IBABÉ pééna, bôt ba gwé ngôñ i bana niñ i maséé. Ndi munu dilo di nsôk tini, hiki wada wés a mboma mandutu ma yé “nledek kiyaga.” (2 Timôtéô 3:1) Kiki bo ngitelepsép, makon, liyep li bôlô, njôghe nyemb, ni mam mape ma mboñ le bôt ba bana nduña ni le ba yodop, kayéle ba nimis maséé ndék ni ndék. I nla pam le yak bagwélél ba Djob ba tomb, ba nimis ki maséé map. Ibale hala a ma pémél we, lelaa u nla témbna maséé moñ?

Inyu timbhe mbadga i, di nlama ndugi yi kii i yé bañga maséé, ni lelaa bôt bape ba bi tééda maséé map tolakii ba bi boma mandutu. Mbus di ga nigil jam di nla boñ inyu tééda ni kéñbaha maséé di gwé.

Di nlama yi boñ maselna ipôla mut a yé toi maséé ni nu a yé ndik minyaô tole liyômba. Di yoñ hihéga hiada: Ngéda a nhiôô, mut nyôba a yé a nolba ngandak. Ndi, ngeñ moog ma mal, hiol hi mal, nduña ni liyot bi ntémb bi yuu nye. Libak jé li liyômba li bak ndigi inyu ndék ngéda.​—Bingéngén 14:13.

Maselna ni hala, maséé mo ma yé ngim lem lam i nlôl matihil ma ñem. Ba bi kobol maséé kiki “jam di nôgda ngéda di nkôs tole di mbem yom ilam.” Maséé ma yé libak li mahak li di nla nke ni bisu i bana, ngéda mam ma mpémél bés ma yé malam tole mabe. (1 Tésalônika 1:6) Ntiik, yom i nla tééñga mut, ndi a bak ki maséé. Kiki hihéga, ba bi bép baôma inyule ba bé niiga bôt inyu Kristô. Ndi, ba bi “nyodi bisu bi ntôñ bakéés, ba konok maséé le ba ñéña kii bôt ba kôli kôs wonyuu inyu jôl li.” (Minson mi baôma 5:41) Di nyi le, ba bé bé le ba ba maséé inyu wonyuu ba bi kôs. Ndi, kiki ba bé bagwélél ba Djob, ba bi léba bañga maséé inyule ba bi ke ni bisu i téñbe ni nye.

Di ngwéé bé ni ntén maséé u; ma nlo bé to motama. Inyuki? Inyule bañga maséé i yé lem yada ikété bilem bilam bi litam li mbuu. Ni mahôla ma mbuu Djob, di nla tibil eñgep “mut yondo” i nya i yôni, maséé ma bak lem yada mu libak li mut yondo. (Efésô 4:24; Galatia 5:22) Ngéda di yé maséé, di nla tibil hônba mandutu ma niñ.

Yéhôva a bé sômbôl le mam malam mon ma bôña hana isi, ndi he mabe bé ma di mbéna tehe i len ini. Jon maboñok mabe ma bôt bape ma mboñ bé le Yéhôva a nimis maséé mé. Bañga i Djob i nkal le: “Ngui ni maséé ba yé homa wé.” (1 Miñañ 16:27) Jam lipe li yé le, mam malam bagwélél ba Djob ba mboñ ma “kônha ñem [u Yéhôva] maséé.”​—Bingéngén 27:11.

Di nla kôna Yéhôva ngeñ di nlôôha bé tjelel ngéda mam ma nke bé kiki di hoñlak. Iloole di nimis maséé més, di nla bok  mahoñol més i mam malam di gwé nano, ni le di bem ni wongut mam malam ma yé bisu. *

Di nla ki léba ngandak dihéga di bôt ikété Bibel, ba ba bi tééda maséé map bisu bi mandutu. Abraham a yé wada mukété yap, nu a bi hônba mandutu ma niñ, ni ndééñga i i bé lôl nye ni bôt bape. (Bibôdle 12:10-20; 14:8-16; 16:4, 5; 20:1-18; 21:8, 9) To hala kiki a bi kôhna i nya mahiha i, Abraham a bi nimis bé maséé mé. Kii i bi hôla nye i boñ hala? A bé bigda mbônga Djob a bôñôl nye le a’ niñ hana isi, i si énél i Mésia. (Bibôdle 22:15-18; Lôk Héber 11:10) Yésu a bi kal le: “Isoñ nan Abraham a ba kon maséé i tehe kel yem.” (Yôhanes 8:56) Di nla kôna Abraham ngeñ di nyoñ ngéda i hoñol maséé ma mbem bés.​—Rôma 8:21.

Kiki Abraham, ñôma Paul ni solôñ yé Silas, ba bi bok mis map i ngii mimbônga mi Djob. Ba bééna hémle ngui, ba téédaga ki maséé map bisu bi mandutu. Kiki hihéga, mbus ba bi bép bo ndôm tôlô, ba leñ bo mok, “ndi bebee ni ñem u, [ba] ba soohe, ba tublak Nyambe tjémbi di bibégés.” (Minson mi baôma 16:23-25) U héya le ba bi hônba inyule ba bééna botñem i ngui, Paul bo Silas ba bé ki maséé inyule ba bé son njonok inyu jôl li Kristô. Di nla kôna Paul bo Silas ngéda di ntééda i mahoñol bisai di nkôs i téñbe i nson Djob.​—Filipi 1:12-14.

Yak i len ini, di gwé ngandak dihéga di lôk kéé i bôda ni i bôlôm, i i bi tééda maséé map bisu bi mandutu. Kiki hihéga, i sôñ Maye Sép i nwii 2013, mbuk mbebi nu ba nsébél le Haiyan, a bi hôñ i ñem loñ i Filipin, a tjé iloo 1 000 mandap ma Mbôgi Yéhôva. George, nu a bé i tison i Tacloban, yak nye a bi nimis ndap yé, a kal le: “Bilôk bikéé bi bé maséé tolakii ba bi kôs ndutu. Hala a yé nledek jam inyu yem i toñol maséé di bi nôgda.” To imbe ngéda di mboma mandutu makeñi, di ga tééda maséé més ibale di nyoñ ngéda i soñda mam malam Yéhôva a mbôñôl bés ni ñem mayéga. Limbe jam lipe Yéhôva a bi ti bés li tinde bés i ba maséé?

Baa jam lipe li nla lona bés maséé iloo maada malam di gwé ni Djob? Bigda le: Di nyi Ñane Ngiinda yosôna. A yé Isañ wés, Djob jés ni Liwanda jés!​—Tjémbi 71:17, 18.

Di ndiihe ki niñ a bi ti bés kiki likébla, di yé ki maséé ni yo. (Ñañal 3:12, 13) Kiki di yé bihégél bi gwé pék, di nla kôôge bebee ni Yéhôva, di nyi ki sômbôl yé inyu yés. (Kôlôsé 1:9, 10) Jon, niñ yés i gwé ngim njômbi, i bak ki mahee inyu yés. Ndi libim li bôt li nyi bé njômbi i. Inyu yigye jam li, Paul a tila le: “‘Mam jis li ma tehe bé, to ôô u ma nok bé, ni mam ma ma jôp bé mut ñem, mam momasôna Nyambe a kôôbana bôt ba ngwés nye.’ Ndi bés bon Nyambe a soolene mam mana ni mbuu wé.” (1 Korintô 2:9, 10) Baa di nkon bé maséé ni i nokna di gwé inyu sômbôl Djob ni bitééne gwé?

Di wan ki jam lipe Yéhôva a bi boñ inyu litén jé. Baa di ta bé maséé i yi le bibéba gwés bi nla nwéhlana? (1 Yôhanes 2:12) Inyu konangoo i Djob, di gwé botñem i ngui le ’isi yondo i yé bebee. (Rôma 12:12) Ibôdôl nano, Yéhôva a nti bés ngandak lôk kéé i pes mbuu. (Tjémbi 133:1) Bañga i Djob i nkwés bés nkaa le, Yéhôva a nsôñ bagwélél bé ikolba Satan ni mimbuu nwé mimbe. (Tjémbi 91:11) Ibale di ntibil ôt pék mu bisai bi gwobisôna Djob a nti bés, di ga bana maséé ma ñem, ma ma ga ke ni bisu i keñep.​—Filipi 4:4.

Baa kristen i i yé maséé, i nla ki kéñbaha maséé mé? Yésu a kal le: “Me bi kal  bé mam mana, le maséé mem ma ba ikété nan, yak maséé manan ma ba nyonok.” (Yôhanes 15:11) Baa hala a ñunda le di nla kéñbaha maséé més? U nla hégha biliya u mboñ inyu kéñbaha maséé moñ ni biliya bi mut a nkoda hié. U nlama kônde tjéé inyu boñ le hié hi kala inyu ti we lék. Nlélém ni maséé, u nlama kônde je i pes mbuu, inyu kéñbaha maséé moñ. Bigda le: Mbuu Djob won u nti maséé. Jon, di nlama bana lem i bat mbuu Yéhôva ni njel masoohe, ni soñda Bañga yé.​—Tjémbi 1:1, 2; Lukas 11:13.

U nla ki kéñbaha maséé moñ ngéda u nyoñ ngaba minson mi mi nlémél Yéhôva. (Tjémbi 35:27; 112:1) Inyuki? Inyule di bi héga inyu ‘kon Nyambe woñi ni tééda matiñ mé, inyule ndak bôt bobasôna i.’ (Ñañal 12:13) Di nla ki kal le, di bi héga ni ngôñ i boñ sômbôl Djob. Jon, ngéda di ngwélél Yéhôva, di nôgda toi maséé ma nlôôha. *

I ngéda di ke ni bisu i hôlôs maséé ma Djob, di ga kôs bisai bi bi nloo i yom di nôgda. Kiki hihéga, di ga ke ni bisu i kônde lémél Tata wés nu a yé ngii mu kii di mba di ngwélél nye ni maséé bisu bi to imbe ndutu di nla mboma. (Ndiimba Mbén 16:15; 1 Tésalônika 5:16-18) Di nla ki kal le, ngéda di gwé bañga maséé, di ga tehe bé nkus kiki jam li nlôôha ba nseñ. Ndi di ga boñ bisesema bikeñi inyu Ane Djob. (Matéô 13:44) Ngéda di ntehe bisai di nkôs ha ngéda i, di ga kéñbaha maséé més, di ga ba ki loñge i niñ yés, ni ki le di ga nôgha bôt bape maséé.​—Minson mi baôma 20:35; Filipi 1:3-5.

Mut nyiña wada i suklu ikeñi i Nebraska, i loñ Amérika, nu a nigil mam ma mbéñge mbôô i mut binam, a tila le: “Ibale u yé maséé, niñ yoñ i lémlak we i len ini, u nla ki ba mbôô i dilo di nlo.” Bibañga bi, bi nkiha ni jam Bibel i nkal: “Ñem u nhak [maséé] u yé bañga matibla.” (Bingéngén 17:22) Ñ, kiki u nkéñbaha maséé moñ, hala a nhôla yak we le u ba mbôô.

Jon, tolakii di niñil mangéda mabe, di nla bana bañga maséé ni ma ma nom, ngéda di nkôs mbuu mpubi ni njel masoohe, yigil ni lisoñda li Bañga i Yéhôva. Di nla ki kéñbaha maséé més ngéda di mbigda bisai di gwé nano, ngéda di nkôna hémle i bagwélél ba Djob bape, tole ngéda di mboñ biliya i boñ sômbôl Djob. Ngéda di mpam i boñ hala, di nla kabna bibañga bi kaat Tjémbi 64:10, bi bi nkal le: “Mut a téé sép a’ kon maséé inyu Yéhôva, a solbene ki nyeni.”