Ndi to hala, Yéhôva a ngwés le di bem ngeñ yé ni wongut. Inyuki hala? Kii i nla hôla bés i bem nye ni maséé?

INYUKI YÉHÔVA A NGWÉS LE DI BEM?

Bibel i nkal le: “Yéhôva a yé i bem le a bôñôl bé loñge, a ga telep inyu kon bé ngoo. Inyule Yéhôva a yé Nyambe nu telepsép. I bôt bobasôna ba nkônde bem nye ba yé bokimasoda.” (Yésaya 30:18) Bini bibuk bi Yésaya bi bé béñge bon ba Lôk Yuda ba ba bé ndok. (Yésaya 30:1) Kiki bon ba Lôk Yuda bahogi ba bé ba tiñi ni Yéhôva, bibuk bi Yésaya bini bi bé ti bo botñem. Minlélém mi bibuk mi, mi nti yak bagwélél ba Yéhôva ba len botñem.

Jon, di nlama bem ni wongut inyule Yéhôva a yé i bem ni wongut. A ntéé ngim ngéda a ga mélés i béba nkoñ ’isi ini, hilo hi ni i ngeñ i gwon a mbem. (Matéô 24:36) Ha ngéda i, bôt bobasôna b’a yi toi le minsohi Nsohop a bi ôm Yéhôva ni bagwélél bé mi bé bé maliga. Ha nyen a ga tjé Satan ni ba bobasôna ba nit nye, ndi a ga ‘kônôl bés ngoo.’

Mu kiki di mbem, i nla pam le Yéhôva a héya bé mandutu més, ndi a mbôn bés le, di nla ba maséé mu kiki di mbem nye. Kiki Yésaya a bi kal, di nla ba maséé yak i ngéda di mbem ni ngôñ ikeñi le loñge jam i bôña. (Yésaya 30:18) a Kii di nla boñ inyu ba maséé? Di tehe mam ma-na ma ma nla hôla bés.

KII DI NLA BOÑ INYU BEM NI MASÉÉ

Di bok mis i mam malam di gwé. Kiñe David a bi tehe mam mabe i niñ yé. (Tjémbi 37:35) Ndi a tila le: “Mom nwee i bisu bi Yéhôva, u waa bañ to bem nye. Liyot li gwel bañ we i ngéda u ntehe mut a mboñ mam mabe a gwé ngôñ i boñ.” (Tjémbi 37:7) David Nyemede a bi noñ maéba ma, a bok mahoñol mé i botñem i tohi  Nyambe a bi bôn nye. A bé ti Yéhôva mayéga inyu bisai gwobisôna a bé kôp nye. (Tjémbi 40:5) Ibale yak bés di mbok mahoñol i mam malam di gwé, he bé mandutu di mboma, i ga bane bés ntombok jam i bem Yéhôva.

Gwélél i pôla yosôna u gwé i añle bôt njee a yé Yéhôva. David nu bebek a tila kaat Tjémbi 71 a bi kal le: “M’a waa bé bem; m’a bégés ndik we, bégés ni bégés.” (Tjémbi 71:14) Lelaa a bé bégés Yéhôva? A bé añle bôt bape mam ma mbéñge Yéhôva, a tublak nye tjémbi di bibégés. (Tjémbi 71:​16, 23) Kiki David, yak bés di nla ba maséé mu kiki di mbem Yéhôva. Di nti nye bibégés i ngéda di ntéé likalô, mu minkwel nwés mi hiki kel, ni i ngéda di ntôp tjémbi di Ane inyu bégés nye. Lisañ lipe u ga tôp hiémbi hi Ane, yoñ ngéda i soñda mu bibuk gwé, ni mu maséé hi nti we.

Ôt nseñ ni makénd u nkôs ipañ lôk kéé i bôlôm ni i bôda: I ngéda David a bé boma mandutu, a kal Yéhôva le: “I bisu bi bagwélél boñ, m’a bôdôl we ñem.” (Tjémbi 52:9) Yak bés di nla ôt nseñ ni mangéda di ntégbaha ni lôk kéé yés inyu kôhna makénd, di mboñ ndigi bé hala i ngéda di yé i makoda ni likalô, ndi yak i ngéda di ntégbaha loñge ngéda ni bo.​—Rôma 1:​11, 12.

Lédés botñem yoñ. Tjémbi 62:5 a nkal le: “Me mbem Nyambe ikété nwee, inyule botñem yem i nlôl i nyeni.” I nlôôha ba nseñ i bana botñem i ngui, téntén ibale di ntehe wee lisuk li nkoñ ’isi unu li ntiñha. Di nlama ba nkwoog nkaa le mimbônga mi Yéhôva mi ga yon, to ibale nano a yé ngandak nwii le di mbem le mi nyon. Inyu lédés i botñem yés, di nlama nigil mbañ i Bibel, ni i mam Bibel i nyelel inyu Yéhôva. (Tjémbi 1:​2, 3) U héya hala, di nlama ‘soohe ni mbuu mpubi’ inyu tééda maada més malam ni Yéhôva, mu kiki di mbem le mbônga wé u niñ boga u yon.​—Yuda 20, 21.

Kiki Kiñe David, di ba nkwoog nkaa le Yéhôva a ntat ba ba nkon nye woñi, a undga ki bo loñgeñem. (Tjémbi 33:​18, 22) Inyu ke ni bisu i bem Yéhôva ni wongut, di bok mis i mam malam di nkôs i niñ yés, di ti nye bibégés, di neebe makénd lôk kéé i nti bés, di kônde ki lédés botñem yés.