1. Kii Yéhôva a mbem le di boñ?

 BABIINA ba yé maséé i ngéda man a ngwéé. Bagwal ba ngwés ba ntehe man wap, ndi to hala, ba gwé bé ngôñ le a kida ha ibabé le a nañ. Jon hala a ga lôôha tééñga bo ibale man wap a nañ bé. Nlélém jam, Yéhôva a yé maséé i ngéda di nyila banigil ba Yésu, ndi a gwé bé ngôñ le di kida homa wada i pes mbuu. (1 Korintô 3:1) Jon a mbat bés le di yila “minañak mi bôt” i pes mbuu.​—1 Korintô 14:20.

2. Kii di ga tehe munu yigil ini?

² I yila nañak kristen wee kii? Kii di nlama boñ inyu yila nhôôlak kristen? Lelaa bañga bijek bi mbuu i nla hôla bés i lédés maada més ni Yéhôva? Inyuki di nlama bé lôôha bôdôl bésbomede ñem? Di ga timbhe mambadga mana munu i yigil ini.

I YILA NHÔÔLAK KRISTEN WEE KII?

3. I yila nañak kristen wee kii?

³ Ikété Bibel, i buk i Grikia ini le “nañak” i nla ki kobla le “nhôôlak,” “peles,” ni “nyonok.” a (1 Korintô 2:6) Di nyila nañak tole nhôôlak kristen, i ngéda di nyodi i libak li disiina di boñge i pes mbuu inyu yila minhôôlak mi bôt i pes mbuu. To i ngéda di mal yônôs i njômbi i, di nlama ke ni bisu i sal inyu hol. (1 Timôtéô 4:15) Bésbobasôna,  yak ba ba ngi yii njohok i pes minson, di nla hol i pes mbuu. Ndi kii i nla hôla bés i yi le mut a yé nhôôlak kristen?

4. Kii i nla hôla bés i yi le mut a yé nhôôlak i pes mbuu?

⁴ Nhôôlak kristen u yé mut nu a mboñ mam momasôna Nyambe a nkal nye, a nwas bé to jada, a mpohol bé to mam ma nlémél nye. Ndi kiki di yé bikwéha bi bôt, a ga boñ dihôha. To hala, a ñunda i niñ yé i hiki kel le mahoñol mé ni maboñok mé ma nkiha ni sômbôl i Nyambe. A bi haba mut yondo, a mboñ ki biliya hiki ngéda le mahoñol mé ma kiha ni mahoñol ma Nyambe. (Éfésô 4:​22-24) A nigil ki i yoñ makidik malam ma ma nkiha ni mbén ni matiñ ma Yéhôva, jon a gwé bé ngôñ ni kôñtô i mambén inyu kal nye kii a nlama boñ ni kii a nlama bé boñ. I ngéda a nyoñ ngim makidik, a mboñ biliya gwobisôna i yônôs mo.​—1 Korintô 9:​26, 27.

5. Mambe mandutu kristen i i ta bé nhôôlak i nla boma? (Éfésô 4:​14, 15)

⁵ Jam lipe li yé le i kristen i ta bé nhôôlak i pes mbuu i ga nwas le “mandon,” “bitembee” ni “biniigana bi batjañgbene maliga” bi yoña nye. b (Añ Éfésô 4:​14, 15.) I nla pam le a kahal kil bôt bape njôñ, a bôdôl yéñ mindañ, a nla pala unup tole a kwoo i bisu bi manoodana.​—1 Korintô 3:3.

6. Himbe hihéga u nla gwélél inyu éba lelaa mut a nhol i pes mbuu? (Béñge yak titii.)

⁶ Kiki di mbôk di tehe, Bibel i nhégha mahol i pes mbuu ni mahol i pes minsôn. Hisiina mañge hi nhañba pék. Jon a gwé ngôñ le nhôôlak mut u tat nye, u éga ki nye. Kiki hihéga, nyañ man a ga bat hisiina hié hi man le hi gwel nye i woo i ngéda ba nyap nloñ. Ngéda ngond yé i nañ, nyañ a nwas nye le a yap nloñ nyetama. Ndi, a mba a mbigdaha nye le a nlama béñge bipes gwobiba ilole a nyap nloñ. I ngéda i mañge nu a nañ, nyemede a nyi kii a boñ inyu keñgle i ndutu i. Kiki disiina di boñge di di gwé ngôñ ni mahôla ma mimañ mi bôt  inyu keñgle ngim mandutu, bikristen bi bi ta bé minhôôlak bi gwé ngôñ ni mahôla ma bikristen bi bi yé minhôôlak inyu keñgle ngim mandutu i pes mbuu, ni inyu yoñ makidik malam. Maselna ni hala, i ngéda minhôôlak mi bikristen mi nyoñ makidik, mi ñôt pék i matiñ ma Bibel inyu yi kii Yéhôva a nhoñol mu jam li, mi nyoñ ki makidik inoñnaga ni i yom mi nigil.

7. Baa minhôôlak mi bikristen mi gwé ngôñ ni mahôla ma bôt bape?

⁷ Baa hala a nkobla le, kekikel nhôôlak kristen u gwé bé ngôñ ni mahôla ma mut? To jam. Ngim mangéda yak nhôôlak kristen u gwé ngôñ ni mahôla. Ndi i mut a ta bé nhôôlak i pes mbuu a nla gwés le bôt bape bon ba kal nye kii a nlama boñ tole ba yôñôl nye makidik. Maselna ni hala, i ngéda nhôôlak kristen u mbat mahôla ma bôt ba ba gwé pék ni yi iloo nye, a nyi le nyen a nlama yoñ makidik, inyule a nyi le Yéhôva a mbem le hiki mut a “begee yé yé mbegee.”​—Galatia 6:5.

8. Kii i mboñ le minhôôlak mi bikristen mi ba maselna?

⁸ Kiki bôt ba yé maselna i bitéé bi mis, hala nyen minhôôlak mi bikristen, mi gwé bé minlélém mi bilem to nlélém ngap. Kiki hihéga, bape ba nla bana pék ngandak, bahogi ba bana ñem ngui, bape ba nla ba bôt ba likap, bahogi ba ban-ga ñem ngôô. Jam lipe li yé le, i ngéda minhôôlak mi bikristen ima mi mboma nlélém jam, mi nla yoñ makidik ma ma nkiha ni Bitilna, ndi ma ba maselna. Hala a nla ba maliga i ngéda i jam li, li ntihba kiññem. Kiki ba nyi hala, ba nla bé kéés mankéé numpe inyule a nyoñ mé makidik. Maselna ni hala, ba mboñ biliya bi ngui i tééda adna yap.​—Rôma 14:10; 1 Korintô 1:10.

KII DI NLAMA BOÑ INYU YILA MINHÔÔLAK MI BIKRISTEN?

9. Baa mut a nla hol i pes mbuu ibabé i boñ biliya? Toñol.

⁹ Ibabé set man a nañ ndigi, ndi i pes mbuu, ibale u mboñ bé biliya, u nañ bé. Kiki hihéga, lôk kéé i bôlôm ni i bôda i Korintô i bi neebe ñañ nlam, i sôblana, i kôhna yak mbuu mpubi. Yak ñôma Paul a bi tégbaha ngandak ngéda i niiga bo. (Minson mi baôma 18:​8-11) Ndi ndék nwii i mbus sôble yap, ngandak i bé ngi hôlôl i pes mbuu. (1 Korintô 3:2) Inyu hol i pes mbuu, kii di nlama bé boñ?

10. Kii di nlama boñ inyu yila minhôôlak mi bôt i pes mbuu? (Yuda 20)

¹⁰ Inyu yila nhôôlak, i mbat ndugi le di bana ngôñ i hol. I bôt ba ‘ngwés ngiyi,’ ba ba neebe ke ni bisu i ba disiina di boñge i pes mbuu, ba ga hol bé. (Bingéngén 1:22). Di gwé bé ngôñ i ba kiki bôt ba ba mal nañ, ndi ba bemek le bagwal bap bon ba yôñôl bo makidik. Maselna ni hala, di gwé ngôñ i yoñ makidik bés bomede inyu hôlôl i pes mbuu. (Añ Yuda 20.) Ibale u ngi boñok biliya inyu yila nhôôlak i pes mbuu, soohe Yéhôva le a hôla we i bana “ngôñ ni ngui i boñ mam.”​—Filipi 2:13.

11. Kii Yéhôva a nti bés inyu hol i pes mbuu? (Éfésô 4:​11-13)

¹¹ Yéhôva a ngwés le di noñ i njel a ntéé inyu hol i pes mbuu. Ikété makoda, a bi ti bés bôt ba ba ntat bés, ba niigaga bés lelaa di boñ inyu yila “minañak mi bôt” i pes mbuu, “inyu pam i bana  libak li Kristô i nya i yôni.” (Añ Éfésô 4:​11-13, buk isi lipep.) Yéhôva a nti bés mbuu mpubi wé inyu hôla bés i bana “mahoñol ma Kristô.” (1 Korintô 2:​14-16) Jam lipe li yé ki le a bi tinde bôt i tila bikaat bina bini le Matéô, Markô, Lukas ni Yôhanes inyu hôla bés i tehe lelaa Yésu a bé hoñol, ni lelaa a bé boñ mam i ngéda a bé hana ’isi. Ibale u nkôna Yésu, mu kiki a bé hoñol ni lelaa a bé boñ mam, u ga pam i yônôs njômbi yoñ, hala wee i yila nhôôlak kristen.

NSEÑ U BAÑGA BIJEK BI MBUU

12. Kii i yé “biniigana bi bisu inyu Kristô”?

¹² Inyu hol i pes mbuu, di nlama ndik bé telbene ha i ‘biniigana bi bisu bi Kristô.’ Kiki hihéga, biniigana bi bi mpôdôl “i tam bibéba gwés, hémle, sôble ni bitugne.” (Lôk Héber 6:​1, 2) Biniigana bi, bi yé hikuu hi biniigana bi bikristen, inyu hala nyen ñôma Pétrô a bi pôdôl gwo i ngéda a bé tééne limut li bôt likalô i Pentékôt. (Minson mi baôma 2:​32-35, 38) Di nlama neebe biniigana bi bisu bi inyu yila banigil ba Kristô. Kiki hihéga, Paul a bi béhe bôt le, nu ni nu a ntjél biniigana bi bitugne, wee a ntañba hémle. (1 Korintô 15:​12-14) Ndi di nlama ndik bé telbene i biniigana bi bisu bi Bibel.

13. Kii di nlama boñ inyu ôt nseñ ni bañga bijek ba mpôdôl i kaat Lôk Héber 5:14? (Béñge yak titii.)

¹³ Maselna ni biniigana bi bisu, bañga bijek i pes mbuu i gwé ndik bé mambén ma Yéhôva, ndi yak matiñ ma ma nhôla bés i tibil nok mahoñol mé. Inyu ôt nseñ ni bijek bi mbuu bi, di nlama nigil, di ôt pék di bii ki i mam di nigil i bisélél. I ngéda di mboñ hala, di nigil i yoñ makidik ma ma nlémél Yéhôva. c​—Añ Lôk Héber 5:14.

14. Lelaa Paul a bi hôla lôk kéé i Korintô i hol i pes mbuu?

¹⁴ I bôt ba ta bé minhôôlak mi bikristen, ba yé ba bana ndutu i yoñ makidik i ngéda mbén i tôbôtôbô i mpôdôl bé mandutu ba mboma. Ibale mbén Bibel i tôbôtôbô i i mpôdôl ndutu yap i ta bé,  bahogi ba yé le ba hoñol le ba nla boñ kiki ba ngwés. Bape ba nla bat mbén i het ngim mbén i ta bé. Kiki hihéga, bikristen bi Korintô bi bi bat Paul too ba nlama je bijek bi ba nsémél bisat. Iloole a kal bo kii ba boñ, a bi yis bo le hiki mut a gwé kiññem, ni le hiki mut a gwé “kunde . . . i pohol.” A bi gwélél ngim matiñ ma Bibel inyu hôla bo i ôt pék inyu boñ le kiññem yap i kéés bañ bo, ni le ba ba bañ ngok baagene inyu bôt bape. (1 Korintô 8:​4, 7-9) Paul a bi hôla lôk kéé i Korintô i nañ i pes mbuu kayéle ba laa gwélél ngap yap i wan mam iloole ba bat bôt bape mambe makidik ba nlama yoñ, tole ba yéñ mambén hiki ngéda ba nsômbôl yoñ makidik.

15. Lelaa Paul a bi hôla bikristen bi Lôk Héber i hol i pes mbuu?

¹⁵ Di ñôt biniigana bi mahee mu kaat Paul a tilna bikristen bi Lôk Héber. Bahogi ipôla yap ba bi ke bé ni bisu i hol i pes mbuu, ‘ba bi témb ba kahal bana ngôñ ni milik, he bañga bi bijek bé.’ (Lôk Héber 5:12) Ba bi ke bé ni bisu i nigil ni i neebe mam ma mondo Yéhôva a bé niiga bo ikété likoda jé. (Bingéngén 4:18) Kiki hihéga, bon ba Lôk Yuda bape ba bé ke ni bisu i kal le ba nlama nôgôl mbén Môsi, to hala kiki hala a bé 30 ma nwii le sesema i Yésu i bi mélés i Mbén i. (Rôma 10:4; Titô 1:10) I 30 ma nwii ma, ma bé ma kôli inyu yis Lôk Yuda le ba bé lama ha bé noñ mbén Môsi. Hiki mut nu a ñañ kaat i Lôk Héber, a nla kal le i gwé bañga bijek bi mbuu. Kaat i Paul i bi hôla bo i nok le bitelbene bi mondo Yéhôva a bi yoñ inyu bibégés bipubi bi bé bilam ngandak. Hala a bi ti bo makénd, a hôla ki bo i ke ni bisu i añal ñañ nlam to hala kiki Lôk Yuda i bé kolba bo.​—Lôk Héber 10:​19-23.

U LÔÔHA BAÑ BÔDÔL WEMEDE ÑEM

16. U héya le di nlama ke ni bisu i hol i pes mbuu, kii ipe di nlama boñ?

¹⁶ Di nlama boñ biliya i nañ i pes mbuu, ni i ke ni bisu i hol. Inyu hala nyen di nlama bé lôôha bôdôl bésbomede  ñem. (1 Korintô 10:12) Di nlama “ke ni bisu i wanba” inyu tehe too di nke ni bisu i hol.​—2 Korintô 13:5.

17. Mu kaat Paul a tilna lôk kéé i Kôlôsé, kii i ñunda le i yé nseñ i ke ni bisu i ba nhôôlak i pes mbuu?

¹⁷ Mu i kaat Paul a tilna lôk kéé i Kôlôsé, a bi yigye mahee ma yé i hol i pes mbuu. To hala kiki ba bé ba ma yila minhôôlak mi bikristen, Paul a bi béhe bo le ba yoñ yihe ni mahoñol ma nkoñ ’isi. (Kôlôsé 2:​6-10) Yak Épafras nu a bé yi lôk kéé i likoda li Kôlôsé loñge loñge, a bé soohe hiki ngéda le ba “pam i ba nyonok,” tole nhôôlak. (Kôlôsé 4:12) Bimbe biniigana di nla ôt mu? Paul bo Épafras ba bi nok le i ke ni bisu i ba nhôôlak i mbat biliya bi ngui, ni mahôla ma Nyambe. Ngôñ yap i bé le lôk kéé i Kôlôsé i kee ni bisu i ba minhôôlak mi bikristen to hala kiki ba bé boma mandutu.

18. Kii i nla pémél yak nhôôlak kristen? (Béñge yak titii.)

¹⁸ Paul a bi béhe bikristen bi Lôk Héber le nhôôlak kristen u nla ôbôs maada mé ni Nyambe. Ibale kristen i ntéñbe ikété béba, i ga tehe ha bé nseñ i tam béba yé ni i bat Nyambe nwéhél. Masoda le Lôk Héber i bi pam bé i likala li. (Lôk Héber 6:​4-9) Kii di nla kal inyu lôk kéé i i bi waa téé likalô tole i ba bi pémés i ntôñ, i mbus ngéda ba tam béba yap? Suhulnyuu yap i ñéba le ba yé maselna ni i bôt Paul a bé pôdôl. Ndi i ngéda i ntén mut u, u ntémb yak Yéhôva, a gwé ngôñ le ba hôla nye. (Ézékiel 34:​15, 16) Mimañ mi nyoñ bitelbene le nhôôlak kristen u hôla nye i témbna ngui yé i pes mbuu.

19. Imbe njômbi di nlama bana?

¹⁹ Ibale u mboñ biliya i yila nhôôlak i pes mbuu, yi le u nla yônôs i njômbi i! Kee ni bisu i je bañga bijek, u boñ le mahoñol moñ ma kiha ni mahoñol ma Yéhôva. Ibale u yé nhôôlak i pes mbuu, kee ni bisu i ba siñ mu libak joñ.