Hégda le jam lini: Ngéda a ntehe mawanda mé ma suklu ima ma nlo nye i pañ, Brian a nôgda ñem wé u mbép ni ngui. Ngélé iba munu sonde ini, ba ma noode tinde nye i ôt siga. Nano ba yé ki i lo inyu ngélé i nyônôs aa.

Mañge munlôm nu bisu a nkal nye le:

A nyigye ini buk le “liwanda,” a leñek Brian jis mu kiki a yé héa yom mukété mpék wé inyu ti nye yo.

Brian a ntehe mañge munlôm a gwé siga mu dinoo tjé. Ha nyen ñem wé u nkônde bép makeñi.

Ibale wen u bak Brian, ki u ntimbhe lelaa?

Baa bisega bi Brian bi ntibil hek pék ilole ba mboñ jam ba yé boñ? Baa bomede bon ba nyoñ makidik i boñ jam li? I nene le to. Libim li ngéda, ba mboñ ndik gwom ba ntehe bôt bape ba mboñ. Ba nyéñ lémél bôt, jon ba nwas le bôt bape ba héñha libak jap.

Ibale wen u mboma nlélém jam, ki w’a boñ lelaa inyu gwélél njel ipe, ni yémbél bilôñ bibe?

1. KÔÔBA I BISU BI NGÉDA

   Bibel i nkal le: “Mut yihe a ntehe jam libe, a nsolop; ndi ditégéé di bôt di ntagbe, di nkôs nôgôs.”—Bingéngén 22:3.

   Ngim mangéda, u nla tehe mindañ mi nlo we i bisu. Kii héga, hégda le u ntehe mawanda moñ ma suklu ma yé we bisu, ma yé ôt siga. Ibale u nkôôba i bisu bi ngéda, w’a ba bebee i yi lelaa u nla semba tole keñgle jam li.

2. HEK PÉK

   Bibel i nkal le: “Ni ban-ga loñge kiññem.”—1 Pétrô 3:16.

   Badba le: ‘Lelaa m’a sôk nôgda ibale me noñ i yom limut li mboñ?’ I yé maliga le, bebeg w’a bébél bisega gwoñ inyu ngim ngéda ibale u noñ bé bo. Ndi lelaa w’a sôk nôgda? Baa u yé bebee i nimis libak joñ lilam, ndik inyu lémél mawanda moñ ma suklu?—Manyodi 23:2.

3. YOÑ MAKIDIK

   Bibel i nkal le: “Mut pék a nyoñ yihe.”—Bingéngén 14:16, MN.

   Len tole yani, di gwé le di yoñ makidik, di bumbul ki mam di nsal. Bibel i mpôdôs bés inyu bôt kiki bo Yôsef, Hiôb, ni Yésu, ba ba bi yoñ makidik malam. Ndi i mpot ki inyu Kain, Ésau, ni Yuda, ba ba bi yoñ makidik mabe. Baa we w’a boñ lelaa?

Bibel i nkal le: “Nu a yé maliga ikété ndék mam, a yé ki maliga ikété ngandak.” (Lukas 16:10) Ibale u nhek pék inyu hoñol bikuu maboñog moñ ma nla lona, ndi u yoñ makidik moñ, kal bisega gwoñ makidik u mal yoñ. Hala a nla hélés wemede i tehe lelaa i boñ hala i ta bé jam li nlet—ndi i yé jam li nti we maséé.

U tôñ bañ—u gwé bé le u ti bisega gwoñ nkwel u mbamba. Yis ndik bo ni makénd le TO woñ a yé toi TO. Tole inyu unda bo le w’a héñha bé makidik moñ, u nla kal le:

• “Me ta bé me mu!”

• “Me mboñ bé me ntén jam u!”

• “Ngo ni nek bé me!”

Jam li yé nseñ, li yé le u timbhe bo bihôô bihôô, u boñ ki hala ni makénd. Ibale u mboñ hala, u nla hel i tehe lelaa bisega gwoñ bi ga waa tééñga we!

Lelaa u nla boñ ibale bisega gwoñ bi nol we? Ibale ba nkal we kii héga le: “Kii nke bé ni we—baa u yé mboye mut?” Hala a hélés bañ we—wee bisega gwoñ bi nyéñ tinde we i boñ ngim jam. Lelaa u nla timbhe bo? U gwé i bititigi gwobisôna manjel ima u nla gwélél.

• U nla neebe jam ba nkal. (“Ni mpot maliga, me nkoñ woñi!” I mbus, gwélél ndék bibuk inyu ti bo manjom moñ.)

• U nla timbhe bo ni pék, u toñle bo inyuki u ntjél boñ jam ba mbat. I mbus, u ôt mahoñol map. (“Ngo me yik le ni nyi le siga i ntina makon!”)

Ibale bisega gwoñ bi nkônde noode we, nyodi ha homa nu! U hôiga bañ le kiki u nkônde yén ha, hala nyen yak bo ba nkônde nyégsa we i boñ jam li. Ndi ibale u nyodi ha, u ñunda le u neebe bé le bôt bape ba héñha libak joñ lilam.

I yé maliga le u nla bé ke bisega gwoñ ngwéé hiki ngéda. Ndi u nla pohol mambe mam u nyéñ boñ, u nla kal bo makidik moñ, u nla ki yéne mu makidik moñ. Jon, wen u nlama yoñ makidik ma nsôk!—Yôsua 24:15.