Yésu a nlôôha diihe Yôhanes Nsôble, ndi lelaa libim li bôt li ntehe Yôhanes? Yésu a nkal le: “I hiai hini hi yé kiki boñge batitigi ba ba yii i bôm, ba séblak mawanda map ma mintuk, ba kalak le: ‘Di bi kôt nsik inyu nan, ndi ni bi sak bé; di bi bégél, ndi ni bi tééñga bé nyuu.’”​—Matéô 11:16, 17.

Kii Yésu a nsômbôl kal? A ntoñol le: “Yôhanes a bi lo, a bé je bé, a bé nyo bé, ndi bôt ba nkal le: ‘A gwé mbuu mbe. Man mut nye a bi lo, a jek, a nyok, ndi bôt ba nkal le: ‘Nuna-ki! Mut mbina je ni mut nyôba wai, liwanda li bakottas ni li baboñbéba.’” (Matéô 11:18, 19) Yôhanes a bééna niñ i nsôhga i mut Nazir, a bé nyo bé wai, ndi bôt ba hiai hini ba nkal le a gwé mbuu mbe. (Ñanga bôt 6:2, 3; Lukas 1:15) Ndi Yésu a niñ kiki bôt bobasôna. A nje, a nyok i nya i kôli, ndi bôt ba nkal le a nlôôha. I nene le ba nla bé kônha bôt bana maséé.

Yésu a hégha bo ni boñge ba ba yé i bôm, ba tjélék sak i ngéda boñge bape ba nkôt nsik, ba tjélék ki ee i ngéda bape ba ñee. Yésu a nkônde le: “Ndi, pék i nene ikété minson nwé.” (Matéô 11:16, 19) Yôhanes ni Yésu ba ñunda ni njel “minson” nwap le minsohi bôt ba ñôm bo mi téé bé.

I mbus le a nhégha i hiai hini ni hiai hi gwé nledek ñem, Yésu a mbôdôl kônd tison i Kôrasin, Bétsaida ni Kapernaum, het a mboñ bihélha bi mam. Yésu a nkal le ibale a bi boñ bihélha bi mam bi i Tir ni Sidôn, bitison bi Fénikia, ki bôt ba bitison bi ba bi hiel miñem nwap. A mpôdôl ki inyu Kapernaum, tison het a nyééne hala a yé ndék ngéda nano. Yak nyoo libim li bi neebe bé biniigana gwé. Yésu a mpôdôl tison i, a nkélél yo le: “I kogse y’a kwél Sôdôm i Hilo hi Mbagi y’a hoi iloo i kogse y’a kwél we.”​—Matéô 11:24.

I mbus Yésu a mbégés Isañ inyule a nsôô “bôt ba pék ni bayikaat” tik maliga i mbuu, ndi a nyelene mo bôt ba suhulnyuu ba ba yé kiki boñge batitigi. (Matéô 11:25) A nleñ bo loñge nsébla ini: “Lona i meeni, a bé bobasôna ba ni ntumbba ni nson, ni bak ki ni bééga mbegee i nyét, m’a ti bé hogbe. Yoña kop yem i nson, ni niglene ki i meeni inyule me gwé ñem nwee ni suhulnyuu, le ndi ni kôs hogbe. Inyule kop yem nson i ntomb i begee, yak mbegee yem i nhoi.”​—Matéô 11:28-30.

Lelaa Yésu a nlona hogbe? Baéga bibase bi Lôk Yuda ba nyilha bôt minkol mi ngandak mambén, kiki bo minledek mi mambén mi kel Sabat. Ndi Yésu a nti bo hogbe inyule a niiga bo maliga ma Djob, ma ma gwé bé to liton li mana mambén mabe. A ñéba lelaa bet baane ba nkon isi ba ntét ba nla nkôhna hogbe, ni lelaa bôt kiññem i nkéés inyu bibéba gwap ba nla ba maséé. Ñ, Yésu a ñunda bo lelaa béba yap i nla nwéhlana ni lelaa ba nla ba nsañ ni Djob.

Ba bobasôna ba neebe kop nson i Yésu ba nla ti bomede nkikip i gwélél Djob ni Tata wés nu konangoo ni nu ngôô. Hala a ta bé mbegee i nlôôha keñi inyule matiñ ma Djob ma nyét bé.​—1 Yôhanes 5:3