1, 2. Imbe ndémbél i ñéba le di gwé ngôñ ni ngim héga i hôla bés i yoñ bikidil inyu mam ma mbéñge base?

LELAA di nla boñ inyu yi Djob? Baa i yé nseñ le di wan biniigana gwobisôna bi ngandak bibase bini? Hala a nla bé bôña. Ndi to ibale di nla boñ hala, lelaa d’a yi bimbe biniigana bi yé maliga?

² Ni maliga, ngéda di ntehe mahéñha ma mahoñol bôt ba gwé inyu Djob, hala a nti bés ngôñ i yéñ njel i yi kii i yé maliga, hala wee hihéga le hiki wada wés a nla neebe. Di yoñ ndémbél: Hoñol le ngim pééna i yé bôm i yi bibôñgô bi ngim libatô. Nuñul a nkal le libatô li yé méta maa. Nsomb a nhoñol le li mpam bé hala. Lelaa ba nla sugus pééna ini? Ndik ngéda b’a hek libatô lini ni méta.

3. Inyuki Bibel i tilbana?

³ Baa ngim méta, tole hihéga, hi yé inyu jam li mbéñge base? Ñ, hio hini le Bibel. Djob a boñ le Bibel i tilba inyu boñ le bôt ba yi maliga inyu yé to he homa ba yé. Didun ndi didun di bi Bibel di ma tilbana. Ba bi kobol ki yosôna, tole pes, ikété iloo 2100 dilémb. Bebee le hiki mut a nla añ maliga inyu Djob ni hop wé nyemede.

4. Bimbe biniigana bi nlébna ikété Bibel?

⁴ Bibel i yé tik likébla li nlôl ni Djob. I ntoñol mam ma di bak bé le di yi ni  njel ipe. I ñañal mam inyu bet ba niñil nkoñ mbuu. I nyelel mahoñol ma Djob, libak jé, ni matéak mé. I ñañal kiki a bi hiôm ni bôt iloo dikôô di nwii len. I mpôdôl mam ma nke lo. Ndi i ébga ki lelaa di nla léba njel i nkena niñ boga.

5. Himbe hihéga hi ñéba le Bibel i nkiha ni njoñ yi?

⁵ Di nla hémle le Bibel i yé toi Bañga Djob inyu ngandak manjom. Njom yada ini le Bibel i nkiha ni njoñ yi. I ngéda kôba bôt ba bé hoñol ikété nkoñ isi wonsôna le hisi hi tégne ngii ngim jam. Kii kahéga, i Africa kéndimbok, bôt ba bé hoñol ngim ngéda le hisi hi kéhne ngi nhôôk nyoo, dibanda 3 500 ngii, ni dibanda 3 500 isi. Ndi iloo 3 500 nwii len nyen ntila Bibel wada a pot, nlélém kii njoñ yi, le Djob a “nkéhne hisi ngii to yom.”​—Hiôb 26:7.

6. Imbe mbogye i nlôôha keñi i ñunda le Bibel i nlôl ni Djob?

⁶ Mbogye i nlôôha keñi i i ñéba le Bibel i nlôl toi ni Djob yo ini le mam momasôna Bibel i bi bôk pot ma bi yon. Mahéñha ni bindéé bôt ba binam ba mpot, Djob a nyi toi bilôl; hiki jam a mpot li nyon.

7. Ngim mbañ Bibel imbe i bi yon ngéda kwañ?

⁷ Mbôgôl ni mbôgôl mbañ i Bibel i bi yon ngéda behe. Kiki héga: 700 nwii i bisu bi ngéda, Bibel i bôk i kal le Yésu a’ gwééne i Bétléhém. Hala ki nyen i bi bôña. (Mika 5:2; Matéô 2:3-9) Ibale di nke i kônde mbañ ipe inyu Yésu, Bibel i bôk i pot le a’ gwé ni hingonda hi konji, le b’a liibana nye inyu mômaa ma bipes bi silba. Mbañ ini i bi yon. Ni maliga to mut to wada a bé bé le a la bôk pot mam mana!​—Yésaya 7:14; Sakaria 11:12, 13; Matéô 1:22, 23; 27:3-5.

8. Ngim mbañ Bibel imbe i nyon i len ini, hala a nti ni imbe mbogye?

⁸ Ngandak mbañ i Bibel i nyônôl ngéda yés ini. I hogi ini le:

• “Loñ y’a nyagbene loñ [ni gwét],  ane i kolba ane, nyeñg disi ikeñi y’a ba, yak makon ni njal bahoma bahoma.”​—Lukas 21:10, 11.

• “Liyan mbén l’a yaaba.”​—Matéô 24:12.

• “Dilo di nsôk . . . bôt b’a tôñ ndigi bomede, ba gwéhék moni, . . . bandogbene bagwal bap, . . . bôt ba biyôgda [ba nhôt bé manyuu], bôt ba nyai, baoo mam malam, . . . ni ba ngôk u nkwés ndim, b’a gwés maséé ma nkoñ isi iloo ki ba ngwés Nyambe.”​—2 Timôtéô 3:1-5.

Baa u neebe bé le mam mana ma ngwéla len ini? Biyônôl bi mbañ i Bibel bi ñunda le Bibel i ta bé to imbe kaat. I yé Bañga i nlôl ni mbuu Djob!​—2 Timôtéô 3:16.

9, 10. Kii i ñéba le Djob a bi ti bé bôt kunde i heñel Bibel?

⁹ Hégda le u yé nwet ngim ndap ba mbéñél gwom, ndi u ômle babôñôl boñ mambén ni njel nkuu bikaat. Kinje jam u yé le u boñ ibale wada ikété baoo boñ a nhéñha yom u ntila? Ba w’a kodol bé jam li nhéñhana? Nlélém, Djob a nti bé bôt kunde le ba heñel maliga ma Bañga yé le Bibel.

¹⁰ Bet ba bi noode heñel biniigana bi Bañga Djob ba bi la bé. Ngéda di nhégha Bibel di gwé len ini ni minlômbi mi bitilna bi Bibel, bi yé nlélém. Hala a ñéba le Bibel i bi heñlana bé ni ngéda.