Ndimbhe i Bibel

 Ane Djob i yé ngim énél, i i yé ntiik, le Yéhôva nyemede a bi téé. Ikété Bibel, “ane Nyambe” i nsébla ki le “ane ngii,” inyule baane ba ga énél ba bak nyoo i ngii. (Markô 1:14, 15; Matéô 4:17, Kaat Nyambe) Ane Djob i mpôna biane bi bôt ba binam inyu ngim matode, ndi i nloo biane bi bôt ba binam i manjel momasôna.

•   Baane bé. Djob a bi téé Yésu Kristô kiki Kiñe i Ane Djob, a ti ki nye kunde ni ngui iloo bôt bobasôna ba bi ane munu nkoñ ’isi ibôdôl behee ipam nano. (Matéô 28:18) Di nyi le Yésu a ga gwélél ngui yé ndik inyu boñ loñge, inyule a bi bôk a unda hala, le a yé Ñéga ba nla bôdôl ñem, nu a yôni ni konangoo. (Matéô 4:23; Markô 1:40, 41; 6:31-34; Lukas 7:11-17) Inoñnaga ni sômbôl i Djob, Yésu a bi pohol ngim bôt, “ikété hiki lihaa, hiki hilémb, hiki litén, hiki loñ,” le ba ane lôñni nye; “b’a ane . . . hisi,” ba bak nyoo i ngii.​—Masoola 5:9, 10.

•   Nom yé. Maselna ni biane bi bôt ba binam, bi ba mbéna héñha, Ane Djob yo “i ga tjiba bé kekikel”​—Daniel 2:44.

•   I bet ba ga niñ isi énél yé. To njee mut a mboñ toi sômbôl i Djob, a nla niñ isi énél i Ane Djob, ibabé i béñge litén jé, to binéñél gwé, to kôgôô yé.​—Minson 10:34, 35.

•   Mambén mé. Mambén ma Ane Djob ma ta bé ndik ha inyu kéñ bôt i boñ mam mabe. Ndi ma nlémés yak libak li babobasôna ba niñ isi énél yé. Kiki héga, Bibel i niiga le: “‘U nlama gwés Yéhôva Nyambe woñ ni ñem woñ wonsôna, ni niñ yoñ yosôna, ni mahoñol moñ momasôna.’ Ini mbén yon i nloo mambén momasôna, yo ki yon i yé mbén bisu. Mbén i nyônôs iba, i i mpôna ini, yon i yé le: ‘U nlama gwés mut woñ libôk kiki wemede’” (Matéô 22:37-39). I bet ba niñ isi énél i Ane Djob ba ngwés Nyambe ni mut wap libôk, jon ba nyoñ makidik téntén inyu loñge i bôt bape.

•   Bisuklu gwé. Ane Djob i ntéé ngim matiñ ma telepsép inyu bet ba yé isi énél yé, ma ma nlédél ngandak bôt i noñ, jon i ngwélél bisuklu inyu niiga bôt i niñ inoñnaga ni matiñ ma.​—Yésaya 48:17, 18.

•   Minson nwé. Ane Djob i nsal bé inyu boñ le baane bé ba ngwañap i miño mi bet ba yé isi énél yap, to. Ndi i nsal inyu yônôs sômbôl i Djob, hala wee yak unu mbônga le, i bôt ba ngwés Djob ba ga niñ i boga ni boga i paradis hana ’isi.​—Yésaya 35:1, 5, 6; Matéô 6:10; Masoola 21:1-4.