YIGIL 12
HIÉMBI 119 Di nlama bana hémle
Di niñ inoñnaga ni hémle
“Di niñ inoñnaga ni hémle, ha inoñnaga ni mam di ntehe ni mis bé.”—2 KORINTÔ 5:7.
NLÔM JAM
Di ga tehe lelaa di nla bôdôl Yéhôva ñem i ngéda di nlama yoñ makidik ma ngui.
1. Inyuki ñôma Paul a bé maséé ni niñ yé?
NGIM NGÉDA i bi pam le ñôma Paul a bé yi le a nwo, ndi i ngéda a bi hoñol umbe ntén niñ a bi bana, a bé maséé ngandak. A bi kal le: ‘Me nke ngwéé ipam lisuk, me tééda hémle.’ (2 Timôtéô 4:6-8) Paul a bi yoñ makidik malam inyule a bi gwélél niñ yé inyu sélél Yéhôva, a bé nkwoog nkaa le Yéhôva a bé maséé ni nye. Yak bés, di gwé ngôñ i yoñ makidik ma ma nlémél Yéhôva. Ndi kii di nla ni boñ?
2. I niñ inoñnaga ni hémle, wee kii?
2 Paul a bi kal inyu yé ni inyu bini bikristen bipe le: “Di niñ inoñnaga ni hémle, ha inoñnaga ni mam di ntehe ni mis bé.” (2 Korintô 5:7) Kii Paul a bé sômbôl kal? I bôt ba nhémle bé Yéhôva ba nyoñ makidik inoñnaga ni i yom ba ntehe, ni i yom ba nok. Maselna ni hala, i mut a niñ inoñnaga ni hémle a mbôdôl Yéhôva Nyambe ñem i ngéda a nyoñ makidik. Maboñok mé ma ñéba le a yé nkwoog nkaa le Nyambe a ga bom nye, jon a ntehe le i yé nseñ i nôgôl maéba ma Yéhôva, ma di nléba ikété Bibel.—Tjémbi 119:66; Lôk Héber 11:6.
3. Bimbe bisai di nkôs i ngéda di niñ inoñnaga ni hémle? (2 Korintô 4:18)
3 I pot maliga, ngim mangéda bésbobasôna di nyoñ makidik inoñnaga ni i yom di ntehe tole ni i yom di nok. Ndi, di ga bana mandutu ibale di nyoñ makidik ndik inoñnaga ni i yom di ntehe tole ni i yom di nok. Inyuki? Ngim mangéda, maôô més tole jôl jés bi nla lôk bés. To ibale hala bé, i nla pam le di nôgôl bé maéba ma Yéhôva. (Ñañal 11:9; Matéô 24:37-39) Ibale di niñ inoñnaga ni hémle, di ga yoñ makidik ma “ma nlémél Nwet.” (Éfésô 5:10) Ibale di nôgôl maéba ma Nyambe, di ga bana ñem nwee, di bana ki bañga maséé. (Tjémbi 16:8, 9; Yésaya 48:17, 18) Ibale di nke ni bisu i niñ inoñnaga ni hémle, di ga bana niñ boga.—Añ 2 Korintô 4:18.
4. Lelaa mut a nla yi ibale a niñ inoñnaga ni hémle tole ni mam a ntehe?
4 Kii i nla hôla bés i yi too di niñ inoñnaga ni hémle tole ni mam di ntehe ni mis? Inyu yi ndimbhe, di nla badba i mambadga mana: Kii i ñéga bés i ngéda di nyoñ makidik? Baa ndik i mam di ntehe mon ma ñéga bés, tole bôdôl di gwééne matiñ ma Djob yon i ñéga bés? Di tehe lelaa di nla ke ni bisu i niñ inoñnaga ni hémle ikété manjel maa: i ngéda di mpohol bôlô, i ngéda di mpohol sobiina, ni i ngéda di nkôhna biniigana bi ntôñ. Inyu hiki jam mu, di ga tehe mambe matode di nlama wan inyu yoñ makidik malam.
I NGÉDA DI MPOHOL BÔLÔ
5. Kii di nlama wan i ngéda di mpohol bôlô?
5 Bésbobasôna di nsômbôl yoñ ndun ni lihaa jés ni bésbomede. (Ñañal 7:12; 1 Timôtéô 5:8) Bibôlô bihogi bi nhôla i bana ngandak moni, bi nla hôla i nwet a nsal i somb gwom bi mbéda nye hiki kel, ni i tééda ndék moni. Ndi bibôlô bipe bi nti bé bañga jam, bi nhôla lihaa i bana ndik i mam ma yé nseñ. I ngéda di nyéñ yi too di nlama neebe ngim bôlô, hala a ta bé béba i yi umbe nsaa di ga kôs. I mut a niñ inoñnaga ni mam a ntehe a nla hoñol le nsaa ndik won a nlama béñge i ngéda a nlama pohol bôlô.
6. Lelaa di nla éba le di niñ inoñnaga ni hémle i ngéda i mbéda le di pohol bôlô? (Lôk Héber 13:5)
6 Ibale di niñ inoñnaga ni hémle, di ga yéñ yi too i bôlô i, i nla ôbôs maada més ni Yéhôva. Di nla badba le: ‘Baa i bôlô i, i ntinde me i boñ mam Yéhôva a ñoo?’ (Bingéngén 6:16-19) ‘Baa i nkéñ me i boñ mam ma mbuu tole i nkena me haa ni lihaa jem inyu ntandaa ngéda?’ (Filipi 1:10) Ibale ndimbhe i mambadga ma i yé le ñ, njel pék i yé le di neebe bañ i bôlô i, to ibale i léba bôlô i ntomb bé. Kiki di niñ inoñnaga ni hémle, di nyoñ makidik ma ma ñéba le di yé nkwoog nkaa le Yéhôva a ga yoñ ndun ni bés.—Matéô 6:33; añ Lôk Héber 13:5.
7-8. Lelaa mankéé wada nu Amérika Nwelmbok a bi éba le a niñ inoñnaga ni hémle? (Béñge yak titii.)
7 Béñge i jam Javier, a mankéé nu Amérika nwelmbok, a nkal inyu nseñ u yé i niñ inoñnaga ni hémle. A nkal le: “Me bi yônôs lipep inyu kôhna loñge bôlô i i bé le i nôgha me maséé, i kéñbahaga ki nsaa wem ngélé iba.” Ndi Javier a bééna ngôñ i yila nsañal. A nke ni bisu i kal le: “Me bi kwel ni nwet bôlô. Ndi ilole di nkwel, me bi soohe Yéhôva, me bak nkwoog nkaa le a nyi i yom i bé nseñ inyu yem. I bôlô i, i bé hôla me i bana tel ikeñi ni ngandak moni, ndi me bé gwés bé sal yo, inyule i bé hôla bé me i yônôs mam me bi téé le me mboñ i pes mbuu.”
8 Javier a nkal le: “I ngéda di bi kwel, nwet bôlô a bi kal me le i ga béda le me sal ngandak, yak i mbus ngeñ i bôlô. Ibabé i babaa nye, me bi kal nye le me nla bé neebe i bôlô i, inyule i bé ti bé me pôla i bégés Djob jem.” Ñ, Javier a bi tjél i bôlô i. Sonde iba i mbus, a bi yila nsañal. I mbus ngéda, i nlélém nwii, a kôhna bôlô i pes ngéda. A nkal le: “Yéhôva a bi emble masoohe mem, a hôla ki me i kôhna bôlô i i nkiha ni ntjega wem. Nano, me yé maséé i bana ngim bôlô i i nhôla me i tégbaha libim li ngéda i sélél Yéhôva ni bilôk bikéé.”
Ibale ba nkal le ba nkônde we moni i homa bôlô inyu boñ u kônde sal, baa u ga bôdôl Yéhôva ñem? (Maben 7-8)
9. Kii ndémbél i Trésor i niiga bés?
9 Kii di nlama boñ ibale di nyimbe le bôlô yés i nhôla bé bés i niñ inoñnaga ni hémle? Trésor, nu a niñ i loñ Kôñgô, a nkal le: “Me bé gwés bôlô yem i mondo ngandak, nsaa wem u bé loo u me bé kôs behee ngélé aa, me bé bañga mut i mis ma bôt.” Ndi Trésor a bééna lem i tôl makoda inyule a bé sal i mbus ngeñ i bôlô. Ba bé tinde ki nye i tembee i homa bôlô, a bééna ngôñ i téé i bôlô i, ndi a bé kon woñi le a ga léba bé ipe. Kii i bi hôla nye? A nkal le: “Habakuk 3:17-19 a bi hôla me i nok le to ibale me nimis bôlô yem, Yéhôva a ga yoñ ndun ni me. Jon me bi téé i bôlô i.” A mélés le: “Ngandak bet ba bôlô ba nhoñol le inyu boñ le ba saa we loñge, u nlama bii mam momasôna ipañ, yak lihaa joñ ni mam ma mbuu. Me yé maséé inyule me bi tééda maada mem malam ni Yéhôva, yak ni lihaa jem. Nwii wada mbus, Yéhôva a bi hôla le me léba loñge bôlô, i i mboñ le me nwo bé njal, i tinak ki me pôla i tégbaha ngandak ngéda i minson mi mbuu. I ngéda di mbii Yéhôva i bisu i niñ yés, ngim mangéda, i nla pam le di bana nduña inyu moni, ndi Yéhôva a ga yoñ ndun ni bés.” Ñ, ibale di mbôdôl Yéhôva ni mimbônga nwé ñem, di ga ke ni bisu i niñ inoñnaga ni hémle, Yéhôva a ga sayap ki bés.
I NGÉDA DI MPOHOL SOBIINA
10. Kii i nla boñ le di niñ inoñnaga ni mam di ntehe i ngéda di nsômbôl pohol sobiina?
10 Libii li yé likébla li Yéhôva, hala a ta bé béba i bana ngôñ i biiba. I ngéda mankéé nu muda a mbéñge mankéé nu munlôm inyu yi too a nla ba sobiina wé, a mbéna béñge bilem gwé, bilama gwé, i yom lôk kéé i nhoñol inyu mankéé nu, lelaa a ngwélél moni nwé, baa a gwé bôt mu lihaa jé ba a nlama tééda? Sita i mbéñge yak ibale a ngwés i mankéé nu. b I matode ma ma yé nseñ, ndi ibale i mam ma ndik mon a mbéñge, i nla pam le a yé niñ inoñnaga ni mam a ntehe.
11. Lelaa di nla éba le di niñ inoñnaga ni hémle i ngéda di nlama pohol sobiina? (1 Korintô 7:39)
11 Kinje maséé Yéhôva a nôgda i ngéda a ntehe lôk kéé i bôlôm ni i bôda i nôgôl maéba mé inyu pohol sobiina! Kiki hihéga, ba ndiihe mana maéba le ba bem ndugi le ba “tagbe ngéda i minheña mi mañge wanda” ilole ba mbôdôl béñge mut inyu libii. (1 Korintô 7:36) Inyu pohol loñge sobiina, bilem Yéhôva a mpôdôl inyu yi too mut a nla ba loñge sobiina gwon ba mbéñge. (Bingéngén 31:10-13, 26-28; Éfésô 5:33; 1 Timôtéô 5:8) Ibale mut nu a ta bé Mbôgi Yéhôva a ntonda bo, ba nôgôl mana maéba le ba biiba “ndik ni kristen.” 1 Korintô 7:39. (Añ.) Ba nke ni bisu i niñ inoñnaga ni hémle, ba bak nkwoog nkaa le Yéhôva a nok mahoñol map iloo bôt bobasôna, ni le a ga nit bo.—Tjémbi 55:22.
12. Kii ndémbél i Rosa i niiga we?
12 Di béñge hihéga hi Rosa, nsañal nu a bé niñ i loñ Kolombia. Bôlô yé i bi boñ le a bana lem i kwel ni mut wada nu a bé bé Mbôgi Yéhôva. I mut nu a bi bôdôl unda le a ngwés nye, kiki ngéda i bé tagbe hala nyen Rosa a bé kôôge bebee ni mut nu. Rôsa a nkal le: “I bitéé bi mis, a bé loñge mut. A bé sal inyu hôla bôt bape ibabé le ba saa nye, a bééna bé béba niñ, a bééna maboñok malam ipañ yem, hala a bé lémél me. A bééna i mam momasôna me bééna ngôñ le nlô wem a bana. I jam li bé yiñba ndik nye, li bé le a bé bé Mbôgi Yéhôva.” Rosa a nke ni bisu i kal le: “Hala a bé lédél me i kal nye le to, inyule ha ngéda i, me bééna toi ngôñ i biiba, ni le me bé nôgda binyuu, me bé ngi to léba mankéé ikété likoda nu a bé le a yila nlô wem.” Rôsa a bi bok ndik bé mis mu mam a bé tehe, a bi ôt mahoñol inyu yi bimbe bikuu makidik mé ma bé le ma lona mu maada mé ni Yéhôva. Inyu hala nyen, a bi kit maada ni i mut nu, a ke ni bisu i pagap ni minson mi ntôñ. Ndék ngéda i mbus, ba bi naña nye i ke i Suklu baañal ñañ nlam. Nano, a yé nsañal nu tôbôtôbô. Rosa a nkal le: “Yéhôva a bi yônôs ñem wem ni ngandak maséé.” To hala kiki i ta bé bun i niñ inoñnaga ni hémle i ngéda di nsômbôl toi biiba, ndi ibale di nôgôl Yéhôva, d’a kôhna ngandak bisai.
I NGÉDA DI NKÔHNA BINIIGANA BI NTÔÑ
13. Kii i nla éba le di niñ inoñnaga ni mam di ntehe i ngéda di nkôhna biniigana bi ntôñ?
13 Ntôñ u nti bés biniigana ni njel mimañ, bagwélél ba makiiña, Bétel, tole Juu li bakena ntôñ li li ñéga bés mu kiki di ngwélél Yéhôva. Ndi ngim mangéda, i nla pam le di nok bé inyuki lôk kéé i nti bés ngim biniigana. Bebek, di nla ndik tehe mandutu ma ma yé le ma pémél bés ibale di mboñ kiki ntôñ u nkal, tole di nla bôdôl bok mis mu bibomb bi lôk kéé i i nti bés i biniigana bi.
14. Kii i nla hôla bés i niñ inoñnaga ni hémle i ngéda di nkôhna biniigana bi ntôñ? (Lôk Héber 13:17)
14 I ngéda di niñ inoñnaga ni hémle, di nyi ntiik le Yéhôva nyen a ñéga ntôñ wé, a nyi ki mandutu més. Jon di yé bebee i nôgôl mam ntôñ u nkal bés ni mahoñol malam. (Añ Lôk Héber 13:17.) Di nyi le manôgla més ma mboñ le adna i ba ikété likoda. (Éfésô 4:2, 3) Di mbôdôl yak Yéhôva ñem kayéle to ibale lôk kéé i i ñéga bés i yé kwéha, di nyi le ibale di nôgôl bo, Yéhôva a ga sayap bésbobasôna. (1 Samuel 15:22) I loñge ngéda, a ga héñha i jam ba nlama héñha.—Mika 7:7.
15-16. Kii i bi hôla mankéé wada i niñ inoñnaga ni hémle to hala kiki a bé bé nkwoog nkaa ni biniigana ntôñ u bi ti? (Béñge yak titii.)
15 Di béñge ndémbél yada i i nyigye nseñ u yé i niñ inoñnaga ni hémle. I Péru, ba mpot hop Panya ngandak, ndi to hala, ngandak bôt i mpot yak mahop mape ma loñ i. Hop Quéchua u yé hop wada mu. Hala a yé ngandak nwii nano le lôk kéé i bôlôm ni i bôda i bé yéñ bôt ba mpot hop Quéchua i libôga jap. Ndi inyu nôgôl mbén ngomin, ntôñ u bi lona mahéñha mu makeñge ma likalô. (Rôma 13:1) Hala a bi boñ le lôk kéé ihogi i kahal badba too i makeñge ma mondo ma, ma ga tééñga bé likalô, ndi i ngéda ba bi gwélél i makeñge ma, Yéhôva a bi sayap biliya gwap mu kii ba bé yéñ bôt ba mpot hop Quéchua.
16 Kevin, nu a yé mañ ikété likoda li hop Quéchua jada, a bé wada mu bôt ba bééna i nduña i. A ntoñol le: “Me bé badba le, ‘Nano, lelaa di ga boñ inyu léba i bôt ba mpot hop Quéchua?’” Kii Kevin a bi boñ? A nkal le: “Me bi bigda kaat Bingéngén 3:5. Me hoñol yak Môsi. A bé lama nyodna litén li Israel i Égiptô. I njel a bi yoñ i bé nene wengoñle i bé kena bo i nyemb, wengoñle bôt ba Égiptô ba bé le ba pala gwel bo. To hala, a bi nôgôl Yéhôva, Yéhôva a sayap nye i nya i mbuma ñañ.” (Manyodi 14:1, 2, 9-11, 21, 22) Kevin a bi héñha makeñge mé i likalô. Mam ma bi sôk lelaa? A nkal le: “Hala a bé jam li hélha i tehe lelaa Yéhôva a bé sayap bés. Behee, i bé béda le di kee ntandaa liké inyu léba mut wada tole bôt iba ba ba mpot hop Quéchua. Nano, di nsal ndik i mabôga i het ngandak bôt i i mpot hop Quéchua i yé. Hala a mboñ le di gwé ngandak minkwel, mapeple, ni gwigil bi Bibel. Ngandak bôt i nlo i makoda.” Ñ, i ngéda di niñ inoñnaga ni hémle, Yéhôva a nsayap bés.
Lôk kéé i bi yimbe le ngandak bôt mu mbok i, i bé unda bo bahoma ba nla léba i bôt ba mpot hop u Quéchua (Béñge maben 15-16)
17. Kii u nigil munu yigil ini?
17 Di ntehe lelaa di nla ke ni bisu i niñ inoñnaga ni hémle ikété manjel maa. Ndi di nlama boñ hala ikété makas momasôna ma niñ yés. Kiki hihéga, i ngéda di mpohol mintuk, i ngéda di mbadba too di nlama boñ ntandaa suklu, i ngéda di nsômbôl yi lelaa di nlama néñés bon bés, i ngéda di nyoñ to mambe makidik, di nlama bé nwas le i mam di ntehe mon ma éga bés. Ndi di nlama bigda maada més ni Yéhôva, maéba mé, ni mbônga a bi ti bés le a ga yoñ ndun ni bés. Ibale di mboñ hala, “d’a kil i jôl li Yéhôva Nyambe wés i boga ni boga.”—Mika 4:5.
HIÉMBI 156 Mis ma hémle
