1. Yéhôva a nti bés kunde i boñ kii?

YÉHÔVA a nti bés kunde i yoñ makidik. A niiga bés lelaa di nla yoñ makidik malam, a nsayap ki bés ngeñ di nyoñ makidik ma ma nlémél nye. (Tjémbi 119:173) Kiki di nke ni bisu i gwélél pék i nlébna ikété Bañga i Djob, hala nyen di nyoñ makidik malam.​—Lôk Héber 5:14.

2. Imbe ndutu di nla boma ngéda di nyoñ makidik?

² To ngéda di nyoñ makidik malam, i nla bane bés ndutu i yônôs mo. Di yoñ ndék dihéga: Njohok mankéé i nsômbôl añ Bibel yosôna. A mbôdôl nga loñge, i mbus ndék ngéda a téé. Mankéé nu muda a nyoñ makidik i yila nsañal nu ngéda yosôna, ndi inyu boñ le a bôdôl, njee bo njee. Mimañ mi likoda mi nôgla le mi nlama ligip i yuuga lôk kéé inyu lédés bo, ndi mbus ngandak ngéda ba mboñok bé to jam. Dihéga di tjodisôna di yé mahéñha, ndi bilôk bikéé bi gwobisôna bi mboma nlélém ndutu. Ba mpam bé i mélés i jam ba mbôdôl. Nlélém jam u bi pémél lôk kéé i Korintô. Kii di nla nigil mu jam li bi pémél bo?

3. Mambe makidik bikristen bi Korintô bi bi yoñ, ndi kii i bi yik bôña?

³ I nwii 55 N.Y., bikristen bi Korintô bi bi yoñ makidik malam. Ba bi nok le lôk kéé yap i Yérusalem ni i Yudéa i bé tégbaha mangéda mabe, ni le liyep li bé  tééñga bo, ba bi nok ki le makoda mape ma bé kot moni inyu hôla bo. Kiki ba bé bôt ba minyaô ni bôt ba nkap, bikristen bi Korintô bi bi yoñ makidik i hôla lôk kéé yap, ba bat ki ñôma Paul kii ba bé le ba boñ inyu ti makébla. Jon Paul a bi tilna bo, a pohol ki Titô inyu hôla bo i kot moni. (1 Korintô 16:1; 2 Korintô 8:6) Ndék sôñ i mbus, Paul a kôs nwin le lôk kéé i Korintô i bé ngi ti i yom ba bi bôn. Jon likébla jap li bé bé le li ba bebee i ngéda ba bé kena makébla ma makoda mape i Yérusalem.​—2 Korintô 9:4, 5.

4. Inoñnaga ni kaat 2 Korintô 8:7, 10, 11, kii Paul a bi kal bilôk bikéé bi Korintô le bi boñ?

⁴ Bilôk bikéé bi Korintô bi bi yoñ makidik malam, jon Paul a bi ti bo bibégés inyu hémle yap i tôbôtôbô ni ñem wap u likap. Ndi a bi ti yak bo makénd i mélés i jam ba bi kit le ba mboñ. (Añ 2 Korintô 8:7, 10, 11.) I jam li bi pémél bo li ñunda bés le yak bañga bikristen i nla bana ndutu i yônôs makidik malam ba nyoñ.

5. Mambe mambadga di ga timbhe?

⁵ Kiki bikristen bi Korintô, i nla bane bés ndutu i yônôs makidik més. Inyuki? Kiki di yé bikwéha bi bôt, ngéda di nyoñ makidik i boñ ngim jam, di nla bana lem i kal le, m’a boñok jo yani. Tole mpuhge jam u nla sôña bés i mélés i jam di mbôdôl. (Ñañal 9:11; Rôma 7:18) Kii di yé le di boñ ibale di nwan makidik di bi yoñ, ndi di nôgda le di nlama héñha mo? Kii i nla hôla bés i yônôs makidik més?

6. Inyuki i nla pam le di héñha makidik?

⁶ Ngim makidik i yé le di ta bé le di héñha. Kiki hihéga, makidik més ma yé le di gwélél Yéhôva niñ yés yosôna, di gwé ki ngôñ i yônôs likak di bi kégél sobiina wés. (Matéô 16:24; 19:6) Ndi ngim makidik i yé le di nla héñha. Inyuki? Inyule, bo kel i yé ye, yak mam ma ye. Mambe mam ma nla hôla bés i yônôs makidik més?

7. Inyu limbe jam di nlama soohe, ni inyuki?

⁷ Bat Yéhôva pék. Mbuu u Yéhôva u bi tinde Yakôbô i tila le: “Ibale wada ikété nan a nhañ ni pék, wee a yagal yaa Nyambe nu a nkébél bôt bobasôna.” (Yakôbô 1:5) Ngim mangéda, di yé di ‘nhañ pék.’ Jon di nlama bôdôl Yéhôva ñem ngéda di nyoñ makidik, ni ngéda di nlama héñha mo. Ñ, Yéhôva a ga hôla bés i yoñ makidik malam.

8. Kii di nlama boñ ilole di nyoñ makidik?

⁸ Boñ bañga nyiña. Wan Bibel ni bikaat bi ntôñ u Yéhôva, u bat ki mawanda moñ maéba. (Bingéngén 20:18) I nlôôha ba nseñ i boñ i mam mana ilole u nhéñha bôlô, ilole u mbôô, tole ilole u nigil ngim bôlô i i ga ti we likala li kel mu kii u nkena nson woñ likalô ni bisu.

9. Inyuki i ga bane bés nseñ i wanba?

⁹ Wanba. Yéhôva a mbéñge mahoñol més. (Bingéngén 16:2) A nsômbôl le di ba maliga manjel momasôna. Jon ngéda di nyoñ makidik, di nlama bé lôk bésbomede to bôt bape. Ibale di nlôk bésbomede, i nla bane bés ndutu i yônôs makidik  més. Kiki hihéga, mañge wanda a nla yoñ bôlô nsañal. Ndi, i mbus ngéda, a laa ha bé yônôs nsoñgi wé ngeñ, a nimis ki makénd. A yé le a kal le gwéha inyu Yéhôva yon i bi tinde nye i yoñ bôlô nsañal, ndi baa a bi yoñ bé makidik ma inyu lémél bagwal bé tole mut numpe?

10. Inyu boñ mahéñha kii i mbéda?

¹⁰ Di yoñ hihéga hi nnigil Bibel nu a nkit le a ñôt ha bé siga. Ndi i mbus ndék ngéda, a témb a kahal ôt. A nwaa bé boñ biliya letee a nwas siga tjagda! Kiki a ngwés Yéhôva, a nsômbôl ki kônha Nye maséé, a nsôk yémbél i lem ibe i.​—Kôlôsé 1:10; 3:23.

11. Inyuki u nlama tjek mam?

¹¹ Bana ngim njômbi. Ibale u nyi het u nke, ha nyen u ga bol. Kiki hihéga, u yé le u yoñ makidik i añ Bibel hiki kel. Ndi ibale u ntjek bé ngéda i tôbôtôbô inyu añ yo, i nla pam le u téé lisoñgol joñ. * Tole mimañ mi likoda mi nla yoñ makidik i yuuga lôk kéé iloo kiki ba boñok, ndi ngéda i ntagbe, ba pam bé i yônôs makidik ma. Inyu yônôs njômbi yap, ba nla badba le: “Baa di mpohol bilôk bikéé bi bôlôm ni bi bôda bi di nlama yuuga? Baa di ntéé ngim ngéda inyu yuuga bo?”

12. Kii di yé le di ba nyégsaga i boñ, ni inyuki?

¹² U lôk bañ wemede. Mut nye kiki nye a gwé bé ngéda, bigwel moo, to ngui i boñ hiki jam a ngwés. Jon u lôk bañ wemede. I nla pam le u ba nyégsaga i héñha ngim makidik inyule u nla bé yônôs mo. (Ñañal 3:6) Ibale u ntiimba wan makidik moñ, ndi u kodol bon ba gwom mu, u nla nôgda le u yé le u yônôs mo. Mam matan mana ma nla hôla we i mélés i jam u bi bôdôl.

13. Lelaa u nla kôs ngui i mbéda we inyu yônôs makidik moñ?

¹³ Bat Yéhôva ngui inyu yônôs makidik moñ. Nyambe a nla ti we “ngui i boñ mam” u bi kit le u mboñ. (Filipi 2:13) Jon bat Yéhôva mbuu mpubi inyu bana ngui i mbéda we. Kee ni bisu i soohe to ibale u nhoñol le Yéhôva a nhoo bé timbhe. Yésu a kal le: “Yaglana [mbuu mpubi], ndi y’a tina bé.”​—Lukas 11:9, 13.

14. Lelaa litiñ li mpémél i kaat Bingéngén 21:5 li nhôla we i yônôs makidik moñ?

¹⁴ Boñ ntjega. (Añ Bingéngén 21:5.) Inyu mélés i jam u mbôdôl, u nlama boñ ntjega. U boñ ki biliya i noñ ntjega u. Jon ngeñ u nyoñ makidik, u nlama tila i mam momasôna i mbéda le u boñ inyu yônôs mo. Ngéda u gwé soso bôlô, sal yo ndék ni ndék inyu boñ le i tômbôô we. Paul a bi ti bikristen bi Korintô makénd le “kel bisu i [hiki] sonde,” ba kot makébla map iloole ba bem malo mé inyu kot mo. (1 Korintô 16:2) Jon ibale u nsal bôlô yoñ ndék ni ndék, hala a ga boñ le i hoi.

15. Inyuki i yé loñge i boñ ntjega?

¹⁵ Ibale u ntila bibôlô u nlama sal, hala a ga bane we jam li ntomb i sal  gwo. (1 Korintô 14:40) Kiki hihéga, ntôñ u nti mimañ makénd i tep wada ipôla yap nu a ntila makidik ma juu li mimañ, a tila môl ma bet b’a yônôs mo ni ngéda ba ntéé inyu yônôs mo. Ngéda mimañ mi noñ maéba ma, i yéne bo jam li ntomb i yônôs makidik map. (1 Korintô 9:26) U nla noode noñ maéba ma mu minson nwoñ. Kiki hihéga, u nla kôôba i mam u gwé le u mboñ ngim kel, ibôdôl i jam li bisu letee ni li li nsôk. Hala a ga hôla ndik bé we i yônôs makidik moñ, ndi hala a ga ti yak we pôla i boñ ngandak mam.

16. Kii i mbéda inyu yônôs makidik moñ, lelaa kaat Rôma 12:11 i nit i jam li?

¹⁶ Boñ biliya. I mbéda biliya inyu noñ ntjega woñ, ni i mélés i jam u mbôdôl. (Añ Rôma 12:11.) Paul a kal Timôtéô le a “kônde boñ biliya” inyu “téñbe ni mam” a bé niiga. Maéba ma ma mbéñge yak i mam di nkit le di nsômbôl boñ.​—1 Timôtéô 4:13, 16.

17. Lelaa di nla gwélél maéba ma mpémél i kaat Éfésô 5:15, 16 inyu yônôs makidik di nyoñ?

¹⁷ Tibil tjek ngéda yoñ. (Añ Éfésô 5:15, 16.) Téé ngim ngéda inyu yônôs makidik moñ, u noñ ki yo. U bem bañ ngim ngéda i tôbôtôbô inyu boñ i jam u nkit le u mboñ; bebek i nya ngéda i y’a nene bé. (Ñañal 11:4) Yoñ yihe le mam ma gwé bé nseñ bañga ma yoñ bañ we ngéda ni ngui i mbéda inyu boñ mam ma yé nseñ. (Filipi 1:10) Ibale u nla, pohol ngim ngéda i u nyi le mut a nla bé tééñga we. Nwas bañ le bôt ba je we ngéda. U hôya bañ lém téléfôn yoñ, ibale ba ntilna we ngéda u yé sal u añ bañ. *

18-19. Kii i nla hôla we i yônôs makidik moñ to ibale u mboma mandutu?

¹⁸ Hoñol bisai bi mbem we. Ngéda u nyônôs makidik moñ a yé ndik wee, u yé ke liké ndi u bol i homa u kenek. Ibale u nsômbôl toi bol i het u nke, w’a boñ kii yosôna u nla, to ibale i mbéda le u yoñ njel ipe. Nlélém inyu makidik moñ, ibale u nhoñol bisai bi mbem we, w’a somol bé to u mboma mandutu.​—Galatia 6:9.

¹⁹ I yoñ makidik malam i ta bé jam li ntomb, to yônôs mo i ta bé bun. Ndi ni mahôla ma Yéhôva, u nla kôs ngui ni pék i mbéda we inyu mélés i jam u mbôdôl.