1. Kii di nlama boñ inyu ba toi maséé, inyuki? (Yésaya 48:​17, 18)

 YÉHÔVA Tata wés a ngwés bés ngandak, a gwé ngôñ le di bana niñ ilam nano ni i dilo di nlo. (Ñañal 3:​12, 13) A bi hek bés, a ti bés ngandak makeñge, ndi a bi ti bé bés kunde i pohol kii i yé loñge ni kii i yé béba inyu yés. (Ñañal 8:9; Yérémia 10:23) A nyi le inyu boñ le di ba toi maséé, di nlama gwélél nye, di nôglak mambén mé.​—Añ Yésaya 48:​17, 18.

2. Kii Satan a gwé ngôñ le di hoñol, ndi kii Yéhôva a bi boñ?

² Satan a nsômbôl le di hoñol le di nla ba maséé to ibale di ngwélél bé Yéhôva, le di nla pam i éga bésbomede. (Bibôdle 3:​4, 5) Inyu unda le Satan a yé mut bitembee, Yéhôva a bi nwas le bôt ba binam ba éga bomede inyu ngim ngéda. Bésbomede di ntehe lelaa bôt ba binam ba nok ndutu i len ini. Ndi Bibel i mpôdôl yak bôlôm ni bôda, ba ba bi bana niñ ilam inyule ba bi gwélél Yéhôva. Mut bisu ikété bôt ba bobasôna a yé Yésu Kristô. Di béñge ndugi inyuki Yésu a bi yoñ makidik i gwélél Yéhôva. Ndi di tehe inyuki Tata wés Yéhôva a kôli ni bibégés. Di ga tehe yak inyuki di bi yoñ makidik le di ga gwélél Yéhôva.

 INYUKI YÉSU A BI YOÑ MAKIDIK LE A NGWÉLÉL YÉHÔVA?

3. Mambe manoodana Yésu a bi kôhna, mambe makidik a bi yoñ?

³ I ngéda Yésu a bé hana ’isi, i bé béda le a pohol i nwet a ga gwélél. Ndék ngéda i mbus sôble yé, Satan a bi kal nye le a ga ti nye biane bi nkoñ ’isi gwobisôna ibale a ñôôp i bisu gwé. Yésu a bi timbhe nye le: “Nyodi me ha, a Satan! Inyule i yé ntilga le: ‘Yéhôva Nyambe woñ nyen u nlama bégés, nyetama ki nyen u nlama gwélél.’” (Matéô 4:​8-10) Inyuki Yésu a bi yoñ i makidik ma? Di béñge manjom mahogi.

4-5. Kii i bi tinde Yésu i yoñ makidik i gwélél Yéhôva?

⁴ Jam li bisu li li bi tinde Yésu i yoñ makidik le a ngwélél Yéhôva li yé gwéha, Yésu a ngwés Isañ bañga ligwéhék. (Yôhanes 14:31) Jam lipe li yé le Yésu a ngwélél Yéhôva inyule a nyi le hala a yé loñge inyu yé. (Yôhanes 8:​28, 29; Masoola 4:11) A nyi le Yéhôva nyen a bi hek bés, di kôli bôdôl nye ñem, a bak mut likap. (Tjémbi 33:4; 36:9; Yakôbô 1:17) Yéhôva a ma teembene bé Yésu, i mam momasôna a gwé nyen a nti nye mo. (Yôhanes 1:14) Satan nye a yé mut manola. A yé mut bitembee, mut huluk ñem, a ntôñ ndik nyemede. (Yôhanes 8:44) I mam mana momasôna ma bi boñ le Yésu a bé bé le a ndogbene Yéhôva kiki Satan.​—Filipi 2:​5-8.

⁵ Jam lipe li li bi boñ le Yésu a yoñ makidik i gwélél Yéhôva li yé le a bé hoñol bisai manôgla mé ma ga lona. (Lôk Héber 12:2) A bé yi le ibale a ntéñbe ni Yéhôva, a ga pubus jôl li Isañ, a tohol ki bôt ba binam i mok mi béba ni mi nyemb.

INYUKI YÉHÔVA A KÔLI NI BIBÉGÉS?

6-7. Inyuki ngandak bôt i ngwélél bé Yéhôva i len ini, ndi inyuki Yéhôva a kôli ni bibégés?

⁶ I len ini ngandak bôt i ngwélél bé Yéhôva inyule i nyi bé bilem gwé, ba nyi bé to i mam a bi bôñôl bo. Hala nyen i bôt Paul a bi añle miñañ minlam i Atén ba bé.​—Minson mi baôma 17:​19, 20, 30, 34.

⁷ Paul a bi kal bo le bañga Nyambe “a nti bôt bobasôna niñ, nhébék, ni gwom gwobisôna.” A kônde le: “Ni njel yé nyen di gwé niñ, di nyiñgha, di héga ki.” Nyambe nyen a bi hek bés, a boñ le ‘ni njel mut wada bôt ba bôl ikété hiki loñ i yé munu nkoñ ’isi wonsôna,’ jon a kôli le di bégés nye.​—Minson mi baôma 17:​25, 26, 28.

8. Kii Yéhôva a yé mbén i boñ? Toñol.

⁸ Yéhôva nyen a bi hek bés, a yé ki Ñane ngii ni ’isi, jon a bé le a énél bés le di gwélél nye. Ndi Yéhôva a yé mbén i boñ hala. A nyis bés le a yé toi, a ñunda ki bés le a ngwés hiki wada wés. A gwé ngôñ le ngandak bôt i ba mawanda mé i boga ni boga. (1 Timôtéô 2:​3, 4) Inyu hala nyen Yéhôva a niiga bés inyu boñ le yak bés di niiga bôt bape sômbôl yé ni mam momasôna a ga bôñôl bôt ba binam. (Matéô 10:​11-13; 28:​19, 20) A mboñ le di ba ikété makoda, a ntéé ki mimañ inyu tééda bés.​—Minson mi baôma 20:28.

9. Kii i ñunda le Yéhôva a ngwés bés?

⁹ Di ntehe toi gwéha i Yéhôva i ngéda di ntehe lelaa a ntééda i bôt ba nkal  le a ta bé. Kiki hihéga, ibôdôl behee, didun di bôt di bi kit le di mboñ i yom ba ngwés. To hala, Yéhôva a nti bo kii yosôna i mbéda bo, a boñ ki le ba bana niñ ilam. (Matéô 5:​44, 45; Minson mi baôma 14:​16, 17) A mboñ le ba bana mawanda, ba biiba, ba gwal bon, ba ba ki maséé ni nson wap. (Tjémbi 127:3; Ñañal 2:24) Pééna yo ki yo i ta bé le Tata wés Yéhôva a ngwés bôt ba binam bobasôna. (Manyodi 34:6) Nano, di tehe inyuki di ngwélél Yéhôva, yak bisai di nkôs i ngéda di ngwélél nye.

INYUKI DI NGWÉLÉL YÉHÔVA?

10. (a) Jam li bisu li li ntinde bés i gwélél Yéhôva li yé le kii? (Matéô 22:37) (b) Lelaa Yéhôva a ñunda le a nhônba bés? (Tjémbi 103:​13, 14)

¹⁰ Jam li bisu li li ntinde bés i gwélél Yéhôva li yé le di ngwés nye ngandak kiki Yésu. (Añ Matéô 22:37.) Bilem bi Yéhôva bi mboñ le di tiige nye bebee. Kiki hihéga, a yé bebee i nwéhél bés. I ngéda bon ba Israel ba bi ndogbene nye, a bi soohe bo, a kal bo le: “Soho . . . héñhana bilem binan ni maboñok manan.” (Yérémia 18:11) Yéhôva a nyi le di yé baboñbéba, le di yé nluñ ték. (Añ Tjémbi 103:​13, 14.) I ngéda u ntehe lelaa Yéhôva a nhônba bés, u tehge yak bini bilem gwé bipe, baa hala a ntinde bé we i gwélél nye i boga ni boga?

11. Kii ipe i nhôla bés i gwélél Tata wés Yéhôva?

¹¹ Jam lipe li li ntinde bés i gwélél Yéhôva li yé le di nyi le hala a yé loñge. (Matéô 4:10) Di nyi ki le nson di nsélél nye u num matam malam. I ngéda di ngwélél Yéhôva, di mpubus jôl jé, di ñunda le Nsohop a yé mut bitembee, di nkônha ki Yéhôva maséé. Ibale di mpohol i gwélél Yéhôva nano, di nla yak gwélél nye i boga ni boga!​—Yôhanes 17:3.

12-13. Kii ndémbél i Jane bo Pam i niiga bés?

¹² To ibale di yé disii di boñge, di nla gwés Yéhôva, di kônde ki gwés nye kiki di mba di nañ. Di yoñ hihéga hi hingonda hiada le Jane ni manyañ nu muda le Pam. a I ngéda ba bi bôdôl nigil Bibel, Jane a bééna 11 nwii, Pam nye a ban-ga 10 li nwii. Bagwal bap ba bé nigil bé Bibel ndi ba bi neebe le Jane bo Pam bo ba nigil ni Mbôgi Yéhôva, ndi ba kal bo le ba nlama ke i base ni bo i Kel sonde. Jane a nkal le: “I mam Mbôgi Yéhôva i bi niiga me ma bi hôla me i tjél bilôñ bibe bi bi bé le bi tinde me i ôt hibañga ni i kwo i hiandi hi malal ma nyega.”

¹³ I ngéda Jane bo Pam ba bi kônde nañ, bo iba ba bi yila batéé likalô. I mbus ngéda, ba bi yila basañal, ba téédaga bagwal bap ba ba bi un. I ngéda Jane a nhoñol i mam ma momasôna, a nkal le: “Me bi tehe le Yéhôva a ntôñ toi mawanda mé ni le kiki kaat 2 Timôtéô 2:19 i nkal, ‘Yéhôva a nyi i bôt ba yé bé.’” Pééna yo ki yo i ta bé, Yéhôva a ntôñ i bôt ba ngwélél nye, a ngwés ki bo!

14. Lelaa maboñok més ni bipôdôl gwés bi mpubus jôl li Yéhôva? (Béñge yak bititii.)

¹⁴ Di nlama boñ kii yosôna di nla inyu pubus jôl li Yéhôva. Di yoñ le hihéga: liwanda joñ li gwé ñem nlam, a  yé mut likap, a bak mut a nwéhél bôt bape. Ndi kel yada, u nok mut a ñôm nye nsohi le a yé mut manola, a bak mut malôga. U ga boñ lelaa? U ga sôñ nye. Hala nyen i ngéda Satan ni nkoñ ’isi wé ba mpot bitembee inyu ôbôs jôl li Yéhôva, di nkal bôt maliga inyu Yéhôva le ndi di pubus jôl jé. (Tjémbi 34:1; Yésaya 43:10) Di ñunda le di ngwés Yéhôva ni ñem wés wonsôna ni njel bipôdôl gwés, ni maboñok més.

15. Bimbe bisai ñôma Paul a bi kôs i ngéda a bi héñha ngim mam mu niñ yé? (Filipi 3:​7, 8)

¹⁵ Di yé bebee i héñha ngandak mam i niñ yés inyu boñ le di kônde ti ngéda yés i nson u Yéhôva. Kiki hihéga, ñôma Paul a bi tjél yila bañga mut i loñ yé inyu yila nnigil Kristô ni i gwélél Yéhôva. (Galatia 1:14) Hala a bi boñ le a bana niñ ilam ni bisai i ke i ane nyoo ngii ni Kristô. Kekikel, a bi tam bé makidik mé i gwélél Yéhôva, to bés di ta bé le di tam mo.​—Añ Filipi 3:​7, 8.

16. Kii ndémbél i Julia i niiga bés? (Béñge yak bititii.)

¹⁶ Ibale nson u Yéhôva won u yé jam li bisu i niñ yés, di nla bana niñ ilam nano ni i dilo di nlo. Di béñge ndémbél i sita yada le Julia. Ilole a nyila Mbôgi Yéhôva, a bé tôp kôa i base ibôdôl nye mañge. Mut wada nu a nyi ntuba ngandak a bi yimbe nye, a kônde niiga nye ntuba. Jôl li Julia li bi ke ngan, a kahal tôp i mangand makeñi. A bé nigil ntuba i suklu ikeñi yada, nyoo nyen a bi boma mañge muda wada nu a bé Mbôgi Yéhôva. I mañge muda nu a  añle nye ñañ nlam, a niiga nye le jôl li Djob le Yéhôva. I mbus ndék ngéda, Julia a bi bôdôl nigil Bibel ngélé iba hiki sonde. A bé bañ a yii, a yoñ makidik le a nti ngéda yé i nson u Yéhôva iloole a yila bañga mut i ntuba tjémbi. Bun a bé bé ha to ndék. Julia a nkal le: “Ngandak bôt i bé kal me le me nyi bé i yom me mboñ, ndi ngôñ yem i bé ndik le me ti ngéda yem i nson u Yéhôva.” Hala a yé 30 ma nwii le a bi yoñ i makidik ma. Nano, mahoñol mé ma yé lelaa? A nkal le: “Me gwé ñem nwee, me nyi ki le Yéhôva a ga ti me mam momasôna ma ga kon me ngôñ i dilo di nlo.”​—Tjémbi 145:16.

DI KEE NI BISU I GWÉLÉL YÉHÔVA

17. Kiki lisuk li nlôôha kôôge bebee, kii di nlama yi inyu bet ba ngwélél bé Yéhôva ni i bet ba ngwélél nye?

¹⁷ Lisuk li nlôôha kôôge bebee. Ñôma Paul a bi kal le: “Inyule i ngi yii ‘ndik ndék ngéda,’ wee ‘nu a yé i njel a’ lo, a’ tiñha bé.’” (Lôk Héber 10:37) Kii di nlama boñ? Di nlama yi le bôt ba gwé ha bé ki ngandak ngéda inyu yoñ makidik i gwélél Yéhôva. (1 Korintô 7:29) Ibale di bi yoñ makidik le di ngwélél Nyambe, di nyi le to manoodana ma nai lelaa, ma yé “ndik inyu ndék ngéda.”

18. Kii Yéhôva bo Yésu ba nkal bés le di boñ?

 ¹⁸ Yésu a bi kal banigil bé le ba nlama ndik bé bôdôl noñ nye, ndi ba nlama noñ nye ngéda yosôna. (Matéô 16:24) Jon ibale hala a yé ngandak nwii le di ngwélél Yéhôva, di tomb bañ. Di nlama boñ kii yosôna di nla inyu yônôs likak di bi kégél Yéhôva. Ndutu i yé ha jôga, ndi bisai u bat bé!​—Tjémbi 35:27.

19. Kii ñañ u Gene u niiga bés?

¹⁹ Ngim bôt i nhoñol le i gwélél Yéhôva i yé ndutu ngandak. A mañge wanda, baa u nhoñol le ibale u ngwélél Yéhôva, u ga ba bé maséé? Mañge wanda wada le Gene a nkal le: “Me bé hoñol le i ngéda u yé Mbôgi Yéhôva, wee u yé i mok. Me bé tehe boñge me ni bo di bi néñha ba nke i mangand, ba pamak ni dingonda, ba tuguk mintuk mi gém i het ba njo bisañ, me me kenek ndik i makoda ni i likalô.” Hala a bi tinde Gene i boñ kii? A nkal le: “Me bi bôdôl boñ mam mabe bisôsôli, ma bi kônha ndik me maséé inyu ndék ngéda. Ndi i maliga, me bé toi bé maséé. Me bi témb me hoñol i mam ba bi niiga me, me yoñ makidik le me mbôdôl gwélél Yéhôva ni ñem wem wonsôna. Ibôdôl ha ngéda i, i mpôna ndik le me ngi soohe, Yéhôva a ntimbhe me.”

20. Mambe makidik di nlama yoñ?

²⁰ Ntôp tjémbi a bi kal le: “I mut u mpohol, u tiigaha ki nye bebee, le a yén i bikotoo bi ndap yoñ, a yé kimasoda.” (Tjémbi 65:4) Yak bés di nlama yoñ makidik Yôsua a bi yoñ, i ngéda a bi kal le: “Ndi inyu yem ni lihaa jem, di ga gwélél Yéhôva.”​—Yôsua 24:15.