DI NIÑIK KIKI BIKRISTEN
Ba maséé i añal miñañ minlam
Baa i téé likalô i ma lédél we? Ngandak ikété yés i ga timbhe le ñ. Inyuki? Bebeg inyule di ma boma ngolba, bôt ba ba nyan bés, tole di nkon woñi i pôdôs bôt ba di nyi bé. I pot mbale, mam mana ma nla suhus maséé més. Ndi, di nyi le di ngwélél Nyambe nu “maséé,” nu a nsômbôl le yak bés di ba maséé. (1 Timôtéô 1:11, MN; Tjémbi 100:2) Mambe manjom malam maa, ma ntinde bés i ba maséé ngéda di añal miñañ minlam?
Pok, nwin di ntjam u nti bôt botñem. To hala kiki botñem i nhañ i len ini, di nla yônôs miñem mi bôt ni “miñañ mi biloñge bi mam.” (Yésaya 52:7) Ndi, miñañ minlam mi Ane Djob mi nla yak nyônôs bésbomede ni maséé. Ilole u nke i likalô, bigda bisai Ane Djob i ga lona hana isi.
Iba, miñañ minlam di ntjam, mi yé nseñ inyu mbôô i bôt i pes mbuu, yak i pes minsôn. Ba nigil i tjôô bibéba bi mam, ba kôs ki pôla i niñ i boga ni boga. (Yésaya 48:17, 18; Rôma 1:16) Di yé kiki bôt ba yé tohol bape i mbus bikuu. To hala kiki bahogi ba ntop bé tohlana, di ntéñbe i yéñ bet ba gwé ngôñ lôñni tohi.—Matéô 10:11-14.
Aa, jam li nlôôha ba nseñ li yé le, i añal ñañ nlam i nti Yéhôva lipém. Yak nye a ndiihe nson wés kiyaga. (Yésaya 43:10; Lôk Héber 6:10) U héa hala, a nti ki bés mbuu wé mpubi inyu yônôs nson u. Inyu hala, soohe Yéhôva inyu kôhna maséé, lem lam yada i litam li mbuu. (Galatia 5:22) Ni mahôla mé, di nla yémbél nduña yés, di kôhna ki makénd i téé likalô. (Minson mi baôma 4:31) Sôk i nsôk, to ibale bôt ba neebe, tole ba ntjél, di ga bana maséé mu nson wés i añal miñañ minlam.—Ezékiel 3:3.
Bimbe bitelbene u ntehe le u nlama yoñ inyu likalô? Lelaa u nla unda le u yé maséé ngéda u yé likalô?
BÉÑGE INI VIDÉÔ LE TÉMBNA MASÉÉ MOÑ NI NJEL YIGIL NI SOÑDA, I MBUS TIMBHE MAMBADGA MANA:
-
Inyuki yigil yés i Bibel i gwé mahee to ibale di ntégbaha ngandak ngéda i likalô?
-
Imbe lem i Maria di nlama kôna?
-
Imbe ngéda u mbéna pohol inyu soñda Bañga i Djob?
-
Kii nti we maséé ngéda u añal miñañ minlam?
