Yéhôva a bi ti bés likébla li li nlôôha lilam le Bibel. I kaat i, i gwé 66 ma bon ba bikaat. Ndi, di nla badba le: ‘Hee Bibel i nlôl? Bibel i yé lipôdôl li njee?’ Inyu timbhe mambadga ma, di bôk ndugi di béñge lelaa Bibel i bi pam i béhni.

1. Ibale bôt bon ba bi tila Bibel, inyuki ba nkal le Bibel i yé lipôdôl li Djob?

I bôt ba bi tila Bibel ba bé 40, hala a bi yoñ jam kiki bo 1 600 nwii ibôdôl i nwii 1513 B.N.Y. ikepam i nwii 98 N.Y. Batila Bibel ba bééna bé binéñél gwada. Bahogi ba bi boñ bisuklu bikeñi, ndi bape ba bi boñ bé ngandak suklu. Bape ba bé mingwañ, ndi bape ba bé yep. To hala, pes i Bibel yada i nkolba bé pes i Bibel ipe. Lelaa hala a bi la bôña? Ndigi inyule Bibel i yé lipôdôl li Djob. (Añ 1 Tésalônika 2:13.) Batila Bibel ba bi tila bé mahoñol map. Ndi ba bi “pot mam ma nlôl yak Nyambe mu kiki mbuu mpubi u bé éga bo.” a (2 Pétrô 1:21) Djob a bi gwélél mbuu wé mpubi inyu tinde bôt i tila mahoñol mé.​—2 Timôtéô 3:16.

2. Bibel i nla hôla njee?

Miñañ minlam mi yé ikété Bibel mi nla hôla bôt ba “hiki loñ, hiki litén ni hiki hilémb.” (Añ Masoola 14:6) Djob a bi yoñ bitelbene le Bibel i koblana ikété ngandak dilémb, iloo bikaat gwobisôna. Bebee le hiki mut a nla nok nwin u Bibel. To a yé limbe litén, to a mpot umbe hop.

3. Lelaa Yéhôva a bi tééda Bañga yé le Bibel?

Inyu tila Bibel, ba bi gwélél gwom kiki bo bikôgôô bi binuga, bo bipapirus. Gwom bi bi yé le bi nom bé. Ndi inyu boñ le Bibel i téédana, i bôt ba bé diihe yo ba bi yoñ ndun i tiimba tila yo ngandak ngélé. Yak ngéda ngim baane ni baéga bibase ba bi boñ biliya i tjé Bibel, bôt bahogi ba bé bebee i ti biniñ gwap inyu tééda yo. Yéhôva a bi nwas bé le mut nye ki nye tole yom yo ki yo i kéñ nye i kwel ni bôt ba binam. Bibel i nkal le: “Bañga i Nyambe i nom i boga ni boga.”​—Yésaya 40:8.

 KÔNDE TÉM

5. Bibel i bééna baoo

 6. Kaat inyu bôt bobasôna

Bibel i yé kaat ba bi lôôha kobol, ba tjam ki iloo bikaat gwobisôna. Añ Minson mi baôma 10:34, 35, i mbus ni kwélél mambadga mana:

• Inyuki Djob a ngwés le ba kobol Bañga yé, ba tjam ki yo?

• Kii i nlémél we mu Bibel?

 I SEM KWEP

Bibel i yé Bañga i Nyambe, a bi yoñ ki bitelbene le bôt ba binam bobasôna ba laa bana yo.

Mambadga ma mbigda

• Ngéda ba nkal le Bibel i yé Bañga i Djob, hala a nkobla le kii?

• Libak le Bibel i bi pei, i bak kaat i yé nkoblak ni ntjamak iloo bikaat bipe, li niiga ki bés?

• Kii u nôgda inyu Djob ngéda u mbigda le a bi yoñ bitelbene bi gwobisôna inyu pôdôs we?