LELAA niñ i yé le i ba ngéda litén djolisô ni kiñe yé ba neebe Yéhôva kii Ñane wap nungingi, ba noñog ki mambén mé? Mbadga ini i bi kôhna ndimbhe ikété ane i kiñe Salômô i i nom 40 ma ñwii.

Ilole David a nwo, a bi yis lok yé Salômô i yééne yé ane. Ni Djob a kal Salômô ikété eem le a bat nye to kinje jam a nsômbôl. Ha nyen Salômô a soohe Djob le a ti nye pék ni yi i kéés litén jé ni telepsép. Yéhôva a kon masé ngandak, ni nye a ti Salômô ñem u pék ni yi i bagal mam. Yéhôva a bôn ki le a ga ti nye lingwañ, lipém ni ntandaa niñ ibale a ntéñba nôgôl nye.

Lipém li Salômô li kahal bet inyu minkaa a bé bagal ni ngandak pék. Kel yada, bôdaa iba ba bé sôñna nkéñéé man munlôm, hi wada wap a kalak le nyen a yé nyañ man. Salômô a ti oda le ba kan nu man bipes biba, ba ti hiki mudaa pes yada. Mudaa nu bisu a neebe, ndi nwet man a pala soohe kiñe le ba tinag nu mudaa man. Kii Salômô a ntehe konangoo i nwet man, a yi le nyen a yé toi ngembe nyañ, ni nye a ti nye man. Israél i nok bañ mbagi kiñe, litén djolisô li tehe le yi i Salômô i nlôl toi ni Djob.

Maoñ ma témpel Yéhôva i Yérusalem ma bé hélha jam ikété minson minkéñi Salômô a sal. Témpel i bé soso loñge ndap, yon i bé lama ba homa bibégés nu bisu i Israél. Kel mayibil ma témpel, Salômô a soohe le: “Nun-ki, ngi yomede ni ngingi bi nla bé kola we, ndina ni ndap ini me bi oñ!”​—1 Bikiñe 8:27.

Ngan Salômô i nôôga yak i biloñ bipe, letee ni loñ yada le Séba, i bipes bi Arabia. Kiñe mudaa i Séba a bi lo le a tehe lipém ni lingwañ li Salômô, ni i bat nye mambadga i hek ndip i pék yé. Ndi pék i Salômô ni mahol ma Israél ma hélés kiñe mudaa ngandak, ni nye a ti Yéhôva mayéga le a ntéé kiñe i gwé pék i ngii Lôk Israél. Ane i Salômô i bé toi nsaibak ni Yéhôva inyule ikété ñañ u Lôk Israél wonsôna, ane i kiñe ipe i bi kôhna bé mahol ni nsañ kiki i Salômô.

Kinje ngandak ngoo le Salômô a téñbe bé i noñ pék i Yéhôva. A tjél nôgôl mbén Djob, a bii bibôgôl bi bôdaa, yak ba ba bé gwélél mob mape. Baa bé ba bi ôt nye mbeñe mbeñe ba kena nye haa ni Yéhôva, a bôdôl bégés bisat. Ha nyen Yéhôva a kal Salômô le a’ héa nye pes ane. Ndi inyu mbônga Djob a ti David isañ Salômô, Djob a kal le pes ane ndik yon y’a yégle i si lihaa li Salômô. Yéhôva nye a tééda malômbla a boñ ni David inyu Ane to hala kii Salômô a nwas nôgôl nye.

​—Biniigana bini bi nyôñna i bikaat bi 1 Bikiñe, pes 1 i pam 11; 2 Miñañ, pes 1 i pam 9; Ndiimba mbén 17:17.