• Nyambe nyen a mpohol nye. “Memede nyen me mal téé kiñe yem . . . M’a ti we biloñ kikii ngababum yoñ, yak masuk ma ’isi m’a ba yom yoñ.”​—Tjémbi 2:6, 8.

• A yé ikété ndaye i Kiñe David. “Inyule man a ngwéé bés, man munlôm a ntina bés . . . Pot yé mbok y’a hol, hol ni hol, mbôda ni nsañ, bi nla bé mal mu ngii yééne ane i David ni ngii mbok yé yosôna, inyu téé yo ni nit yo ni mbagi sép ni telepsép, ibôdôl hanano letee ni mba ni mba.”​—Yésaya 9:5, 6.

• A bi gwééne i Bétléhém. “Ndi we, a Bétléhém . . . , i weeni nyen mut a’ pam kingéda ngôôba yem . . . A’ ba nunkeñi letee ni masuk ma ’isi.”​—Mika 5:1, 3.

• Bôt ba binam ba bi nol nye. “A ba ndôñ mut bôt ba nyiip, ba tjôôk. . . . Ndi nyen a uma inyu matjañg més; ba nyagat nye inyu bibôñôl gwés bibe.”​—Yésaya 53:3, 5.

• Nyambe a tugul nye, a ti ki nye lipém. “Inyule w’a yék bé [me] i Séôl to kémhe le numpubi woñ a bol soñ. . . . I woo woñ walôm mam ma nkônha maséé ma yé mba ni mba.”​—Tjémbi 16:10, 11.

Ikété bôt ba binam bobasôna, mut wada nyen a ntibil nyônôs matode ma Ñane di ntip sima. I mut nu a yé Yésu Kristô. Jon añgel i bi kal Maria, nyañ Yésu le: Nyambe a’ ti nye yééne ane i isañ wé David, . . . a’ ane ndap Yakôb mba ni mba; Ane yé y’a mal bé.”​—Lukas 1:31-33.

Yésu a bi ane bé ngéda a bé hana ’isi. Ndi a ga ane bôt ba binam a bak Kiñe i Ane Djob nyoo i ngii. Inyuki nyen a kôli énél? Béñge mam Yésu a bi boñ ngéda a bé hana ’isi.

•   Yésu a bi tôñ bôt. Yésu a bi hôla bôlôm ni bôda, boñge ni mimañ mi bôt ibabé i béñge binéñél gwap ni libak jap. (Matéô 9:36; Markô 10:16) Ngéda mut lô a bi soohe nye le: “Ibale ngôñ yoñ i, u nla mélés kon wem,” konañgoo i bi tinde Yésu i mélés kon wé.​—Markô 1:40-42.

• Yésu a bi unda bés lelaa di nla lémél Nyambe. A bi kal le: “Ni nla bé ba minkol mi Nyambe ni mi Lingwañ.” A bi niiga bés i bôñôl bôt bape i mam di nsômbôl le ba bôñôl bés. A bi niiga ki bés le Djob a mbéñge ndik bé maboñok més, ndi yak mahoñol més ni mam di nôgda. (Matéô 5:28; 6:24; 7:12) Yésu a bi niiga ki bés le inyu ba maséé, di nlama yi i yom Djob a mbat le di boñ, di bii ki yo bisélél.​—Lukas 11:28.

• Yésu a bi unda bés lelaa di nlama gwés bape. Bipôdôl ni maboñok ma Yésu ma bi tihba miñem mi bôt. “Limut li bôt li bé nhelek kiyaga inyu likeñge jé i niiga, inyule a bé niiga bo kiki mut nu a gwé kunde.” (Matéô 7:28, 29) A bi kal bo le: “Ni gwés baoo banan.” A bi soohe yak inyu bôt ba bi nol nye le: “A Ta, nwéhél bo inyule ba nyi bé i jam ba mboñ.”​—Matéô 5:44; Lukas 23:34.

Yésu a kôli toi i ba ñane bôt ba binam inyule a ntôñ bo, a nhôla ki bo. Ndi imbe ngéda a’ bôdôl ane?