Yéhôva a mbem le babiina ba téñbe i yônôs likak ba boñ i kel libii jap. Ngéda a bi at libii li bisu, Yéhôva a bi kal le: “Mut a’ . . . adbe ñwaa wé, boba ba ba nsôn wada.” I mbus ngéda, Yésu Kristô a bi tiimba bibañga bini, a kônde ki le: “Jon jam Nyambe a ñat, mut a bagal bañ jo.” (Bibôdle 2:24; Matéô 19:3-6) Yéhôva bo Yésu ba ngwés le maada ma libii ma nom niñ yosôna, libii li malak ndigi  ngéda sobiina wada a nwo. (1 Korintô 7:39) Kiki libii li yé nlômblak jam i mis ma Djob, mabos ma nlama bé yôña kiki yom i minjôha. Ni maliga, Yéhôva a ñoo mabos ma ma gwé bé njom i nkiha ni Bibel.​—Malaki 2:15, 16.

Mambe mabos ma gwé njom i nkiha ni Bibel? I pot maliga, Yéhôva a ñoo ndéñg. (Bibôdle 39:9; 2 Samuel 11:26, 27; Tjémbi 51:6) I nlôôha suñgaha nye ñem kayéle a neebe le ndéñg i ba njom inyu mabos. (Inyu yi kii i yé ndéñg, béñge pes 9, liben 7, i homa ba ntoñol kii i yé ndéñg.) Yéhôva a nti sobiina nu a yé nginsohi kunde i yén ni nwet a ntjañgap ikété libii, tole kunde i bos. (Matéô 19:9) Jon, ibale sobiina nu a yé nginsohi a nkit le a mbos, Yéhôva a ñoo bé i mabos ma. Ndi i nlélém ngéda, likoda li ntinde bé ki to mut i bos. Ngim mam i nla tinde sobiina nu a yé nginsohi i ke ni bisu i niñ ni nwet a ntjañgap, téntén ibale a ntam béba yé ni ñem wonsôna. Sôk i nsôk, i bet ba gwé kunde i nlôl i Bibel inyu bos, ba nlama yoñ makidik map botama, ba ba ki bebee i neebe to limbe jam li nlo mu i mbus.​—Galatia 6:5.

Ngéda mandutu ma nlôôha, bikristen bihogi bi bi yoñ makidik i bagla tole i bos lôñni sobiina wap to hala kiki a bi ke bé i ndéñg. Ha nya ngéda i, Bibel i nkal le i nwet a nkit le a nke, a nlama “yén ngibiiba, to le a sangla ni” sobiina wé. (1 Korintô 7:11, MN) Nya kristen i, i ta bé kunde i bana maada ni mut numpe ni mahoñol ma libii. (Matéô 5:32) Di béñge ni ndég mandutu i i bi tinde bahogi i bagla.

I tjél tééda lihaa i libak li minsôn. Lihaa li nla yila liyep, kayéle li hañak yak bijek inyule isañ mbai a ntjél tééda lihaa jé to hala kiki a gwé bigwel moo inyu boñ hala. Bibel i nkal le: “Ibale mut a ntôñgôl bé bôt . . . bé ba ndap, wee a mal tañba hémle a yé béba iloo mut a ntop bé hémle.” (1 Timôtéô 5:8) Ibale i nya mut i, i ntjél héñha maboñog mé, ñwaa wé a nla yoñ makidik i bagla i bisu bi ngomén inyu sôñ  bon bé ni nyemede ñwaa. I yé maliga le, mimañ mi likoda mi nlama tibil wan ngéda ba ñôm kristen nsohi le a ntééda bé lihaa jé. Ba nla pémés mut ikété ntôñ inyule a ntjél tééda lihaa jé.

Ngéda ndôm i nai. I nla pam le sobiina wada a nlôôha bép nuu numpe kayéle a nla nimis mbôô wé tole niñ yé. Ibale kristen yon i mbép sobiina wé, mimañ mi likoda mi nlama wan jam li inyu yi too hala a yé mbale. Ba nla pémés mut ikété ntôñ inyu nyayak ni lem i bép bôt.​—Galatia 5:19-21.

Ngéda njel i ta bé tjagda inyu bégés Yéhôva. Sobiina wada a nla noode sôña nuu numpe i bégés Yéhôva ibabé waa, tole i nyéksa nye i bôk mambén ma Djob. Ha ngéda i, i sobiina nu ba nhan, a nla kit le mpom njel a gwé i “nôgôl Nyambe iloo bôt” i yé le a bagla i bisu bi ngomén.​—Minson mi baôma 5:29.

Ngéda mandutu ma nlôôha kiki bo mana di ntip pôdôl, mut to wada a nlama bé nyéksa sobiina nu a yé nginsohi i bagla tole i yén ni nuu numpe. To hala kiki mimañ ni minhôôlak mi bikristen mimpe mi nla ti mahôla ni maéba ma nlôl ikété Bibel, ba nyi bé i mam momasôna ma ntagbe ipôla munlôm bo ñwaa. Ndigi Yéhôva nyen a nla tehe i mam ma. I yé maliga le, kristen muda i ga ti bé Djob lipém to litéak li libii ibale a nkéñbaha mandutu mé ikété ndap libii inyu bagla ni nlôm. To munlôm a nlama bé kéñbaha mam inyu bagla ni ñwaa. Yéhôva a nyi minsôngi mimbe ñwominsôna mi mi ntinde mut i yéñ bagla ni sobiina wé, to di mboñ biliya lelaa inyu sôô ñwo. Ni maliga, “hégél yo ki yo i sôli bé mbom yé; ndi mam momasôna ma yé nso, ma bémbi ki bisu bi nu di nlama timbhe.” (Lôk Héber 4:13) Ndi ibale ndutu i tôbôtôbô i nom ikété libii, mut nye ki nye a nlama bé yahal i kristen i nsôk tehe le a nlama bagla. Sôk i nsôk, “bés bobasôna yaga d’a telep bisu bi yééne mbagi Nyambe.”​—Rôma 14:10-12.