1. Imbe ngéda minhook nwominsôna mi ga ba i ngii?

 HALA a yé ngandak nwii nano le, bagwélél ba Yéhôva ba bé badba le, ‘imbe ngéda minhook mi bikristen mi mi yii hana ’isi mi ga yôña inyu ke i ngii?’ Di bé hoñol yak le bebek i mbus gwét bi Armagédôn ngim minhook i ga yégle hana ’isi i Paradis, inyu ndék ngéda. Ndi Nkum Ntat nu hilo 15 nu sôñ Njéba, nwii 2013, a bi niiga bés le minhook mi mi yii hana ’isi mi ga ke i ngii ndék ngéda ilole gwét bi Armagédôn bi mbôdôl.​—Matéô 24:31.

2. Imbe mbadga di nla badba, kii di ga wan munu yigil ini?

² Ndi, di nla badba le: Kii i ga tagbe ni “mintômba mimpe” mi Kristô mi mi ga téñbe i gwélél Yéhôva i “njiiha ikeñi”? (Yôhanes 10:16; Matéô 24:21) Ngim bôt i nla kon woñi le ba ga tjôô bo, tole ba ga nôgda binyuu i ngéda lôk kéé yés i bôlôm ni i bôda i i yé minhook i ga ke i ngii. Di wan miñañ ima mi Bibel mi mi nla boñ le ba bana i nya mahoñol i. I mbus di ga tehe inyuki di nlama bé kon woñi.

KII I GA BÔÑA BÉ?

3-4. Kii bôt bape ba nla badba, inyuki?

³ Bôt bahogi ba bé badba too mintômba mimpe mi ga pam i téñbe i maliga, i ngéda minhook mi bikristen mi Juu li bakena ntôñ mi ga ba ha bé ha inyu éga nwo. Bebek le ngim miñañ mi Bibel nwon mi ntinde bo i hoñol hala. Di wan le dihéga diba. Ñañ u bisu u mbéñge prisi  keñi le Yéhôyada. A bé a tiñi ni Nyambe. Nye ni nwaa wé Yéhôsabéat, ba bi sôô hisiina mañge le Yôas, ba hôla ki nye i yila loñge kiñe i i ngwélél Yéhôva. Ntel ngéda wonsôna mañ mut unu le Yéhôyada a bé a ngi yii i niñ, Yôas a bé boñ mam malam. Ndi i ngéda Yéhôyada a bi wo, Yôas a kahal boñ mam mabe. A bé nôgôl baane, a tjôô Yéhôva.​—2 Miñañ 24:​2, 15-19.

⁴ Hihéga hi nyônôs hiba hi yé hi bikristen bi hiai hi nyônôs iba. Yôhanes, ñôma Yésu nu a bi nsôk wo, a bi ba ndémbél ilam inyu ngandak bikristen, a hôla bo i téñbe i gwélél Yéhôva. (3 Yôhanes 4) Ñôma Yôhanes ni bana baôma bape ba Yésu, ba bi jo sañ i ngui inyu boñ le batjañgbene maliga ba jôp bañ ikété likoda. (1 Yôhanes 2:18; béñge buk isi lipep i 2 Tésalônika 2:7.) I mbus nyemb ñôma Yôhanes, batjañgbene maliga ba bi tjama homa nyensôna kiki hié hi nkala i lipan. Ndék nwii ndigi i mbus, likoda li bikristen li bé nyonok ni bikwéha bi biniigana.

5. Kii miñañ mini nwo ima mi nlama bé tinde bés i hoñol?

⁵ Baa miñañ mini nwo ima mi nlama tinde bés i hoñol le, i nya jam ini i ga pémél mintômba mimpe i ngéda minhook mi ga ke i ngii? Baa i ngéda i, bikristen bi ga tjôô Yéhôva kiki Yôas a bi boñ, tole bi ga jôp ikété ntôñ u batjañgbene maliga kiki bikristen bi hiai hi nyônôs iba N.Y. bi bi boñ? Ndimbhe i yé le, to jam! Di nla ba nkwoog nkaa le i ngéda minhook mi ga ke i ngii, mintômba mimpe mi ga ba nkôôbaga i yémbél manoodana ma mbem bo. Kii i nkwés bés nkaa hala?

BIBÉGÉS BIPUBI BI GA MAL BÉ

6. Mambe mangéda maa di ga wan?

⁶ Kii i nla kwés bé nkaa le bagwélél ba Yéhôva ba ga téñbe i gwélél nye to ibale ba mboma mandutu? I yom i nla kwés bés nkaa i yé le, Bibel i bi bôk i kal bés imbe ngéda di niñil. I ngéda ini di niñil, i yé mahéñha ngandak ni dilo di nlômbi Israel yak ni dilo di bikristen bi hiai hi nyônôs iba. Jon di tibil wan mangéda ma mo maa: (1) i ngéda nlômbi Israel, (2) i mbus nyemb baôma, ni (3) i ngéda yés, “bitimbhene bi mam momasôna.”​—Minson mi baôma 3:21.

7. Inyuki bon ba Israel ba ba bi téñbe ni Yéhôva, ba bi nimis bé botñem yap i ngéda bikiñe ni bon ba Israel bape ba bi ndogbene Nyambe?

⁷ I ngéda nlômbi Israel. Ndék ngéda ilole Môsi a nwo, a kal bon ba Israel le: “Me nyi le i mbus nyemb yem n’a boñ mam mabe, ni yék ki njel me bi ti bé oda le ni noñ.” (Ndiimba Mbén 31:29) Môsi a bi béhe ki bo le, ibale ba ndogbene Yéhôva, ba ga ke i minkôm. (Ndiimba Mbén 28:​35, 36) Baa hala nyen mam ma bi yik tagbe? Ñ. Ikété ngandak tjai, ngandak bikiñe i bi boñ mam mabe i mis ma Yéhôva yak litén li noñ bo mu béba njel i. Hala a bi boñ le Yéhôva a kogse litén li Israel, a mélés yak énél i bikiñe gwé. (Ézékiel 21:​25-27) Ndi bon ba Israel ba ba bi téñbe i gwélél Yéhôva ba bi kôhna makénd i ngéda ba bi tehe le, i mam Yéhôva a kal ma bi yon.​—Yésaya 55:​10, 11.

8. Baa hala a nlama hélés bés le bikristen bi hiai hi nyônôs iba bi bi bôdôl boñ mam mabe? Toñol.

⁸ I mbus nyemb baôma. Baa hala a nhélés bés i yi le bikristen bi hiai hi nyônôs  iba bi bi bôdôl boñ mam mabe? To jam. Yésu a bi bôk a kal le i bôt ba nyan mbén ba ga bôl. (Matéô 7:​21-23; 13:​24-30, 36-43) Ñôma Paul, Pétrô, ni Yôhanes ba bi unda le i yom Yésu a bi kal i bi bôdôl yon i hiai hi bisu N.Y. (2 Tésalônika 2:​3, 7; 2 Pétrô 2:1; 1 Yôhanes 2:18) I hiai hi nyônôs iba N.Y., batjañgbene maliga ba bi yon ikété likoda li bikristen. I mbus nyemb i baôma, batjañgbene maliga ba bi bôl ngandak kayéle bon ba bi yila ndôñ bibase hala wee Babilôn Nunkeñi. Mbañ i Bibel i bi yon ki.

9. Lelaa ngéda yés i yé maselna ni ngéda i nlômbi Israel lôñni ngéda i likoda li bikristen li hiai hi nyônôs iba?

⁹ “Bitimbhene bi mam momasôna.” Ngéda yés i yé maselna ni ngéda nlômbi Israel lôñni i ngéda batjañgbene maliga ba bi bôl i hiai hi nyônôs iba N.Y. Lelaa ba nsébél ngéda yés? Di mbéna di nsébél yo le “dilo di nsôk” di béba nkoñ ’isi ini. (2 Timôtéô 3:1) Ndi Bibel i ñunda le, i kék i tôbôtôbô ini, ni i i yé mbôñgô i bi bôdôl i nlélém ngéda. I ga ke letee ni i Ane i Mésia i i ga boñ le bôt ba yila peles ni le hisi hi yila paradis. Ba nsébél i kék i le “bitimbhene bi mam momasôna.” (Minson mi baôma 3:21) I ngéda i, i bi bôdôl i nwii 1914. Kii ba bi tiimba téé? Yésu a bi tééba Kiñe i ngii. Jon Yéhôva a bi témb a bana kiñe i ngii i i nyiha nye, nkôdôlbum nu Kiñe David. Ndi kiñe yotama bé yon Yéhôva a bi tiimba téé. Ndék ngéda i mbus, a bi tiimba téé bibégés bipubi! (Yésaya 2:​2-4; Ézékiel 11:​17-20) Baa bibégés bipubi bi ga mal ki?

10. (a) Kii Bibel i bi bôk i kal inyu bibégés bipubi i ngéda yés? (Yésaya 54:17) (b) Inyuki i mbañ i i nlédés bés?

¹⁰ Añ Yésaya 54:17. Hoñol le i mbañ ini: “Jôl i gwét yo ki yo le ba ñôô inyu jôs we i ga yémbél bé we”! Bibañga bi Bibel bini bi nyon i len ini. Yak bini bi bañga bi bi nhôgbaha bés bi nyon i ngéda yés: “Yéhôva nyen a ga niiga bon boñ bobasôna, nsañ u bon boñ u ga ba ngandak. U ga telep siñ siñ ikété telesép. . . . U ga kon bé mut nye ki nye woñi, yom yo ki yo i ga boñ bé we le u sehla, inyule i ga lo bé we bebee.” (Yésaya 54:​13, 14) To Satan nyemede, “nyambe nu nkoñ ’isi unu,” a nla bé kéñ bagwélél ba Yéhôva i niiga bôt bape i yi nye. (2 Korintô 4:4) Bibégés bipubi bi mal tééba, bi ga ôbi ha  bé. Bi ga nom i mba ni mba. Jôl i gwét yo ki yo i ga yémbél bé bés!

KII I GA BÔÑA?

11. Kii i nkwés bés nkaa le limut likeñi li ga ba bé jotama i ngéda minhook mi ga ke i ngii?

¹¹ Kii i ga bôña i ngéda minhook mi ga ke i ngii? Bigda le, Yésu a yé Ntééda wés. Nyen a yé ño u likoda li bikristen. Yésu a bi kal le: “Ni gwé ndigi Ñéga wada le Kristô.” (Matéô 23:10) Yésu Kristô, Kiñe i i ñane a ga yônôs ndigi nson wé. Inyule Kristô nyen a ñéga bagwélél bé hana ’isi, jon ba gwé bé le ba kon yom yo ki yo woñi. I yé maliga le, di nyi bé lelaa Kristô a ga kena litén jé ha ngéda i. Jon di béñge le ndék dihéga i i nla lédés bés.

12. Lelaa Yéhôva a bi yoñ ndun ni litén jé (a) i mbus nyemb Môsi? (b) i mbus le Éliya a bi kôhna nson umpe? (Béñge yak titii.)

¹² Ilole litén li Israel li njôp Hisi hi likak, Môsi a bi wo. Mam ma bé lelaa inyu litén li Nyambe? Baa Yéhôva a bi waa hôla litén jé i mbus nyemb ngwélél wé? To. Ntel ngéda wonsôna ba bé téñbe ni nye, Yéhôva a bé yoñ ndun ni bo. Ilole Môsi a nwo, Yéhôva a bi kal nye le, a téé Yôsua inyu kena litén. Môsi a bi tégbaha ngandak nwii i kôôba Yôsua inyu yônôs nson u. (Manyodi 33:11; Ndiimba Mbén 34:9) Ngandak minhôôlak mi bôt ipe i bé éga litén​—baane ba dikôô, baane ba mbôgôl, baane ba môm matan, ni baane ba jôm. (Ndiimba Mbén 1:15) Litén li Nyambe li bé i moo malam. Di ntehe i nlélem jam yak Éliya. A bi hôla litén li Israel i bégés Yéhôva ngandak nwii. Ndi i mbus ngéda, Yéhôva a bi bééga nye nson umpe i nwelmbok u Yudéa. (2 Bikiñe 2:1; 2 Miñañ 21:12) Baa bagwélél ba Yéhôva ba ba bé téñbe ni nye mu jôm li matén ma Israel ba bi yégle botama? To jam. Éliya a bi kôôba Élisa ngandak nwii. Yak “bon ba bapôdôl” ba ba bé nkôôbaga inyu ngim minson ba bé ha. (2 Bikiñe 2:7) Jon, ngandak bagwélél ba Nyambe ba bé nkôôbaga inyu éga litén jé. Yéhôva a bé ke ni bisu i yônôs sômbôl yé, ni i yoñ ndun ni bagwélél bé.

13. Bimbe bibuk bi nlédhana di nléba i kaat Lôk Héber 13:5b? (Béñge yak titii.)

¹³ Ni dihéga di i mahoñol, u nhoñol le kii i ga tagbe i ngéda nhook u nsôk u ga ke i ngii? Di gwé bé le di badba ngandak  mambadga. I yom Bibel i nkal mu jam li i ntina makénd: Yéhôva a yé mbén i tjôô bagwélél bé ba ba yé hana ’isi. (Añ Lôk Héber 13:5b.) Kiki Môsi bo Éliya, i ndék minhook i i ñéga mam i len ini, i nyi nseñ u yé i uñgus bôt bape. Hala a yé ngandak nwii nano le Juu li bakena ntôñ, li ñuñgus lôk kéé i bôlôm mu mintômba mimpe inyu éga litén li Nyambe. Kiki hihéga, ba bi téé bisuklu inyu mimañ, bagwélél ba makiiña, lôk kéé i muu ma biloñ, mimañ mi Bétel ni bape ki. Juu li bakena ntôñ li bi uñgus yak bahôla ikété bon ba muu Juu li bakena ntôñ li ñéga. Nano bahôla ba, ba ñéga ngandak minson ikété ntôñ. Ba yé nkôôbaga loñge i ke ni bisu i yoñ ndun ni mintômba mi Kristô.

14. Nlôm jam munu yigil ini a yé le kii?

¹⁴ Nlôm jam munu yigil yés nyen a yé le: I ngéda minhook mi mi nginda yii hana ’isi, m’a ke i ngii i mamélél ma njiiha ikeñi, bibégés bipubi bi ga ke ni bisu i ba hana ’isi. Ni njel nkena wés Yésu Kristô, bagwélél ba Djob ba ga waa bé bégés nye. Di nyi le ha ngéda i, kodba i matén le Gôg nu Magôg, a ga kolba bés. (Ézékiel 38:​18-20) Ndi ngolba yé i ga kwo i lép; i ga la bé kéñ bagwélél ba Yéhôva i bégés nye. Ibabé pééna, a ga sôñ bo! Ikété yiinda, ñôma Yôhanes a bi tehe “limut likeñi” li mintômba mimpe mi Kristô. Yôhanes a bi kal le “limut likeñi” li, li nlôl “i njiiha ikeñi.” (Masoola 7:​9, 14) Ñ, Yéhôva a ga sôñ bo!

15-16. Inoñnaga ni Masoola 17:​14, kii minhook mi bikristen mi ga boñ i gwét bi Armagédôn, inyuki hala a ntina makénd?

¹⁵ Bebek le, bôt bahogi ba mbadba le: ‘Kii minhook mi ga boñ i ngéda mi ga ke i ngii?’ Bibel i ntimbhe i mbadga i. I ñunda le biane bi nkoñ ’isi “bi ga jôs Man ntômba gwét.” Ndi bi ga nimis gwo. Di ñañ le: “Man ntômba a ga yémbél gwo.” Njee a ga hôla nye? Nlôñ Bibel u ntimbhe. Ba ba yé “nséblaga,” “mpohlak,” ba bak ki “maliga.” (Añ Masoola 17:14.)  Bonjee ba? Minhook mi mi ntuglana! Jon minhook mi mi nsôk niñ hana ’isi, i ngéda mi ga yôña inyu ke i ngii bebee ni mamélél ma njiiha ikeñi, nson wap u bisu u mba le ba joo gwét. Kinje nson u tôbôtôbô! Ilole mi nyila Mbôgi Yéhôva, minhook mihogi mi bé jôs bôt bape. Mimpe mi bé yak bisônda. Ndi ba bi sôk ba yila bañga bikristen, ba nigil niñ ikété nsañ ni bôt bape. (Galatia 5:22; 2 Tésalônika 3:16) Ba bi waa nit gwét. Ndi, i ngéda ba ga bet i ngii, ba ga hôla Kristô ni biañgel gwé bipubi i jôs baoo ba Nyambe i gwét bi nsôk.

¹⁶ Ni bigda le! Hana ’isi, minhook mihogi mi yé mimañ mi bôt, mi gwééba ha bé. Ndi i ngéda ba ga tuge, i mbus ba ke i ngii, ba ga yila mimpémba mi bihégél mi mi nwo bé, nson wap u ga ba le ba joo gwét lôñ yada ni Kiñe-Njo gwét le Yésu Kristô. I mbus gwét bi Armagédôn, ba ga éga bôt ba binam letee bobasôna ba yila peles. Ibabé pééna, ba ga boñ lôk kéé yap loñge kiyaga, iloo i loñge ba bé le ba bôñôl bo i ngéda ba bé hana ’isi ba bak bikwéha bi bôt!

17. Kii i nyis bés le bagwélél ba Yéhôva bobasôna ba ga pei i gwét bi Armagédôn?

¹⁷ Baa u yé ikété mintômba mimpe? Kii u nlama boñ ilole gwét bi Armagédôn bi mbôdôl? Boñ ndigi i jam lini: Bôdôl Yéhôva ñem, nôgôl ki nye. Kii hala a nkobla? Bibel i mpôdôl i jam li ni bibuk bini bi nhôgbaha: “Jôp i bituñ gwoñ bi kétékété, yip manwemel. Solop inyu ndék ngéda letee hiun hi tagbe.” (Yésaya 26:20) Bagwélél ba Nyambe bobasôna, ba ba yé i ngii ni ba ba yé hana ’isi, ba ga pei i ngéda i. Kiki ñôma Paul, di yé nkwoog nkaa le “to bangomin, to mam ma yé hanano to mam m’a ke i lo . . . [bi] ga la bé bagal bés ni gwéha Nyambe.” (Rôma 8:​38, 39) Kekikel u hôiga bañ le: Yéhôva a ngwés we, a yé mbén i tjôô we!