1-2. Inyuki Yéhôva a bi yible bés njel i yila bijô bi lihaa jé, lelaa a bi boñ hala?

YÉHÔVA a nsômbôl le di yila bagwélél bé. Kinje nsima! Lihaa jés li yé nyonok ni bôt ba ba bi ti bomede nkikip yak Djob, ba ba nhémle ki sesema i Man wé. Di yé ikété lihaa li li yé toi maséé. Di gwé bañga niñ ibôdôl nano, ni botñem i niñ boga dilo di nlo, i ngii tole hana ’isi.

² Gwéha yon i bi tinde Yéhôva i yible bés njel i yila bijô bi lihaa jé. Hala a bi héé ki nye diye ngandak. (Yôhanes 3:16) Ñ, di bi ‘sômba ni ndamba.’ (1 Korintô 6:20) Yéhôva a bi ti bés pôla i bana maada malam ni nye ni njel binoñ. Kinje nsima i bana Ñane ngiinda yosôna kiki Tata wés. Kiki di ntehe i yigil i ntip tagbe, Yéhôva a yé Isañ nu a nloo basañ bobasôna.

3. Mambe mambadga di nlama badba? (Béñge minkéñék mi matila le “ Baa Yéhôva a nyimbe toi me?”)

³ Kiki ntila Bibel wada, yak bés di nla badba le: “M’a timbhe kii Yéhôva inyu biloñge gwé gwobisôna a mbôñôl me?” (Tjémbi 116:12) Kekikel, di ga la bé timbhe Tata wés nungingii mam a mbôñôl bés. Ndi i mam ma ma ntinde bés i gwés nye. Ñôma Yôhanes a tila le: “Di ngwés [nye] inyule a bi bôk a gwés bés.” (1 Yôhanes 4:19) Lelaa di nla unda Tata wés nungingii le di ngwés nye?

4. Inoñnaga ni Yakôbô 4:8, inyuki di nlama boñ biliya i kôôge Yéhôva bebee?

⁴ Yéhôva a ngwés le di kôôge nye bebee ni le di kwel ni nye. (Añ Yakôbô 4:8.) A nti bés makénd i “téñbe ni masoohe,” a ñemble bés hiki ngéda. (Rôma 12:12) Kekikel, a ga waa bé emble bés, to pagda i ga kéñ bé nye i boñ hala. Yak bés di ñemble nye ngéda di nsoñgol Bañga yé le Bibel, ni ngéda di nigil bikaat bi ntôñ bi bi ntoñol yo. Di ñemble ki nye ngéda di yé péé makoda. Kiki minkwel mi nlédés maada ipôla bagwal ni bon bap, hala nyen di ga kônde ba bebee ni Yéhôva ngéda di nkwel ni nye hiki ngéda.

5. Lelaa di nla kônde lémés masoohe més?

⁵ Lelaa u yé u nsoohe Djob? Yéhôva a ngwés le di yible nye ñem ikété masoohe. (Tjémbi 62:9) Di nlama badba le: ‘Baa me mbéna soohe ngwéé ngwéé kiki mut le ba noñ? Baa ngéda me nsoohe, me ntiimba ndik minlélém mi bibuk, tole i mam ma yé me ñem mon me nkal Yéhôva ikété masoohe?’ Pééna yo ki yo i ta bé le u ngwés Yéhôva, u gwé ki ngôñ i ke ni bisu i lédés maada moñ ni nye. Inyu pam i boñ hala, u nlama kwel ni nye hiki ngéda. Yible nye ñem woñ. Añle nye i mam ma nkônha we maséé ni ma ma ntééñga we. U kon bañ woñi i bat nye mahôla.

6. Kii di nlama boñ inyu tééda maada malam ni Tata wés nungingii?

⁶ Inyu tééda maada malam ni Tata wés nungingii, di nlama bana lem i ti nye mayéga inyu mam a mbôñôl bés. Di gwé minlélém mi mahoñol ni ntôp tjémbi nu a kal le: “A Yéhôva, Nyambe wem, minson nwoñ mi hélha u bi boñ mi yé mbôlôk, yak mahoñol moñ inyu yés, ma nla bé éña manoñ manoñ bisu gwoñ. Ibale bo ndi me bak le me añal mo ni pot mo, ki ma yé ngandak iloo kii ma nla éña!” (Tjémbi 40:6) Di nlama ndigi bé ti nye mayéga, ndi bipôdôl gwés ni bibôñôl gwés bi nlama unda le di nkon maséé inyu mam a mbôñôl bés. Inyu hala nyen di yé maselna ni ngandak bôt i len ini. Munu nkoñ ’isi unu, bôt ba nyi bé ti mayéga inyu mam malam Yéhôva a mbôñôl bo. Ikété mam ma ñunda le di niñil ‘dilo di nsôk,’ jada li yé le, bôt ba nyi bé ti mayéga. (2 Timôtéô 3:1, 2) Di nlama bé ba kiki bo!

7. Kii Yéhôva a ngwés le di boñ, inyuki?

⁷ Bagwal ba ngwés bé le bon bap ba nomol, to jo bisañ, ndik le ba ba mawanda. Nlélém ni Yéhôva, a ngwés le bon bé bobasôna ba ba mawanda. Ñ, i gwéha i yé ipôla yés yon i ñunda le di yé bañga bikristen. (Yôhanes 13:35) Di gwé minlélém mi mahoñol ni ntôp tjémbi nu a tila le: “Kinje loñge ni maséé ngéda lisañ li bôt li nyén ni adna!” (Tjémbi 133:1b) Ngeñ di ngwés lôk kéé yés i bôda ni i bôlôm, di ñunda Yéhôva le di ngwés nye. (1 Yôhanes 4:20) Kinje maséé i ba ikété lihaa li bilôk bikéé bi bôda ni bi bôlôm, bi bi gwé ‘loñgeñem, ni ñem konangoo’!​—Éfésô 4:32.

8. Inoñnaga ni 1 Yôhanes 5:3, njom bisu i i ntinde bés i gwés Yéhôva i yé le kii?

⁸ Yéhôva a ngwés le boñge ba nôgôl bagwal bap, a ngwés ki le di nôgôl nye. (Éfésô 6:1) Di kôli nôgôl nye inyule a  yé Nhek wés, i Nwet a nti bés niñ, a gwé ki pék iloo bagwal bobasôna. Di nôgôl nye inyule di ngwés nye. (Añ 1 Yôhanes 5:3.) To hala kiki Yéhôva a nyi le di gwé ngandak manjom i i ntinde bés i nôgôl nye, a nyégsa bé bés i boñ hala. A bi ti bés kunde i yoñ makidik, jon a yé maséé ngéda a ntehe le gwéha di gwééne nye yon i ntinde bés i nôgôl nye.

9-10. Inyuki i yé nseñ i yi mambén ma Djob, ni i bii mo bisélél?

⁹ Bagwal ba ngwés bé le jam libe li pémél bon bap. Jon ba ntééne bo mambén ma ma yéne bo nseñ. Ngéda boñge ba noñ mo, ba ñunda le ba nôgôl bagwal bap, ba nti ki bo lipém. Bôô ni ngélé yañen ni mambén Tata wés nungingii a nti bés, di nlama noñ mo inyule ma yé inyu loñge yés. Ngéda di mboñ hala, di ñunda le di ngwés nye ni le di nti nye lipém, hala a yé ki inyu loñge yés. (Yésaya 48:17, 18) Ndi i bet ba ntjél nôgôl mambén ma Yéhôva, ba yé ba sôk boma bikuu.​—Galatia 6:7, 8.

¹⁰ Ngéda di noñ mambén ma Yéhôva, hala a nhôla bés i keñgle mam mabe ma ma nla pémél bés i pes minsôn ni i pes mbuu. Yéhôva a nyi kii i yé loñge inyu yés. Aurôra nu a yé Amérika a nkal le: “Me nyi ntiik le ngéda di nôgôl Yéhôva, niñ yés i nlama i nya nloo héga.” Bés  bobasôna di nyi le maliga ma. Baa u ma ôt nseñ i bii maéba ma Yéhôva bisélél i niñ yoñ?

11. Inyuki masoohe ma yé nseñ?

¹¹ Masoohe ma nhôla bés nôgôl Djob, yak ngéda hala a nlet. Ngim mangéda i ta bé bun i nôgôl Yéhôva, ndi di nlama bé waa jo sañ inyu yémbél béba. Ntôp tjémbi a bi yemhe Djob le: “Lédés ki me ni mbuu manôgla.” (Tjémbi 51:14) Dénise, nu a yé nsañal nu ngéda yosôna a nkal le: “Ngéda me nôgda le ngim mbén i Yéhôva i nyidil me, me nsoohe nye le a hôla me i boñ sômbôl yé.” Di nla ba nkwoog nkaa le Yéhôva a ga timbhe mintén mi masoohe mi.​—Lukas 11:9-13.

12. Inoñnaga ni kaat Éfésô 5:1, kii di nlama boñ?

¹² Añ Éfésô 5:1. Kiki di yé ‘bon Yéhôva a ngwés,’ di mboñ kii yosôna di nla inyu kôna nye. Di nigle bilem gwé kiki bo gwéha, loñgeñem, ni nwéhél. Ngéda bôt bape ba ntehe bihiumul gwés bilam, hala a nla tinde bo i yéñ yi njee a yé Nyambe. (1 Pétrô 2:12) Bagwal ba nlama nigle Yéhôva mu maada map ni bon bap. Ngéda ba mboñ biliya bi, hala a nla tinde yak bon bap i yila mawanda mé.

13. Kii i nla ti bés makénd?

¹³ Boñge ba mbéna gwés isañ wap, ba bak ki maséé i añle bôt njee a yé. Jon  yak bés di ngwés Tata wés nungingii le Yéhôva, di yé ki maséé i hôla bôt bape i yi nye. Di nôgda nlélém kiki Kiñe David nu a tila le: “Ñem wem w’a yadbene inyu Yéhôva.” (Tjémbi 34:3) Ndi kii di nla boñ ibale di nkon woñi i bôdôl nkwel ni bôt? Lelaa di nla boñ inyu bana makénd? Inyu bana makénd, di nlama bigda le Yéhôva a yé maséé ngandak ngéda di nyis bôt jôl jé, di hoñlak ki bisai bôt bape ba nkôs ngéda di ñañle bo ñañ nlam. Yéhôva a ga ti bés ñem ngui. A bi hôla bikristen bi hiai bisu i bana ñem ngui, a’ boñ nlélém ni bés.​—1 Tésalônika 2:2.

14. Inyuki nson i yilha bôt banigil u yé nseñ?

¹⁴ Yéhôva a ntodol bé bôt, a yé maséé ngéda di ñunda bape gwéha, ibabé i béñge binéñél gwap, to loñ yap. (Minson mi baôma 10:34, 35) Njel yada di nla gwélél inyu unda le di ngwés bôt i yé le, di añle bo ñañ nlam. (Matéô 28:19, 20) Mambe matam malam nson unu u nlona? Niñ i bôt ba neebe likalô jés i nkônde lama ibôdôl nano, ibabé i hôya le b’a bana niñ boga dilo di nlo.​—1 Timôtéô 4:16.

15-16. Inyuki di kôli kon maséé?

¹⁵ Yéhôva a yé loñge Isañ mbai, jon a ngwés le lihaa jé li ba maséé. (Yésaya 65:14) To hala kiki di mboma mandutu, di gwé ngandak mam i nti bés maséé. Kiki hihéga, di nyi ntiik le Tata wés nungingii a ngwés bés ngandak. Di gwé bañga yi i Nyambe. (Yérémia 15:16) Di yé ki ikété lihaa li li yé nyonok ni bagwélél ba Yéhôva, ba ba ngwés matiñ mé, ba gwéhnaga ki bo ni bo.​—Tjémbi 106:4, 5.

¹⁶ Di nla ki ba maséé inyule di gwé botñem i bana niñ ilam i mbok yondo. Di nyi le ndék ngéda, ni njel Ane yé, Yéhôva a ga tjé bibéba bi bôt gwobisôna, a yilha hisi Paradis. Di gwé ki botñem le bawoga ba ga tuge, ba témb ba kahal niñ ni bés. (Yôhanes 5:28, 29) Hala a ga ba jam li mbuma ñañ! Ndi jam li nloo momasôna li yé le, ndék ngéda, bôt bobasôna i ngii ni hana ’isi ba ga ti Tata wés nu gwéha lipém ni bibégés inyule a kôli ni gwo.