1-2. Mambe mandutu ngandak Mbôgi Yéhôva i mboma?

ÑÔMA Paul a bi ti Timôtéô makénd le a gwel nson wé i nya i yôni. (2 Timôtéô 4:5) Maéba ma Paul ma, ma mbéñge yak bés i len ini. Jon di mboñ kii yosôna di nla i nson Djob. Ndi hala a ta bé bun. Ngandak lôk kéé i bôda ni i bôlôm i nkon woñi i téé likalô. (2 Timôtéô 4:2) Kiki bo bilôk bikéé bi bi niñ biloñ i het nson wés u ta bé kunde, tole i het ba bi tééne bés ngim minwaa inyu nson likalô. Bilôk bikéé bi bi nke ni bisu i téé likalô tolakii ba nyi le ba nla gwel bo, ba ha bo i mok!

² Bagwélél ba Yéhôva ba mboma ngandak mandutu ma ma yé le ma tômbôs bo. Kiki hihéga, ngandak ikété yap i nlama sal ni ngui inyu tééda mahaa map. Ba ngwés yaga tégbaha ngandak ngéda i nson likalô, ndi i mamélél ma sonde, ba yé ba ba nwaak ngandak. Bape ba nla ha bé téé likalô kiki ba bé boñ inyule ba nkon tole ba ñun; bebek to pam mandap, ba nla bé. Bape ki ba nhoñol le ba gwé bé nseñ i mis ma Yéhôva. Sita Maria, * nu a niñ i Moyen Orient, a nkal le: “Me nlôôha jôs mahoñol mabe kayéle me yé me ba ntombok ngandak. Hala a ntééñga me ngandak, inyule me nyi le me lam-ga gwélél ngéda i ni i ngui i, i nson likalô.”

3. Kii di ga tehe munu yigil ini?

³ Yéhôva a nla ti bés ngui i boñ kii yosôna di nla inyu ke ni bisu i gwélél nye, to ikété mandutu. Di tehe ndugi lelaa Yéhôva a bi ti Paul bo Timôtéô ngui i kena nson wap ni bisu, tolakii ba bé boma mandutu. I mbus di ga tehe lelaa Yéhôva a nla hôla bés i len ini.

4. Mambe mandutu Paul a bi boma?

⁴ Paul a bi boma ngandak mandutu. A bééna ngôñ ni ngui i Yéhôva i ngéda i bé i pam le baoo bé ba tumb nye, ba ha nye i mok ni i ngéda ba bé yeñ nol nye. (2 Korintô 11:23-25) Paul a bi sôô bé le i bé i pam le a jôs mahoñol mabe. (Rôma 7:18, 19, 24) A bi hônba béba kon i i bé tééñga nye kiki ‘loo ikété minsôn,’ jon a bi yemhe Yéhôva le a héya nye yo.​—2 Korintô 12:7, 8.

5. Umbe nson Paul a bi gwel tolakii a bé boma mandutu?

⁵ Yéhôva a bi ti Paul ngui i kena nson wé ni bisu tolakii a bé boma mandutu. Hégda i bôlô yosôna a bi sal. Kiki hihéga, i ngéda a bé i mok i Rôma, a bi tééne ngandak bôt likalô, yak bangomin. (Minson mi baôma 28:17; Filipi 4:21,22) A bi todol bé to bisônda bi bi bé tat kaisa, ni i bôt bobasôna ba bé yuuga nye i mok. (Minson mi baôma 28:30, 31; Filipi 1:13) Mu ngéda i nyen Paul a tila bikaat bi bi bi hôla bikristen ha ngéda i. U héya hala, ndémbél i Paul i bi lédés likoda li Rôma, ñ bilôk bikéé bi bi kôs “ngandak makénd i añal bañga i Nyambe ibabé woñi.” (Filipi 1:14) Tolakii i bé i pam le Paul a boma mandutu ma ma bé kéñ nye i sal kiki yôha, a bé boñ kii yosôna a bé la mu libak jé, hala a bi boñ le “ñañ nlam u ke ni bisu.”​—Filipi 1:12.

6. Inoñnaga ni kaat 2 Korintô 12:9, 10, kii i bi hôla Paul i nyônôs nson wé?

⁶ Paul a bé yi le ngui i Yéhôva yon i bi hôla nye i boñ i mam ma momasôna. Jon a bi kal le ikété ‘bomb yé nyen ngui i Nyambe i nene i nya i yôni.’ (Añ 2 Korintô 12:9, 10.) Yéhôva a bi gwélél mbuu mpubi wé inyu hôla Paul i gwel nson wé i nya i yôni, tolakii i bé i pam le ba tééñga nye, ba ha nye i mok, tole a boma mandutu mape.

7. Mambe mandutu Timôtéô a bi boma ma ma bé le ma kéñ nye i gwel nson wé?

⁷ Yak i mañge wanda nunu le Timôtéô, nu a bé solôñ i Paul, a bi bana ngôñ ni mahôla ma Djob inyu gwel nson wé. A bi éga Paul mu i hônd yé likalô ikeñi. U héya hala, Paul a bi om nye i yuuga makoda ni i lédés  mo. (1 Korintô 4:17) Timôtéô a bé le a nôgda wee a kôli bé. Bebek inyu hala nyen Paul a bi ti nye mana maéba le: “U nwas bañ kekikel le mut a yan we inyule u yé mañge wanda.” (1 Timôtéô 4:12) Ni ki le, mu mangéda ma, Timôtéô a bé ‘béna makon,’ ma ma bé nye kiki loo minsôn. (1 Timôtéô 5:23) Ndi Timôtéô a bé yi le mbuu u Yéhôva u ga hôla nye i téé likalô, ni i sélél bilôk bikéé gwé.​—2 Timôtéô 1:7.

8. Lelaa Yéhôva a nlédés bagwélél bé i len ini?

⁸ I len ini, Yéhôva a nti bagwélél bé “lipémba li li nloo li mut binam” inyu hôla bo i téñbe ni nye. (2 Korintô 4:7) Di béñge manjel ma-na Yéhôva a ngwélél i len ini inyu lédés bés ni hôla bés i téñbe ni nye: Masoohe, Bibel, bilôk bikéé ni nson wés likalô.

9. Lelaa masoohe ma nla hôla bés?

⁹ A nlédés bés ni njel masoohe. Kiki kaat Éfésô 6:18 i nkal, Paul a nti bés makénd i soohe “ngéda yosôna.” Ibale di mboñ hala, Nyambe a ga hôla bés. Mankéé Jonnie, nu a yé i Bôlivia a bi tehe woo u Yéhôva ngéda a bé tégbaha mangéda mabe kiyaga. Nwaa ni bagwal bé ba bi bep kwo kon i nlélém ngéda. I bé bé jam li ntomb inyu Jonnie i tééda bo. Sôk i nsôk, nyañ a bi wo, ndi nwaa bo isañ ba bi mbôôp i mbus ntandaa ngéda. I ngéda Jonnie a mbigda i jam li i len ini a nkal le: “Ngéda me bé ikété njiiha, i yom i bi hôla me i bé le, me bééna lem i yible Yéhôva ñem wem ikété masoohe.” Yéhôva a bi ti Jonnie ngui i hônba i ndutu i. Ba bi léba le nyañ mañ wada i loñ Bôlivia le Ronald, a bééna kon u pos. Mbus sôñ yada, a wo. Kii i bi hôla Ronald i hônba ndutu i? A nkal le: “Ngéda me nsoohe Yéhôva, me nkal nye kii yosôna me nôgda. Me nyi le a nok me iloo bôt bobasôna, iloo yak memede.” I yé i pam ngim mangéda le mandutu ma yuu bés kayéle di yi bé kii di kal ikété masoohe. Ndi Yéhôva a ngwés le di soohe nye to ibale di nhañ bibuk inyu toñle nye i yom di nôgda.​—Rôma 8:26, 27.

10. Inoñnaga ni kaat Lôk Héber 4:12, inyuki di nlama soñgol Bibel ni ôt pék mu?

¹⁰ A nlédés bés ni njel Bibel. Inyu bana ngui i hônba mandutu ni kôs hogbe, Paul a bé nigil Bitilna, yak bés di nlama boñ nlélém. (Rôma 15:4) Mu kii di nigil Bibel, di soñdaga yo, Yéhôva a nla hôla bés i yi lelaa i yom di ñañ i nla hôla bés i niñ yés. (Añ Lôk Héber 4:12.) Mankéé Ronald nu di mbôk di sima a nkal le: “Me yé maséé i añ Bibel hiki kôkôa ilole me nañal. Me ñôt pék mu bilem bi Yéhôva, ni mu mam a mboñ inyu yoñ ndun ni bagwélél bé. Hala a nhôla me i témbna ngui yem.”

11. Lelaa Bibel i bi hôla sita yada i i bi nimis nlô wé?

¹¹ Lem i soñda i mam di ñañ i Bibel i nhôla bés i béñge mandutu ma nkwél bés ni mis ma mondo. Di tehe lelaa Bibel i bi hôla yik muda yada. Mañ wada u bi ti nye makénd i añ kaat Hiôb, ni i ôt pék mu. Mu kii a bé nigil yo, a bi bôk ndugi a yahal Hiôb. Mu kii a bé soñda, a nyaa ndik a nkal Hiôb le: “A Hiôb, wéi, yak we waa njelel!” I mbus ngéda a bi nôgda le, maboñok mé ma  bé pôna ma Hiôb. Lisoñgol li li bi hôla nye i kodol litehge jé li mam, li hôla ki nye i hônba nyemb nlô wé.

12. Lelaa Yéhôva a ngwélél bilôk bikéé inyu lédés bés?

¹² A ngwélél bilôk bikéé inyu lédés bés. Njel ipe i Yéhôva a ngwélél inyu lédés bagwélél bé i yé bikristen bipe. Paul a tila le a bééna ngôñ ikeñi i tehe lôk kéé yé i bôda ni i bôlôm, inyu boñ le ba “tina makénd, hiki wada a lédhak hémle i nuu numpe.” (Rôma 1:11, 12) Mankéé Maria nu di mbôk di sima, a ngwés ngéda a yé ni bilôk bikéé. A nkal le: “Yéhôva a bi gwélél bilôk bikéé bi bôda ni bi bôlôm bi bi bé yi bé to mandutu me bé boma. Ba bé lédés me ni bibuk gwap, ba tilnaga me, me bééna toi ngôñ ni mahôla ma. Me bi nôgda yak hogbe ngéda me bi kwel ni bilôk bikéé bi bôda bi bi bi boma minlélém mi mandutu, téntén ngéda me bi yi lelaa ba bi yémbél mo. Yak mimañ mi bi hôla me i nok le, bilôk bikéé bi bôda ni bi bôlôm bi ngwés me ngandak.”

13. Lelaa di nla tina makénd i makoda?

¹³ Ni njel makoda, di nlédés bilôk bikéé gwés, yak bo ba lédhak bés. Ngéda u nke makoda, unda lôk kéé ipe ni bibuk gwoñ le u ngwés bo, u kal ki bo le u yé maséé ni biliya ba mboñ. Kiki hihéga, ngéda mañ wada le Peter a bé kwel ni sita yada i i néñés bon bé nyetama ilole likoda li mbôdôl, a kal nye le: “U nla bé yi lelaa me yé me ba maséé i tehe we makoda. U mboñ biliya i ba ha ni bon boñ basamal, u nyoñ ki bitelbene i hôla bo i timbhe.” Ngéda i sita i i bi nok hala, mis ma yek nye ni gwiiha, a timbhe mañ u le: “U nla bé yi lelaa hala a ntihba me i nok hala.”

14. Lelaa likalô li nhôla bés?

¹⁴ A nlédés bés ni njel nson likalô. Ngéda di ntééne bôt bape likalô, hala a nlédés bés to ba neebe, to ba neebe bé. (Bingéngén 11:25) Sita yada le Stacy a bi nôgda i jam li. Ngéda ba bi pémés mut wé lihaa wada ntôñ, hala a bi tééñga nye ngandak, a kahal badba le: ‘Kii me bé le me boñ inyu hôla nye?’ A bé tégbaha ngéda yé yosôna i hoñol i jam li. Kii i bi hôla nye i pamba? Likalô! Ngéda a bé likalô, mahoñol mé momasôna ma bé ndigi le a hôla bôt i yi maliga. A nkal le: “Mu mangéda ma, Yéhôva a bi hôla me i léba nnigil Bibel nu a bé pala hol. Hala a bi ti me makénd ngandak. I yom i nlôôha hôla me i yé nson likalô.”

15. I jam sita Maria a nkal i niiga kii we?

¹⁵ Inoñnaga ni libak jap, i nla pam le lôk kéé ihogi i nôgda wee ba nla ha bé téé likalô kiki ba gwéhék. Ibale u nôgda nlélém, u hôya bañ le Yéhôva a yé maséé ni kii yosôna u nla boñ nano. Di yoñ hihéga hi Maria nu di mbôk di sima. Ngéda a bi ke i yén i homa bôt ba mpot hilémb hipe, a bi nôgda le a bé la ha bé boñ ngandak mam. A nkal le: “I bibôdle, i yom me bé la boñ i bé ndigi le me ti ndimbhe i sem kwep, tole ngéda me bé likalô, me bé ndik le me añ nlôñ Bibel ni ti trakt.” A bé nôgda wee a kôli bé ngéda a bé hégha nyemede ni i bet ba mpot hilémb hi loñge. Ndi a bi héñha litehge jé li mam. A bi sôk nok le Yéhôva a nla gwélél nye to ibale a mpot bé hilémb hi loñge. A nkal le:  “Biniigana bi Bibel bi ntomb i nok, ndi bi nhéñha niñ i bôt.”

16. Kii i nla hôla i bet ba ngwés téé likalô ndi ba nla bé pam i ndap?

¹⁶ Yéhôva a nyi le lôk kéé ihogi i ngwés pam likalô, ndi i nla bé pam mandap map. A nla hôla bés i tééne bidokta ni i bet ba ntééda bakokon likalô. Ibale di nhégha i yom di mboñ nano ni i yom di bé boñ kôba, hala a nla tômbôs bés. Ndi ibale di nyi manjel Yéhôva a ngwélél inyu hôla bés i len ini, di ga bana ngui i yémbél to imbe ndutu di mboma ni maséé.

17. Inoñnaga ni kaat Ñañal 11:6, inyuki di nlama kena nson wés ni bisu to ibale di ntehe bé matam nano?

¹⁷ Ngéda di mbel mbôô i maliga, di nyi bé i i ga o, i nañ ki. (Añ Ñañal 11:6.) Kiki hihéga sita yada le Barbara nu a gwé 80 ma nwii, a mbéna téé likalô ni njel téléfôn tole biléta. Mu kaat yé yada, a bi som Nkum Ntat nu hilo hi bisu hi sôñ Matumb, nwii 2014, nu a bééna ño nkwel ni hop u Pulasi le: “Ce que Dieu a fait pour vous.” A bi yi bé le kaat yé i nkwo i moo ma babiina ba ba bé Mbôgi Yéhôva, ndi ba sune. Ba bi añ mbamble u ngandak ngélé. Munlôm a nok ndik wee nyen Yéhôva a bé pôdôs. Ha nyen ba bi bôdôl lo makoda, sôk i nsôk, i mbus 27 nwii, ba témb ba bôdôl yoñ ngaba i mam ma mbuu kiki yôha. Hégda maséé Barbara a bi nôgda i tehe i yom kaat yé yada ndigi, i bi boñ!

18. Kii di nlama boñ inyu kôhna ngui i Djob?

¹⁸ Yéhôva a ngwélél ngandak manjel inyu boñ le di kôhna ngui, kiki bo masoohe, Bibel, lôk kéé yés, ni likalô. Ngéda di ngwélél manjel ma, di ñunda le di gwé bôdôl le a nla hôla bés, ni le a ga boñ hala. Di kee ni bisu i bôdôl Tata wés nungingii ñem, nu a nkon maséé i “unda ngui yé inyu hôla bôt ba ngwélél nye ni ñem wap wonsôna.”​—2 Miñañ 16:9, MN.