“A Yéhôva, m’a lont letee ni ngéda imbe, ndi u nok bé? M’a béglene we letee ni ngéda imbe inyu mam ma njôô, ndi u ntohol bé?” (Habakuk 1:2, 3, MN) Ngwélél Djob wada le Habakuk, nu a bé a téé sép nyen a bi bat mambadga mana. Baa minyemhe nwé mi bé kobla le a bééna bé hémle? To jam! Djob a bi tiimba yis nye le, a bi téé ngim ngéda inyu mélés mandutu.​—Habakuk 2:2, 3.

Ngéda mandutu ma nkwél we tole ma nkwél mut woñ lihaa, u nla pala kal le Djob a ntiñha i mélés mandutu, inyuki a mélés bé mo hanano? Ndi, Bibel i nôgha bés le: “[Yéhôva] a ntiñha bé inyu likak jé kiki bôt bahogi ba nhoñol le hala a yé ndiñha, ndi a nwo ndigi ngut inyu bé bobasôna, lakii a ngwés bé le to mut wada a nimil, ndigi le bobasôna ba pam homa ba nhiel miñem.”​—2 Pétrô 3:9.

Ndék ngéda! Yésu a bi niiga le ngim hiai hi bôt hi tôbôtôbô hi ga ba mbôgi i mam ma ma ñunda le di niñil dilo di nsôk di nkoñ isi unu. (Matéô 24:3-42) Biyônôl bi mbañ i Yésu bi ñunda toi le Djob a yé bebee ni yoñ mam ma bôt ba binam i moo. *

Ndi lelaa Djob a ga mélés mandutu momasôna? Ngéda Yésu a bé hana isi, a bi gwélél ngui Djob inyu hôyôs mandutu ma bôt ba binam. Di béñge ndék dihéga.

Mbuge mam (tole bikuu bikeñi): Kel yada, ki Yésu ni banigil bé ba yé ikété môñgô i Lom nu Galiléa, soso mbuk mbebi a bôdôl hôñ, a sômblak boñ le môñgô wap u kôp. Ndi Yésu a bi unda le bona Isañ ba gwé ngui i ngii bihégél gwobisôna. (Kôlôsé 1:15, 16) Yésu a bi kal ndigi le: “Hogbe, mom nwee.” Kii i bi bôña? “Ni mbebi i mal, lom a temep yaga nwenwee.”​—Markô 4:35-39.

Makon: Yésu a bé yiba inyu ngap a bééna i mélés bôt ba ndim ni bibôk bi bôt, yak bakwo ti, bôt ba lô ni mintén mi makon nwominsôna. “A mélés ki bôt bobasôna ba ba kon.”​—Matéô 4:23, 24; 8:16; 11:2-5.

Njal: Yésu a bi gwélél ngui Isañ a bi ti nye inyu bulus ndék bijek. Bibel i nkal le, ngéda a bé hana isi, a bi jés dikôô di bôt ngélé iba.​—Matéô 14:14-21; 15:32-38.

Nyemb: Le Yéhôva a gwé ngui i mélés nyemb, hala a ntibil nene ikété bitugne baa Yésu a bi boñ. Mut wada mukété bitugne bi, a bi tuglana i mbus dilo dina.​—Markô 5:35-42; Lukas 7:11-16; Yôhanes 11:3-44.