David a nol bañ Gôliat, Kiñe Saulô a téé nye nkena ntôn wé gwét. David a bi yémbél ngandak gwét, a yiba ki ngandak. Hiki ngéda David a bé lôl i gwét, bôda ba bé pam, ba sagak, ba loñgege le: ‘Saulô a bi nol dikôô, ndi David môm ma dikôô!’ Saulô a kahal kil David njôñ, a bôdôl ki yéñ i nol nye.

David a bé yi kôt hiluñ loñge loñge. Kel yada, ngéda a bé kôt hiluñ inyu Saulô, Kiñe Saulô a leñ nye likoñ. David a bi semba jo, li ke li ôm libap li ndap. I mbus jam li, a noode ki ngandak ngélé i nol David. Sôk i nsôk, David a ke ngwéé, a solop i ñoñ.

Saulô a bi yoñ ntôñ gwét u 3 000 di bôt, inyu noñ David. Ndi i léña le, a jôp i hôk i het David ni bôt bé ba bé ba sôlne. Bôt ba David ba sooga nye le: ‘Nsima unu u gwé i nol Saulô.’ David a bi tiige  Saulô bebee, a kit linjek li mbot li kiñe. Ndi Saulô a bi yi bé. I mbus hala, ñem u kahal bép David inyule a bi ti bé nhook u Yéhôva lipém. A bi neebe bé le bôt bé ba jôs Saulô. A sébél Saulô, a kal nye le a bak le a nol nye inyule a ban-ga pôla i boñ hala. Baa Saulô a bi héñha mahoñol inyu David?

To. Saulô a bi ke ni bisu i noñ David. U wada, David bo man manyañ le Abisai, ba bi jôp bisôsôli ikété libôga li Saulô. Abner, ntat Saulô, a bé ke ’ilo. Abisai a kal le: ‘Nsima wés unu! Nwas me me nol nye.’ David a timbhe nye le: ‘Yéhôva a ga saa Saulô. We yoñ ndigi likoñ jé ni sop yé malép, di kenek.’

David a bi bet i ngii hikôa hiada, bebee ni libôga li Saulô. A lond le: ‘A Abner, inyuki u nla bé tat kiñe yoñ? Sop yé malép ni likoñ jé bi yé hee?’ Saulô a bi yi kiñ David, a kal le: ‘U bak le u nol me, ndi u mboñ bé hala. Me nyi le u ga ba kiñe Israel.’ I mbus Saulô a huu. Ndi ikété lihaa li Saulô, bôt bobasôna bé bon ba bé oo David.