1. (a) Kii Yéhôva a bi bôn bés? (b) I “bôdôl Yéhôva ñem” wee kii? (Béñge “Ndoñi bibuk.”)

 YÉHÔVA a bi bôn bagwélél bé bobasôna mam malam. Ndék ngéda a ga mélés makon, ndutu ni nyemb. (Masoola 21:3, 4) A ga hôla “bôt ba suhulnyuu” ba ba mbôdôl nye ñem i yilha hisi paradis. (Tjémbi 37:9-11) A ga boñ ki le hiki wada wés a kônde bana maada ma bas bas ni nye, iloo ma di gwé nano. Hala a yé jam li mbuma ñañ! Ndi kii i nyis bés le mimbônga mi Djob mi ga yon? Yéhôva a mah tembee bé. Jon di kôli ‘bôdôl nye ñem.’ b (Tjémbi 27:14, MN.) Inyu éba le di mbôdôl toi nye ñem, di bem ni maséé momasôna le mimbônga nwé mi yon.​—Yésaya 55:10, 11.

2. Kii Yéhôva a ma boñ?

² Yéhôva a nyônôs mimbônga nwé nwominsôna. Di béñge kii i ñéba hala. I kaat Masoola, Yéhôva a bi kal le munu ngéda yés, bôt ba biloñ gwobisôna, ni matén momasôna, ni dilémb tjodisôna ba ga bégés nye ikété adna. I bôt ba bon ba yé “limut li bôt likeñi” i len ini. (Masoola 7:9, 10) Tolakii i bôt bana ba yé bôlôm, bôda ni boñge, ba gwé bé kôkôô yada, ba mpot bé hop wada, ba gwé bé to bilem gwada, ba ngwélél  Yéhôva ikété adna. (Tjémbi 133:1; Yôhanes 10:16) I bôt ba yé munu limut likeñi lini ba ngwés ba añal ñañ nlam, ba yé ki bebee i kal bôt bobasôna ba ba ñemble bo le mbok yondo i yé bebee. (Matéô 28:19, 20; Masoola 14:6, 7; 22:17) Ibale u yé mu limut li bôt likeñi, ibabé pééna, i botñem ini i nkônha we maséé.

3. Sômbôl i Satan i yé le kii?

³ Nsohop a nsômbôl le di waa bôdôl Nyambe ñem. A gwé ngôñ le di hoñol le Yéhôva a ntôñ bé bés ni le a ga yônôs bé mimbônga nwé. Ibale di nwas le Satan a tinde bés i waa bôdôl Yéhôva ñem, d’a kon woñi bebek di kôm yak Yéhôva mbus. Kiki d’a tehe munu yigil ini, Nsohop a bi noode boñ le Hiôb a waa bôdôl Yéhôva ñem, a waa yak gwélél nye.

4. Kii di ga tehe munu yigil ini? (Hiôb 1:9-12)

⁴ Munu yigil ini, d’a tehe kii Satan a bi boñ inyu noode tinde Hiôb i kôm Yéhôva mbus. (Añ Hiôb 1:9-12.) D’a ôt ki biniigana mu ndémbél i Hiôb, di tehe ki inyuki di nlama bé hôya le Yéhôva a ngwés bés ni lelaa a ga yônôs mimbônga nwé.

5-6. Mambe mandutu Hiôb a bi boma?

⁵ Hiôb a bé niñ loñge. A bé liwanda li Yéhôva. A bééna lihaa likeñi li li bé niñ ikété adna, a bak ngwañ mut ngandak. (Hiôb 1:1-5) Ndi kel yada, a bi nimis gwom gwé gwobisôna. A bi bôk a nimis nkus wé. (Hiôb 1:13-17) A bé a yii, bon bé bobasôna ba wo. Di hégda le i nya ndutu i. I ngéda bagwal ba nimis man wada, hala a yé a lôôha tééñga bo. Jon, di nla hégda ntén ndutu Hiôb bo nwaa wé ba bi nôgda i ngéda ba bi nok le bon bap bobasôna ba nwo. Inyu hala nyen Hiôb a bi was mbot yé inyu ngandak njôghe, a kwo ’isi!​—Hiôb 1:18-20.

⁶ I mbus, Satan a bi boñ le Hiôb a bana ngim kon i i bé wéha nye nyuu. (Hiôb 2:6-8; 7:5) Bôt ba bé ndugi ba nti nye lipém. Ba bé lo i bat nye maéba. (Hiôb 31:18) Ndi, i ngéda a bi kwo kon, ba bi kahal ke nye ngwéé. Lôknyañ, mawanda mé ni bagwélél bé ba bi tjôô nye!​—Hiôb 19:13, 14, 16.

7. (a) Hiôb a bé hoñol le mandutu mé ma nlôl hee, ndi kii a bi hoñol bé? (b) Mambe mandutu kristen i nla boma len, ma ma mpôna ma ma nene mu titii?

⁷ Satan a bé sômbôl le Hiôb a hoñol le a nok ndutu inyule Yéhôva a ngwés ha bé nye. Kiki hihéga, a bi ep mbuk mbebi, a ôbôs ndap i het bon bé bobasôna ba bé je ntôñ. (Hiôb 1:18, 19) A bi boñ ki le hié hi lôl i ngii, hi ligis bémba i Hiôb ni i bet ba bé tééda yo. (Hiôb 1:16) Kiki mbebi ni hié bi bé lôl i ngii, Hiôb a bé hoñol le Yéhôva nyen a ñom gwo. Inyu hala nyen Hiôb a bé hoñol le Yéhôva a ñunbene nye. Ndi to hala, a bi tiihe bé Yéhôva. Hiôb a bi kal le mu nwii nwominsôna mi ntagbe, Yéhôva a nti nye ngandak gwom bilam. Inyu hala nyen a bi kal le kiki a bé maséé i ngéda Yéhôva a bé ti nye gwom bilam, a nlama yak ba bebee i neebe mandutu. Jon a bi kal le: “Jôl li Yéhôva li ba nsaibak.”  (Hiôb 1:20, 21; 2:10) Hiôb a bé nihbe mandutu mé, kiki bo nkus wé a bi nimis, bon bé ba ba bi wo, ni kon. Ndi to hala, Satan a bi nwas bé nye nwee.

8. Kii ipe Satan a bi boñ?

⁸ Satan a bi boñ jam lipe inyu noode Hiôb, a bi tinde bôt baa ba ba bé kal le ba yé mawanda mé i boñ le Hiôb a hoñol le a ta bé nseñ. I bôt ba, ba bi kal le Hiôb a nok ndutu inyule a mboñ béba. (Hiôb 22:5-9) Ba bé sômbôl le a hoñol le mam momasôna a mboñ inyu lémél Djob ma nhee bé to yom. (Hiôb 4:18; 22:2, 3; 25:4) Ngôñ yap i bé le Hiôb a hoñol le Nyambe a ngwés bé nye, le a ntôñ bé nye, ni le nseñ u ta bé i gwélél nye. Bibañga gwap bi bé le bi boñ le Hiôb a lehel ñem.

9. Kii i bi lédés Hiôb?

⁹ Di hégda le i jam lini, Hiôb a yé ikété libu a nogok njôghe. (Hiôb 2:8) I bôt ba nkal le ba yé mawanda mé ba ñôm nye nsohi, ba ôbhak nye jôl. Mandutu mé ma nyidil nye kiki liaa, yak nyemb i bon bé i yé le i pat nye ñem. Ndi Hiôb a yén ndugi nwee. (Hiôb 2:13–3:1) Ibale mawanda mé ma nhoñol le kiki a nyén nwee, hala a nkobla le a ga kôm Yéhôva mbus, ba ntembee. Ha nyen, bebek le Hiôb a mpa mis mé, a nun bo, a kal bo le: “Letee me wo, m’a tjôô bé libak jem li ngi nsohi!” (Hiôb 27:5) Kii i bi ti Hiôb ngui i hônba mandutu ma momasôna tolakii ndutu i bé nye nnayak? A bé yi le Yéhôva a ga mélés ndutu yé. A bé yi ki le to a nwo, Yéhova a ga tugul nye.​—Hiôb 14:13-15.

10. Ñañ u Hiôb u niiga kii bés?

¹⁰ Ñañ u Hiôb u niiga bés le Satan a nla bé nyégsa bés i kôm Yéhôva mbus, ni le Yéhôva a ntehe mam momasôna. Ñañ u Hiôb u nhôla ki bés i tibil nok mam mape mu maada més ni Yéhôva. Di béñge ngim biniigana di nla ôt mu ndémbél i Hiôb.

11. Ibale di nwaa bé bôdôl Yéhôva ñem, di nla ba nkwoog nkaa ni kii? (Yakôbô 4:7)

¹¹ Ndémbél i Hiôb i niiga bés le ibale di nwaa bé bôdôl Yéhôva ñem, di ga nihbe mandutu més momasôna, di kolba Satan. Mam ma ga sôk lelaa? Bibel i nkal le Nsohop a ga ke bés ngwéé.​—Añ Yakôbô 4:7.

12. Lelaa botñem i bitugne i bi lédés Hiôb?

¹² Di nlama hoñol botñem i bitugne. Kiki di bi tehe i yigil i ntagbe, lakii Satan a nyi le di nkon nyemb woñi, a noode boñ le di kôm Yéhôva mbus. Inyu Hiôb, Satan a bi kal le a yé bebee i boñ to kii, a yé yak bebee i tjôô Yéhôva inyu boñ le a wo bañ. Satan a bi pot bitembee. Yak i ngéda ndutu i bé nnayak, i nen-ge yak le Hiôb a nwo, a bi kôm bé Yéhôva mbus. Hiôb a bé bôdôl Yéhôva ñem, a yik le Yéhôva a ga mélés mandutu mé, jon a bi téñbe. Hiôb a bé yi ki le to ibale Yéhôva a mélés bé mandutu mé a bak a yii i niñ, ibale a nwo, a ga tugul nye. Hiôb a bé yi le bitugne bi ga ba. I ngéda di nyi le bitugne bi ga ba, to ba nhan bés nyemb, di nkôm bé Yéhôva mbus.

13. Inyuki di nlama ôt pék mu dipa Nsohop a bi gwélél inyu noode Hiôb?

¹³ Di nlama yoñ ngéda inyu ôt pék mu dipa Nsohop a bi gwélél inyu noode Hiôb, inyule dipa di tjon a ngwélél yak i len ini. Di béñge i jam Satan a bi kal nye: “Mut [ha ndik Hiôb bé] a’ ti gwom gwobisôna a gwé le a la péyés niñ yé.” (Hiôb 2:4, 5) A yé wee Satan a yé kal le, di ngwés toi bé Yéhôva ni le di yé bebee i kôm nye mbus inyu boñ le di wo bañ. Satan a nkal yak le Nyambe a ngwés bé bés, ni le a ntehe bé i mam momasôna di mboñ inyu lémél nye. Kiki di nyi i mam mana momasôna, Satan a ta bé le a lôk bés.

14. Mandutu ma nhôla bés i tehe kii? Ti hihéga.

¹⁴ Mandutu ma nhôla bés i yi bésbomede. Mandutu ma Hiôb ma bi hôla nye i tehe bibomb gwé ni i héñha. Kiki hihéga, a bi nok le a nlama kônde bana suhulnyuu. (Hiôb 42:3) Yak bés i ngéda di mboma mandutu, di nla kônde yi bésbomede. Mankéé wada le Nikolay, c nu ba bi ha i mok to hala kiki a bé kon ngandak a nkal le: “Mok mi yé kiki radiô i i nhôla bés i yi kii i yé bés ikété.” I ngéda di nyimbe bibomb gwés, di nlama jo sañ inyu héñha.

15. Njee di nlama emble, inyuki?

¹⁵ Yéhôva nyen di nlama emble, ha baoo bés bé. Hiôb a bé emble i ngéda Yéhôva a bé pôdôs nye. A bé wee Yéhôva a bé kal Hiôb le: ‘Baa u ntehe bé lipémba jem? Ngo me ntehe i mam momasôna ma mpémél we. U nhoñol le me nla bé hôla we?’ Hiôb a bi emble Yéhôva ni suhulnyuu yosôna, a kon  maséé. A bi kal le: “Maôô mem ma bi nok inyu yoñ, ndi hanano jis jem li mal tehe we.” (Hiôb 42:5) I ngéda Hiôb a bi pot bibañga bini, a bé a ngi yii ikété libu ni mambabaa homa nyensôna, bon bé ba bak i soñ. To hala, Yéhôva a bi éba Hiôb le a ngwés nye ni le Hiôb a nlémél nye.​—Hiôb 42:7, 8.

16. Inoñnaga ni kaat Yésaya 49:15, 16, i ngéda di mboma mandutu, kii di nlama hoñol?

¹⁶ Yak i len ini, bôt ba yé le ba sol bés, ba yanak bés. Ba yé le ba ôbôs jôl li Mbôgi Yéhôva yada tole ntôñ wés wonsôna, “ba temblak i ngéda ba mpot mintén mi mam mabe nwominsôna ikolba” bés. (Matéô 5:11) Ñañ u Hiôb u niiga bés le Yéhôva a nyi le d’a waa bé gwélél nye, to i bisu bi manoodana. Yéhôva a ngwés bés, kekikel a ga tjôô bé bés. (Añ Yésaya 49:15, 16.) Di emble bañ bitembee baoo ba Yéhôva ba mpot! Mankéé wada le James i Turquie, lihaa jé li bi boma ngandak mandutu. A nkal le: “Di bé yi le ibale di ñemble bitembee bi baoo bés, hala a ga tômbôs bés. Inyu hala nyen di bé hoñol i mam Yéhôva a mbôn bés, di gwelek nson wé. Hala a bi boñ le di ba maséé.” Kiki Hiôb, yak bés di nlama emble Yéhôva. Bitembee baoo bés ba mpot bi nlama bé boñ le di waa bôdôl Yéhôva ñem.

17. Bimbe biniigana di nla ôt mu ndémbél i bôt kaat Lôk Héber pes 11 i mpôdôl?

¹⁷ Hiôb a yé ndik wada ikété bagwélél ba Yéhôva ba ba bi téñbe ni nye ikété ngandak manoodana. I kaat Lôk Héber, ñôma Paul a mpôdôl i bôt ba, a nsébél bo le “limut li mbôgi likeñi.” (Lôk Héber 12:1) Bobasôna ba bi boma manoodana ma ngui, ndi ba bi téñbe ni Yéhôva. (Lôk Héber 11:36-40) Baa ndéñbe yap ni nson wap u bé yañga? To jam! Tolakii mimbônga mi Yéhôva nwominsôna mi bi yon bé i ngéda ba bé ba ngi yii i niñ, ba bi ke ni bisu i bôdôl nye ñem. Kiki ba bé yi le ba nlémél Yéhôva, ba bé nkwoog nkaa le ba ga tehe mimbônga nwé mi nyon. (Lôk Héber 11:4, 5) Ndémbél yap i nla hôla bés i kônde bôdôl Yéhôva ñem.

18. Kii di nlama boñ? (Lôk Héber 11:6)

¹⁸ Nkoñ ’isi unu u ñôbi ndik ôbi ni ôbi. (2 Timôtéô 3:13) Satan a ngi noodege bagwélél ba Yéhôva. To imbe ndutu di ga boma i dilo di nlo, di kee ni bisu i gwélél Yéhôva, di yik le “di mbii botñem yés yak Nyambe nu a niñ.” (1 Timôtéô 4:10) Di bigda le, i mam Yéhôva a bi bôñôl Hiôb i lisuk, ma ñéba le “Yéhôva a yôni ni ñem gwéha lôñni konangoo.” (Yakôbô 5:11) Di téñbe ni Yéhôva, ni botñem le a ga bom “i bôt ba nyéñ toi nye.”​—Añ Lôk Héber 11:6.