjémbi 51:17 i nkal le: “A Nyambe, u ga tjél bé ñem u nyodop ni ñem u nsôghe.” Nyambe a nsômbôl le u niñ inyule a ngwés we.

   Noode le boñ i jam lini: Yéñ ikété Bibel i mam ma nkwés we nkaa le Djob a ngwés we. Kiki ’héga, béñge pes 24 i kaat i yigil ini le Approchez-​vous de Jéhovah.

• ● Soohe Djob.

   I yom Bibel i nkal: “Ni bééga [Nyambe] nduña nan yosôna inyule a ntôñ bé.”—1 Pétrô 5:7.

   Kii hala a nkobla: Nyambe a nsômbôl le di kal nye i mam ma ntééñga bés.

   Djob a nla ti we ñem nwee, ni ngui i ke ni bisu i hônba. (Filipi 4:6, 7, 13) A nit i bôt bobasôna ba nlôndôl nye.—Tjémbi 55:22.

   Noode le boñ i jam lini: Soohe Djob. Gwélél jôl jé le Yéhôva, añle nye nduña yoñ yosôna. (Tjémbi 83:18) Bat nye mahôla.

• ● Ôt pék mu mimbônga mi Djob inyu dilo di nlo.

   I yom Bibel i nkal: “Di gwé i botñem ini kiki hikoba hi sitima inyu biniñ gwés, i nla bé set, i umi ki siñ.”—Lôk Héber 6:19, matila isi lipep.

   Kii hala a nkobla: Hok ngéda, u nla hoñol le ngii i nkwél we, ndi i botñem Bibel i nti i nla lédés we.

   I botñem i, i ta bé eem inyule Djob a mbôn le a ga mélés mandutu momasôna.—Masoola 21:4.

   Noode le boñ i jam lini: Kônde nigil i jam Bibel i nkal inyu botñem i pes 5 i man kaat nunu le Miñañ minlam mi nlôl ni Djob!

• ● Boñ ngim yom i i nlémél we.

   I yom Bibel i nkal: “Ñem maséé u yé bañga matibla.”—Bingéngén 17:22.

   Kii hala a nkobla: I boñ yom i i nlémél bés i nla hôla bés i pes mahoñol.

   Noode le boñ i jam lini: Boñ yom i i mbéna kôhna we maséé. Kiki hihéga, i emble nsik, i añ ngim ñañ u u nlémél we tole i boñ yom ipe. U nla ki kônde ba maséé ibale u nhôla bôt bape to ikété disii di mam.—Minson mi baôma 20:35.

• ● Yoñ ngéda ni mbôô woñ.

   I yom Bibel i nkal: ‘I nyiñgha minsôn i gwé ndik ndék mahee.’—1 Timôtéô 4:8.

   Kii hala a nkobla: I yiñgha minsôn hiki ngéda, i ke hilo jôga, i je loñge i nla hôla bés.

   Noode le boñ i jam lini: Boñ biliya i ke liké li makôô inyu ngim kel to 15 manut.

• ● U hôiga bañ le mam ma nla héñha i niñ yoñ.

   I yom Bibel i nkal: “Ni nyi bé lelaa niñ nan y’a ba yani.”—Yakôbô 4:14.

   Kii hala a nkobla: Hok ngéda i ndutu mut a yé a mboma i yé i nom bé ngandak ngéda.

   To di mboma mandutu, mam ma nla héñha. Yéñ i mam ma nla hôla we i nihbe mandutu moñ. (2 Korintô 4:8) Ibale u nolba, u nla ha bé témb i niñ, ndi ki le mandutu moñ ma yé ndik inyu ndék ngéda.

   Noode le boñ i jam lini: Noode yéñ ñañ u Bibel wada u u mpôdôl mut nu a bi boma ndutu kiki yoñ. I ngéda w’a añ ñañ u, w’a léba le niñ i mut nu i bi sôk i lama i nya i yé le nyemede a bé hoñol bé. Di béñge ndék dihéga.

 Ñ. Bibel i mpôdôl ngim bôt i i bi kal le, “i yé loñge le me wo.” Ndi Yéhôva a bi nyéé bé bo, maselna ni hala, a bi hôla bo. Yak nye a nla hôla we.

Éliya

•  ● Njee a bé Éliya? Éliya a bé mut makénd. Ndi to hala, ngim ngéda i bi pam, yak nye a tomb. Kaat Yakôbô 5:17 i nkal le: “Éliya a bé mut binam lôñni mahoñol kiki bés”

•  ● Ndi inyuki a bé sômbôl wo? Ngim ngéda i bi pam, Éliya a kon woñi, a nhoñol le niñ yé i gwé ha bé mahee. Inyu hala nyen a bi yemhe Yéhôva le: “Éé a Yéhôva, yoñok niñ yem.”—1 Bikiñe 19:4.

•  ● Kii i bi hôla nye? Éliya a bi yiblene Yéhôva ñem wé. Lelaa Djob a bi hôla nye. Djob a bi tôñ nye, a éba nye lipémba jé. Djob a bi kal nye le a ngi gwéhék nye, a ti ki nye nhôla.

•  ▸ Añ ñañ u Éliya i: 1 Bikiñe 19:2-18.

Hiôb

•  ● Njee a bé Hiôb? Hiôb a bé ngwañ mut, a ban-ga soso lihaa. A bé bañga ngwélél Djob.

•  ● Ndi inyuki a bé sômbôl wo? Niñ i Hiôb i bi héñha kunda yada. A nimis lingwañ jé jolisôna. Bon bé bobasôna ba bi wo kel yada. Nyemede a kon béba kon. I mbus ngéda, bibéba bi mawanda bi bi lo bi kahal pôdôs nye ni bibuk bibe. Hiôb a bi kal le: “Niñ yem i mbébél yaga me; me gwé ha bé ngôñ i niñ.”—Hiôb 7:16.

•  ● Kii i bi hôla nye? Hiôb a bi soohe Djob, a yible ki bôt bape ñem wé. (Hiôb 10:1-3) Liwanda li ñem nyuu le Élihu li bi ti nye makénd. Hiôb a bi neebe maéba ma liwanda jé, ni mahôla ma Djob.

•  ▸ Añ ñañ u Hiôb i: Hiôb 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Môsi

•  ● Njee a bé Môsi? Môsi a bé ñane wada mu litén li Israel, a bé ki mpôdôl.

•  ● Ndi inyuki a bé sômbôl wo? A bééna minson minkeñi ndi hiki ngéda ba bé ba nyahal nye, hala a wééhak nye. Jon kel yada, a bi kal Djob le: “Nseñ u nol me nano.”—Ñañga bôt 11:11, 15.

•  ● Kii i bi hôla nye? Môsi a bi yiblene Djob ñem wé. Djob a bi hôyôs nson wé, hala a suhus nye nduña.

•  ▸ Añ ñañ u Môsi i: Ñañga bôt 11:4-6, 10-17.