1. Mambe makidik bôt bobasôna ba nlama yoñ?

 MUNU ngéda ini, hiki mut a nlama yoñ makidik. Baa di ga gwélél Yéhôva Djob, Ñane mam momasôna, tole di ga gwélél ñoo wé le Satan Nsohop? Di nla ndik pohol wada wap. Ni le, inoñnaga ni makidik di ga yoñ, di ga kôhna niñ boga tole tjiba i boga. (Matéô 25:31-33, 46) Mu “njiiha ikeñi” nyen bôt ba ga kôhna yimbne, bana inyu tohi, bana bape inyu tjiba.​—Masoola 7:14; 14:9-11; Ézékiel 9:4, 6.

2. (a) Kaat Lôk Héber 10:35-39 i nkal le di boñ kii? (b) Lelaa kaat Masoola i nla hôla bés?

² Añ Lôk Héber 10:35-39. Ibale u mpohol i nit énél i Yéhôva, wee u nyoñ makidik malam. Hanano, u gwé ngôñ i hôla bôt bape i yoñ makidik malam. U nla gwélél biniigana bi kaat Masoola inyu hôla bo. I kaat i i nyeelene bés jam li ga pémél baoo ba Yéhôva, ndi i mpôdôl yak i bet ba nit énél i Djob ni bisai bi bi mbem bo. Hala a yé loñge jam le di wan biniigana bini. Ibale di mboñ hala, di ga ke ni bisu i gwélél Yéhôva. Di ga gwélél ki biniigana bi inyu hôla bôt bape i yoñ makidik malam ni i téñbe ni Yéhôva.

3. Kii di ga tehe munu yigil ini?

³ Munu yigil ini, di ga timbhe mana mambadga: Kii Yéhôva a nkôôbana i bet ba nit énél yé? Ndi kii y’a pémél i bet ba nit nuga i bikai i i nkôyôp tjôôm kaat Masoola i mpôdôl?

4. Bonjee ñôma Yôhanes a ntehe nyoo i ngii lôñni Yésu?

⁴ Ikété yiinda yada, ñôma Yôhanes a bi tehe mintôñ  mi bôt ima mi nkôhna niñ boga inyule mi nit énél i Yéhôva. Ntôñ u bisu, nsoñgi wé u yé 144 000 bôt. (Masoola 7:4) Ba nyôña hana ’isi inyu ane ni Yésu i ngii. Lôñ yada ni nye, ba ga ane hisi hiosôna. (Masoola 5:9, 10; 14:3, 4) Mu yiinda i, Yôhanes a ntehe bo ba téé bitétéé ni Yésu i Hikôa Siôn nyoo i ngii.​—Masoola 14:1.

5. Ndék ngéda, kii y’a pémél minhook mi yii hana ’isi?

⁵ I bôdôl i ngéda baôma ikepam munu ngéda yés, dikôô ndi dikôô di bôt di ma pohlana inyu jôp mu nsoñgi u 144 000 bôt. (Lukas 12:32; Rôma 8:17) Ndi ba bi yis Yôhanes le mu nsoñgi u, ndik minyégla, hala wee ndék bôt yon i mba i ngi yii hana ’isi i dilo di nsôk. Ndék ngéda ilole njiiha ikeñi i mbôdôl, i “bôt ba nyégle” ba ga kôhna “béndél” i nsôk i i yé yimbne le Yéhôva a mal pohol bo. (Masoola 7:2, 3; 12:17) Ha ni nyen, i ngéda njiiha ikeñi, minyégla mi, mi ga yôña i ngii, mi kee mi koba mii minhook mimpe, mi mi yé mu 144 000. Ba ga ane ni Yésu mu Ane Djob.​—Matéô 24:31; Masoola 5:9, 10.

6-7. (a) Umbe ntôñ u bôt Yôhanes a yé tehe nano, imbe ndimbhe a nkôs? (b) Inyuki kaat Masoola pes 7 i yé nseñ inyu minyégla ni inyu “limut likeñi”?

⁶ Yôhanes a mbôk a tehe i bôt ba bi pohlana inyu ke i ngii, nano a yé tehe “limut likeñi.” Maselna ni 144 000 bôt, mut to wada a bé bé le a soñgol limut likeñi li. (Masoola 7:9, 10) I bôt ba ba yé bonjee? Ini ndimbhe yon Yôhanes a bi kôs: “Bana bon ba nlôl i njiiha ikeñi, ba bi jôwa ki mimbôñgô nwap mi mambot, ba yilha ki nwo puba ikété matjél ma Man ntômba.” (Masoola 7:14) “Limut likeñi” lini li ga pei njiiha ikeñi; li ga kôdôl hisi, li nok ki lingoñoo inyu ngandak bisai.​—Tjémbi 37:9-11, 27-29; Bingéngén 2:21, 22; Masoola 7:16, 17.

⁷ To ibale u mpohlana inyu ke i ngii, tole w’a yégle hana ’isi, baa u ntehe wemede mu bôt kaat Masoola pes 7 i mpôdôl? U nlama. Kinje bisai bi mbem mini mintôñ ima mi bagwélél ba Djob! Maséé moñ ma ga yamb mayoo inyule u mpohol énél i Yéhôva. Ndi kii ipe kaat Masoola i mpot inyu njiiha ikeñi?​—Matéô 24:21.

8. (a) Kii i ga ba bibôdle bi njiiha ikeñi? (b) Lelaa libim li bôt li ga boñ ha yo ngéda?

⁸ Kiki di bi tehe i yigil i ntagbe, ndék ngéda, minlôñ mi m’bô mi nkoñ ’isi, mi ga leñ Babilôn Nunkeñi gwét, hala wee bikwéha bi bibase gwobisôna, inyu mélés gwo. (Masoola 17:16, 17) I jam li jon li ga ba bibôdle bi njiiha ikeñi. Baa hala a ga tinde mamut makeñi i lo yak Yéhôva inyu bégés nye? Heni. Maselna ni hala, kaat Masoola pes 6 i ñéba le mu njiiha i, i bet ba ngwélél bé Yéhôva ba ga ke i yéñ lisolbene i minlôñ mi m’bô mi nkoñ ’isi ni yak bôt ba nyuñga bakeñi, i gwom bi gwon Bibel i nkal le bi yé kiki dikôa. Inyule ba ga tjél nit Ane i Djob, jon Yéhôva a ga tehe bo kiki bôt ba nkolba nye.​—Lukas 11:23; Masoola 6:15-17.

9. Mu njiiha ikeñi, lelaa litén li Yéhôva li ga ba maselna ni bana bôt bape, kii i ga pémél bo?

⁹ Mu mangéda mabe ma njiiha ikeñi, ntôñ u bagwélél ba Yéhôva u ga ba maselna ni bana bôt bape. Botama bon ba  ga ba ba mboñ sômbôl i Yéhôva Nyambe hana ’isi, botama ki bon ba ga tjél bégés “nuga i bikai.” (Masoola 13:14-17) Inyu hala nyen bakolba Yéhôva ba ga lôôha oo bagwélél ba Djob. I ôa i y’a gwel bo kiki njék; yon i ga tinde biloñ ni matén i leñ bagwélél ba Djob bobasôna hana ’isi gwét. I gwét bi gwon mbañ i Bibel i nsébél le gwét bi Gôg nu Magôg.​—Ézékiel 38:14-16.

10. Inoñnaga ni kaat Masoola 19:19-21, lelaa Yéhôva a ga timbhe i bet ba ga leñ bagwélél bé gwét?

¹⁰ Lelaa Yéhôva a ga timbhe i bet ba ga leñ bagwélél bé gwét? A nkal le: “Hiun hiem hi ga kala.” (Ézékiel 38:18, 21-23) Masoola pes 19 a ntoñol i jam li ga noñ. Inyu sôñ bôt bé, Yéhôva a ga ep Man wé inyu tjé baoo ba litén jé. Mu gwét bi, Yésu a ga ba lôñni “mintôñ mi gwét mi ngii” hala wee biañgel bi Djob lôñ yada ni ini 144 000 bôt. (Masoola 17:14; 19:11-15) I gwét bi, bi ga sôk lelaa? I bôt bobasôna ba nkolba Yéhôva, bo lôñni minlôñ nwap, ba ga tjiba, tjiba yosôna!​—Añ Masoola 19:19-21.

11. Limbe jam li tôbôtôbô li yé nlôm jam mu kaat Masoola?

¹¹ Noode hégda lelaa bagwélél ba Djob hana ’isi ba ga nôgda, i tehe le ba mpei, ki le baoo ba Djob bobasôna ba ntjiba! Kinje maséé homa nyensôna! To hala kiki mbok yosôna nyoo ngii i ga yôgbe ni maséé inyu tjiba i Babilôn Nunkeñi, lini lisañ, jam lipe li ga boñ le maséé ma yamb mayoo. (Masoola 19:1-3) I maliga, i jam li jon li yé toi nlôm jam mu kaat Masoola​—“ngand libii i Man ntômba.”​—Masoola 19:6-9.

12. Inoñnaga ni kaat Masoola 21:1, 2, imbe ngéda libii li Man ntômba li ga ba?

¹² Imbe ngéda libii li, li ga ba? I bôt ba yé mu nsoñgi u 144 000 bôt, bobasôna ba ga ba i ngii nwaa le gwét bi Armagédôn bi mbôdôl. Ndi ha yo ngéda bé nyen libii li ga ba. (Añ Masoola 21:1, 2.) Libii li Man ntômba li ga ba ndik i mbus gwét bi Armagédôn, i ngéda ñoo Djob to wada a ga ba ha bé.​—Tjémbi 45:4, 5, 14-18.

13. Kii libii li Man ntômba li nkobla inyu bet ba ga biiba?

¹³ Kii libii li Man ntômba li nkobla inyu bet ba ga biiba? Nlélém kiki libii li ñat bôt iba, munlôm ni muda, hala nyen libii li tôbôtôbô lini li ñat Kiñe Yésu Kristô, ni “sombo” yé, hala wee 144 000. Libii lini li yé nlôm jam; jon li ntek hikuu hi ane i mondo, i i ga énél hisi 1 000 hi nwii.​—Masoola 20:6.

14-15. Kaat Masoola pes 21 i nhégha 144 000 ni kii? (Béñge titii i lipep li bisu.)

¹⁴ I mbus, kaat Masoola pes 21 i nhégha ini 144 000 bôt ni tison i mbai ni bilama, i nsébla le “Yérusalem yondo.” (Masoola 21:2, 9) I tison i, i yé ntegek i ngii hikuu hi 12 ngok, “12 môl ma 12 baôma ba Man ntômba ma bé ntilga mu ngok” i. Inyuki i jam lini li bé lama ôt mahoñol ma Yôhanes? Inyule a bi tehe yak jôl jé ntilga mu ngok yada. Kinje bisai!​—Masoola 21:10-14; Éfésô 2:20.

¹⁵ I tison i tôbôtôbô ini i mpôna bé tison ipe yo ki yo. Nlôm njel nu tison a bé ni bañga gôl, manwemel mé ma bé 12 perl, mintén mi tik ngok nwominsôna  mi bé lémés hikuu hi tison ni lipénd jé, tison yomede mede i bak nhegek loñge bipes gwobisôna. (Masoola 21:15-21) Ndi to hala, i bé nene wengoñle le jam li bé hañ mu! Yimbe bibañga bi Yôhanes bi bi noñ ha: “Me bi tehe bé témpel mukété, inyule Yéhôva, Nyambe Nu ngui yosôna a yé témpel i tison, bona Man ntômba. Tison i gwé bé to ngôñ ni hiañgaa, to sôñ, inyu béyéi yo, inyule lipém li Nyambe jon li nti yo mapubi, Man ntômba nyen a yé lambe yé.” (Masoola 21:22, 23) I bôt bana Bibel i nsébél le Yérusalem yondo, ba ga ba ni Yéhôva, ba tehge su wé. (Lôk Héber 7:27; Masoola 22:3, 4) Jon, Yéhôva bona Yésu bon ba yé témpel i tison i.

16. Bimbe bisai bôt ba binam ba ga kôhna mu énél i hikôô hi nwii i Ane Djob?

¹⁶ Kinje maséé bikristen bi bi yé nhook bi nôgda i ngéda bi nhoñol ini tison. Ndi botama bé; yak i bet ba gwé botñem i niñ boga hana ’isi, yak bo ba gwé manjom i séé. Mu énél i hikôô hi nwii i Ane Djob, Yérusalem yondo i ga kôp bisai bi mbuma ñañ hana ’isi. Yôhanes a ntehe bisai bi bi nkuli kiki “lom malép ma niñ.” Bipes bi lom gwo biba bi gwé “bie bi niñ,” bi tinak tjai “inyu mbuubaha biloñ.” (Masoola 22:1, 2) I bôt bobasôna ba ga ba i niñ ha yo ngéda, ba ga bana pôla i ôt nseñ ni bitelbene bini. Bôt ba manôgla ba ga yila peles, ndék ni ndék. Makon, njôghe, ni gwiiha bi ga ba ha bé.​—Masoola 21:3-5.

17. Kiki kaat Masoola 20:11-13 i ñéba, bonjee ba ga kôhna bisai bikeñi mu Ane i hikôô hi nwii?

¹⁷ Bonjee ba ga kôhna bisai bikeñi bini? Bôt ba bisu bisu ba ga ba limut likeñi, li li ga pei i gwét bi Armagédôn, bo lôñni i bon ba yé le ba gwal i mbok yondo. Ndi kaat Masoola pes 20 i mbôn yak le bawoga ba ga tuge. (Añ Masoola 20:11-13.) Bôt ba “téé sép” hala wee ba ba bi téñbe ni Yéhôva, ni ba ba “téé bé sép,” hala wee ba ba bi bana bé pôla i yi Yéhôva ba ga tuge. (Minson mi baôma 24:15; Yôhanes 5:28, 29) Baa hala a nkobla le bawoga bobasôna ba ga tuge inyu niñ hana ’isi, mu énél i hikôô hi nwii? Heni. I bôt ba bi tjél gwélél Djob ilole ba nwo, ba ga témb ha bé  i niñ. Ba bi bana i nsima nkeñi u, ndi ba yan wo, makidik map ma ñunda le ba kôli bé niñ i Paradis hana ’isi.​—Matéô 25:46; 2 Tésalônika 1:9; Masoola 17:8; 20:15.

18. Lelaa mam ma ga ba hana ’isi i mamélél ma 1 000 hi nwii?

¹⁸ I mamélél ma 1 000 hi nwii, i bôt bobasôna ba ga ba hana ’isi ba ga mal yila peles. To wada a ga nôgda ha bé bikuu bi nlôl i béba di bi kôdôl ni njel Adam. (Rôma 5:12) Ndiihe yosôna i nlôl i béba i Adam y’a ba ha bé. Jon Bibel i nkal le i bôt ba ga ba hana ’isi ba ga ‘kôhna niñ’ hala wee libak li peles i mamélél ma 1 000 hi nwii.​—Masoola 20:5.

19. Inyuki manoodana ma nsôk ma ga ba nseñ?

¹⁹ Di nyi le Yésu a bi kolba Satan, nu a bé yéñ tinde nye i boñ béba. A bi tééda telepsép yé ikété manoodana. Baa, i ngéda i bôt bana bobasôna ba ga ba peles, ba ga ba bebee i boñ kiki Yésu, i ngéda Satan a ga noode bo? I mbadga i, hiki mut a ga timbhe yo, i ngéda b’a pémés Satan i mok i mamélél ma 1 000 hi nwii. (Masoola 20:7) I bôt ba ga éba toi le ba tiñi ni Yéhôva mu manoodana ma nsôk mana, bon ba ga kôhna bom i niñ boga, lôñni bañga kunde. (Rôma 8:21) I bet ba ga ndogbene Yéhôva, ba ga kôhna tjiba i boga, lôñ yada ni Nsohop ni mimbuu mimbe nwé.​—Masoola 20:8-10.

20. Kii u nôgda mu ñem woñ inyu i mbañ ini yosôna di nwan mu kaat Masoola?

²⁰ Kii u nôgda mu ñem woñ, i mamélél ma gwigil bini, i het di wan ndék biniigana bi kaat Masoola? I mbañ ini yosôna di nwan, baa u yé maséé i tehe lelaa biyônôl gwap bi ga lona we bisai? Baa hala a ntinde bé we i naña bôt bape, le ba loo, di bégés Djob ntôñ? (Masoola 22:17) Miñem nwés mi nyon ni maséé mu kiki di nwan mana mam ma tôbôtôbô ma ma ga bôña dilo di nlo, jon di gwé ngôñ i tiimba bini bibuk bi ñôma Yôhanes le: “Amen! Lok, a Nwet le Yésu.”​—Masoola 22:20.