To hala kiki bikristen bi gwé bé i noñ Mbén Môsi, matiñ mé ima ma bisu, ma ngi tinak ndoñi i mam Yéhôva a mbat le di boñ, hala wee i gwés Djob ni i gwés mut wés libôk. (Matéô 22:37-39) Ba ngwééna bé nya ngwéha i. Di nlama sal inyu bana yo. Lelaa? Njel yada i nlôôha ba nseñ i yé lisoñgol li Bibel li hiki kel. Ngéda di mbéñge bilem bilam Djob a gwé, bi di nléba ikété Bitilna, di nla tehe “bilama bi Yéhôva.” (Tjémbi 27:4) Sôk i nsôk gwéha yés inyu yé i mbôdôl nañ, di mbôdôl ki tehe mam kiki nye. Hala a nti bés makénd i ke ni bisu i nôgôl mambén ma Djob, yak i nôgôl mbén i mbat le di sem bésbomede inyu bape. (Yôhanes 13:34, 35; 1 Yôhanes 5:3) Inyu boñ le lisoñgol li Bibel li lémél bés, makeñge maa mana:

• Gwélél mahoñol moñ, u hégda ki lelaa mam ma ntagbe. Hégda le u yé ha. Kii u yé tehe, kii u yé nok? Imbe njiñ u nok? Bôt ba yé ni we ba nôgda kii?

• Boñ mam nya ipe. Ndék manjel ini: Añ ni kiñ keñi, tole, gwélél lisoñgol li audiô, nlélém ngéda u noñok jo mu Bibel yoñ. Soñgol bipes bi Bibel bi bi gwé ñañ u mut wada Bibel i mpôdôl, tole soñgol inoñnaga ni ño nkwel wada u mpohol. Boñ hala iloole u soñgol pes yada i mbus ini. Kiki hihéga, gwélél bipes 4 ni 16 bi man kaat ni hop Pulasi le Guide d’étude de la Parole de Dieu inyu añ mam ma mbéñge niñ Yésu. Añ pes yosôna i het buk kel i mpémél. Añ bikaat bi Bibel u noñok oda i ngéda yap matila.

• Añ inyu nok. I añ ndigi pes yada i Bibel hiki kel, i nok yo ni soñda yo, i gwé mahee iloo lisoñgol li ngandak bipes i Bibel mut a yé le a boñ ndik inyu kal le a mal soñgol Bibel. Wan mam ma nkéña ñañ. Wan yak disii di mam. Gwélél bititii tole matila ma yé ñemkété mapep ma Bibel. Boñ nyiña to inyu jam jada u ntibil bé nok. Ibale hala a nla bôña, tégbaha bebee le nlélém ngéda inyu soñgol ni inyu soñda.