Yésu ni banigil bé ba mal tagbe Péréa inyu ke i Yérusalem i nwelmbok. Nano, ba nyap Lom Yordan nu a yé bebee ni Yérikô. Bôt bape ba yé ke ni bo inyu tégbaha ngand i Pasa i nwii 33 N.Y.

Yésu a mbôk bisu bi banigil inyule a gwé ngôñ i pam i tison ilole ngand Pasa i mbôdôl. Ndi banigil bé ba nkon woñi. Ndék ngéda i bisu, i ngéda Lasarô a bi wo, Yésu a bé kôôba i nyodi i Péréa inyu ke i Yudéa, Tômas a bi kal bape le: “Yak bés di kenek, le ndi di wo lôñni nye.” (Yôhanes 11:16, 47-53) Jon i ke i Yérusalem i nkônha woñi, inyu hala nyen di nla nok inyuki banigil ba ta bé nwee.

Inyu kôôba bo i hônba mam ma nlo, Yésu a ñôt baôma bé ipañ, a nkal bo le: “Di yé i bet i Yérusalem, b’a ti Man mut i moo ma baéga biprisi ni bayimbén. B’a pémhene nye mbagi nyemb, b’a ti ki nye i moo ma bôt ba matén inyu boñ le ba nol nye hiol, ba bép nye disôô, ba nol ki nye i ngii kék; ndi i mbus dilo daa, a’ tuge.”​—Matéô 20:18, 19.

Hala a yé ngélé nyôhne aa le Yésu a mpôdôl banigil bé inyu nyemb yé ni bitugne gwé. (Matéô 16:21; 17:22, 23) Ndi lisañ lini, a nkal bo le ba ga nol nye i ngii kék. Ba ñemble nye, ndi ba ntibil bé nok jam a yé kal. Bebek ba mbem le ane i Israel i tiimba tééba hisi, inyule ba gwé ngôñ i bana lipém ni bibégés i ngim ane hana isi ni Yésu.

I nene le nyañ Yakôbô bo Yôhanes le Salômé, a bé lôñ yada ni bôt ba bé ke liké. Yésu a bi sébél baôma ba bo iba le “Bon ba mbambat,” bebek inyu libak jap li ngandak makénd. (Markô 3:17; Lukas 9:54) Hala a  yé ndék ngéda le ba gwé mahoñol i bana tel keñi i Ane i Kristô, yak nyañ wap a nyi hala. Jon a nkôôge Yésu bebee, a kwo isi yé makôô inyu bat nye jam li tôbôtôbô. Yésu a mbat nye le: “Kii u nyéñ?” Ni nye a timbhe le: “Ti oda le bana bon bem bôlôm bo iba, ba yén i Ane yoñ, wada i woo woñ walôm, wada ki i woo woñ waé.”​—Matéô 20:20, 21.

I pot maliga, i jam a bé bat li bé lôl ni Yakôbô bo Yôhanes. Mu kiki a ntip pôdôl hison ni wonyuu a ga ke i kôs, Yésu a nkal bo le: “Ni nyi bé yom ni yé i bat. Baa ni nla nyo libôndô me yé bebee i nyo?” Ba nkal nye le: “Ñ, di nla.” (Matéô 20:22) Ndi i nene le ba ta bé nok kii hala a nkobla inyu yap.

Ndi to hala, Yésu a nkal bo le: “N’a nyo yaga libôndô jem, ndi inyu yén i woo wem walôm ni i woo wem waé, me bé nyen me gwé kunde i boñ hala, ndi i biyééne bi, bi yé inyu bôt Tata a nkôôbana gwo.”​—Matéô 20:23.

Kiki ba nok i jam Yakôbô bo Yôhanes ba mbat, ini jôm li baôma ipe i ñunup. Baa kiñ i Yakôbô bo Yôhanes i nlôôha nôga mu nkaa u nkwo ipôla baôma inyu yi njee a yé nu bisu? (Lukas 9:46-48) To ibale kii, i jam li ntagbe, li ñunda le baôma bobasôna ba nogok bé maéba ma Yésu i ba kiki boñge batitigi. Ngôñ yap i ba ba bisu i nginda yii.

Yésu a nyoñ makidik inyu sañgal hiun hi yé ikété yap. A nsébél bobasôna, inyu ti bo mana maéba ma gwéha: “Ni nyi le i bet bôt ba ntehe kiki baane ba nkoñ isi ba ñénél bôt bap kiki i nlémél bo, yak mintôô nwap mi bôt mi ngwélél ngui yap inyu tét bôt bape. Hala bé nyen i nlama ba ipôla nan, ndi nu ni nu a nyéñ ba nunkeñi ipôla nan, a nlama ba ngwélél nan, yak nu ni nu a nyéñ ba nu bisu ipôla nan, a nlama ba nkol u bôt bobasôna.”​—Markô 10:42-44.

Yésu a ngwélél ndémbél yé nyemede. A ntoñol le: “Man mut a bi lo bé le ba gwélél nye, ndi le a gwélél bôt bape, a ti ki niñ yé kiki binoñ inyu ngandak bôt.” (Matéô 20:28) Hala a yé nwii maa le Yésu a ngwel nson wé inyu loñge i bôt bape. A ga boñ hala letee a wo inyu bôt bobasôna! Banigil ba nlama bana minlélém mi mahoñol ma kristen le ba gwel nson inyu bôt iloole bôt bape bon ba gwel nson inyu yap.