Masoola Yôhanes a bi kôhna 2:1-29
2 “Tilna añgel+ i likoda li Éfésô+ le: Nu a gwé tjôdôt disaambok i woo wé walôm, a kilak ki ipôla bitééne bi bilambe bi gôl bisaambok,+ nyen a nkal i mam mana le:
2 ‘Me nyi maboñok moñ, ni ndumbba yoñ, ni hônba yoñ, ni le u nla bé nihbe bibéba bi bôt; u bi wan ki ba ba nkadba le ba yé baôma+ ndi ki le ba ta bé baôma, u léba le ba yé bôt ba bitembee.
3 U ñunda le u gwé hônba, u bi téñbe ki inyu jôl jem,+ to waa u bi waa bé.+
4 Ndi to hala, me gwé i jam lini ikolba we: u bi nwas gwéha u bééna i bibôdle.
5 “‘Jon hoñol homa u bi nyodne ndi u kwo, u hiel ki ñem,+ u boñ yak minson u bé boñ i bibôdle; ibale u mboñ bé hala, m’a lo i weeni, me héya ki tééne yoñ bilambe+ i homa wé, handugi le u hiel ñem.+
6 Ndi u gwé jam lilam lini: u ñoo maboñok ma ntôñ mbagla u Nikôlaô,+ u yak me me ñoo.
7 Nu a gwé maôô, a emble i jam mbuu u nkal makoda:+ i mut a nyémbél,+ m’a ti nye kunde i je mu e niñ+ i i yé ikété paradis i Nyambe.’
8 “Tilna ki añgel i likoda li Smirna le: ‘Nu bisu ni Nu sôk,’+ nu a bé nwok, ndi a témb i niñ,+ nyen a nkal i mam mana le:
9 ‘Me nyi njiiha yoñ ni liyep joñ (ndi u yé ngwañ),+ me nyi yak bôt ba ñôbôs we jôl, ba kadbaga le ba yé Lôk Yuda, ndi ki le ba ta yaga bé yo; ba yé ndik ndap bibégés i Satan.+
10 U kon bañ woñi inyu mandutu ma yé bebee ni kwél we.+ Nun-ki! Nsohop a’ ke ni bisu i leñ bahogi ikété nan i ndap mok kayéle ni noodana i nya i yôni, ni kôhna ki njiiha jôm li dilo. Tééda ndéñbe yoñ letee ni i nyemb, ha nyen m’a ti we ntut u niñ.+
11 Nu a gwé maôô,+ a emble i jam mbuu u nkal makoda: i mut a nyémbél,+ nyemb i nyônôs iba+ i yé mbén i boñ nye béba.’
12 “Tilna añgel i likoda li Pergamô le: Nu a gwé mbôñgô pansoñ u malo ima u u nhoo,+ nyen a nkal i mam mana le:
13 ‘Me nyi i homa u nyééne, i het yééne ane i Satan i yé; ndi to hala, u ngi téñbege ni jôl jem,+ ni le u bi tañba bé le u nhémle me,+ to i dilo di Antipas, mbokmbôgi wem nu maliga,+ nu ba bi nol+ ipañ nan i het Satan a nyééne.
14 “‘Ndi to hala, me gwé ndék mam ikolba we: u gwé bôt nyoo ba ba noñ biniigana bi Balam,+ nu a bi niiga Balak+ i bii ngok baagene i bisu bi bon ba Israel, le ba je gwom ba nsémél bisat, ba boñ ki malal ma nyega.*+
15 Hala nyen yak we u gwé bôt ba noñ biniigana bi ntôñ mbagla u Nikôlaô.+
16 Jon hiel ñem. Ibale hala bé, me mpala lo i weeni, m’a jôs bo gwét lôñni mbôñgô pansoñ u mpémél i nyo wem.+
17 “‘Nu a gwé maôô, a emble i jam mbuu u nkal makoda:+ i mut a nyémbél,+ m’a ti nye ndék mana ma sôli,+ m’a ti ki nye puba hibaña, jôl li mondo li bak ntilga mu, li mut to wada a nyi bé, ndigi nu a nkôhna jo.’
18 “Tilna añgel i likoda li Tiatira+ le: Man Nyambe nu a gwé mis ma yé wengoñle lindômbôô li hié,+ makôô mé ma bak wengoñle bañga mamuna,+ nyen a nkal i mam mana le:
19 ‘Me nyi maboñok, ni gwéha yoñ, ni hémle yoñ, ni nson woñ, ni hônba yoñ, ni le minson nwoñ mi nsôk mi yé ngandak iloo mi u bi boñ i bibôdle.
20 “‘Ndi to hala, me gwé jam ikolba we: u nihbe i muda nunu le Yézabel,+ nu a nkadba le a yé mpôdôl, nu a niiga minkol nwem, a yumhak ki nwo le mi boñ malal ma nyega,*+ ni le mi je mam ba nsémél bisat.
21 Me bi ti nye ngéda le a hiel ñem, ndi a ntop bé tam béba yé le a nwas malal mé ma nyega.*
22 Nun-ki! Me yé bebee i leñ nye i nañi kon, yak i bôt ba nke i ndéñg ni nye, me nleñ bo ikété ndutu* ikeñi, handugi le ba tam minson a bi tinde bo i boñ.
23 M’a nol bon bé lôñni himala hi nyemb, inyu boñ le makoda momasôna m’a yi le men me yé nu a nwan mahoñol ma kétékété* lôñni miñem, m’a timbhe ki hiki mut inoñnaga ni maboñok mé.+
24 “‘Ndi me nkal i bôt ba nyégle ikété nan, bé ba ni yé i Tiatira, i bôt bobasôna ba noñ bé i biniigana bini, i bôt ba mpam bé i yi i mam ba nsébél le “ndip mam i Satan,”+ le: Me nkônde bé me bé mbegee ipe.
25 Ndik le ni téñbe ni mam ni gwé letee me lo.+
26 I mut a nyémbél, a gwelek minson nwem letee ni lisuk, m’a ti nye kunde i ngii biloñ,+
27 a’ ane bôt ni ntoñgo kei*+ kayéle a nyugut bo wengoñle biébél bi ték lima, ndik kiki me bi kôhna kunde yak Tata.
28 M’a ti ki nye hiôdôt hi maye ma kel.+
29 Nu a gwé maôô, a emble i jam mbuu u nkal makoda.’
Ndoñi
^ Béñge Ndoñi bibuk.
^ Béñge Ndoñi bibuk.
^ Ni hop Grikia, “pornéia.” Béñge Ndoñi bibuk.
^ Tole “njiiha.”
^ Tole “matihil ma miñem.” Ni hop Grikia, “ditam.”
^ Tole “éña.”
