1, 2. (a) Kii i yé sômbôl i Pétrô ngéda Yésu a niiga i Kapernaum? (b) Ndi kii i ntagbe?

PÉTRÔ a yé béñge Lôk Yuda i i nlo ndap mitiñ i Kapernaum, inyu emble Yésu. Pétrô a bé yééne mu tison i, mu ki nyen a bé boñ bôlô yé i nloptjobi, i ñombok u lom Galiléa. Ha nyen a bééna ki mawanda mé, bôt bé ba lihaa ni biyina gwé. I nene le Pétrô a nsômbôl le bôt ba tison yé ba bana minlélém mi mahoñol kiki nye inyu Yésu, le ba bana nlélém ngôñ i emble malét nkeñi a mpôdôl bo Ane i Djob. Ndi mam ma ntagbe bé kiki a nhoñol.

² Ngandak i ñemble ha bé Yésu. Bahogi ba nhuñbene nye, ba péénaga biniigana gwé. Ndi jam li ntééñga Pétrô ngandak li yé le, yak ngim banigil i noñ njel i. Masu map ma ñunda le ba ta ha bé maséé ni mam ma mondo Yésu a niiga bo. I mpôôna le ba yé ñunbak ngandak. Bape ba nkal le bipôdôl bi Yésu bi nhoda, le ba nla ha bé emble nye. Ba mpam i ndap mitiñ, ba kalak le ba ta ha bé banigil bé.​—Añ Yôhanes 6:60, 66.

3. Ngandak ngélé, kii hémle i nhôla Pétrô i boñ?

³ Hala a yé ndutu jam ngandak inyu Pétrô ni bana baôma bape. I yé mbale le to Pétrô a ntibil bé nok jam Yésu a nkal yokel. Kiki Yésu a ntoñol bé bipôdôl gwé, i yé maliga le bi yé ndutu i nok. Ndi kii Pétrô a mboñ nano? Hala a ta bé ngélé i bisu le ndéñbe yé ipañ Malét wé i boma manoodana. Hala a ta bé to ngélé i nsôk. Di béñge lelaa hémle i nhôla Pétrô i téñbe ikété manoodana.

4, 5. Mambe mam Yésu a mboñ le limut li bemek bé?

⁴ Bipôdôl bi Yésu bi ma hélés Pétrô ngandak ngélé.  Ngim mangéda, Malét Yésu a mboñ jam tole a mpot jam bôt ba bemek bé le a nla pot. Hala a yé ndik kel yada le Yésu a mboñ hélha jam, a jés dikôô di bôt. Kii limut li ntehe hala, li noode téé nye kiñe. Ndi a nhélés bo, a so, a kal banigil bé le ba bet i ngii môñgô, ba ke i Kapernaum. Mu njel Kapernaum i u u, Yésu a ntémb a hélés bo, ngéda a nke i ngii malép ma lom Galiléa, mbuk mbebi a hôñôk. I u u, Yésu a nhôla Pétrô i lédés hémle yé.

⁵ Ngéda kel i nye, ba nkoba le limut li nkiiña lom Galiléa inyu noñ bo. Ndi i nene le bôt ba noñ nye inyule ba nsômbôl le a bulus bijek, ndi ba noñ bé nye inyule ba gwé ngôñ ni biigana bi mbuu. Yésu a nkônd bo inyu libak jap li mbina je. (Yôhanes 6:25-27) Yésu a nkena nkwel u ni bisu i ndap mitiñ i Kapernaum, het a ntémb a kal jam li ba bemek bé, inyu ti bo biniigana bi bi yé nseñ.

6. (a) Himbe hihéga Yésu a nyoñ? (b) Lelaa baemble nye ba nleege jam li?

⁶ Yésu a gwé bé ngôñ le bôt ba yoñ nye kiki mbulus bikoga, ndi kiki mut le Djob a ñom inyu boñ le niñ yé ni nyemb yé kiki mut binam bi yible bôt bape njel niñ boga. Inyu hala nyen Yésu a nhégha nyemede ni mana, bijek bi bé lôl i ngii, i dilo di Môsé. Ngéda bahogi mukété limut ba mbôdôl pééna nye, Yésu a nyoñ hihéga, a toñol le bôt ba nlama je minsôn nwé inyu kôhna niñ boga. Ngandak i ñunup ngéda i nok hala. Ba mbôdôl kal le: “Lipôdôl lini li yé nledek; njee a nla nok jo?” Ngandak bôt i nkit le i mba ha bé banigil ba Yésu. *​—Yôhanes 6:48-60, 66.

7, 8. (a)  Kii Pétrô a yé ngi tibil nok inyu Yésu? (b) Lelaa Pétrô a ntimbhe mbadga Yésu a mbat baôma?

⁷ Kii Pétrô a mboñ nano? Bebeg le yak nye a nok bé bibañga bi Yésu loñge. A yé ngi nok le sômbôl i Djob i yé le Yésu a wo. Baa yak Pétrô a gwé ngôñ i tjôô Yésu kiki banigil bape? To! Jam jada li mboñ maselna ipôla Pétrô ni banigil bana. Limbe li jam?

⁸ Yésu a nhielba, a bat baôma le: “Baa yak bé ni nsômbôl nyodi?” (Yôhanes 6:67) A mbat jôm ni iba mbadga, ndi Pétrô nyen a ntimbhe. Lem yé i. Bebeg inyule nyen  a yé bo mañ. To i ba yaga lelaa, ikété bobasôna, i nene le Pétrô nyen a nkal yom a nhoñol. I jam lilam li yé nye ikété mahoñol ha ngéda i, a mpahal jo ngéda a nkal le: “A Nwet, d’a ke yak njee? Wen u gwé bibañga bi niñ boga.”​—Yôhanes 6:68.

9. Lelaa Pétrô a ñunda le a ntéñbe i hémle Yésu?

⁹ Baa bibañga bini bi ntihba bé ñem woñ? Pétrô a nhémle Yésu ngandak. Hala a nhôla nye i bana lem i nlôôha nseñ le ndéñbe. Pétrô a yé nkwoog nkaa le Yésu a yé Ntohol nu Yéhôva a ñômle bôt ba binam, ni le Yésu a nti tohi ni njel bibañga gwé, hala wee biniigana gwé inyu Ane Djob. Pétrô a nyi le to hala kii a nok bé mam momasôna loñge, homa numpe a ta bé le a nla ke inyu kôhna bisai bi Djob ni niñ boga.

10. Lelaa di nla kôna ndéñbe i Pétrô i len ini?

¹⁰ Baa yak we u gwé minlélém mi mahoñol? Hala a yé ngoo ngandak, ndi jôga li bôt i nkoñ isi i len ini ba nkal le ba ngwés Yésu, ndi i téñbe i nôgôl nye li nai bo. Inyu unda le di gwé bañga ndéñbe ipañ Yésu, di nlama gwés biniigana gwé kiki Pétrô. Di nlama nigil gwo, di nok gwo, di niñ inoñnaga ni gwo to ibale di nok bé gwo loñge, tole bi yé maselna ni mam ma nlémél bés. Ndik ni njel ndéñbe yés nyen di nla kôhna niñ boga, i Yésu a nsômbôl le di bana.​—Añ  Tjémbi 97:10.

11. Limbe liké Yésu ni banigil bé ba nke? (Béñge yak buk isi lipep.)

¹¹ Ndék ngéda i mbus ha, Yésu ni baôma bé, lôñni banigil bape, ba nke mbôñgô liké i pes ñombok. Ba nlôô i njel i ntagbe i mambai ma yé bebee ni Kaiséra Filipi. Ngim mangéda, ibale mut a yé i lom Galiléa, a nla tehe hikôa hi Hermôn. Ndi kiki ntôñ u bôt unu u mbet i pes ñombok, hikôa hi nene wengoñle hi nkônde nañ ntel. * I mbus yap, ba nla tehe bilama bi hisi hi likak hiosôna. Munu loñge homa ini nyen Yésu a mbat banigil mbadga i nlôôha nseñ.

12, 13. (a) Inyuki Yésu a mbat kii mamut ma nkal inyu yé? (b) Imbe ndimbhe Pétrô a nti, i i ñunda le a gwé hémle?

 ¹² Yésu a mbat le: “Mamut ma nkal le me yé njee?” Baa u yé hégda ngéda mis ma Pétrô ni ma Malét wé ma mbomna, kayéle a tehe loñgeñem ni pék i Yésu? Yésu a nyéñ yi yom bôt ba nhoñol inyu yé, kiki ba ntehe maboñok mé. Banigil bé ba nkal nye bikwéha bi mahoñol bi bi mpôda inyu yé. Ndi a ngwés kônde yi. Baa yak banigil bé, ba ba yé nye ipañ, ba nyi bé njee a yé? A mbat bo le “Ndi bé ni nkal le me yé njee?”​—Lukas 9:18-20.

¹³ Kii lem yé, Pétrô a nhoo timbhe. I yom bôt ba nhuñbe isi ni isi, nye a mpot yo i ngii: “U yé Kristô, man Nyambe nu niñ.” Di nla hégda le Yésu a nwemla, a bégés ki nye ni makénd momasôna. Yésu a nkal nye le mut binam bé nyen a nsoolene nye hala, ndi Yéhôva Djob. Yéhôva Djob nyen a mboñ le i bet ba gwé toi hémle ba yi maliga mana. Yéhôva a nyelene Pétrô maliga ma nlôôha ba nseñ: I yi njee a yé Mésia, hala wee Kristô, nu ba bé bem ntandaa ngéda. Kinje bisai bikeñi inyu Pétrô!​—Añ Matéô 16:16, 17.

14. Umbe nson nkeñi Yésu a bi yigle Pétrô?

¹⁴ Mbañ i kôba i bi pôdôl Kristô kiki ngok baoñ ba bi tjél. (Tjémbi 118:22; Lukas 20:17) Kiki a bééna i mbañ i i mahoñol mé, Yésu a nsoole bo le Yéhôva a ga téé likoda jé i ngii ini ngok a ntip yelene Pétrô. Ndi a nti Pétrô nson nkeñi ikété likoda. A nkal bé nye le a nlel baôma bape, kiki ngim bôt i nhoñol. Ndi a nyigle nye nson nkeñi: “Diliba di ane.” (Matéô 16:19) Pétrô nyen a ga ti pôla le mintôñ mi bôt maa mi jôp i Ane Djob: Ba bisu le bon ba Lôk Yuda. Iba, Lôk Samaria. Sôk i nsôk, bôt ba matén mape.

15. (a) Lelaa Pétrô a nkônd Yésu? (b) Inyuki a mboñ hala?

¹⁵ Ndi Yésu a bi kal le, tonjee i ntina ngandak, nyen y’a béda ngandak. (Lukas 12:48) Bibañga bi bi nyon inoñnaga ni nson nkeñi a yigle Pétrô. Yésu a nkônde ki yelene bo maliga mape, inyu tel yé i Mésia. Kiki héga, a nkal bo  le a nlama ke i Yérusalem, i het a ga kôs njiiha, a wo ki. Hala a nyumus Pétrô. A nyoñ Yésu ipañ, a kahal kônd nye: “A Nwet, jam li, li ba nonok ni we; l’a lôl bé we kekikel.”​—Matéô 16:21, 22.

16. (a) Lelaa Yésu a bi kodol Pétrô? (b)  Bimbe biniigana di nlama ôt mu jam li?

¹⁶ Pétrô a gwé mahoñol malam, ndi ndimbhe i Yésu i nsuk nye. Yésu a nhielba, a nun banigil bé ba ba nhoñol nlélém jam kiki Pétrô, ndi Yésu a nkal Pétrô le: “A Satan, témb me mbus! Inyule u nhoñol bé mam ma Nyambe, ndik mam ma bôt.” (Matéô 16:23; Markô 8:32, 33) Hala a yé biniigana bilam inyu bés bobasôna. Hala a yé jam li ntomb i nwas le biniigana bi nkoñ isi bi yémbél biniigana bi Yéhôva. Ibale hala a mpémél bés, di yi le to ibale di gwé mahoñol malam, bibañga gwés bi nla tinde bés i boñ sômbôl Satan iloole di boñ sômbôl Nyambe. Ndi lelaa Pétrô a bi tehe jam li?

17. Kii hala a nkobla ngéda Yésu a nkal Pétrô le: “Témb me mbus”?

¹⁷ Pétrô a nlama yi le Yésu a nyoñ bé nye kiki Satan Nsohop. Inyu hala nyen Yésu a ntimbhe bé Pétrô kii a bi timbhe Satan. A bi kal Satan le: “A Satan, nyodi”; ndi a nkal Pétrô le: “Témb me mbus.” (Matéô 4:10) Yésu a ntjôô bé ñôma wé nu a ngwés ngandak. Ndi a nkodol ngim mahoñol mabe a bééna. Pétrô a bane bañ nye kiki ngok baagene, ndi a nlama nit Malét wé.

18. (a) Lelaa Pétrô a ñunda le a tiñi ni hémle yé? (b) Lelaa di nla kôna nye?

¹⁸ Baa Pétrô a bi kaa, a unup, tole a kañ su? To jam! Ni suhulnyu, a bi neebe le Yésu a kodol nye. A bi kônde unda le a tiñi ni hémle yé. Bikristen bi gwé ngôñ le ba nkodol bo. Ibale ni suhulnyu di neebe le ba nkodol bés, di leege ki biniigana di nkôs, di nkônde tiige Yésu bo Yéhôva bebee.​—Añ Bingéngén 4:13.

19. (a) Limbe jam li hélha Yésu a nkal? (b) Kii Pétrô a nla badba?

¹⁹ Yésu a bi témb a pot jam li hélha lipe: “Hodo me  nhomp bé le, bôt ba téé hana bahogi b’a wo yaga bé letee ba tehe Man mut a nlo ni ane yé.” (Matéô 16:28) Yak jam li, li nsuk Pétrô: Kii Yésu a nsômbôl kal? A yé le a badba le, kiki Yésu a ntip kodol nye, baa hala a yé le a boñ le a kôs ha bé ngim bisai bi tôbôtôbô?

20, 21. (a) Toñol i yiinda Pétrô a bi tehe. (b) Lelaa yiinda i, i bi hôla Pétrô i nok ngim mam?

²⁰ Bebee le mbus ngim sonde, Yésu a nkena Yakôbô, Yôhanes ni Pétrô i “ngii hikôa,” bebeg le hikôa hi Hermôn, hi hi yé jam kiki bo 25 kilôméta haa ni homa ba bé. U u bé nsudge, inyule ’ilo hi bé tôngôl bo baa. Kiki Yésu a mbôdôl masoohe, ngim jam i mboñ bo le ’ilo hiap hi mal.​—Matéô 17:1; Lukas 9:28, 29, 32.

²¹ Su u Yésu u nhéñha, u kahal bai kiki hiañgaa. Mbôt  yé i pôp le peññ, i bayak. Ndi nuñ ki bôt iba, wada a bé pôôna Môsé, numpe Élia. I bôt ba bo iba ba bé kwel ni Yésu, “ba ka pot inyu manyodi mé, ma a ba ke i yônôs i Yérusalem.” Ba podok téntén inyu nyemb yé ni bitugne gwé. Pétrô a ntibil nok inyuki a bi hôs, i ngéda a kal le Yésu a kôli bé kôs ndutu to nyemb!​—Lukas 9:30, 31.

22, 23. (a) Bimbe bilem bilam Pétrô a bi unda? (b) Bimbe bisai Pétrô, Yakôbô ni Yôhanes ba bi kôs?

²² Pétrô a bi nôgda le yak nye a nlama yoñ ngaba munu yiinda i tôbôtôbô ini. I nene le Môsé bo Élia ba nkahal selna ni Yésu, bebeg le Pétrô a gwé ngôñ le ba kônde yén ha. Jon a nkal le “A Soñ, i yé bés loñge i ba hana; di oñ bilap baa, we yada, Môsé yada, Élia ki yada.” Hala a yé ntiik le yiinda ndik i, inyule bagwélél ba Yéhôva bana bo iba, ba bi wo behee. Ba gwé bé ngôñ ni bilap. Pétrô a bi pot ibabé hek pék. Ndi, baa makénd mé ma ntihba bé we?​—Lukas 9:33.

²³ Pétrô, Yakôbô ni Yôhanes ba bi kôs bisai bipe i u u. Ond i nlo, i hôô bo, kiñ i Yéhôva i pémél mu ond, i kalak le: “Nunu a yé ntebek wem Man; emblana nye.” Yiinda i mal, baôma bo baa ba ntémb ba yégle ndiki ni Yésu i ngii hikôa.​—Lukas 9:34-36.

24. (a) Lelaa yiinda i bi hôla Pétrô? (b) Umbe nseñ di nla ôt mu yiinda i?

²⁴ Nlélém kiki Pétrô, i yiinda ini i yé bés likébla likeñi ngandak! I mbus môm ma ñwii, ñôma Pétrô a bi pôdôl bisai a bi kôhna i u u, a bi ba “mbôgi mis i bai i lipém” li Yésu, hala wee lipém Malét wé a ga bana ngéda a ga ba kiñe i ngii. I yiinda i, i bi kônde kwés bo nkaa le mbañ i Bibel i ga yon, i bi lédés ki hémle i Pétrô inyu manoodana a ga boma i bilôl. (Añ 2 Pétrô 1:16-19.) I nla ki tihba bés i len ini, ibale di kôna Pétrô i téñbe ni Nwet Yéhôva a bi téé i ngii yés. Jon di tibil nigil njee a yé Yésu, di nwas le a kodol bés, di bana ki suhulnyu hiki ngéda.