1, 2. Mambe mambadga ngandak bôt i mbadba?

LOM a mbet, a nol bôt, a tjé ki mambai. Mut wada a ngwélél ngaa ikété ndap base inyu babaa bôt, ni nol bape. Muda nu a ban-ga kon ba nsébél le poh, a nwo, a nyék bon batan i niñ.

² Ngéda mam mabe ni nya bikuu i, i kwél bo, ngandak bôt i mbadba le: “Inyuki?” Ngandak bôt i mbadba inyuki nkoñ isi u yé nyonok ni ôa, yak ni mandutu. Baa wemede u ma badba mambadga ma?

3, 4. (a) Mambe mambadga Habakuk a bi bat? (b) Lelaa Yéhôva a bi timbhe nye?

³ Ikété Bibel, di ñañ le yak bôt ba bééna hémle ikeñi inyu Djob ba bi bat nya mambadga i. Kii héga, mpôdôl Habakuk a bi bat Yéhôva le: “Inyuki u mboñ me le me tehe mpuñgu, u béñgege mam ma téé bé sép ni mis? Ngadla ni njôô bi téé me mbom, yak ndañ u mpam, lisanda ki li kwo.”​—Habakuk 1:3.

⁴ Ikété kaat Habakuk 2:2, 3, di ñañ mandimbhe Djob a bi ti Habakuk inyu mambadga mé, a bôn ki le a ga héñha mam. Yéhôva a gwé gwéha ikeñi inyu bôt. Bibel i nkal ki le: “A ntôñ ni bé.” (1 Pétrô 5:7) Maliga ma yé le Djob a ñoo a ntehe mandutu iloo bés. (Yésaya 55:8, 9) Jon, di kwélél munu mbadga ini le: Inyuki mandutu ma yé nayak ikété nkoñ isi?

5. Lelaa ngandak baéga bibase ba ntoñol mandutu? Kii Bibel i niiga?

⁵ Bipastô, bipada ni baéga bibase ba mbéna toñol le ngéda bôt ba nok ndutu, hala a yé sômbôl i Djob. Bape ba nkal yak le hiki jam li nkwél mut, to ibale li yé béba jam, li nlôl ni Djob, ni le kekikel di ga la bé nok inyuki Djob a mboñ hala. Bahogi ki ba nkal le bôt, yak boñge, ba nwo inyu ba ni Djob i ngii. Ndi hala a ta bé maliga. Kekikel Yéhôva a mah boñ bé le mam mabe ma kwél bôt. Bibel i nkal le: “Hala, a ba yaga nonok ni Nyambe le a boñ biyabda [tole béba], to ni Nu ngui yosôna le a boñ biyôgda [tole ngitelepsép]!”​—Hiôb 34:10.

6. Inyuki ngandak bôt i ñôm Djob nsohi inyu mandutu ma nkoñ isi?

⁶ Ngandak bôt i ñôm Djob nsohi inyu mandutu ma nkoñ isi, inyule ba nhoñol le Djob nyen a ñane nkoñ isi. Ndi, kiki di bi nigil i Pes 3, Satan Nsohop nyen a yé toi ñane nu nkoñ isi.

7, 8. Inyuki mandutu ma yé nayak i nkoñ isi?

⁷ Bibel i nkal bés le: “Nkoñ isi wonsôna u niñi isi ane mut mbe.” (1 Yôhanes 5:19) Satan, nu a yé ñane nu nkoñ isi unu, a yé béba mut, a ban-ga ki ñem mbe. A ‘yé yumus nkoñ isi wonsôna.’ (Masoola 12:9) Ngandak bôt i nkôna nye. Ndi, hala a yé ndik njom yada inyu toñol inyuki nkoñ isi u yé nyonok ni bitembee, ôa, ni manola.

⁸ Manjom mape ma yé inyu toñol inyuki mandutu ma yé nyonok ikété nkoñ isi. Adam bo Éva ba bi ndogbene Djob, ba lôôs bon bap béba. Inyu béba i nyen bôt ba mboñ bape béba. Ba ngwés unda le ba  nlel bôt bape. Ba njo, ba kenek i gwét, ba tédék ki bape. (Ñañal 4:1; 8:9) Mangéda mape, bôt ba nkôs ndutu inyule “ngéda ni mpuhge ngéda ba mpémél bôt bobasôna.” (Ñañal 9:11) Mam mabe ma nla ki kwél bôt ngéda ba yé i béba homa i béba ngéda.

9. Inyuki di nla ba nkwoog nkaa le Yéhôva a gwé bañga njom inyu kônde nwas le mandutu ma ba?

⁹ Kekikel Yéhôva a mah lona bé mandutu. Di nlama bé to ôm nye nsohi inyu gwét, manola, ni ndééñga. Djob bé nyen a nlona mam mabe kiki bo nyeñg disi, mbuk mbebi, tole malép ma ma mbet ngandak, ma nolok bôt. Ndi u yé le u badba le: “Ibale Yéhôva nyen a gwé ngui iloo bôt bobasôna, inyuki a mélés bé mam mabe ma ma nkwél bôt ba binam?” Di nyi le Djob a ntôñ toi bés kiyaga. Hala a nkobla le ibale a nkônde nwas béba, wee a nlama bana bañga njom i boñ hala.​—1 Yôhanes 4:8.

10. Lelaa Satan a bi kolba Yéhôva?

¹⁰ Ikété wom Éden nyen Nsohop a bi tinde Adam bo Éva i ndogbene Djob. Satan a bi ôm Djob nsohi le a yé béba Ñane. A bé sômbôl unda le Djob a bé sôô Adam bo Éva mam malam. Satan a bé yéñ le ba hémle le a nla ba loñge ñénél lel Djob, ni le ba gwé bé ngôñ ni Djob.​—Bibôdle 3:2-5; béñge Ndoñi 27, i mamélél ma kaat.

11. Imbe mbadga di nlama timbhe?

¹¹ Adam bo Éva ba bi ndogbene Yéhôva, ba kolba ki nye. Ba bé hoñol le ba gwé kunde i kit ni bomede kii yé loñge ni kii yé béba. Lelaa Yéhôva a bé lama unda le bakolba nye ba mpot bitembee, ni le nyen a nyi kii i nlôôha ba loñge inyu yés?

12, 13. (a) Inyuki Yéhôva a bi tjé bé bakolba nye kunda yada? (b) Inyuki Yéhôva a bi nwas le Satan nyen a ba ñane nu nkoñ isi unu, a nwas ki le bôt ba binam ba énél bomede?

 ¹² Yéhôva a bi tjé bé Adam bo Éva kunda yada, ndi a bi nwas bo le ba bana bon. Mbus, a ti bon ba Adam kunde, le bomede ba pohol njee a mba ñane wap. Bitééne bi Yéhôva bi bé le a yônôs nkoñ isi ni bôt ba ba yé peles. Jam a bi mal kit li ga bôña to ibale Nsohop a mboñ kii inyu jôs sômbôl yé.​—Bibôdle 1:28; Yésaya 55:10, 11.

¹³ Satan a bi kolba Yéhôva i bisu bi didun di biañgel. (Hiôb 38:7; Daniel 7:10) Jon Yéhôva a bi ti Satan ngéda inyu tehe too a nla unda le yom a bi pot i yé maliga. Yéhôva a bi ti ki bôt ba binam ngéda, le bomede ba téé biane gwap isi énél i Satan, inyu tehe too ba gwé ngap i énél bomede ibabé mahôla ma Djob.

14. Kii ngéda i bi sôk unda?

¹⁴ Hala yé dikôô di ñwii i len ini le bôt ba binam ba noode énél bomede, ndi ba nla bé. I nsôk yiba le Satan a yé mut bitembee. Jon bôt ba binam ba gwé toi ngôñ ni mahôla ma Djob. Mpôdôl Yérémia a bi pot maliga ngéda a bi kal le: “A Yéhôva, me nyi le njel mut i ta bé ni nyemede; mut a ntéé bé makôô mé ni nyemede ngéda a nke.”​—Yérémia 10:23.

15, 16. (a) Inyuki Yéhôva a nwas le mandutu ma nom ntandaa ngéda? (b) Inyuki Yéhôva a mélés bé mandutu Satan a nlona?

¹⁵ Inyuki Yéhôva a bi nwas le mandutu ma nom ntandaa ngéda? Inyuki a nkéñ bé le mam mabe ma bôña? Hala a bé bat le ngéda i tagbe inyu unda le Satan a yé béba ñane. Bôt ba binam ba noode mintén  mi biane nwominsôna, ndi hala a nhéñha bé to jam. To hala kii bôt ba binam ba nhol i mam ma njôôñ yi, ba mbañ ki ngandak bisélél bi mondo; ndi ngitelepsép, liyep, njôô, ni gwét bi yé nayak iloo kiki ngéda bisu. Di nla bé ba maséé ntel di énél bésbomede ibabé le Djob a hôla bés?

¹⁶ Ndi, Yéhôva a yé ngi mélés mandutu Satan a nlona. Ibale a mboñ jam li, hala a nla kobla le Djob a nit énél i Satan. Ndi, kekikel Djob a nla bé boñ nya jam i. Hala a nla ki tinde bôt ba binam i hémle le ba nla énél bomede ikété maséé. Ndi yak hala a yé tembee le Yéhôva a nla bé nit. Djob a ntembee bé kekikel.​—Lôk Héber 6:18.

17, 18. Kii Yéhôva a ga boñ inyu mam mabe momasôna Satan a bi lona?

¹⁷ Baa Yéhôva a nla tibil mam mabe momasôna ngolba i Satan ni bôt ba binam i bi lona? Ñ, ni Yéhôva, hiki jam li nla bôña. Yéhôva a nyi ngéda imbe i yé loñge inyu timbhe Satan. Ndi, a ga yilha hisi paradis kiki hi bé lama ba i bibôdle. Bôt bobasôna ba ba yé i “soñ” ba ga tuglana. (Yôhanes 5:28, 29) Bôt ba ga kon ha bé, to wo ba ga wo ha bé. Yésu a ga sas mam mabe momasôna Satan a bi lona. Yéhôva a ga gwélél Yésu le a “ôbôs minson mi Nsohop.” (1 Yôhanes 3:8) Di nti Yéhôva mayéga le a nhônba bés mu ngéda i, kayéle a nti bés ngéda i yi nye, ni i yoñ makidik le nyen a ba Ñane wés. (Añ 2 Pétrô 3:9, 10.) To ngéda di yé ikété ndutu, a nhôla bés i bana hônba.​—Yôhanes 4:23; añ 1 Korintô 10:13.

¹⁸ Yéhôva a nyégsa bé bés i pohol le nyen a ba  Ñane wés. A bi ti mut binam kunde i pohol ni nyemede. Di nke tehe kii likébla li tôbôtôbô li, li nkobla inyu yés.

19. Limbe likébla li tôbôtôbô Yéhôva a bi ti bés? Inyuki di nla ti nye mayéga inyu likébla li?

¹⁹ Kunde i pohol ni bésbomede i yé likébla li tôbôtôbô Yéhôva a bi ti bés. Jon li boñ le di yé mahéñha ni binuga. Binuga bi gwé bé le bi pohol to tep, bi mboñ ndigi yom Djob a bi téé inyu yap. Ndi bés di nla pohol lelaa di ngwés gwélél biniñ gwés, di nla ki yoñ makidik i lémél Yéhôva tole to. (Bingéngén 30:24) Di ta bé to kiki bikei tole mashin, ma ma mboñ ndik yom ba nkal bo. Bés di gwé kunde i pohol umbe ntén mut di nyéñ yila, mambe mawanda di nyéñ bana, ni lelaa di nyéñ gwélél niñ yés. Yéhôva a ngwés le di kon maséé i niñ.

20, 21. Mambe makidik malam kiyaga u nla yoñ hanano?

²⁰ Yéhôva a nsômbôl le di gwés nye. (Matéô 22:37, 38) A yé kiki isañ nu a nkon maséé ibale a nok man wé a nkal nye le: “Me ngwés we,” tôbôtôbô ngéda man a nkal hala ni ñem wé wonsôna, ibabé le ba nyégsa nye i pot hala. Yéhôva a bi ti bés kunde i pohol too di ga gwélél nye tole to. Satan, Adam, ni Éva ba bi pohol i tjél gwélél Yéhôva. Lelaa u ga gwélél kunde yoñ i pohol ni wemede?

²¹ Bôñôl kunde yoñ inyu gwélél Yéhôva. Didun di bôt bape ba bi yoñ makidik i lémél Yéhôva ni i tjél Satan. (Bingéngén 27:11) Kii u nlama boñ nano inyu ba ha i mbok yondo i Djob, ngéda a ga mélés mandutu momasôna? Pes i noñ ha, i ga timbhe mbadga i.