1-2. Mambe mam Mbôgi Yéhôva i ngwés i mpôdôl?

MAM ma nlôôha nseñ ma ma mbéñge hiki wada wés i len ini ma yé i nit énél i Yéhôva ni i pubus jôl jé. Bés Mbôgi Yéhôva di ngwés di mpôdôl i mam mana ngandak. Ndi baa i pubus jôl li Djob ni i nit énél yé mam ima ma? To jam! Nlélém jam u.

² Bés bobasôna di yé kiñ yada le jôl li Djob li nlama pubhana. Di nyi ki le bôt ba nlama yi le Yéhôva a ñane loñge iloo baane bobasôna. Di kôIi diihe i mam ma mo ima ma nlôôha nseñ.

3. I pubus jôl li Yéhôva i nkobla le kii?

³ I pot maliga, ngéda ba mpôdôl jôl li Yéhôva, hala a mbéñge mam momasôna ma ntihba nye, kiki bo lelaa a ñénél. Jon ngéda di nkal le jôl li Yéhôva li nlama pubhana, wee di yé kal le Yéhôva a ñane loñge iloo baane bobasôna. Jôl li Yéhôva li nkiha ni libak jé li Ñane ngiinda yosôna.​—Béñge minkéñék mi matila le “ Mam ma nlôôha nseñ.”

4. Lelaa kaat Tjémbi 135:13 i mpôdôl jôl li Djob, mambe mambadga di ga timbhe munu yigil ini?

⁴ Jôl li Yéhôva li yé tôbôtôbô. (Añ Tjémbi 135:13.) Inyuki? Ngéda imbe i jôl li li bi hooba mahindi inyu ngélé bisu? Lelaa Nyambe a mpubus jo? Kii di nla boñ inyu pubus jôl jé? Di timbhe mambadga ma.

5. Kii mut a yé le a badba ibale a nok le jôl li Djob li nlama tééba lipubi?

⁵ “Jôl joñ li tééba lipubi.” (Matéô 6:9) I jam li jon Yésu a bi bugus mu masoohe a bi niiga. Kii a bé sômbôl kal? I pubus ngim yom hala a nkobla le, i jôwa yo, i héya mahindi. Mut a yé le a badba le, ‘baa jôl li Yéhôva li ta bé lipubi inyu boñ le ba kahal ki pubus jo?’ Inyu timbhe i mbadga i, i mbéda ndugi le di nyi kii i yé toi jôl li mut.

6. Kii i mboñ le jôl li mut li bana mahee?

⁶ Jôl li ta ndik bé bibuk to bibañga mut a mpahal. Di béñge yom Bibel i nkal mu jam li: ‘Loñge jôl i nloo ngandak lingwañ.’ (Bingéngén 22:1; Ñañal 7:1) Inyuki jôl li yé nseñ hala? Inyule jôl li ta ndik bé buk bôt ba ngwélél inyu sébél bés, ndi yak mam bôt ba nhoñol ngéda ba nsima jôl jés. Jon i jam li yé nseñ lôôha, li ta bé bibuk bôt ba nsima inyu sébél bés, to lelaa ba mpahal gwo; ndi i yom bôt ba nhoñol ngéda ba nok i jôl li.

7. Lelaa ba bi ôbôs jôl li Djob?

⁷ Ngéda bôt ba mpot bitembee inyu Yéhôva, ba ntinde bôt bape i hoñol le Yéhôva a yé béba mut. Ni i njel i nyen ba ñôbôs nye jôl. I wom Éden nyen ba bi ôbôs jôl li Djob inyu ngélé bisu. Di ôt biniigana mu ñañ u.

8. (a) Kii Adam bo Éva ba bé yi? (b) Mambe mambadga di yé le di badba?

⁸ Adam bo Éva ba bé yi jôl li Yéhôva ni mam mape ma ma gwé maada ni i jôl li. Ba bé yi le a yé Nhek nu a nti bo niñ, Paradis ilam, ni sobiina nu a yé peles. (Bibôdle 1:26-28; 2:18) Ndi baa ba bi ke ni bisu i gwélél boña wap nu a bé peles inyu ôt pék mu mam Yéhôva a bi bôñôl bo? Baa ba bi ke ni bisu i lédés gwéha inyu Djob ni i ti nye mayéga? Mbale i bi yeli ngéda ñoo Djob a bi noode bo.

9. (a) Inoñnaga ni kaat Bibôdle 2:16, 17 ni 3:1-5, kii Yéhôva a bi kal Adam bo Éva? (b) Lelaa Satan a bi kôdôs maliga?

⁹ Añ Bibôdle 2:16, 17 ni 3:1-5.  Satan a bi gwélél nyoo inyu kwélés Éva, a bat nye le: “Baa hodo le Nyambe a kal le, ni je bañ matam ma bie gwobisôna mu wom?” I mbadga i, i bé sôô tembee ikolba Nyambe, i bé kiki mbôñ i sôli. I jam Djob a kal li bé le, ba bé lama je matam ma bie gwobisôna, amas matam ma e yada. Adam bo Éva ba bééna ngandak matam ma bie ba bé le ba je. (Bibôdle 2:9) Ñ, Yéhôva a yé mut likap. Ndi a bi téé Adam bo Éva mbén le ba je bañ matam ma e yada. Satan nye a bi kôdôs maliga. A bé sômbôl le ba hoñol le Nyambe a nima. Hala a bé le a tinde Éva i badba le: ‘Le Djob a nsôô bé me jam lilam?’

10. Lelaa Satan a bi ôbôs jôl li Djob, hala a bi lona kii?

¹⁰ Ngéda Satan a bi bat Éva i mbadga i, Éva a bé a ngi tehge Yéhôva kiki Ñane wé. A bi timbhe Satan ni bibuk Djob a bi gwélél. A kônde yak le, ba nlama bé to tihba e i. A bé yi le Nyambe a bi kal le, ibale ba nôgôl bé nye, ba nwo. Ndi Satan a bi kal nye le: “N’a wo yaga bé.” (Bibôdle 3:2-4) Satan a bé sôô ha bé tembee yé. Ha ngéda i, a bi ôbôs yaga Yéhôva jôl, a kal Éva le Yéhôva a yé mut bitembee. Ha nyen a bi yila nsohop, tole ñôbôsjôl. A bi bep lôk Éva; yak Éva a hémle nye. (1 Timôtéô 2:14) A bi bôdôl Satan ñem iloo Yéhôva. Hala a bi tinde Éva i yoñ makidik ma nlôôha mabe. A bi yoñ makidik i ndogbene Yéhôva. A yoñ litam Yéhôva a bi sôña, a je jo. Mbus, a ti yak Adam.​—Bibôdle 3:6.

11. Kii Adam bo Éva ba bé le ba boñ, ndi kii ba bi la bé boñ?

¹¹ Hoñol lelaa mam ma bé le ma ba, ibale Éva a timbhe Satan nya ipe. Hégda le Éva a kal nye le: “Me nyi bé njee u yé, ndi me nyi Tata, le Yéhôva, me ngwés nye, me bôdlak ki nye ñem. Nyen a bi ti bés i gwom gwobisôna di gwé. Inyuki u ñôbôs nye jôl? Nyodi me ha!” Kinje maséé Yéhôva a bé le a nôgda ibale a nok ngond yé i gwéha i mpahal i nya bibuk i! (Bingéngén 27:11) Ndi Éva a bi ke bé ni bisu i gwés Yéhôva; to Adam a boñ bé hala. Kiki ba bééna bé bañga gwéha i i mal bé inyu Isañ wap, Adam bo Éva ba bi la bé sôñga Satan i ôbôs jôl li Djob.

12. Lelaa Satan a bi ha pééna i ñem Éva, kii Adam bo Éva ba bi la bé boñ?

¹² Kiki di mbôk di tehe, Satan a bi bôdôl ôbôs jôl li Yéhôva i ngéda a ha pééna i ñem Éva. A bé sômbôl le Éva a badba too Yéhôva a yé loñge mut.  Adam bo Éva ba bi la bé sôñ jôl li Yéhôva. Ba bi nwas le nkwel u Satan u tinde bo i ndogbene Isañ wap. Dipa di tjon Satan a ngwélél i len ini. A ngwélél bitembee inyu ôbôs jôl li Yéhôva. I bet ba ñemble bitembee bi Satan ba mbéna kôm Yéhôva mbus.

13. Lelaa kaat Ézékiel 36:23 i nyigye nwin u Bibel?

¹³ Baa Yéhôva a yé le a nwas le ba ôbôs jôl jé hala? To jam! Bibel i mpôdôl i mam Yéhôva a bi boñ inyu pubus jôl jé, li ba bi hindis i wom Éden. (Bibôdle 3:15) I sem kwep, di yé le di kal le nwin u Bibel wonsôna unu le: Yéhôva a mpubus jôl jé ni njel Ane yé, i Man wé a ñéga, yon i ga tiimba lona telepsép ni nsañ hana ’isi. Bibel i gwé biniigana bi bi nhôla bés i yi lelaa Yéhôva a mpubus jôl jé.​—Añ Ézékiel 36:23.

14. Lelaa makidik Yéhôva a bi yoñ i wom Éden ma bi pubus jôl jé?

¹⁴ Satan a ma noode manjel momasôna inyu kéñ le sômbôl i Yéhôva i bôña bañ. Ndi a nlep ngéda yé yañga. Bibel i ñunda i mam Yéhôva a mboñ, ma ma nkwés bés nkaa le mut nye ki nye a ta bé kiki nye. I pot mbale, ngolba i Satan ni ba bobasôna ba yé i pes yé, i bi unbaha Yéhôva ngandak. (Tjémbi 78:40) Ndi to hala, a bi timbhe bo ni pék, ni wongut, ni telepsép. A bi gwélél ngandak manjel inyu unda ngui yé i mbuma ñañ. Iloo mam momasôna, gwéha yé i nene ikété hiki jam a mboñ. (1 Yôhanes 4:8) Yéhôva a nwaa bé sal inyu pubus jôl jé.

15. Lelaa Satan a ñôbôs jôl li Djob i len ini, kii hala a nlona?

¹⁵ Yak i len ini, Satan a nke ni bisu i ôbôs jôl li Djob. A ntinde bôt i hoñol le Djob a gwé bé ngui, to pék, to gwéha ni le a téé bé sép. Kiki hihéga,  Satan a mboñ le bôt ba hoñol le Yéhôva a ta bé Nhek. I ngéda Satan a ntehe le ngim bôt i nhémle le Djob a yé, a ntinde bo i hoñol le mambén mé ma nlôôha let, ni le ma téé bé. A niiga yak bôt le Yéhôva a gwé ñem mbe, le a yé Djob li manola li li nligis bôt i bee hié. I ngéda bôt ba nhémle nya bitembee i, hala a yé le a tinde bo i kôm Yéhôva mbus. Satan a ga waa bé ôbôs jôl li Yéhôva letee a tjiba, a’ waa bé to tinde we i ke haa ni Djob. Baa a ga pam i yônôs njômbi yé?

16. Kii u yé le u boñ le Adam bo Éva ba bi boñ bé?

¹⁶ Yéhôva a nti bikwéha bi bôt pôla i pubus jôl jé. Inyu hala nyen, u nla pam i boñ jam Adam bo Éva ba bi la bé boñ. Tolakii di niñ i nkoñ ’isi nyonok ni bôt ba ba ñôbôs Yéhôva jôl, ba solok nye, di nla pahal ni makénd le Yéhôva a yé mpubi, a téé sép, a gwé loñgeñem, a yé ki Djob li gwéha. (Yésaya 29:23) Di nla nit Ane yé. Di nla yis bôt le énél yé yotama yon i téé sép, ni le yotama yon i nla lona nsañ ni maséé.​—Tjémbi 37:9, 37; 146:5, 6, 10.

17. Lelaa Yésu a bi yis bôt jôl li Isañ?

¹⁷ Ngéda di mpubus jôl li Yéhôva, di noñ ndémbél i Yésu Kristô. (Yôhanes 17:26) Yésu a bi yis bôt jôl li Isañ mu kii a bé gwélél jo, a sôñ ki jo. Kiki hihéga, a bi kolba Farisai i i bé tinde bôt i tehe Yéhôva kiki mut a gwé nledek ñem, nu a mpéé ni mambén, a ta bé liwanda ni bôt ba binam, a gwé bé to konangoo. Yésu a bi hôla bôt i tehe Isañ kiki Djob li li ta bé ndéñ ndéñ, Djob li wongut, li gwéha ni li li nwéhél. A bi hôla ki bôt i yi Yéhôva mu kii a bi kôna bilem bi Isañ i nya i yôni.​—Yôhanes 14:9.

18. Lelaa di nla unda le minsohi ba ñôm Yéhôva mi téé bé?

¹⁸ Kiki Yésu, di nla kal bôt mam di nyi inyu Yéhôva, di yis ki bo le a yé Djob li gwéha, ni le a gwé loñgeñem.  Ngéda di mboñ hala, di nkolba i bet ba ñôbôs Yéhôva jôl. Di mpubus jôl li Yéhôva, di nhôla ki bôt i tehe jo kiki yom ipubi. Kiki Yésu, di nla nigle Yéhôva. Di nla pam i boñ hala tolakii di yé bikwéha bi bôt. (Éfésô 5:1, 2) I ngéda di ñunda ni njel bibuk gwés ni maboñok més, njee Yéhôva a yé toi, di mpubus jôl jé. Di mpubus ki jôl jé ngéda di nhôla bôt i yi maliga inyu bikwéha bi biniigana ba bi kôs. * Di ñunda ki le bikwéha bi bôt bi nla téñbe ni Yéhôva.​—Hiôb 27:5.

19. Inoñnaga ni kaat Yésaya 63:7, i ngéda di niiga bôt, njômbi yés i bisu i nlama ba le kii?

¹⁹ Di béñge jam lipe di nla boñ inyu pubus jôl li Yéhôva. Ngéda di niiga bôt Bibel, di mbéna yigye le Yéhôva nyen a ñane ngiinda yosôna, hala a yé ki maliga. Ndi njômbi yés i ta ndik bé le di niiga bôt mambén ma Djob, njômbi yés i bisu i yé le di hôla bôt i gwés Yéhôva, Tata wés, ni i téñbe ni nye. Di nlama yigye bilem bi Yéhôva bi bi mbuma ñañ, di unda ki bôt umbe ntén mut a yé. (Añ Yésaya 63:7.) I ngéda di niiga bôt hala, di nhôla bo i gwés Yéhôva ni i nôgôl nye inyule ba nsômbôl téñbe ni nye.

20. Kii di ga tehe mu yigil i noñ?

²⁰ Ndi kii di nla boñ inyu boñ le bihiumul gwés ni biniigana gwés bi hôla bôt bape i ti Yéhôva lipém ni i kôôge nye bebee? Di ga timbhe i mbadga i mu yigil i noñ.