1-2. Lelaa di nla bégés Djob i nya i nlémél nye?

 KII i nlo we mahoñol i ngéda u nok i buk ini le “bibégés”? Bebek le u nhoñol mankéé wada nu a ñôm maboñ ipañ nañi yé ni suhulnyuu yosôna, a kahal yible Yéhôva ñem wé. Tole bebek u nhoñol lihaa jada li li yé sum sum ikété yigil i Bibel.

² Mu dihéga di tjodiba, i bôt ba ba yé i bégés Nyambe. Baa Yéhôva a neebe bibégés gwap? Ibale ba mboñ sômbôl yé, ba béghak nye inyule ba ngwés nye, ba tinak nye lipém, a ga neebe bibégés gwap. Di ngwés Yéhôva ngandak. Di nyi le a kôli ni bibégés, di nsômbôl ki bégés nye ni ñem wés wonsôna.

3. Kii di ga tehe munu yigil ini?

³ Munu yigil ini, di ga tehe bibégés bi bé kônha Yéhôva maséé ngéda kôba, di ga tehe ki mam juem di nla boñ i len ini inyu bégés Yéhôva i nya i kôli. Di tehe ki lelaa di nla kônde bégés Yéhôva i nya i nlémél nye ni inyuki di yé maséé i ngéda di mbégés nye.

4. Lelaa i bôt ba bé bégés Yéhôva i ngéda kôba ba bé éba le ba nti Yéhôva lipém ba gwéhék nye?

⁴ Ngéda kôba, bôt kiki bo Abel, Nôa, Abraham, ni Hiôb ba bé éba le ba nti Yéhôva lipém, ba gwéhék nye. Lelaa? Ba bé nôgôl Yéhôva, ba hémlege nye, ba tinak nye bisesema. Bibel i nkal bé mam momasôna ba bé boñ inyu bégés Yéhôva. Ndi di nyi le ba bi boñ kii yosôna ba bé la inyu ti Yéhôva lipém ni bégés nye i nya i nlémél nye. I mbus ngéda, Yéhôva a bi ti mbôda i Abraham mbén Môsi. Mambén ma bé mu, ma bé éba Lôk Israel lelaa ba bé le ba bégés Yéhôva i nya i nlémél nye.

5. Lelaa bôt ba bé bégés Yéhôva i mbus nyemb Yésu ni bitugne gwé?

⁵ I mbus nyemb Yésu ni bitugne gwé, sômbôl i Yéhôva i bé ha bé le bôt ba noñ mbén Môsi. (Rôma 10:4) Bikristen bi bé lama noñ mbén ipe, hala wee “mbén Kristô.” (Galatia 6:2) Inyu nôgôl i “mbén” i, ba bééna bé le ba noñ ngandak mambén, i bé sômbla ndik le ba nigle Yésu, ba nôgôl ki mam a bi niiga bo. I len ini, bikristen bi njo sañ inyu lémél Yéhôva i ngéda ba ñodop mu mabal ma Yésu, ba ‘nkôs ki hogbe.’—Matéô 11:29.

6. Lelaa i yigil ini i nla hôla bés?

⁶ Kiki di mba di wan mam di nlama boñ inyu bégés Nyambe, badba le: ‘Kii me ma boñ munu mam mana?’ U nla ki badba le: ‘Kii me nla kônde boñ inyu bégés Nyambe i nya i nlémél nye?’ U yé le u kon maséé inyu mam u ma boñ, ndi u nlama soohe Yéhôva le a hôla we i boñ mam u boñok bé.

7. Lelaa Yéhôva a ntehe masoohe més?

⁷ I ngéda di nsoohe, di mbégés Yéhôva. Bibel i nkal le masoohe més ma yé kiki binjinjiñ bi Lôk Israel i bé i yoñ ngéda i kôôba inyu ti Yéhôva i lap ni i témpel. (Tjémbi 141:2) Binjinjiñ bi, bi bé lémél Nyambe ngandak. Hala nyen yak masoohe més ‘ma nkônha nye maséé,’ to ibale di nyi bé hop. (Bingéngén 15:8; Ndiimba Mbén 33:10) Ngandak mam i ñéba le Yéhôva a yé maséé i emble bés i ngéda di nsoohe nye ni ñem wonsôna. A gwé ngôñ le di kal nye mandutu més, mam di nsômbôl boñ, ni mam ma nkon bés ngôñ. Nwaa le di nsoohe Yéhôva, i yé loñge i yoñ ngéda inyu ôt pék mu mam d’a kal nye. Ibale di mboñ hala, wee di yé kébél Yéhôva binjinjiñ bi bi nlémél nye.

8. Imbe ngéda di nla pôdôl bilem bi Yéhôva?

⁸ I ngéda di mpôdôl bilem bi Yéhôva, di mbégés nye. (Tjémbi 34:2) I ngéda di ñañle bôt bilem bi Yéhôva ni mam a bi hek, wee di yé bégés nye. I ngéda di nhoñol i mam Yéhôva a ma bôñôl bés, hala a ntinde bés i bégés nye. Ibale di nyoñ ngéda i ôt pék mu mam momasôna a ma bôñôl bés, d’a waa bé bégés nye. I ngéda di yé likalô, di ‘nti Nyambe sesema i bibégés, hala wee litam li bibép gwés.’ (Lôk Héber 13:15) Kiki di yé di kôôba ilole di nsoohe Yéhôva, hala nyen di nlama kôôba, ilole  di nke likalô. Di nlama boñ kii yosôna di nla inyu boñ le ‘sesema yés i bibégés’ i lémél Yéhôva. Jon di nlama pot ni ñem wés wonsôna i ngéda di yé likalô.   

9. (a) Kiki Lôk Israel i ngéda kôba, lelaa makoda ma nhôla bés? (b) Lelaa makoda ma ma hôla we?

⁹ I ngéda di yé makoda, di mbégés Yéhôva. Yéhôva a bi kal Lôk Israel le: “Bôlôm boñ bobasôna b’a ba ba ntelep bisu bi Yéhôva Nyambe woñ ngélé iaa hi nwii i homa a’ tep.” (Ndiimba Mbén 16:16) Ba bé ba yék mandap map ni nwom nwap. Ndi Yéhôva a bi kal bo le: “Mut a’ tam bé ki to hisi hioñ ngéda u mbet le u telep bisu bi Yéhôva Nyambe woñ.” (Manyodi 34:24) Bon ba Israel ba bi éba hémle ikeñi, ba kenek mangand momasôna, hiki nwii. Ba bi kôs ngandak bisai; kiki hihéga, ba bi kônde nok mbén Djob, ba ôt pék mu bilem gwé, ba lôôs ki loñge ngéda ni lôk kéé yap. (Ndiimba Mbén 16:15) Bisai bi gwon yak bés di nkôs i ngéda di mboñ bisesema inyu ke makoda. Yéhôva a yé maséé ngandak i ngéda di ntibil kôôba makoda, di tinak mamdimbhe malam ma ma ñap bé.

10. Inyuki di yé le di kal le i ngéda di ntôp tjémbi di mbégés Yéhôva?

¹⁰ I ngéda di ntôp tjémbi, di mbégés Yéhôva. (Tjémbi 28:7) Bon ba Israel ba bé yi le i ngéda ba ntôp tjémbi, ba mbégés Yéhôva. Kiñe David a bi pohol 288 i Lôk Lévi inyu tôp tjémbi i témpel. (1 Miñañ 25:1, 6-8) I len ini, i ngéda di ntubul Yéhôva tjémbi, di ñéba le di ngwés nye. To ibale di nyi bé tôp tjémbi, béba i ta bé. Kiki hihéga, ngeñ di mpot, “bésbobasôna di mbaage,” ndi hala a nsôña bé bés i pot i likoda tole likalô. (Yakôbô 3:2) Jon, di nlama bé tjél tôp inyule di nhoñol le kiñ yés i ta bé ilam.

11. Kiki kaat Tjémbi 48:14 i ñunda, inyuki di nlama yoñ ngéda i nigil Bibel ni lihaa jés?

¹¹ I ngéda di nigil Bibel, di niigaga bon bés, di mbégés Yéhôva. I ngéda Sabat, Lôk Israel i bé nwas bibôlô gwap inyu bégés Yéhôva. (Manyodi 31:16, 17) Ba bé niiga bon bap njee a yé Yéhôva. Yak bés di nlama yoñ ngéda i añ Bañga i Djob, ni nigil yo. I ngéda di mboñ hala, di mbégés Yéhôva, di nkônde ki yila mawanda mé. (Tjémbi 73:28) I ngéda di nigil Bibel ni bon bés, di nhôla bo i yila mawanda ma Yéhôva.—Añ Tjémbi 48:14.

12. I ngéda di nok lelaa Yéhôva a bé tehe bôlô i bé séla i lap, kii hala a niiga bés?

¹² I ngéda di ñoñ mandap ma Ane, di bôñglak mo, di mbégés Yéhôva. Bibel i ñéba le i bôt ba bé oñ lap, ba bôñglak i gwom bi bé mu, ba bé sal “nson mpubhaga.” (Manyodi 36:1, 4, MN.) Yak i len ini, Yéhôva a ntehe bôlô maoñ ma mandap ma Ane, ni mana mandap mape ma ntôñ kiki nson mpubhaga. Ngim lôk kéé i bôda ni i bôlôm i nti ngéda yap mu bôlô i. Baa di ta bé maséé ni bôlô ba nsal? Ndi, ba nlama yak añal ñañ nlam. Bahogi ba yé yak le ba bana ngôñ i ba basañal. Inyu nit i lôk kéé i mu nson maoñ, mimañ mi nlama neebe le ba yila basañal ibale ba ntehe le i lôk kéé i i nla gwel i nson u. To di nyi maoñ to di nyi bé, bésbobasôna di nla  yoñ ngaba i pubus ni i bôñgôl mandap més ma Ane.

13. Lelaa di nlama tehe makébla di nti inyu nit nson u Ane?

¹³ I ngéda di nti makébla inyu nit nson u Ane, di mbégés Yéhôva. Lôk Israel i bé lama bé kôôge Yéhôva bebee moo nso. (Ndiimba Mbén 16:16) Ba bé lama ti nye makébla kiki ba bé la. Makébla ba bé ti, ma bé éba le ba nti mayéga inyu mam momasôna ma mbôña inyu boñ le ba bégés Djob. Lelaa yak bés di nla unda le di ngwés Yéhôva, ni le di nti mayéga inyu mam momasôna ma mbôña inyu boñ le di kôôge nye bebee? Di nla boñ hala i ngéda di nti makébla kiki di nla i likoda jés ni inyu bôlô i nséla i nkoñ ’isi wonsôna. Ñôma Paul a bi kal le: “Ibale mut a gwé yaga ngôñ i ti, wee likébla jé li ga lémél toi Nyambe, ibale a nti inoñnaga ni mam a gwé, handugi ma a gwé bé.” (2 Korintô 8:4, 12) Yéhôva a nkon maséé ni makébla més momasôna, to ibale ma yé ndék.—Markô 12:42-44; 2 Korintô 9:7.

14. Inoñnaga ni kaat Bingéngén 19:17, lelaa Yéhôva a ntehe loñge di mbôñôl lôk kéé?

¹⁴ I ngéda di nhôla lôk kéé, di mbégés Yéhôva. Yéhôva a bi kal le a bé lama saa Lôk Israel i i bé hôla diyeyeba. (Ndiimba Mbén 15:7, 10) Jon, i ngéda di nhôla lôk kéé yés, Yéhôva a ntehe le di yé i ti nye likébla. (Añ Bingéngén 19:17.) Kiki hihéga, i ngéda lôk kéé i Filipi i bi éble Paul likébla, a bi sébél jo le: ‘Sesema ilam i i nlémlél Nyambe.’ (Filipi 4:18) Badba le: ‘Baa mut a yé mu likoda jem nu me nla hôla?’ Yéhôva a yé maséé ngeñ di nti ngéda yés, ngui yés, pék yés, ni gwom di gwé inyu hôla bôt. I ngéda di mboñ i mam ma, a ntehe le di yé bégés nye.—Yakôbô 1:27.

15. I ngéda di mbégés Yéhôva, hala a nyoñ bés ngandak ngéda, ndi inyuki hala a nyidil bé bés?

¹⁵ I ngéda di mbégés Yéhôva, hala a nyoñ bés ngandak ngéda, ndi hala a nyidil bé bés. (1 Yôhanes 5:3) Inyuki? Inyule di ngwés Yéhôva. Di hégda le mañge a nsômbôl ti isañ likébla. A nla lôôs ngandak ngéda i ôt titii. Ndi a ntjelel bé inyu ngéda yosôna a nlôôs mu. Kiki a ngwés isañ, a yé maséé i ti nye likébla li. Hala nyen yak bés di yé maséé i ti ngéda yés ni ngui yés inyu bégés Yéhôva, inyule di ngwés nye.

16. Inoñnaga ni kaat Lôk Héber 6:10, lelaa Yéhôva a ntehe nson wés?

¹⁶ Bagwal ba ba ngwés bon bap, ba mbem bé le makébla bon bap ba nti bo ma ba jam jada. Ba nyi le, boñge ba mpôna bé, ba gwé bé to nlélém ngui. Hala nyen yak Yéhôva a nyi hiki wada wés. Bebek le u gwé ngui iloo ngandak lôk kéé. Tole u nla bé sal kiki ini lôk kéé ipe, bebek inyule u ñun, u nkon, tole u nlama tééda lihaa joñ. U tomb bañ. (Galatia 6:4) Yéhôva a’ hôya bé nson woñ. Ibale u mboñ kii yosôna u nla, ni mahoñol malam, a ga kônôl we maséé. (Añ Lôk Héber 6:10.) Yéhôva a nyi yak mahoñol moñ. A nsômbôl le u kon maséé ni bôlô u nsélél nye.

17. (a) Ibale jam jada li nlédél we mu mam di ntehe munu yigil ini, kii u nlama boñ? (b) Kii i nhôla we munu minkéñék mi matila mini le “ Kônde ba maséé”?

 ¹⁷ Kii di nlama boñ ibale jam jada li nlédél bés mu mam di ntehe munu yigil ini, kiki bo yigil Bibel tole likalô? Bebek di ma léba le i ngéda di mbéna añ Bibel, di kenek likalô, ha nyen minson mi mi nkônde lémél bés mi hôlga ki bés. I bégés Yéhôva i yé kiki mut a mboñ sport, tole mut a nigil i gwélél ngim kei inyu kôt nsik. Ibale a mboñ bé i mam ma hiki ngéda, a nla bé hol. Ndi ibale a nkit le a nkahal boñ mo hiki kel, a nla bôdôl tégbaha ndék ngéda mu, i mbus a keñbaha yo. Kiki i mam ma ma nlémél nye, hala nyen a’ bana ngôñ i kônde boñ mo. Yak bés di yé le di boñ nlélém jam i ngéda di mbégés Yéhôva.

18. Jam li nlel mam momasôna i niñ yés li yé le kii, i jam li li nlona kii bés?

¹⁸ Jam li nlel mam momasôna i niñ yés li yé le di bégés Yéhôva ni ñem wés wonsôna. I ngéda di mbégés nye, hala a nkônha bés maséé, di gwé ki botñem i niñ boga. (Bingéngén 10:22) Di ntôñ bé, inyule di nyi le Yéhôva a nhôla bagwélél bé i ngéda ba gwé ndutu. (Yésaya 41:9, 10) Di kôli toi kon maséé ngéda di mbégés Yéhôva, nu a kôli “kôhna lipém ni bibégés.”—Masoola 4:11.