Mu yigil i, di bi nigil le maselna ni i jam di bé kal behee, ndok i wom Éden i bi suu ndigi mbadga ikeñi yada i i mbéñge bôt ba binam bobasôna ni biañgel, he ima bé. Yo ini le: i pubus jôl likeñi li Yéhôva. I jam lini le i nit kahap i Yéhôva, tole i hoñol le énél yé yon i nlôôha ba loñge, i gwé maada ni i pubus jôl jé. Nlélém, yak ndéñbe i bôt ba binam ipañ Nyambe, i gwé maada ni jam li.

Inyuki di ntémb di suu nlôm jam nunu, nu a gwé maada ni jôl li Djob, ni i pubus jôl jé le Yéhôva? Di wan manjom maa.

Pog, Satan a bi ôbôs jôl li Yéhôva, i wom Éden. I mbadga Satan a bi bat Éva i bé unda le Yéhôva a bé nima, le a ti bo minledek mi mambén kiyaga. I jam Satan a bi kal i mbus ngéda li nkolba yaga bibuk bi Yéhôva, ndik wee a bé kal le Nyambe a yé mut bitembee. Hala nyen a bi ôbôs jôl li Yéhôva. A yila “Nsohop,” hala wee “mut minsohi.” (Yôhanes 8:44) Éva a bi ndogbene Nyambe inyule a bi hémle bitembee bi Satan, a unda le a gwé ha bé ngôñ le Nyambe nyen a énél nye. (Bibôdle 3:1-6) Letee ni len, Satan a ñôbôs jôl li Nyambe, a nke ni bisu i tjam bitembee ikolba Yéhôva. I nla ba jam li ntomb inyu bôt ba nhémle i nya i bitembee i, i ndogbene Yéhôva. Jon inyu bagwélél ba Nyambe, i ôbôs jôl lipubi li Yéhôva i nlôôha ba béba jam. I jam li jon li yé njom i bisu, i mandutu ni béba di ntehe i nkoñ ’isi len.

Iba, inyu loñge i bihégél gwobisôna, Yéhôva a nkit le a ga pubus jôl jé, a sas mahindi momasôna ba bi hoo jo. I jam li, li nlôôha ba nseñ inyu Yéhôva. Inyu hala nyen a nkal le: “M’a pubus jôl jem likeñi.” (Ézékiel 36:23) Yak Yésu a bi unda kii i nlama ba jam li bisu ikété masoohe ma bagwélél ba Yéhôva bobasôna, i ngéda a kal le: “Jôl joñ li tééba lipubi.” (Matéô 6:9) Ibabé waa, Bibel i nyigye nseñ i ti jôl li Yéhôva lipém. Di wan le ndék dihéga: “Tina Yéhôva lipém li kôli ni jôl jé.” (1 Miñañ 16:29; Tjémbi 96:8) “Tublana jôl jé likeñi tjémbi di bibégés.” (Tjémbi 66:2) “M’a ti ki jôl joñ lipém i boga ni boga.” (Tjémbi 86:12) Lisañga jada, Yéhôva nyemede a bi pot, kiñ yé i lôlak i ngii, hala a bi bôña i témpel i Yérusalem, Yésu a kal le: “A Ta, ti jôl joñ lipém.” Yéhôva a timbhe, a kal le: “Me bi ti jo lipém, m’a kônde ki ti jo lipém.”​—Yôhanes 12:28. a

Aa, sômbôl i Yéhôva inyu hisi i gwé maada ni jôl jé. Di ôt le pék mu jam lini: I mbus manoodana ma nsôk ma ma ga ba i mamélél ma Ane i hikôô hi nwii i Kristô, kii y’a bôña? Baa bôt ba binam yak biañgel b’a ke ni bisu i ba nkabak mu mbadga i nlôôha ikeñi ini le i pubus jôl li Yéhôva? Inyu timbhe i mbadga i, di bigda i mam mana mo ima: ndéñbe i bôt ba binam ni kahap i Yéhôva i ngii bihégél  gwé. Baa i mbus manoodana ma nsôk, i bôt ba ntéñbe ni Yéhôva ipam ha, b’a bana ki ngôñ i unda le ba tiñi ni nye? To. Ha ngéda i, ba ga ba peles, ba ma tégbaha manoodana momasôna. B’a kôhna niñ i boga ni boga. Baa bôt ba binam ni biañgel ba ga badba ki too énél i Yéhôva i yé loñge? To jam. Ngélé yada inyu ngélé yosôna, ba bobasôna ba mba ba niñ i ngii ni hana ’isi ha ngéda i, ba ga neebe le énél i Yéhôva yon i nlôôha ilam, kinje adna. Ndi baa jôl jé li ga ba ki jam li nlôôha nseñ inyu bagwélél bé?

Ha i ngéda i, jôl jé li mba li ma pubhana ngélé yada inyu ngélé yosôna, nsohi wo ki wo u ga ba ha bé. Ndi jôl li Yéhôva li ga ke ni bisu i ba jam li nlôôha nseñ inyu bagwélél ba Yéhôva bobasôna i ngii ni hana ’isi. Inyuki? Inyule b’a ke ni bisu i tehe nye a mboñ bihélha bi mam. Kiki Yésu a ga timbhe Yéhôva énél yosôna ni suhulnyuu, Nyambe a ga “ba mam momasôna inyu bôt bobasôna.” (1 Korintô 15:28) Mbus hala, i bôt ba ga niñ hana ’isi, ba ga nok lingoñoo i “bana kunde ikété lipém li bon ba Nyambe.” (Rôma 8:21) Ha nyen Yéhôva a ga tibil yônôs sômbôl yé a gwé ibôdôl behee, yo ini le, biañgel ni bôt ba binam ba niñ kiki lihaa jada ikété adna.​—Éfésô 1:10.

I ngéda i mam mana momasôna ma ga bôña, lelaa lihaa li Yéhôva i ngii ni ’isi li ga nôgda? Di kôli hégda le hala a ga ti bés ngôñ ikeñi i bégés jôl lilam li Yéhôva ibabé waa. Ni ngui i mbuu mpubi, ntôp tjémbi le David a tila le: “Yéhôva Nyambe . . . a kôhna bibégés . . . Jôl jé likeñi li béghana i boga ni boga.” (Tjémbi 72:18, 19) I boga ni boga, di ga yéñ manjom malam ma ma ga tinde bés i boñ hala.

Jôl li Yéhôva li ntibil toñol njee a yé. Téntén, li mbigdaha bés gwéha yé. ((1 Yôhanes 4:8) Di ga hôya bé kekikel le gwéha yon i bi tinde nye i hek bés, yon i bi tinde ki nye i ti binoñ inyu yés. Di ga bigda ki i boga ni boga le a ñénél bés ni telepsép lôñni gwéha. Ndi di ga ke ni bisu i tehe lelaa Yéhôva a ñunda bihégél gwé gwéha. I boga ni boga, di ga nôgda ngôñ i kônde kôôge nye bebee kiki bon ni Isañ wap, di tubul ki jôl jé likeñi tjémbi di bibégés.​—Tjémbi 73:28.