1, 2. (a) Lelaa Mbôgi Yéhôva i ntehe Bibel? (b) Imbe pes i Bibel i nlôôha lémél we?

MBÔGI YÉHÔVA i ngwés Bibel. Bibel i nti bés biniigana di nla bôdôl ñem, bi bi nhôla ki bés i bana hogbe ni botñem. (Rôma 15:4) Di ntehe Bibel “kikii bañga i Nyambe, lakii i yé ntiik hala,” ha kiki minkodok mi mahoñol ma bôt ba binam bé.​—1 Tésalônika 2:13.

² Ngi pééna yo ki yo, bés bobasôna di gwé bipes bi Bibel bi nlôôha lémél bés. Bôt bahogi ba ngwés miñañ minlam ngandak, mi mi ñunda libak lilam li Yéhôva, li Yésu a bi tibil unda hana isi. (Yôhanes 14:9) Bape ba nlôôha gwés bipes bi Bibel bi bi mpôdôl mbañ​—bebeg kaat Masoola, ni dinyo malép i “mam ma nlama gwéla mbus ndék ngéda.” (Masoola 1:1) Njee ikété yés a mah kôs bé hogbe i nlôl i kaat Tjémbi, tole a bi ôt biniigana i kaat Bingéngén, bi a nla gwélél i niñ yé i hiki kel? Bibel i yé toi kaat inyu bôt bobasôna.

3, 4. (a) Lelaa di ntehe bikaat gwés? (b) Bimbe bikaat di nkôs inyu ngim bôt i tôbôtôbô?

³ Di ngwés Bibel, inyu hala nyen di ngwés ki bikaat gwés bi bi ntoñol Bibel. Kiki hihéga, di ndiihe bijek bi mbuu di nkôs ni njel bikaat, bon ba bikaat, mimbamble, ni gwom bipe. Di  nyi le bijek bi mbuu bi bi nlôl ni Yéhôva bi nhôla bés i yén péé ni i ba nuuak i pes mbuu, i nhôla ki bés ‘i bana hémle i ngui.’​—Titô 2:2.

⁴ U héya bikaat bi mbéñge Mbôgi Yéhôva yosôna, di nkôs ki bikaat bi ntoñol Bibel, bi bi ntilba ndugi inyu ngim bôt i tôbôtôbô. Ngim biniigana bi yé tôbôtôbô inyu boñge bawanda ni batitigi; bipe bi yé ntilbaga inyu nhôla bagwal bap. Libim li biniigana bi bi yé ntilbaga, ni bi bi yé i site internet yés, bi yé nkôôbaga inyu bôt ba ba ta bé Mbôgi Yéhôva. U ntén ngandak bijek bi mbuu bini, bi nhôñlaha bés le, Yéhôva a nyônôs mbônga wé le “a’ lôôhene biloñ gwobisôna ngand ndiba.”​—Yésaya 25:6.

5. Di nla ba nkwoog nkaa le Yéhôva a ndiihe kii?

⁵ Bebeg le, ngandak ikété yés i yé le i gwés bana ngandak ngéda inyu añ Bibel ni bikaat bi ntoñol yo. Di nla ba nkwoog nkaa le Yéhôva a ndiihe biliya gwés i yoñ makidik inyu tibil gwélél ngéda yés i añ ni nigil Bibel bésbotama. (Efésô 5:15, 16) I yé mbale le, i ta bé bun le di ti nlélém ngéda inyu bijek bi mbuu gwobisôna bi, di nla bana. Ndi, di nlama yoñ yihe ni lem ibe i i nla puhe bés. Imbe i lem?

6. Kii i yé le i kéñ bés i ôt nseñ ni bijek bi mbuu?

⁶ I nla pam le di les ngim nseñ inyule di ntehe wengoñle ngim bijek bi mbuu bi mbéñge bé bés. Kiki hihéga, kii di nlama boñ ibale nlôñ Bibel di yé añ, i nene bé bana maada ni niñ yés? Tole kii di nlama boñ ibale di ta bé ikété nsoñgi u bôt ngim kaat i mbéñge tôbôtôbô? Baa di gwé lem i añ i nya biniigana i ngii ni ngii, tole i pind gwo? Ibale ñ, di nla les biniigana bi bi nla bane bés nseñ ngandak. Lelaa di nla keñgle i hiandi hi? I ngii mam momasôna, hiki wada wés a nlama bii i mahoñol mé le Djob nyen a yé lingen li bijek gwés bi mbuu. Yéhôva a kal ni njel mpôdôl Yésaya le: “Men me yé Yéhôva Nyambe woñ, nu a niiga we, le hala a bahle we [bane we nseñ].” (Yésaya 48:17) I nla ba loñge le di wan mana maéba maa, ma ma nla hôla bés i ôt nseñ ni bipes bi Bibel gwobisôna, ni mi mintén mi bijek bi mbuu gwobisôna di nla bana.

7. Inyuki di nlama soñgol Bibel ni mahoñol ma néhi?

⁷ Soñgol ni mahoñol ma néhi. Bibel i nkal loñge loñge le: “Tilna yosôna i nlôl ni Nyambe, i mbahal.” (2 Timôtéô 3:16) Ni maliga, ngim bipes bi Bibel bi bi tilba ndugi inyu ngim mut tole ngim bôt. Inyu hala nyen, di gwé ngôñ i añ Bitilna ni mahoñol ma néhi. Mankéé nu munlôm wada a nkal le: “Ngéda me ñañ Bibel, me noode bigda le nlôñ me yé añ i nla bana ngandak biniigana me nla ôt.” A nkônde ki le: “I hoñol hala, i ntinde me i wan mam me yé añ sum sum inyu tehe i yom i nhoo bé nene i mis.” Ilole u mbôdôl añ Bañga i Djob, i yé loñge le u soohe inyu bana mahoñol ma néhi ni pék inyu yimbe biniigana Yéhôva a nsômbôl ti bés.​—Esra 7:10; añ Yakôbô 1:5.

8, 9. (a) Ngéda di nsoñgol Bibel, mambe mambadga di nlama badba? (b) Kii bilem bi mbuu mimañ mi nlama bana bi niiga inyu Yéhôva?

⁸ Badba mambadga. Mu kii u ñañ ngim nlôñ Bibel, yoñ ngéda i badba ngim mambadga kiki bo: ‘Kii unu nlôñ u niiga me inyu Yéhôva? Lelaa me nla bii biniigana bini i bisélél i niñ yem? Lelaa me nla gwélél gwo inyu hôla bôt bape?’ Ngéda di mbadba i nya mambadga i, di ga kônde ôt nseñ mu lisoñgol jés li Bibel. Kiki hihéga, hoñol bilem bi mbuu bi mbéda inyu mimañ mi likoda. (Añ 1 Timôtéô  3:2-7.) Kiki ngandak ikété yés i ta bé mimañ, di nla ndugi hoñol le i pes kaat ini i ntihba bé bés ngandak. Ndi, ngéda di nwan ndék mandimbhe mu mambadga ma noñ hana i si, di ga tehe le bilem bi mbuu bi gwobisôna, bi nla bane bés bobasôna nseñ ikété ngandak manjel.

⁹ Kii nlôñ unu u niiga me inyu Yéhôva? Ngeñ Yéhôva a ti nsoñgi bilem bi mbuu bini, a yelene bés le a mbat i bet ba ñéga likoda ngandak mam. A mbémél bo le ba ti ndémbél ilam, a mbat ki bo ñañga inoñnaga ni lelaa ba ntééda likoda, li “a bi somb ni matjél ma man wé nyemede.” (Minson mi baôma 20:28, MN) Yéhôva a gwé ngôñ le mimañ mi bane bés lisolbene. (Yésaya 32:1, 2) Ni litehge li, bilem bi mbuu Bitilna bi mbat le mimañ mi bana, bi nhôñlaha bés bôô ni ngélé yañen Yéhôva a ntôñ ni bés.

10, 11. (a) Ngéda di ñañ bilem bi mbuu mimañ mi nlama bana, lelaa di nla gwélél biniigana bi i niñ yés? (b) Lelaa me nla gwélél biniigana bi inyu hôla bôt bape?

¹⁰ Lelaa me nla bii biniigana bini i bisélél i niñ yem? Ngim mangéda, mankéé nu munlôm nu a bééga begee i likoda a nlama gwélél nsoñgi bilem bi mbuu bi Bibel i nsima inyu wanba nyemede, ni tehe hee homa a gwé mahéñha i boñ. Mankéé wada nu “a nsômbôl toi yila ntééda ntôñ” a nlama yoñ ngéda i wan bilem bi mbuu bini, inyu boñ biliya i yônôs gwo kingéda la yé. (1 Timôtéô 3:1, MN) Ni maliga, hiki kristen i nla ôt biniigana mu bilem bi mbuu bi yé nsim-nga i minlôñ mini, ni le bi njôp ikété nsoñgi u mam Yéhôva a mbémél bikristen gwobisôna. Kiki hihéga, bés bobasôna di nlama ba bôt ba nok bape, di bak ki bôt ba ñamb manyu map. (Filipi 4:5, MN; 1 Pétrô 4:7) Ibale mimañ mi yé “ndémbél inyu bémba,” di nla ôt biniigana mu ndémbél yap, di “kôna hémle yap.”​—1 Pétrô 5:3; Lôk Héber 13:7.

¹¹ Lelaa me nla gwélél gwo inyu hôla bôt bape? Di nla gwélél nsoñgi i bilem bi mbuu bi mimañ inyu hôla bôt ba ngwés maliga tole i bet ba nigil Bibel ni bés i tehe maselna ma yé ipôla mimañ mi likoda mi Mbôgi Yéhôva ni baéga ba ndôk bikristen. Ngéda di nsoñgol bilem bi, di nla ki hoñol biliya mimañ mi likoda mi mboñ inyu yés. I yoñ ngéda i bigda lelaa “ba ntumbba ni nson” ikété likoda li nkéñbaha lipém di nti bo. (1 Tésalônika  5:12) Kiki di nke ni bisu i ti batééda ntôñ ba ba ntumbba inyu yés lipém li li nlôl miñem nwés, la nyen yak maséé map ma nkôndba.​—Lôk Héber 13:17.

12, 13. (a) Ngéda di ngwélél bisélél di yé le di bana, mimbe mintén minyiña di nla boñ? (b) Ti hihéga hi ñunda lelaa mam ma sôli mbus ngim ñañ ma nla yelel biniigana bi bi nen-ge bé kunda yada?

¹² Boñ nyiña. Gwélél bisélél bi u nla bana. Di nla yéñ mam kiki bo:

• Njee a bi tila ini pes kaat i Bitilna?

• Hee homa ni ngéda imbe a bi tila yo?

• Mambe mam ma tôbôtôbô ma bi bôña ngéda i pes kaat i, i bi tilba?

I biniigana bi sôli kiki bi, bi nla hôla bés i tehe biniigana bi bi nen-ge bé kunda yada.

¹³ Kiki hihéga, di wan kaat Ezékiel 14:13, 14, i het di ñañ le: “I ba ni le hisi hi mboñ me béba, hi boñ yaga bibéba bi matjañg, ndi me sambal woo wem ngii yé, me bôk ki ntoñgo wé u koga ngéñngéñ ni om njal i nyeni, me tjé bôt ni binuga le bi ba ha bé, to i ba yaa le bôt bana baa ba bé ikété yé le​—Nôa, ni Daniel, ni Hiôb​—wee botama bon ba bak le ba péyés niñ yap inyu telepsép yap yosôna, hala nyen Nwet le Yéhôva a mpot.” Ngéda di mboñ ndék nyiña, di ga tehe le, minlôñ mi kaat Ezékiel mi, mi bi tilbana bebee le i ñwii 612 B.N.Y. Ha ngéda i, ki Nôa bo Hiôb ba bé nwok behee behee, ndi Djob a bé a ngi hoñlak ndéñbe yap. Ndi, Daniel a bé a ngi yii i niñ. Ni maliga, a bé le a bana jam kiki bo 20 ma ñwii ngéda Yéhôva a kal le a bé a téé sép kiki Nôa bo Hiôb. Baa di gwé biniigana i ôt mu? Yéhôva a ntehe, a diihege ki ndéñbe i bagwélél bé bobasôna i gwés nye, ibabé i hôya i bet ba yé njohok.​—Tjémbi 148:12-14.

14. (a) Lelaa biniigana di mpémés ni ngandak manjel inyu boñge bawanda ni batitigi bi nhôla bo? (b) Lelaa bi nla ki bane bôt bape nseñ? (Béñge titii i bibôdle.)

¹⁴ Kiki i nla bane bés nseñ i nigil bipes bi Bibel gwobisôna ibabé i todol, di nla ôt nseñ ni bijek bi mbuu gwobisôna di nla bana. Di yoñ ndék dihéga. Biniigana inyu boñge bawanda ni batitigi. I ñwii mini mi ntip tagbe, ngandak bikaat gwés bi ntilba inyu boñge bawanda ni batitigi. ^[1] Ngim biniigana mu, bi ntilbana inyu hôla bo i yémbél ngui bilôñ bibe i suklu tole mandutu boñge bawanda ba mboma. Lelaa bés bobasôna di nla ôt nseñ i soñgol i nya biniigana bi? I boñ hala, i nhôñlaha bés mandutu bon bés bawanda ba ba tiñi ni Djob ba mboma. Ha ngéda i, di nla yi loñge lelaa di nla hôla bo, ni ti ki bo mankénd.

15. Baa bikristen bi bi yé nnañak bi nlama nigil bikaat bi boñge?

¹⁵ Libim li mandutu ba mpôdôl mu biniigana bi, li mpémél ndik bé boñge bawanda ni batitigi. Bés bobasôna di gwé ngôñ i sôñ hémle yés, i yoñ yihe ni mahoñol ma ñem nwés, i yémbél ngui i bilôñ bibe i i nla ôbôs maada més ni Djob, i keñgle bilôñ bibe ni mintuk mimbe. Miño mi minkwel mini ni ngandak ipe mi bi tilbana ndugi inyu boñge bawanda. Baa bikristen bi bi yé nnañak bi nlama hoñol le i soñgol bikaat bi yé ndugi ntilbaga inyu boñge i nyilha ki bo boñge? Heni! Tolakii biniigana bi yé ntilga i nya i ntihba miñem mi boñge bawanda, bi niñne i ngii matiñ ma Bibel ma ma ñum bé, kayéle bés bobasôna di nla ôt nseñ mu bijek bi mbuu bi.

16. Kii ipe bikaat gwés bi nhôla boñge bawanda ni batitigi i boñ?

 ¹⁶ U héya le bikaat gwés bi nhôla boñge bawanda i yémbél mandutu ba mboma, bi nhôla ki bo i hol i pes mbuu ni i kôôge Yéhôva bebee. (Añ Ñañal 12:1, 13.) Yak ha ki, bikristen bi bi yé nhôôlak i pes minsôn bi nla ôt nseñ. Kiki hihéga, mbamble ni hop pulasi le Réveillez-vous! (Tôde ’ilo!) nu sôñ Matôp 2009 i i gwé ño nkwel ni hop pulasi le “Les jeunes s’interrogent . . . Comment trouver du plaisir à lire la Bible?” Nkwel u, u nti ngandak maéba, u bagna ki nkéñég matila i mut a nla kit, a tééda yo ikété Bibel yé, inyu gwélél yo hiki ngéda. Baa yak minhôôlak mi bôt i pes minsôn mi nla ôt nseñ mu nkwel u? Mankéé nu muda wada, nu a yé mbiibaga, a bak ki nyañ bon, a nkal le: “Me nliya hiki ngéda i soñgol Bibel. I maéba ma nkwel unu, ma bi tihba me. Me bi ha mo bisélél, me ngwélél ki minkéñég mi matila me bi kit loñge loñge. Nano, me nyamnda ni ngôñ i soñgol Bibel hiki ngéda. Me nla tehe lelaa bikaat bi Bibel bi édi, bi gwé maada ma bas bas kiki loñge libadô ba mbañ ni moo. Lisoñgol li Bibel li mah ngi lémél me hala.”

17, 18. Lelaa di nla ôt nseñ ni biniigana bi mbéñge ndugi i bôt ba ta bé Mbôgi Yéhôva? Ti hihéga hiada.

¹⁷ Biniigana inyu bôt ba ta bé Mbôgi Yéhôva. I bôdôl ñwii 2008 di yé maséé i nigil Nkum Ntat nu yigil, nu a yé ntilbaga ndugi inyu Mbôgi Yéhôva. Ndi, kii di nla kal inyu mimbamble nwés mi mi mbéñge i bôt ba ta bé Mbôgi Yéhôva tôbôtôbô? Baa yak nwo mi nla bane bés nseñ? Di yoñ hihéga. Hégda le kel yada, ilole nkwel mbamba u mbôdôl, u tehe ngim mut le u bi naña a nlo i Ndap Ane. I yé ntiik le maséé moñ ma ga yamb mayoo. Kiki nti nkwel a mba a mpot, bebeg u mba u nhoñol nkén woñ. A yé wengoñle u nyoñ libak li nkén woñ inyu emble nkwel. I mamélél ma nkwel, u ga sôk bana matehge ma mondo mu nkwel u.

¹⁸ Nlélém jam won u nla pémél bés i ngéda di ñañ biniigana bi mbéñge ndugi i bôt ba ta bé Mbôgi Yéhôva. Kiki hihéga, Nkum Ntat nu mbamba nu a ntoñol minkwel mi Bibel ni bibuk le basoñgol ba ba ta bé Mbôgi Yéhôva ba nla nok. Nlélém jam ni minkwel mi yé i site yés jw.org, kiki mi di nkoba ikété homa le “Questions bibliques” (Mambadga Bibel i ntimbhe) ni “Mambadga bôt ba mbéna bat.” Ngéda di ñañ biniigana bini, di nkônde kéñbaha nogna yés i biniigana di meya. Di ga ke ni bisu i nigil manjel ma mondo inyu toñol biniigana gwés i likalô. Nlélém jam ni Réveillez-vous! (Tôde ’ilo!) nu a mbéna lédés bikwo bi nkaa gwés le bañga Djob a yé toi, ni le Réveillez-vous! (Tôde ’ilo!) nu a nla hôla i toñol biniigana gwés.​—Añ 1 Pétrô 3:15.

19. Lelaa di nla unda le di nti Yéhôva mayéga inyu bijek bi mbuu a nti bés?

¹⁹ I yé ntiik le Yéhôva a nti bés ngandak bijek bi mbuu inyu mélés njal yés i pes mbuu. (Matéô 5:3) Di ke ni bisu i gwélél bijek bi mbuu gwobisôna di nla bana. La nyen di ga unda le di nti i Nwet a niiga bés inyu nseñ wés, mayéga.​—Yésaya 48:17.