1, 2. (a) ‘Likébla li mbuma ñañ’ li Djob li nkobla le kii? (b) Mambe mambadga di ga wan munu i yigil ini?

YÉHÔVA a bi ti bés likébla li nlôôha ba likeñi ngéda a bi ep Man nu a ndiihe ngandak le Yésu, hana isi! (Yôhanes 3:16; 1 Yôhanes 4:9, 10) Ñôma Paul a bi sébél likébla li le “likébla . . . li mbuma ñañ.” (2 Korintô 9:15) Inyuki ñôma Paul a bi gwélél bibañga bini?

² Ñôma Paul a bé yi le sesema i Yésu i nti likak le mimbônga minlam mi Djob nwominsôna mi ga yon. (Añ 2 Korintô 1:20.) Hala a nkobla le ‘likébla li mbuma ñañ’ li Djob li yé sesema i Yésu, loñgeñem, ni gwéha i boga, i Yéhôva a ñunda bés. Ntén likébla likeñi li, li nla bé toñlana i likala le bôt ba nok yo i nya yôni. Mambe mahoñol di gwé ngéda di nhoñol lini likébla likeñi? Lelaa lini likébla li nlama tinde bés i tibil kôôba inyu mbigda i nyemb Yésu i kel ngwa Ngé, i hilo 23, i sôñ Matumb (sôñ aa), i ñwii 2016?

3, 4. (a) Lelaa u nôgda ngéda mut a nti we likébla? (b) Lelaa likébla li tôbôtôbô li nla héñha niñ yoñ?

³ Di yé maséé ngéda mut a nti bés likébla. Ndi, ngim makébla i nlôôha bana mahee kayéle i nla héñha niñ yés. Kii héga, hégda le u nol mut. Inyu kogse we, yak we ba nlama nol we. Ndi i sôk i pam le, mut nu u nyi bé, a neebe i kôhna i kogse i, le we u tohlana. A yé bebee i wo inyu yoñ! U ga nôgda lelaa inyu lini likébla?

⁴ Unu ntén likébla li gwéha u ga tinde we i héñha niñ yoñ. Bebeg hala a ga tinde ki we i ba mut a nkap, mut a ngwés bape ni mut nu a nwéhél ba ba mboñ nye béba. Niñ yoñ yosôna, u ga bana ngôñ i unda le u nti mayéga inyu sesema i bi tina inyu yoñ.

5. Lelaa likébla li Djob inyu binoñ li nlee makébla mape momasôna?

⁵ Lini likébla li Djob le binoñ li nlee likébla mu hihéga di nyoñ. (1 Pétrô 3:18) Hoñol ki le: Bés bobasôna di bi kôdôl béba i Adam, ni kogse i béba le nyemb. (Rôma 5:12) Gwéha i bi tinde Yéhôva i ep Yésu le a wo hana isi inyu bôt ba binam bobasôna, ni le a “nôgda nyemp miño mi bôt bobasôna.” (Lôk Héber 2:9) Ndi, sesema i Yésu i ga boñ iloo hala! I ga mélés nyemb i boga ni boga. (Yésaya 25:7, 8; 1 Korintô 15:22, 26) Ba bobasôna ba ñunda le ba nhémle Yésu, ba ga niñ ikété nsañ ni maséé i boga ni boga. Bahogi ba ga ba bikiñe i ngii ni Yésu. Bape ki, ba ga niñil hana isi, isi énél i Djob. (Rôma 6:23; Masoola 5:9, 10) Baa likébla li Djob li ga lona ki bimbe bisai?

6. (a) Bimbe bisai bi likébla li Yéhôva u mbem? (b) Sima mam maa likébla li Djob li ntinde bés i boñ.

⁶ Likébla li Djob li yé ki le, a yilha hisi paradis, a mélés makon, a tugul bawoga. (Yésaya 33:24; 35:5, 6; Yôhanes 5:28, 29) Di ngwés Yéhôva ni Man wé nu gwéha le Yésu, inyule ba bi ti bés lini “likébla li mbuma ñañ.” Baa kii likébla lini li nlama tinde bés i boñ? Li nlama tinde bés (1) i tibil kôna Yésu, (2) i gwés lôk kéé yés, ni (3) i nwéhél bôt bape ni ñem wés wonsôna.

7, 8. Mambe mahoñol di nlama bana inyu gwéha i Kristô, ni hala a nlama tinde bés i boñ kii?

⁷ Jam li bisu li yé le, di nlama bana makénd i gwélél niñ yés inyu ti Yésu lipém. Ñôma Paul a bi kal le: “Gwéha Kristô i ntinde bés.” (Añ 2 Korintô 5:14, 15.) Ñôma Paul a bé yi le, ibale di neebe gwéha ikeñi i Yésu, hala a ga tinde bés tole a ga ti bés makénd i gwés ni ti Yésu lipém. Ni maliga, ibale di ntibil nok i jam Yéhôva a bi boñ inyu yés, gwéha yé i ga tinde bés i niñ i nya i ñunda le di nti Yésu lipém. Lelaa di nla boñ hala?

⁸ Gwéha inyu Yéhôva i ntinde bés i kôna ndémbél i Yésu, ni i odop mu mabal mé. (1 Pétrô 2:21; 1 Yôhanes 2:6) Ngéda di nôgôl Djob ni Yésu, di ga unda toi le di ngwés bo. Yésu a bi kal le: “Nu a gwé matiñ mem, a téédaga ki mo, nyen a ngwés me; nu ki a ngwés me, Tata a’ gwés nye, yak me m’a gwés nye, m’a unda ki nye memede.”​—Yôhanes 14:21; 1 Yôhanes 5:3.

9. Mambe manoodana di gwé?

⁹ Munu ngéda i mbigda i nyemb  Yésu, i yé loñge le di hek pék inyu yi lelaa di ngwélél niñ yés. Jon, badba wemede le: ‘Ikété mambe mam me ñunda le me nigle Yésu? Ikété mambe mam me nlama kônde boñ biliya?’ Hala a yé nseñ le u badba mana mambadga, inyule bôt ba ngwélél bé Yéhôva ba ngwés le u niñ kiki bo. (Rôma 12:2) Ibale di nyoñ bé yihe, di nla hoñol le di yé nyégsaga i kôna bôt kiki bo balét ba nkoñ isi, mintôô mi bôt, batuk bol, ni bapééna ngwéé. (Kôlôsé 2:8; 1 Yôhanes 2:15-17) Lelaa di nla kolba mana manoodana?

10. Mambe mambadga u nlama badba munu ngéda i mbigda i nyemb Yésu? Mandimbhe ma, ma nlama tinde bés i boñ kii? (Béñge titii i bibôdle bi yigil.)

¹⁰ I yé loñge le mu ngéda i mbigda i nyemb Yésu, di wan lihabga jés, bisinima gwés, tjémbi di ñemble, ni kii yosôna i yé munu minkuu mi biyi (tole ordinateur ni hop Pulasi), minsiñga, tole bi tafel di gwé. Badba le: ‘Ibale Yésu a ba hana, ndi a tehe mambot me nhaba, baa a ga nôgda lelaa?’ (Añ 1 Timôtéô 2:9, 10.) ‘Baa mambot mem ma ñunda le me yé nnigil nu Kristô? Baa yak Yésu a nla béñge bisinima me mbéñge? Baa a ga la emble mingen me ñemble? Ibale Yésu a mpoo nsiñga wem tole tafel yem, lelaa a ga nôgda inyu mam a ga tehe mukété? Baa hala a ga ba ndutu, le me toñle Yésu inyuki me nkon maséé ni mini mintuk mi yé i tafel, i nsiñga, tole i nkuu biyi wem?’ Gwéha yés inyu Yéhôva i nlama tinde bés i tjôô kii yosôna i nkiha bé ni libak jés li kristen, to ibale hala a nla ba sesema ikeñi inyu yés. (Minson mi baôma 19:19, 20) Ngéda di bi ti niñ yés nkikip yak Yéhôva, di bi bôn le di ga gwélél niñ yés i ti Kristô lipém. Jon di nlama bé gwélél yom yo ki yo, i i nla boñ le i nigle ndémbél Yésu i ba bés ndutu.​—Matéô 5:29, 30; Filipi 4:8.

11. (a) Lelaa gwéha yés inyu Yéhôva bo Yésu i nhôla bés i bôlô i likalô? (b) Lelaa gwéha yés i nla tinde bés i hôla bôt bape ikété likoda?

¹¹ Gwéha di gwéne Yésu i ntinde bés i añal ñañ nlam, ni i niiga ni makénd. (Matéô 28:19, 20; Lukas 4:43) Mu ngéda i mbigda i nyemb Yésu, baa u yé le u tjek mam moñ ma hiki kel, kayéle u la ba nsañal nu ngim ngéda inyu tégbaha 30 tole 50 ma ngeñ i añal ñañ nlam? Yik munlôm i i bééna 84 ñwii, i bé hoñol le i nla bé ba nsañal nu ngim ngéda inyule a bé ñunuk ngandak, a bak bé mbôô. Ndi, basañal ba homa a bé yééne ba bééna ngôñ i hôla nye. Ba bi kôôba matôa, ba pohol ki loñge homa het ba bé le ba téé likalô. Nunu mankéé a bi sôk a yônôs mbônga wé u 30 ma ngeñ. Baa u nla hôla wada mu likoda joñ le yak nye a ba nsañal nu ngim ngéda mu i sôñ Matumb (sôñ aa) tole i sôñ Matop (sôñ ina)? Hala a yé maliga le bôt bobasôna ba nla bé ba basañal, ndi di nla gwélél ngéda yés ni ngui yés, inyu kena bôlô yés i Yéhôva ni bisu. Ibale di mboñ hala, di ga unda kiki Paul le, gwéha i Yésu yon i ntinde bés. Kii ipe gwéha i Djob i nla tinde bés i boñ?

12. Gwéha i Djob i ntinde bés i boñ kii?

¹² Jam li nyônôs iba li yé le, gwéha i Djob i nlama tinde bés i gwés bilôk bikéé gwés. Ñôma Yôhanes a bi tila le: “A  bagwéha, ibale Nyambe a gwés bés hala, wee yak bés di nlama gwéhna.” (1 Yôhanes 4:7-11) Joñ, ibale di neebe gwéha i Djob, di nlama gwés bilôk bikéé gwés. (1 Yôhanes 3:16) Lelaa di nla unda le di ngwés bo?

13. Yésu a bi ti imbe ndémbél i gwéha?

¹³ Ndémbél Yésu i ñunda bés lelaa di nla gwés bôt bape. Ngéda a bé hana isi, a bi hôla bôt, téntén diyeyeba. A bé a mélés bakokon, bibôk, bandim, bandok, ni bambuk. (Matéô 11:4, 5) Mahéñha ni baéga ba bibase, Yésu a bé a nkon maséé i niiga bôt ba ba bééna ngôñ i yi mam ma Djob. (Yôhanes 7:49) A bé gwés bôt ba suhulnyu ba, a salak ki ni ngui i hôla bo.​—Matéô 20:28.

14. Kii u nla boñ inyu unda le u ngwés bilôk bikéé gwoñ?

¹⁴ Ngéda i mbigda i nyemb Yésu i yé ki loñge ngéda inyu hoñol lelaa u nla hôla bilôk bikéé bi bôlôm ni bi bôda bi likoda joñ, téntén ba ba ñun. Baa u nla yuuga bini bilôk bikéé? Baa u nla kena bo ndék bijek, u hôla ki bo munu bibôlô ba gwé i ndap yap? Baa u nla begee bo mu litôa joñ tole u kena bo le ni téé likalô ntôñ? (Añ Lukas 14:12-14.) Nwas le gwéha i Djob i tinde we i unda bilôk bikéé gwoñ le u ngwés bo!

15. Kii di nlama neebe?

¹⁵ Jam li nyônôs aa li yé le, gwéha i Yéhôva i ntinde bés i nwéhél bilôk bikéé gwés bi bôlôm ni bi bôda. Bés bobasôna di bi kôdôl béba ni nyemb ni njel Adam. Jon, to wada wés a nla bé kal le, “Me gwé bé me ngôñ ni binoñ.” Yak ngwélél Yéhôva nu a nlôôha ba telepsép, a gwé ngôñ ni binoñ. Bés bobasôna di gwé ngôñ ni nwéhél inyu pil wés nkeñi! Inyuki i yé nseñ le di neebe jam li? Di nléba ndimbhe ikété ngén yada Yésu a bi ti.

16, 17. (a) Kii ngén Yésu i kiñe ni minkol nwé i niiga bés? (b) Kiki u ntibil wan ngén Yésu, mambe makidik u nyoñ?

¹⁶ Yésu a bi ti ngén i kiñe yada, i i bi nwéhél nkol wé u bééna nye pil u 60 000 000 di dénariô. Ndi i mbus, nkol unu u bi nwéhél bé nkol umpe u u bééna nye pil u 100 dénariô. Konangoo i kiñe i bé lama tinde nkol unu i nwéhél manyañ. Ngéda kiñe i bi nok le nkol u ntjél nwéhél manyañ inyu isii pil, a unup kiyaga. A kal le: “A we nkol mbe unu, me bi nwéhél we pil wonsôna, inyule u bi soohe me; baa yak we u bak bé le u kônôl so nkol woñ ngoo, kikii me me bi kon we ngoo?” (Matéô 18:23-35) Kiki kiñe i, Yéhôva a nwéhél bés pil u keñi. Kii gwéha ni konangoo bi Yéhôva bi nlama tinde bés i boñ?

¹⁷ Mu kii di nkôôba inyu Bilôp bi Nwet, di nlama badba le: ‘Baa mankéé a bi babaa me? Baa me ntehe le hala a  yé me ndutu i nwéhél nye?’ Ibale hala, loñge ngéda ini inyu kôna Yéhôva, “nu a nyégi ki i nwéhél.” (Néhémia 9:17; Tjémbi 86:5) Ibale di ndiihe konangoo i mbuma ñañ i Yéhôva, di ga unda bôt bape konangoo, di nwéhlak ki bo ni ñem wés wonsôna. Ibale di ñunda bé bilôk bikéé gwéha, di tjélék ki nwéhél bo, di nlama bé bem le Yéhôva a ga unda bés gwéha yé, to nwéhél bés. (Matéô 6:14, 15) Ngéda di nwéhél bôt bape, hala a nsômbôl bé kal le ba mbabaa bé bés, ndi hala a ga hôla bés i ba maséé mu dilo di nlo.

18. Lelaa gwéha i Djob i bi hôla mankéé nu muda wada i hônba bibomb bi mankéé nu muda numpe?

¹⁸ Hala a nla ba ndutu i hônba bibomb bi bilôk bikéé bi bôlôm ni bi bôda. (Añ Efésô 4:32; Kôlôsé 3:13, 14.) Mankéé nu muda nu a bi boñ hala a bé Lili. [1] (Béñge bibuk i mamélél ma yigil.) Lili a bi hôla yik muda le Karol. Kii héga, a bé a nkena Karol ni litôa jé to numbe homa Karol a bééna ngôñ i ke, a hôlga ki nye i somb gwom a bééna ngôñ, ni i boñ ngandak mam ipe. To hala kiki Lili a bé boñ biliya bini, Karol a bééna lem i léba mahôha ikété mam momasôna Lili a bé boñ. Ngim mangéda, hala a bé ndutu inyu Lili, ndi a bé bok ndik mis mé i ngii bilem bilam bi Karol, a hôla ki nye letee ni ngéda Karol a bi kwo kon, i mbus a wo. To hala kii i hôla Karol i bé bé jam li ntomb, Lili a nkal le: “Me mbem ngéda m’a tehe Karol i bitugne. Me nyéñ yi nye ngéda a’ ba peles.” Ntiik, gwéha i Djob i nla tinde bés i hônba bilôk bikéé bi bôlôm ni bi bôda, ni i bem ngéda libak jés li kwéha l’a ba ha bé i boga ni boga.

19. Mambe makénd “likébla li mbuma ñañ” li Djob li nti we?

¹⁹ Yéhôva a nti toi bés “likébla li mbuma ñañ.” Di nlama diihe jo hiki ngéda! Ngéda i mbigda i nyemb Yésu i yé loñge kiyaga inyu yoñ ngéda i hoñol mam momasôna Yéhôva bo Yésu ba mboñ inyu yés. Yak bés ki di nwas le gwéha yap i tinde bés i tibil kôna Yésu, i unda lôk kéé gwéha, ni i nwéhél bo ni ñem wés wonsôna.