STÉFANÔ a yé bisu bi ntôñ bôt bi nkolba nye. Ntôñ bakéés bakeñi i loñ Israel unu, u gwé 71 bakéés, ba ba yé ipôla mintôô mi bôt ba loñ. Prisi keñi le Kaifa, nu a ñénél bo, a bi bôk a kot bo ndék sôñ bisu bi ngéda, ngeñ Yésu a bi kôs mbagi nyemb. (Matéô 26:57, 59; Minson mi baôma 6:8-12) Mu kii ba bi naña bôt inyu ôm Stéfanô nsohi wada mbus wada, ba bi yimbe ngim jam li hélha i nyeni​—su wé u bé “wengoñle su añgel.”​—Minson mi baôma 6:13-15.

Kii i bi hôla nnigil Stéfanô i yén nwee bisu bi mintôô mi bôt mi, ibabé i kon woñi? Ilole ba nlona nye bisu bi ntôñ bakéés bakeñi, Stéfanô a bé ti nyensôna i nson Djob, a salak lôñni mbuu mpubi. (Minson mi baôma 6:3-7) Jon ngéda a bé noodana, nlélém mbuu u bé sal ngii yé, u lédhak nye, u hôñlahaga ki nye mam. (Yôhanes 14:16) Inoñnaga ni kaat Minson mi baôma pes 7, ngéda Stéfanô a bé kaaba i bisu gwap ni makénd, mbuu mpubi u bi hôñlaha nye jam kiki bo 20 ma bipes bi bikaat mu Bitilna bi Lôk Héber, bebek iloo yak ha. (Yôhanes 14:26) U héya hala, hémle i Stéfanô i bi kônde let ngéda a bi tehe yiinda i Yésu a téé i woo walôm u Nyambe.​—Minson mi baôma 7:54-56, 59, 60.

I nla pam kel yada le di ba bisu bi ndééñga, tole bakolba bés ba séh bés. (Yôhanes 15:20) Ngéda di ñañ Bañga i Djob hiki kel, di yoñok ki ngaba i nson likalô, di nwas le mbuu u Yéhôva u sal i niñ yés. Di ga bana ki ngui i yémbél ngolba, di téédaga ki ñem nwee.​—1 Pétrô 4:12-14.