Prisi Keñi le Éli a bééna bon bôlôm iba, Hôfni bo Finéhas, ba bak biprisi i Lap. Ba bé nôgôl bé mbén Yéhôva, ba tééñgaga ntôñ Yéhôva, béba ngandak. Ngéda Lôk Israel i bé ti Yéhôva bisesema, Hôfni bo Finéhas ba bé yoñ binuga bilam inyu yap bomede. Éli a bé nok mam bon bé ba bé boñ, ndi a bé boñ bé to yom. Baa Yéhôva a bé le a nwas le hala a kônde ke ni bisu?

To hala kiki Samuel a bé a ngi yii mañge ngandak ilel Hôfni bo Finéhas, a bi kôna bé libak jap. Yéhôva a bé maséé ni Samuel. U wada, ngéda Samuel a bé a nke ’ilô, a nok kiñ i nsébél nye ni jôl jé. A telep, a ke ngwéé i koba Éli, a kal le: ‘Me nunu!’ Ndi Éli a timbhe nye le: ‘Me nsébél bé we. Témb ke nañal.’ Samuel a témb i nañi. I mbus, hala a témb a bôña. Ngéda Samuel a bi nok ki nsébla inyu ngélé i nyônôs aa, Éli a nôgda le Yéhôva nyen a yé sébél Samuel. A kal Samuel le ibale a nôk ki nsébla, a kal le: ‘Pot, a Yéhôva. Ngwélél woñ a ñemble we.’

Samuel a témb i nañi. A nok ki nsébla: ‘A Samuel! A Samuel!’ A timbhe le: ‘Pot, ngwélél woñ a ñemble we.’ Yéhôva a kal nye le: ‘Añle Éli le, me nkogse nye lôñni lihaa jé. A nyi yaga le bon bé  ba mboñ mam mabe i Lap yem, ndi to hala a mboñ bé to yom.’ I kel i bé noñ ha, Samuel a yibil manwemel ma Lap kiki lem yé. A bé kon woñi i legel Prisi Keñi nwin Yéhôva a bi añle nye. Ndi Éli a sébél nye, a bat nye le: ‘A man wem, kii Yéhôva a ñañle we? Sôô bañ me to yom.’ Ha nyen Samuel a añle nye mam momasôna.

Yéhôva a ba ni Samuel dilo tjodisôna di binéñél gwé. Bon ba Israel bobasôna ba bé yi le Yéhôva a bi tep Samuel i ba mpôdôl ni nkéés.