To. I yom David a bi tila i bé maliga.

Di béñge i yom a bi tila mu nlôñ u, ni i minlôñ mimpe mi mi mpôna wo: “Ha nyen m’a tubul jôl joñ tjémbi di bibégés i boga ni boga, m’a yônôs ki makak mem hiki kel.” “A Yéhôva Nyambe wem, me mbégés we ni ñem wem wonsôna, m’a ti ki jôl joñ lipém i boga ni boga.” “M’a bégés jôl joñ i boga ni boga.”​—Tjémbi 61:8; 86:12; 145:1, 2.

I ngéda David a bi tila i bibañga bi, a bé hoñol bé le a ga wo bé. A bé yi le Yéhôva a bi mal kit le bôt ba binam ba nwo inyule ba bi boñ béba. Yak nye David a bé mboñbéba. (Bibôdle 3:3, 17-19; Tjémbi 51:4, 5) A bé yi le yak bôt ba hémle kiki Abraham, Isak ni Yakôb ba bi wo. David a bé yi le yak nye a ga wo. (Tjémbi 37:25; 39:4) Ndi bibañga bi yé i kaat Tjémbi 61:8 bi ñunda ngôñ yé ni makidik mé i bégés Nyambe i boga ni boga, hala wee niñ yé yosôna.​—2 Samuel 7:12.

Ngim mangéda, David a bé tila mam a bi tégbaha i niñ yé, kiki di ntehe i matila ma bibôdle bi Tjémbi 18, 51, ni 52. I kaat Tjémbi 23, a nkal le Yéhôva a yé ntééda nu a ñéga, a nhôgbaha, a tadak ki bémba. David a bé i nya ntééda bémba i. A bééna ki ngôñ i gwélél Nyambe ‘dilo tjodisôna di niñ yé.’​—Tjémbi 23:6.

Di hôya bañ le Yéhôva nyen a bi ti David mbuu wé inyu tila i mam ma momasôna a bi tila. I mam a bi tila, ma bééna yak mbañ i i bé lama yon i mbus ngéda. Kiki hihéga, i kaat Tjémbi 110 David a bi tila, a bi pôdôl i ngéda Nwet wé a ga “yén i woo walôm u [Nyambe]” i ngii, a kôhna ki tel ikeñi. Inyu boñ kii? Inyu suhus baoo bé, ni inyu “pémhene biloñ mbagi” hana ’isi. David a bé sôgôlsôgôl nu Yésu, nu a bé Mésia. Mésia nyen a bé lama ba ñane i ngii, a bak ki “prisi i boga ni boga.” (Tjémbi 110:1-6) Yésu a bi kal le mbañ i i yé i kaat Tjémbi 110, i i bé béñge nye, i bé lama yon i dilo di nlo.​—Matéô 22:41-45.

Ñ, Yéhôva a bi ti David mbuu wé mpubi le a tila mam ma ma bé lama tagbe i ngéda yé, yak i dilo di nlo, i ngéda a ga lo i bitugne, a ga bégés Yéhôva i boga ni boga. Hala a nhôla bés i nok le kaat Tjémbi 37:10, 11, 29 i bé toñol mam ma bé tagbe i Israel i ngéda kôba, ni ma ma ga ba i nkoñ ’isi wonsôna i dilo di nlo, i ngéda mimbônga mi Nyambe mi ga yon.​—Béñge liben 8 yigil i i gwé ño le “W’a ga ba ni me i Paradis” munu mbamble unu.

Jon kaat Tjémbi 61:8, ni minlôñ mi mi mpôna yo, i ñunda le David a bééna ngôñ i bégés Yéhôva letee ni i nyemb yé. I ñunda ki i yom David a ga boñ i dilo di nlo, i ngéda Yéhôva a ga tugul nye.