Yésu a bi niiga le i mut a nsômbôl yila nnigil wé a nlama sôblana. (Añ Matéô 28:19, 20.) Ndi kii i yé sôble? Kii mut a nlama boñ inyu kôhna sôble?

1. Kii i yé sôble?

I buk hop u Lôk Grikia ini le “sôble” i nkobla le “i ha mut nyensôna” ikété malép. I ngéda Yésu a bé sôblana, ba bi jubus nyensôna ikété Lom Yordan, i mbus ‘a pam ikété malép.’ (Markô 1:9, 10) Nlélém, yak ngéda bañga bikristen i nsôblana, ba nha nyuu yap yosôna ikété malép.

2. I ngéda mut a nkôs sôble, kii hala a nkobla?

I ngéda mut a nkôs sôble, hala wee a nti niñ yé nkikip inyu boñ sômbôl i Yéhôva. Ilole mut a nkôs sôble, a mbôn Yéhôva ikété masoohe le a ga sélél ndik nyetama, le sômbôl yé yon y’a ba jam li bisu i niñ yé, ni le ‘a niñ ha bé inyu yé nyemede . . . ndi a ga noñ Yésu ibabé waa.’ (Matéô 16:24) I ngéda mut a nti nyemede nkikip, a kôs ki sôble, a nyila liwanda li Yéhôva ni li bagwélél bé.

3. Kii mut a nlama boñ ilole a nkôs sôble?

Ilole u nkôs sôble, i yé nseñ le u nigil i yi Yéhôva ni le u bana bañga hémle. (Añ Lôk Héber 11:6.) Kiki yi yoñ ni hémle yoñ bi ga ke ni bisu i nañ, hala nyen u ga kônde gwés Yéhôva. Ibabé pééna, w’a bana ngôñ i añal ñañ nlam ni i niñ inoñnaga ni matiñ ma Yéhôva. (2 Timôtéô 4:2; 1 Yôhanes 5:3) I ngéda mut a mbôdôl “hiôm i nya i kôli ni Yéhôva le ndi a lémél nye i nya i yôni,” ha nyen a nla yoñ makidik i ti nyemede nkikip yak Nyambe ni i kôs sôble.—Kôlôsé 1:9, 10. a

 KÔNDE TÉM

4. Sôble i Yésu i niiga bés ngandak mam

Añ Matéô 3:13-17 inyu yi biniigana di nla ôt i sôble Yésu. I mbus ni kwélél mambadga mana:

• Baa Yésu a bé nkéñéé man i ngéda a bi kôs sôble?

• Lelaa ba bi sôble nye? Baa ba bi kôp ndik nye ndék malép i ngii ño?

I mbus sôble yé nyen Yésu a bi bôdôl gwel nson wé u tôbôtôbô Nyambe a bi ep nye i boñ hana ’isi. Añ Lukas 3:21-23 ni Yôhanes 6:38, i mbus ni kwélél mbadga ini:

• I mbus sôble i Yésu, umbe nson u bé jam li bisu i niñ yé?

5. Di nlama bé kon sôble woñi

I ngéda mut a nok le a nlama ti nyemede nkikip, a sôblana ki, hala a nla kônha nye woñi. Ndi to hala, u nla pam i yoñ makidik ma. Di béñge lelaa ngim bôt i bi pam i yoñ makidik ma, tuk VIDÉÔ.

Añ Yôhanes 17:3 ni Yakôbô 1:5, i mbus ni kwélél mbadga ini:

• Kii i nla hôla mut i ba bebee i kôs sôble?

1. Di nti bésbomede nkikip i ngéda di mbôn Yéhôva ikété masoohe le d’a gwélél ndik nyetama niñ yés yosôna

2. I ngéda di sôblana, di ñéba i mbamba le di mbôn Yéhôva le d’a gwélél ndik nyetama

 6.I ngéda mut a nsôblana, a njôp ikété lihaa li Yéhôva

I ngéda di nsôblana, di nyila wada mu ntôñ i lôk kéé i nkoñ ’isi wonsôna. Mbôgi Yéhôva yosôna i gwé minlélém mi biniigana, i nôgôl ki minlélém mi matiñ ibabé i béñge i het ba nlôl tole i homa ba néñél. Añ Tjémbi 25:14 ni 1 Pétrô 2:17, i mbus ni kwélél mbadga ini:

• Lelaa sôble i nlédés maada més ni Yéhôva, ni bana bagwélél bé bape?

 I SEM KWEP

Yésu a bi niiga le banigil bé ba nlama kôs sôble. Ilole mut a nkôs sôble, a nlama bôdôl Yéhôva ñem ni ñem wé wonsôna, a nlama gwés matiñ mé, a ti ki nyemede nkikip yak Yéhôva.

Mambadga ma mbigda

• Kii i yé sôble, inyuki i nlôôha ba nseñ?

• Mambe maada ma yé ipôla i ti bésbomede nkikip yak Yéhôva ni i kôs sôble?

• Ilole mut a nti nyemede nkikip yak Yéhôva ni le a nkôs sôble, mambe mam a nlama boñ?