1-2. (a) Inyuki hala a nhélés bé bés le Yésu a unda bés ngim njel i i ntomb inyu bigda nyemb yé? (b) Bimbe bilem bi Yésu di ga wan?

BAA u nla toñol i yom i mbéna tagbe i Mbigda nyemb Kristô? I yé ntiik le ngandak ikété yés i mbigda yak disii di mam di mbôña i Bilôp bi Nwet. Inyuki? Inyule Bilôp bi ta bé jam li nlet i kôôba. Ndi bi yé jam li nlôôha nseñ. Jon di nla badba le: ‘Inyuki bitelbene bi bi ta bé jam li nlet to ndék?’

² Ngéda Yésu a bé gwel nson wé hana isi, a bé yiba kiki mut a niiga maliga i nya i ntomb, i i nôga loñge kayéle hiki mut a bé la nok. (Matéô 7:28, 29) Nlélém inyu Mbigda * nyemb yé, a bi unda bés loñge njel i i ntomb inyu tégbaha yo. Di ôt mahoñol mu bret ni wai bi ngwéélana Bilôp bi Mbigda nyemb Yésu, ni i ndék mam Yésu a bi kal a boñ ki. Di ga kon ki maséé i nok ikepam limbe likala Yésu a yé suhulnyuu, a ban-ga ñem ngui ni gwéha i nlôôha, mbus di ga nigil lelaa di nla tibil kôna nye.

3. (a) Inoñnaga ni Matéô 26:26-28, lelaa Yésu a bi téé Bilôp bi Mbigda nyemb yé ibabé i boñ ngôôba keñi? (b) Bret ni wai bi yé yimbne i kii?

³ Yésu a bé ni baôma bé 11, ba ba bi téñbe ni nye, ngéda a bi téé Mbigda i nyemb yé. A bi gwélél gwom bi bi yégle mu kiki ba bi tégbaha ngand Pasa, inyu tégbaha ini Mbigda. (Añ Matéô 26:26-28.) A bi gwélél bret bi ngi  séñha ni wai bi bi bé ha. Yésu a kal baôma bé le i gwom bi gwobiba, bi yé yimbne i nyuu yé i i yé peles ni i matjél mé, ma a bé bebee i ti kiki sesema inyu yap. I nene le hala a bi hélés bé baôma i tehe nye a tégbaha likoda li mondo lini ibabé i boñ ngôôba keñi. Inyuki?

4. Lelaa maéba Yésu a bi bôk a ti Marta ma nhôla bés i nok inyuki Yésu a yoñ bitelbene le Bilôp bi Mbigda nyemb yé bi ba bañ jam li nlet i tégbaha?

⁴ Di hoñol i jam li bi tagbe ndék sôñ bisu bi ngéda, mu nwii u yônôs aa u nson Yésu, ngéda a bé yuuga mawanda mé ma ñem nyuu​—Lazarô, Marta, ni Maria. Mu i loñge ngéda ba bé tégbaha, Yésu a bi bôdôl niiga. Marta a bé ha yokela, ndi a bé a pégi i lamb ngandak bijek inyu legee nkén. Yésu a tehe bañ hala, ni loñgeñem a kodol Marta, a bi hôla nye i nok le i kôôba ngandak bijek i ta bé nseñ hiki ngéda. (Lukas 10:40-42) Jon i kel Mbigda nyemb yé, ndék ngéda ilole a nwo, Yésu nyemede a bi bii jam a bi niiga bisélél. A bi lôôs Bilôp bi Mbigda nyemb yé ibabé ngôôba keñi. Kii hala a niiga bés inyu Yésu?

5. Kii Bilôp Yésu a bi tégbaha ibabé ngôôba keñi bi niiga bés inyu yé, ni lelaa hala a nit bibuk bi kaat Filipi 2:5-8?

⁵ Ikété mam momasôna Yésu a bi pot a boñ ki, suhulnyuu i bé nene mu. Jon hala a nhélés bé bés i tehe le a bi unda suhulnyuu i nlôôha i u u nsôk i niñ yé hana isi. (Matéô 11:29) A bé yi le a bé bebee i ti sesema i nlôôha keñi iloo i bôt ba binam ba bé ba ma ti, ni le Yéhôva a bé lama tugul nye inyu ba kiñe i ngii. To hala kiki a bé yi i mam ma, a bi yéñ bé le a lôôha nene, a bi yéñ bé to ki le bôt ba boñ soso ngand inyu bigda nyemb yé. Ndi, a bi kal banigil bé le hiki nwii, ba nlama bigda nye ngélé yada ni njel Bilôp bi bi mbat bé ngôôba keñi. (Yôhanes 13:15; 1 Korintô 11:23-25) Bilôp bi, bi bi bé bat bé ngôôba ikeñi, bi bak ki bi kôli, bi bé unda le Yésu a bé bé mut ngôk. Kinje maséé i yi le suhulnyuu i yé lem yada ikété bilem bilam bi tôbôtôbô Kiñe yés nungingii a gwé.​—Añ Filipi 2:5-8.

6. Lelaa di nla kôna suhulnyuu i Yésu ngéda di mboma manoodana?

⁶ Lelaa di nla kôna suhulnyuu i Yésu? Di bii gwéñe bi bôt bape bisu bi yéñe yés. (Filipi 2:3, 4) Ni bigda u u nsôk u Yésu hana isi. A bé yi le a bé bebee i wo béba nyemb; ndi a bé lôôha tôñ baôma bé, ba ba bi téñbe ni nye, inyule  ba bé lama nok njôghe inyu nyemb yé. Jon a bi tégbaha u u nsôk i niiga bo, i ti bo makénd ni i hôgbaha bo. (Yôhanes 14:25-31) Ni suhulnyuu Yésu a bi unda le a bé tôñ inyu loñge i bôt bape iloo loñge yé nyemede. Kinje loñge ndémbél a bi yigle bés!

7. Lelaa Yésu a bi unda ñem ngui u tôbôtôbô mbus a bi téé Bilôp bi Nwet?

⁷ Ndék ngéda mbus le a téé Bilôp bi Nwet, Yésu a bi unda ñem ngui u nloo héga. Lelaa? Yésu a bi neebe i boñ sômbôl i Isañ, to hala kiki a bé yi le i boñ hala i ga tinde bôt i ôm nye nsohi le a yé ôbôs jôl li Djob, ni i nol nye. (Matéô 26:65, 66; Lukas 22:41, 42) Yésu a bi tééda ndéñbe i yôni inyu ti jôl li Yéhôva lipém, inyu nit kahap i Djob i ngii bihégél gwé ni inyu yible bôt ba binam ba ba nhiel ñem njel i niñ i boga ni boga. Nlélém ngéda, Yésu a bi kôôba banigil bé inyu ngolba ba bé lama kôs.

8. (a) Kii Yésu a kal baôma bé ba ba bi téñbe ni nye? (b) Mu nwii mi bi noñ nyemb yé, lelaa banigil ba bi noñ ndémbél yé i ñem ngui?

⁸ Yésu a bi unda ki ñem ngui mu kiki a bi nwas bé le nduña i yoña nye, a bi bok mahoñol mé momasôna i mam ma bé kon baôma bé ngôñ. I ndék man yom je ba bi kabna i Bilôp bi a bi téé i mbus a pémés Yuda, i bé lama bigdaha i bet ba bé lama yila minhook nwé nseñ u matjél ma Yésu ma ma bi kuba inyu band malômbla ma yondo a bi boñ ni bo. (1 Korintô 10:16, 17) Yésu a kal banigil bé i jam nye ni Isañ ba bé bémél bo inyu boñ le ba pam i téñbe ni Djob ni i kôs bom yap i ngii. (Yôhanes 15:12-15) Yésu a bi  añle ki baôma bé i njiiha ba bé lama kôs inyu ndéñbe yap. Mbus a bi bigdaha bo ndémbél yé, inyu unda bo le yak bo ba bé lama “bana ñem ngui!” (Yôhanes 16:1-4a, 33, MN.) Ngandak nwii mbus, banigil ba Yésu ba bi ke ni bisu i noñ ndémbél yé ni i unda ñem ngui. To hala kiki hala a bé lama lona bo ndééñga, ba bé nitna wada ni nuu mu njiiha ba bé boma.​—Lôk Héber 10:33, 34.

9. Lelaa di nla kôna ñem ngui u Yésu?

⁹ Nlélém jam inyu yés, di noñ ndémbél i ñem ngui Yésu a bi yék. Kiki hihéga, i mbéda ñem ngui inyu nit bilôk bikéé bi bi mboma ndééñga inyu hémle yap. Ngim mangéda, bilôk bikéé gwés bi yé bi ke i mok ngi njom. Ngéda i nya jam i i mpam, di nlama boñ kii yosôna di nla inyu yap, to ibale i nsômbla le di sôñ bo bisu bi bakéés. (Filipi 1:14; Lôk Héber 13:19) Njel ipe di nla gwélél inyu unda ñem ngui i yé le, di ke ni bisu i téé likalô ni “makénd.” (Minson mi baôma 14:3) Kiki Yésu, di nyoñ makidik ma ngui i añal nwin u Ane, to ibale bôt ba nkolba bés tole ba ntééñga bés. Ndi ngim mangéda, ñem ngui u nla héñél bés. Kii di nlama boñ ha ngéda i?

10. Mu dilo ilole di ntégbaha Mbigda i nyemb Yésu, kii di nlama boñ, inyuki?

¹⁰ Di nla kéñbaha ñem ngui di gwé ngéda di nsoñda botñem binoñ bi Kristô bi nti bés. (Yôhanes 3:16; Éfésô 1:7) Mu dilo ilole di ntégbaha Mbigda nyemb Yésu, di gwé pôla i tôbôbôbô i kônde diihe binoñ. Mu ngéda i yosôna, di ke ni bisu i boñ lisoñgol li Bibel li ngéda i Mbigda nyemb Yésu, di soñdaga ki ikété masoohe i mam ma bé kéña nyemb yé. Ngéda di ga kodba inyu Bilôp bi Nwet, di  ga tibil nok ngobol i bret ni i wai, di ga tibil ki nok mahee ma sesema i tôbôtôbô i. Ngéda di ndiihe i yom Yésu bo Yéhôva ba bi boñ inyu yés, di nogok ki lelaa hala a yé bés nseñ, bés ni i bôt di ngwés, botñem yés i nkônde yila siñ, hala a ntinde ki bés i hônba ipam lisuk ibabé i kon woñi.​—Lôk Héber 12:3.

11-12. Kii di ma nigil ipam hana liben lini?

¹¹ Ipam hana liben lini, di nigil le Bilôp bi Nwet bi nhôñlaha ndik bé bés mahee ma binoñ, ndi yak bilem bi tôbôtôbô bi Yésu kiki bo suhulnyuu ni ñem ngui. Kinje maséé i yi le Yésu a’ ke ni bisu i unda bilem bini mu kii a mba Prisi yés keñi, nu a nyemhe inyu yés! (Lôk Héber 7:24, 25) Inyu unda le di nti toi mayéga, di nlama téñbe i bigda nyemb Yésu kiki a bat. (Lukas 22:19, 20) Di mboñ hala i kel i nkwo i hilo 14 hi sôñ Nisan, hilo hi nwii hi, hi nlôôha ba mahee.

¹² Ngéda di nhoñol kiki Bilôp bi Nwet bi mbéna tagbe, hala a niiga bés le Yésu a gwé lem ipe i i bi tinde nye i wo inyu yés. Ngéda a bé mut binam hana isi, a bé yiba inyu lem i. Imbe i lem?

13. Lelaa Yôhanes 15:9 ni 1 Yôhanes 4:8-10 bi ntoñol gwéha Yéhôva bo Yésu ba bi unda, njee a ñôt nseñ ni gwéha yap?

¹³ Kiki Isañ Yéhôva, Yésu a bi unda ikété mam momasôna a bi boñ le a bé gwés bés i nya nlôôha. (Añ Yôhanes 15:9; 1 Yôhanes 4:8-10.) Ni ki le, Yésu a bi neebe i ti niñ yé inyu yés ibabé le mut a nyégsa nye. Too di yé i nsoñgi u minhook tole u “mintômba mimpe,” di ñot nseñ ni gwéha Yéhôva bo Man wé ba bi unda ni njel i sesema i. (Yôhanes 10:16; 1 Yôhanes 2:2) Ni hoñol yaga bret ni wai di ngwélél i Bilôp bi Mbigda nyemb Yésu; bi ñunda le Yésu a bé gwés banigil bé, a diihege ki bo. Lelaa hala?

14. Lelaa Yésu a bi unda le a bé gwés banigil bé?

¹⁴ Yésu a unda ki banigil bé ba ba yé minhook gwéha, ngéda a bé téé Bilôp bi Nwet. Iloole a bat bo le ba boñ ngôôba keñi, ba bé le ba gwélél i ndék yom i je ba bééna inyu lôôs gwo. Kiki ngéda i bé tagbe, minhook mi mi bé lama bigda i nyemb i hiki nwii, to hee homa ba bé lama ba, yak i ndap mok. (Masoola 2:10) Baa ba bi pam i nôgôl Yésu? Ñ!

15-16. Lelaa lôk kéé ihogi i bi tégbaha Bilôp bi Nwet to hala kii i bé i mok?

¹⁵ Ibôdôl ha ngéda i letee ni len, bañga bikristen i mboñ biliya i bigda nyemb Yésu. Bi noñ biniigana Yésu a bi yék kiki la yap, ngéda bi ntégbaha Bilôp bi Nwet, bebek ngim mangéda ikété mandutu. Di béñge dihéga dini di noñ. Ngéda mankéé wés Harold King a bé i ndap mok nyetama i Kina, a bi léba ngim likeñge inyu tégbaha Bilôp bi Nwet. A bi kôôba bret ni wai bisôsôli, ni gwom a bééna ha i moo. A bi tibil ôt yak minsoñgi inyu yi imbe kel i bé lama ba hilo hi Bilôp bi Nwet. Ngéda ngeñ i bi kola inyu tégbaha Mbigda nyemb Yésu, a bi​—hala wee nyetama mu mok​—tôp hiémbi, a soohe, a ti ki nkwel u Bilôp.

¹⁶ Ndémbél ipe ini. Ngim ntôñ bisita u u bé i mok mi mbanda i Jaman ngéda Gwét bi Ntôla II bi bé nayak, bi bé le bi nimis niñ yap inyu bigda Bilôp bi Nwet. Kiki bret ni wai bi mbat bé ngôôba keñi, ba bi la tégbaha Mbigda nyemb Yésu bisôsôli. Ba nkal le: “Di bi kodba homa wada, di ték man beñgi nhôk ni mboñ u mpôp i ñemkété wés, di kés bret ni wai mu ngii. Tjañdre yon i bé béyés i  tuñ ba bi ha bés, inyule maléktrik ma bé le ma boñ le ba hige bés. . . . Di bi tiimba ti bésbomede nkikip yak Isañ wés nungingii ni njel masoohe, di kal nye le d’a gwélél nye ni ngui yés yosôna inyu nit kahap Yé.” Kinje hémle i tôbôtôbô ba bi unda! Ni, kinje gwéha keñi Yésu a bi unda ngéda a bi neebe le di lôôs Mbigda nyemb yé to ikété mangéda mabe!

17. Mambe mambadga di nla badba?

¹⁷ Nano nu Mbigda nyemb Yésu i nkôôge bebee, di nla badba le: ‘Lelaa me nla odop mu mabal ma Yésu inyu jam li unda gwéha? Baa me ntôñ toi ni mam ma nkon lôk kéé yem i mbuu ngôñ, iloo ma ma nkon me ngôñ? Baa me nlôôha bémél lôk kéé yem i bôlôm ni i bôda iloo héga, tole me nyi minwaa nwap?’ Di nla ke ni bisu i kôna Yésu, mu kii di ‘ntôñ lôk kéé yés.’​—1 Pétrô 3:8.

18-19. (a) Di nla ba nkwoog nkaa ni kii? (b) Mambe makidik u nlama yoñ?

¹⁸ I oda Kristô a bi ti le di tégbaha Mbigda i nyemb yé i ga nom ha bé. Ngéda Yésu ‘a ga loo’ i njiiha keñi, a’ kot “mintebek nwé” mi mi yii hana isi inyu ke i ngii, ha nyen Mbigda nyemb yé y’a mal.​—1 Korintô 11:26; Matéô 24:31.

¹⁹ Yak ngéda di ga lôôs ha bé Bilôp bi Mbigda nyemb Yésu, di nyi ntiik le bagwélél ba Yéhôva b’a ba maséé i bigda Bilôp bi Nwet kiki yimbne i suhulnyuu keñi, i ñem ngui ni i gwéha mut binam numpe a mah bana bé ndik Yésu. Ha ngéda i, i bet ba bi yi, ba tégbaha ki Bilôp bi tôbôtôbô bini, b’a añle gwo bôt bape inyu loñge yap bobasôna. Ndi inyu ôt nseñ ni Bilôp bi ibôdôl nano, di nlama yoñ makidik i kôna ndémbél i suhulnyuu, i ñem ngui ni i gwéha i Yésu. Ibale di mboñ hala, di nla ba nkwoog nkaa le Yéhôva a’ bom bés.​—2 Pétrô 1:10, 11.