1. Kii i nyumus ngandak bôt?

 NGANDAK bibase i len ini i nkadba i le i yé bikristen ni le ba mbégés Djob i nya i kôli. I jam li li nyumus ngandak bôt! Ba mbadba le, “Baa base maliga i yé ndik yada, tole bibase gwobisôna bi nlémél Djob?” Baa di yé nkwoog nkaa le bés Mbôgi Yéhôva di niiga maliga ni le ndik bés bon di mbégés Yéhôva i nya i nlémél nye? Kii i nkwés bés nkaa le di yé i base maliga? Di wan le mam ma nkwés bés nkaa.

2. Inoñnaga i kaat 1 Tésalônika 1:5, kii i bi kwés Paul nkaa le a yé base maliga?

² Ñôma Paul a bé nkwoog nkaa le a yé base maliga. (Añ 1 Tésalônika 1:5.) A bé bé nkwoog nkaa ndik inyule Bitilna bi bé lémél nye ngandak. A bé nigil Bañga i Djob ngandak. A bé yi le “Tilna yosôna i nlôl ni Nyambe.” (2 Timôtéô 3:16) Kii a bi nok mu yigil yé? Paul a bi nok mu yigil yé le Yésu a yé Mésia nu Djob a bi bôn le a bé lama lo, ki le baéga base i Lôk Yuda ba bi top bé hémle hala. I baéga base ba ba bé kal le Djob nyen a bi ep bo, ndi maboñok map ma bé éba bé hala. (Titô 1:16) Paul a bé boñ bé kiki bo, a bé pohol bé bipes bi Bibel bi a bé lama hémle. A bé niiga, a noñok ki “pék yosôna i Nyambe.”—Minson mi baôma 20:27.

3. Baa di nlama timbhe mambadga momasôna inyu ba nkwoog nkaa le di yé base maliga? (Béñge yak minkéñék mi matila mini le “ Minson mi Yéhôva ni mahoñol mé—‘Ma yé ngandak iloo kii ma nla éña.’”)

 ³ Ngim bôt i nhoñol le bañga base i nlama timbhe mambadga momasôna, yak ma Bibel i ntimbhe bé. Ndi baa ba kôli hoñol hala? Di yoñ le ndémbél i ñôma Paul. A bi ti lôk kéé makénd i ‘wan mam momasôna,’ ndi a bi kal yak le ngandak mam i bé le a bé nok bé. (1 Tésalônika 5:21) A bi kal le: “Di gwé bé yi i nya i yôni,” a kônde ki le: “Di ntehe puyepuye ni njel léman.” (1 Korintô 13:9, 12) Paul a bé nok bé mam momasôna; to bés di nla bé nok mam momasôna. Ndi a bé nok biniigana bi bisu inyu Yéhôva. I mam a bé yi ma bi kwés nye nkaa le a yé base maliga.

4. Kii i yé le i kwés bés nkaa le di yé i base maliga, mambe mam ma ñunda le di yé bañga bikristen?

⁴ Jam jada li li yé le li kwés bés nkaa le di yé i base maliga li yé le di hégha nson Mbôgi Yéhôva i nsal i len ini ni mam Yésu a bé boñ inyu bégés Djob. Munu yigil ini, di ga tehe le bañga bikristen (1) i mbégés bé bisat, (2) i nti jôl li Djob lipém, (3) i ngwés maliga, (4) i ngwéhna ki wada ni nuu bañga bañga.

5. Inyu bégés Djob, kii ndémbél i Yésu i niiga bés, lelaa di nla boñ i mam a bi niiga?

⁵ Yésu a bé gwés Djob ngandak, jon a bi bégés ndik nyetama, ngéda a bé nyoo ngii ni ngéda a bi lo hana ’isi. (Lukas 4:8) A bi kal banigil bé le yak bo ba bégés ndik Yéhôva nyetama. To  Yésu to banigil bé, ba bi gwélél bé bititii inyu bégés Djob. Nyambe a yé mbuu, jon mut nye ki nye a nla bé ôô titii i i mpôna nye! (Yésaya 46:5) Ndi lelaa di nlama tehe i bôt ba mbañ bititii bi bôt ba nsébél le bapubhaga, ba soohege gwo? Mbén i nyônôs iba ikété jôm li mambén Yéhôva a bi ti Lôk Israel i nkal le: “U héglak bañ wemede njok ôñgba, to maôñk ma gwom bi yé nyoo ngii, to bi bi yé hana ’isi . . . U ôôbak bañ letee ni ’isi bisu gwap.” (Manyodi 20:4, 5) Bibuk bini bi ñunda le i bôt ba nsômbôl toi bégés Djob ba nlama bé gwélél bititii.

6. Imbe ndémbél Mbôgi Yéhôva i noñ i len ini?

⁶ Bayimam ba nkal le i hiai hi bisu, bikristen bi bé bégés ndigi Nyambe nyetama. Kiki hihéga, kaat yada i i mpôdôl mam ma kôba i nkal le bikristen “bi bé oo” bisat, bi bé bé le bi gwélél gwo inyu bégés Djob. I len ini, Mbôgi Yéhôva i noñ ndémbél i bikristen bi hiai hi bisu. Di nsoohe bé bititii bi “bapubhaga” tole biañgel; di nsoohe bé to Yésu. Di nyéga bé libadô li nyuñg, di mboñ bé to ngim mam inyu bégés baane tole ngim loñ. To kii i leñek, di nôgôl bibañga bi Yésu bini le: “Yéhôva Nyambe woñ nyen u nlama bégés.”—Matéô 4:10.

7. Mambe maselna ma yé ipôla Mbôgi Yéhôva ni bini bibase bipe?

⁷ I len ini, bôt ba ngwés ba ñemble baéga bibase ba ba nyiba ngandak. Ba nlôôha bégés bo, a yé ndik wee ba ntehe bo kiki mop. Bôt ba yé nyonok bañ mu bibase gwap, ba nsomb bikaat gwap, ba nti ki ngandak moni. Ngim bôt i nhémle hiki yom ba nkal. Ba yé maséé i tehe baéga bibase ba kiki ba bak le ba ba maséé i tehe Yésu ibale a bak hana ’isi! Ndi bagwélél ba Yéhôva ba mbégés bé bôt ba binam. Di nti lôk kéé i ñéga bés lipém, ndi di mbigda bibañga bi Yésu bini le: “Bébobasôna ni yé lisañ li bôt.” (Matéô 23:8-10) Di mbégés bé bôt kiki mop, too ba yé baéga bibase, too ba yé baane ba nkoñ ’isi. Di nit bé to bo. Di nyoñ bé ngaba yo ki yo ni mam ma nkoñ ’isi. Inyu hala nyen di yé maselna ni bini bibase gwobisôna bi bi nkadba le bi mbégés Djob.—Yôhanes 18:36.

8. Kii i nyis bés le Yéhôva a nsômbôl le di ti jôl jé lipém, di yis ki jo bôt bobasôna?

⁸ Lisañ jada Yésu a bi soohe le: “A Ta, ti jôl joñ lipém.” Yéhôva nyemede mede a bi timbhe masoohe ma ni kiñ ikeñi nyoo ngii, a bôn le a’ ti jôl jé lipém. (Yôhanes 12:28) Yésu a bi ti jôl li Isañ lipém mu nson wé wonsôna. (Yôhanes 17:26) Jon hala a yé bés bisai bikeñi i gwélél jôl li Djob ni i yis jo bôt bape.

9. Lelaa bikristen bi hiai hi bisu bi bi éba le bi nti jôl li Djob lipém?

⁹ I hiai hi bisu munu N.Y., ndék ngéda i mbus le likoda li bikristen li bi tééba, Yéhôva “a bi yoñ ngéda i biloñ bipe le a pémés bôt ikété yap inyu jôl jé.” (Minson mi baôma 15:14) Bikristen bi bi bé maséé i gwélél jôl li Djob ni i niiga jo bôt bape. Banigil ba Yésu ba, ni baôma bé ba  bi gwélél jôl li Djob ngéda ba bé añal ñañ nlam ni ngéda ba bé tila Bibel. * I mam mana momasôna ba bi boñ ma bé éba le ndik botama bon ba bé yis bôt jôl li Djob.—Minson mi baôma 2:14, 21.

10. Kii i ñunda le ndik Mbôgi Yéhôva yotama yon i nyis bôt jôl li Djob?

¹⁰ Baa Mbôgi Yéhôva yotama yon i nyis bôt jôl li Djob? Di wan le mam ma ñunda le hala nyen i yé. I len ini, ngandak baéga bibase i njo sañ inyu unda bôt le Djob a gwé bé jôl. Ba bi héya i jôl li mu Bibel yap, ngim mangéda ba nsôña yak le bôt ba gwélél i jôl li mu bibase gwap. * Hala a ñunda toi le ndik Mbôgi Yéhôva yotama yon i nti toi jôl li Djob lipém. Di nyis bôt jôl li Djob ni nkoñ ’isi wonsôna, iloo bibase gwobisôna. Di mboñ kii yosôna di nla inyu éba le di yé Mbôgi Yéhôva! (Yésaya 43:10-12) Di ma pémés iloo 240 didun di Bibel, Bitilna bipubi Ngobol mbok yondo, mu Bibel i, jôl li Yéhôva li yé homa nyensôna ba bi héya jo i Bibel ipe. Di mpémés ki bikaat bi bi ngwélél jôl li Yéhôva ikété iloo 1 000 dilémb!

11. Lelaa bikristen bi bisu bi bi éba le bi ngwés maliga?

¹¹ Yésu a bé gwés maliga, maliga ma ma mbéñge Djob ni bitééne gwé. Yésu a bi niñ inoñnaga ni maliga ma, a niiga ki mo bôt bape. (Yôhanes 18:37) Yak banigil ba Yésu ba bé gwés maliga ngandak. (Yôhanes 4:23, 24) Ñôma Pétrô a bi kal yak le bikristen bi yé i “njel maliga.” (2 Pétrô 2:2) Kiki bikristen bi hiai hi bisu bi bé gwés maliga ngandak, jon ba bi tjél biniigana bi kwéha base, bilem bi loñ, ni mahoñol ma ma bé kiha bé ni maliga. (Kôlôsé 2:8) Yak i len ini, bañga bikristen i njo sañ i ‘ke ni bisu i kil ikété maliga.’ Niñ yap ni i mam ba nhémle ma nkiha ni bañga i Yéhôva.—3 Yôhanes 3, 4.

12. Kii lôk kéé i i ñéga bés i yé i mboñ ngéda ba ntehe le ba nlama héñha ngim biniigana, inyuki ba yé ba mboñ hala?

¹² I len ini, Mbôgi Yéhôva i nhoñol bé le i nok i mam momasôna Bibel i niiga. Ngim mangéda ba yé ba boñ dihôha mu biniigana gwap ni mu kiki ba ntjek mam. Ndi hala a nlama bé hélés bés. Bibel i ñunda le kiki ngéda i ntagbe, hala nyen di ntibil nok maliga. (Kôlôsé 1:9, 10) Yéhôva a nyeelene bés maliga ndék ni ndék, jon di nlama hônba letee di tibil nok bañga yé. (Bingéngén 4:18) Ngéda juu li bakena ntôñ li ntehe le ba nlama héñha ngim jam mu biniigana gwap, ba nhoo yoñ bitelbene inyu héñha i jam li. Ngandak bibase i nkoñ ’isi i nhéñha biniigana gwap inyu lémél bôt ba binam. Ndi Mbôgi Yéhôva i nhéñha biniigana gwap inyu kôôge Yéhôva bebee ni inyu noñ ndémbél i Yésu. (Yakôbô 4:4) Di nhéñha bé biniigana gwés inyu lémél bôt munu nkoñ ’isi unu, ndi inyule di ntibil nok Bibel. Di ngwés maliga!—1 Tésalônika 2:3, 4.

13. Imbe lem i bikristen i nloo bilem gwobisôna, lelaa Mbôgi Yéhôva i ñéba yo i len ini?

¹³ Bikristen bi hiai hi bisu bi bééna ngandak bilem bilam, ndi lem yap i bisu i bé gwéha. Yésu a kal le: “Hala nyen bôt bobasôna b’a yi le ni yé banigil bem, ibale ni ngwéhna bé ni bé.” (Yôhanes 13:34, 35) I len ini, Mbôgi Yéhôva i ñunda gwéha ni adna i nkoñ ’isi wonsôna. Di ta bé kiki bini bibase bipe inyule di niñ ikété adna tolakii di nlôl bé i nlélém loñ, di gwé bé to bilem gwada. Gwéha i i yé ipôla yés i nene i makoda més, makoda makeñi, makoda ma ndôn. I mam mana momasôna ma nkwés bés nkaa le di mbégés Yéhôva i nya i nlémél nye.

14. Inoñnaga ni kaat Kôlôsé 3:12-14, lelaa di yé le di éba bañga gwéha ipôla yés?

¹⁴ Bibel i nkal le: “Di bana bañga bañga gwéha bés ni bés.” (1 Pétrô 4:8) Di mboñ hala i ngéda di nwéhlana bés ni bés, di nôglaga ni lôk kéé to hala kii bésbobasôna di yé bikwéha bi bôt. Di nyéñ ki manjel i kap ni i leege lôk kéé yosôna i mbai yés, yak i lôk kéé i mboñ bés béba. (Añ Kôlôsé 3:12-14.) Ngéda di ñunda i nya gwéha i, hala a ñéba le di yé toi bañga bikristen.

15. Lelaa di ñéba le di noñ ndémbél i bikristen bi hiai hi bisu?

¹⁵ Di mboñ ki ngandak mam ipe i i ñéba le di noñ ndémbél i bikristen bi hiai hi bisu. Kiki hihéga, nson wés u yé ntjegek i len ini kiki u bé i hiai hi bisu. Di gwé bagwélél ba makiiña, mimañ, ni bahôla nsoñ. (Filipi 1:1; Titô 1:5) Kiki lôk kéé i hiai hi bisu, di noñ i yom Yéhôva a nkal inyu jam li malal, libii, ni matjél. Di nhéya ki i bôt ba ntam bé bibéba gwap i ntôñ inyu boñ le ba tinde bañ ini lôk kéé ipe i boñ béba.—Minson mi baôma 15:28, 29; 1 Korintô 5:11-13; 6:9, 10; Lôk Héber 13:4.

16. Kii kaat Éfésô 4:4-6 i niiga bés?

¹⁶ Yésu a bi kal le ngandak bôt y’a kadba le i yé banigil bé, ndi bobasôna bé bon b’a ba toi banigil bé. (Matéô 7:21-23) Bibel i bi bôk i kal ki le i dilo di nsôk, ngandak bôt y’a “nene wengoñle ba ntéñbe i gwélél Nyambe.” (2 Timôtéô 3:1, 5) Ndi Bibel i nkal le ndik “hémle yada” yon i nlémél Djob.—Añ Éfésô 4:4-6.

17. Bonjee ba noñ ndémbél i Yésu i len ini ba ban-ga ki bañga hémle?

¹⁷ Bonjee ba gwé bañga hémle i len ini? Di nwan ngandak mam. Di ntehe ndémbél i Yésu ni banigil bé ba bisu. Jon pééna yo ki yo i ta bé, Mbôgi Yéhôva yon i gwé bañga hémle. Kinje bisai di gwé i ba Mbôgi Yéhôva ni yi maliga inyu Yéhôva ni bitééne gwé! Jon di pééna bañ le di yé base maliga.