To ibale u mboñ biliya i gwés Yéhôva ngandak, u boñok ki biliya le u unbaha bañ nye, i yé i pam ngim mangéda le u hôs. Ngim bibéba i yé titigi, ndi bipe bi yé bikeñi. (1 Korintô 6:9, 10) To ibale u mboñ bibéba bikeñi, u hôiga bañ le Yéhôva a yé bebee i nwéhél we ni i hôla we.

1. Kii u nla boñ le ndi Yéhôva a nwéhél we?

I bet ba ngwés Yéhôva ba yé ba lôôha nok ndutu i ngéda ba mboñ béba ikeñi. Ndi unu mbônga u Yéhôva u nhôgbaha bagwélél bé: “To ibale bibéba binan bi nkôyôp kiki matjél, bi ga pôp kiki libu li lisuni.” (Yésaya 1:18) Ibale di ntam toi bibéba gwés, Yéhôva a nwéhél bés. Lelaa di nla éba le di ntam toi bibéba gwés? I ngéda i jam di mboñ li ntééñga bés ngandak. Di nyemhe Yéhôva le a nwéhél bés, di mbôn ki le di ntiimba ha bé boñ i jam li. Ha i ngéda i, di mboñ biliya i héñha mahoñol més ni maboñok més mabe, di kee ki ni bisu i niñ inoñnaga ni matiñ ma Yéhôva.—Añ Yésaya 55:6, 7.

2. Lelaa Yéhôva a ngwélél mimañ inyu hôla bés i ngéda di mboñ béba?

Ibale di mboñ béba ikeñi, Yéhôva a nkal le ‘di sébél mimañ mi likoda.’ (Añ Yakôbô 5:14, 15.) Mimañ mi ngwés Yéhôva, mi gwéhék ki mintômba nwé. Ba nla hôla mut nu a mboñ béba ikeñi i tiimba bana maada malam ni Yéhôva.—Galatia 6:1.

Lelaa mimañ mi nla hôla kristen i i mboñ béba ikeñi? Mimañ ima tole maa, mi ngwélél Bibel inyu hôla mut a mboñ béba. Ba nti ki bés maéba ni makénd inyu yi kii di nla boñ inyu boñ le, di boñ ha bañ i béba i. Ibale mankéé a mboñ béba ikeñi, ndi a tam bé yo, mimañ mi mpémés nye i likoda inyu sôñ likoda, inyu boñ le lôk kéé ipe i kôna bañ ndémbél yé ibe.

 KÔNDE TÉM

3. I yelel béba yés i nhôla bés i témbna mbôô wés

I ngéda di mboñ béba di ñunbaha Yéhôva, jon di kôli i pahle nye béba yés. Añ Tjémbi 32:1-5, i mbus ni kwélél mbadga ini:

• Inyuki i yé loñge i pahal béba yés i bisu bi Yéhôva, iloole di sôô yo?

 4. Yéhôva a ñunda baboñbéba konangoo

I ngéda mut a ntjél nôgôl matiñ ma Yéhôva, ndi a boñ béba ikeñi, ba mpémés nye i likoda. Ha ngéda i, di nla ha bé kiha ni nye. Añ 1 Korintô 5:6, 11, i mbus ni kwélél mbadga ini:

• Nlélém kiki ndék séñha i nhulus flawa yosôna, lelaa likoda li nla yila ibale di mbéna tégbaha ngéda ni mboñbéba nu a ntjél tam béba yé?

Lelaa liboñok li Yéhôva ipañ baboñbéba, li ñéba toi le a yé Djob li telepsép, le a nok bés, a konok bés ngoo, ni le a yé Djob li gwéha?

 I SEM KWEP

Ibale di mboñ béba ikeñi, ndi di tam yo, di kôm i béba i mbus, Yéhôva a ga nwéhél bés.

Mambadga ma mbigda

• Inyuki hala a yé loñge jam i pahle Yéhôva bibéba gwés?

• Inyu boñ le Yéhôva a nwéhél bés, kii di nlama boñ?

• Inyuki di nlama yéñ mahôla ma mimañ, i ngéda di mboñ béba ikeñi?